MeraPahad Community Of Uttarakhand Lovers

भैरव गढ़ी: जख छन बाबा भैरवनाथ
-
सरोज शर्मा गढ़वाली पाॅप लिटरेचर – 207
-
प्रकृति कि गोद मा बसयूं
बसयूं भैरव धाम क दर्शन खुण दूर दूर से श्रृधालु अंदिन,
भगवान शिव क 15 अवतारो मा भैरव गढ़ी कु नाम भि आंद,
और यूं कालभैरव कु सुप्रसिद्ध धाम भैरव गढ़ी च,
लैंसडौन से लगभग 17 किलोमीटर दूर राजखील गौं कि पहाड़ी मा यी देवस्थल च,
यै कालनाथ भैरव कि नियमित पूजा हूंद,
कालनाथ भैरव थैं सब्या कालि चीज पसंद छन, यी कारण च कालनाथ भैरव मा मंडवे क आटू कु रोट प्रसाद क रूप मा बणद,
गढ़वाल क रक्षक का रूप मा प्रसिद्ध अर्थात द्वारपाल क रूप मा भौत महत्व मनै ग्या भैरव कु,
भैरव का अनुयायी पुजारी और साधक आज भी भैरव गढ़ी कि चोटी मा जै कि साधना कैरिक सिद्धी प्राप्त करदिन,
ऐ स्थान कु अपड़ ऐतिहासिक महत्व भि च, भैरव गढ़ गढ़वाल का 52 गढ़ो मा एक च ,एकु वास्तविक नौ लंगूर गढ़ च,
शैद लांगूल पर्वत मा स्थित हूण से यैक नौ लंगूर गढ़ प्वाड़,
लंगूर गढ़ सन 1791 तक भौत शक्तिशाली गढ़ छा, द्वि बर्ष तक गुरखो कि फौज न ऐ थैं जितण खुण घेराबन्दी कैर, 28 दिनो तक निरंतर संघर्ष का बाद भि गोरखा पराजित ह्वै कि वापस चल गैन,
थापा नौ क एक गोरख्या न लंगूर गढ़ भैरव कि महिमा देखिक एक ताम्र पत्र चढै ऐक वजन 40 किलो बतयै जांद,
यख भैरव की गुमटी मा मंदिर बणयू च गुमटि क भैर बांय तरफ शक्तिकुंड च, यख भक्त लोग चांदि का छत्र चडन्दिन, यख भक्त जन रोज हि पहुंचदा छन, और नै वर वधू भि मनौति मंगण खुण पहुंचदा छन। इति

तेरा मंजिल मंदिर ऋषिकेशः जगद्गुरू शंकराचार्य द्वारा स्थापित मंदिर
-
सरोज शर्मा-गढ़वाली जन साहित्य-216
लक्ष्मण झूला क बिल्कुल समणि स्वर्गआश्रम का समणी तेरह मंजिल मंदिर स्थापित च।
यू त्रयमकेश्वर नाम से भि जणै जांद। ऋषिकेश से रेलवे स्टेशन से 6 किलोमीटर कि दूरी पर च, यी मंदिर ऋषिकेश मा लक्ष्मण झूला क पास गंगा नदी का तट पर स्थित एक बहुमंजिला मंदिर च।
ऐ मंदिर थैं कैलाश निकेतन मंदिर का रूप मा भि जंणे जांद। ऋषिकेश मा यू महत्वपूर्ण पूजा स्थलो में एक च।
मने जांद कि एकि स्थापना 9 वीं शताब्दी म आदि शंकराचार्य न कैर।
मंदिर अपणि विशालता और वास्तुकला खुण प्रसिद्ध च।तेरह मंजिल मंदिर मा हर मंजिल मा कई छवट छवट मंदिर छन जु कई हिन्दू देव देवताओ थैं समर्पित छन। तेरह मंजिल मंदिर कै एक देवता कु समर्पित नि च। मंदिर का ऊपरी मंजिल ऋषिकेश का पहाड़ो पर सूर्यास्त कु मनोरम दृश्य प्रस्तुत करद। यू मंदिर श्रावण सोमवार और महाशिवरात्रि क समय बड़ी संख्या मा पर्यटको कु आकर्षित करद।

श्री सिद्धबली मंदिर कोटद्वार
-
सरोज शर्मा कु गढ़वाली जन साहित्य -219
-
सिद्ध बली मंदिर कोटद्वार शहर से भैर एक पहाड़ी मा स्थित हनुमान जी क मंदिर च ,जु खोह नदी क तट पर बसयूं च ,यी एक शांत और रहस्यमयी मंदिर च,ऐ मंदिर थैं सिद्ध बली धाम और सिद्ध बली पीठ क नाम से जंणै जांद। यख हर साल लाखों की संख्या मा श्रधालुओ की भीड़ देखणक मिल जांद।
खो नदी क तट पर हनुमान जी थैं समर्पित यू मंदिर उत्तराखंड राज्य क पौड़ि गढ़वाल जिला मा कोटद्वार शहर कि एक ऊंची पहाड़ी मा स्थित च। जु उत्तराखंड ही ना बल्कि देश का अन्य हिस्सो मा भि प्रसिद्ध च।
सिद्ध बली मंदिर कु इतिहास
पौराणिक कथाओं क अनुसार ब्वले जांद कि हनुमान जी द्वारा संजीवनी बूटी लिजांण क दौरान ये जगा पर एक सिद्ध बाबा थैं हनुमान जी की सिद्धि प्राप्त ह्वै, ऐ कारण सिद्ध बाबा न यख हनुमान जी कि प्रतिमा कु निर्माण करै, ईलै ही ऐ मंदिर थैं सिद्ध बली क नाम से जंणै जांद।
एक मान्यता ई भि च कि भारत मा ब्रिटिश शासन क दौरान एक मुस्लिम सुपरिटेंडेंट जु अंग्रेजु कु मुलाजिम छा वू घ्वाड़ा से पेट्रोलिंग कनू छा, जनि वु सिद्ध बली समाधि क नजदीक पौंच बेहोश ह्वै ग्या बेहोशी मा ही वै थैं स्वप्न आई जै म सिद्ध बली मंदिर बणाण कु ब्वले ग्या, ये कारण से ऐ स्थान मा सिद्ध बली मंदिर कु निर्माण ह्वै, तब बटिक ई मंदिर अस्तित्व मा ऐ, पैल यख एक छवट मंदिर हूंद छाई पर बाद मा पौराणिक शक्ति कि महत्ता कि वजा से श्रधालुओ न ऐ थैं भव्यता प्रदान कैर, ई मंदिर न केवल हिंदू सिख धरमावलंबियो क च अपितु मुसलमान भि ऐ धाम का दर्शन कैरिक मन्नत मंगण कु अंदिन। मनोकामना पूर्ण हूंण पर लोग भंडारा क आयोजन भि करदिन, खोह नदी क तट पर बसयूं ई मंदिर रहस्यों से भरयूं च, पूरा भारत मा प्रसिद्ध च ।ऐ कारण यख सभी धर्मो का लोग मनोकामना पूर्ण हेतू यख अंदिन। यख बटिक कोटद्वार शहर कु बेहतरीन नजारा भि देखणकु मिलद। ऐ मंदिर थैं पौढी गढ़वाल कु प्रवेश द्वार भि ब्वले जांद। इति

खैरागढ़ महादेव: भक्तो की इच्छा पूर्ण करणवल
-
सरोज शर्मा- गढ़वाली जन साहित्य- 220
-
मण्डल मुख्यालय पौडी से लगभग 37 किलोमीटर दूर कल्जीखाल विकास खंड क अंतर्गत खैरालिंग महादेव समुद्र तल से 1800 मीटर कि ऊंचै मा एक रमणीक सुरम्य पहाड़ी च, खैरालिंग महादेव थैं मुण्डनेश्वर महादेव भि ब्वले जांद, यूं थैं धवड़िया देवता क रूप मा भि जणै जांद, मान्यता च कि जै पर्वत कि चोटी मा श्री खैरालिंग महादेव स्थापित च वू मुंड क आकार मा उभर्यू च,तीन ओर से पर्वत श्रंखलायें यख आकि मिलदिन, घ्वाड़ा की पीठ क समान एक ह्वै कि चलीं छन, ऊंक मिलण क स्थान मा मुंड कि आकृति बण ग्ये, जैकु मुण्डन डांडा भि बव्लदिन, और ऐ क आधार पर ऐ थैं मुण्डनेश्वर भि ब्वले जांद, ऐ मंदिर कि स्थापना 1795 ई मा किए ग्या, मंदिर मा स्थित लिंग खैर क रंग कु च यांल ही ऐ थैं खैरालिंग बव्लदिन, मान्यता च कि खैरालिंग का तीन भाई और भि छन, ताड़केश्वर, एकेश्वर, विन्देश्वर (विनसर) यूंकि एक भैंण काली भि च जु खैरालिंग क दगड़ रैंद, वखी खैरालिंग मंदिर मा काली कु थान भि च, भगवान शिव कभि बली नी लींदा पर खैरालिंग मंदिर मा बलि दिए जांद, ऐ संबंध मा ब्वले जांद कि खैरालिंग क दगड़ काली च इलै यख बली दिए जांद, यख हर साल ज्येष्ठ मास मा मेला आयोजित किए जांद, जै मा पशुबलि दिए जांद, द्वी दिन क मेला मा पैल दिन ध्वजा चढ़यै जांद, दुसर दिन बलि दिए जांद,
खैरालिंग कौथिक मेला कु अनुष्ठान नौ दिन पैल से से शुरू ह्वै जांद, वर्तमान समय मा मंदिर क जु स्वरूप च वू गढ़वाली वासतुकला कु बेजोड़ नमूना च ,शैव क दगड़ शाक्त मतावलंबियो कि समान रूप से सहभागिता बणी रा ऐ उदेश्य से भगवान शंकर क दगड़ शक्ति रूप मा मां काली की भि स्थापना कियै ग्या, शिवालय मा नन्दी कि सवरि करदा भगवान शिव कि पत्थर कि मूर्ती स्थापित किए ग्या, मंदिर क भैरकि दिवार मा मां काली कि मूर्ती उकेरीं च ,मां काली कि मूर्ती कुछ खण्डित अवस्था मा च, मने जांद कि उन्नसवी शताब्दि क आरंभ मा सन 1803 से 1815 तक गढ़वाल गोरखाओ क अधीन छा वै समय गोरखालीयो द्वारा मूर्ति खंडित किए ग्या, मंदिर क शांत शीतल स्थान भौत हि रमणीक च ,सिध्द पीठ लंगूर गढ़ी, एकेश्वर महादेव, विन्देश्वर महादेव, रानीगढ़, दूधातोली, जड़ाऊखांद,दीवाडांडा, ताड़केश्वर महादेव और सरया हिमालय यख बटिक दृष्टिगोचर हूंद ।इति

  सात समन्दर पार(विदेशों मा) शिक्षा पाणकुण अंठ(ध्यान)  मा रखण वाल दस मुख्य बात:-

विदेशम शिक्षा भाग – 2
-
 संकलन रुपेश कुकरेती
-
हर साल भारत बिटिक लाखों की संख्या मा नौन/नौनी(छात्र/छात्रा) सात समन्दर पार(विदेशों मा) पढ़णकुण जान्दन। यूं मान अधिकतर उच्च शिक्षा पाणक उद्देश्य से ही विदेशोंक मुख(विदेशों की ओर) लीन्दन। कुछ सात समन्दर पारक शिक्षण संस्थान ये संसार मा अपर शिक्षा क गुणोंक कारण जणै जान्दन।अनुसन्धान अर विकास कु क्षेत्र मा भी वू अगने छन।इन संस्थानों मा पढण हर बच्चक सुपनी(सपना) हुन्द अर उख दाखिल मिन ही अफमा बड़ी उपलब्धि मने जान्दी। यूँ संस्थानों मा पढ़णक मतलब च कि आप वू बट्वे(राहगीर) छ्या जु सफलता की ओर बाट लग्यां(अग्रसर) छ्या। हालाँकि सात समन्दर पारक विश्वविद्यालयक चुनाव करद दफैं अर उखमा प्रवेशक कुण आवेदन करद बगत(वक्त)  कुछ खास बातोंक ध्यान रखण बहुत जरुरी च ताकि आप तै अपरु मनपसन्द शैक्षिक संस्थान मा प्रवेश मिल साक अर आपक सुपिन भी सच ह्वे जा।
1 :-      जांच पड़ताल अर जानकारी जुटाण :-
अपरी इच्छक (रुचि) अर पैलक कक्षा क हिसाब से सही कोर्सक चुनाव कन। उन त सटीक कोर्स ढूँढण बडू कठिन काम च। यांक कारण या च कि संसार मा एक जैसा कोर्स कराण वाल हजारों विश्वविद्यालय छन जैसे कि नौन/नौनी सटीक कोर्सक चयन करद दफैं घंघतोल(कंफ्यूज) मा पोड जान्दन।ये घंगतोल से बचणक एक ही उपाय च कि आप तै अफकुण उपयुक्त कोर्सक चयन करद धै अपर स्तर से वेक खोजबीन/जांच पड़ताल करण प्वाडली अर कई सारी जानकारी भी जुटाण प्वाडली। इन स्थिति मा आपक अनुसन्धान निम्न कारकों पर आधारित हुण चयाणु च।
आप कोर्स मा कै विशेष विषय तै चाणा छ्या ?
क्या आप क्वी लोकप्रिय कोर्स कन चाणा छ्या ?
आप इन कोर्स कन चाणा छ्या जु ज्यादा प्रयोगात्मक कन वाल विषय ह्वा या सैद्धान्तिक या अनुसन्धान कन वाल ह्वा।
कोर्स की समय सीमा कदगा च ?
कोर्सक बाद तुम दगड़ दगड़ वर्क प्लेसमेंटक इच्छा भी रखदा क्या?
विषैक(विषय)  स्थान (रैंकिंग) कन चाणा छ्या ?
यीं प्रक्रिया मा आप जदगा मेहनत कल्या आप तै सही कोर्स मिलणक सम्भावना भी उतना ही बढ़ जाली।एक बार आप वे कोर्स अर वे विश्वविद्यालयक चयन कौर लेल्या जख आप पढ़ण चाणा छ्या त यी भी तै(तय) ह्वे जाल कि आप वुख प्रवेश लीणकुण सच्चू मन से कोशिश कल्या।

2        :-     कहाँ पढ़ें   :-
ये संसार मा कई देशों मा अच्छा विश्वविद्यालय अर महाविद्यालय छन पर सही देश जैकि पढ़ै कन ही महत्वपूर्ण च।
देश इन हुण चयाणु च जु आपक आवश्यकता पूर कौर साक।ये सम्बन्ध मा निम्न बातोंक ध्यान रखण प्वाडल :-
भारत बिटिक वू देश कतुक दूर च?
सम्पर्क कनक क्या क्या साधन छन उख?
रौणकुण वू देश सुरक्षित छैं च कि ना?
वे देशक मौसम कन च ?

3: - पैसक बात -  कै भी कोर्स तै कन सै पैली यी सुनिश्चित कौर ल्या कि वे देश मा पढ़णक खर्च उठे दीण क्या आपन? सात समन्दर पार पढणकुण सरकारी अर निजि विश्वविद्यालयोंक विकल्प छन।हर महाविद्यालयक अर विश्व विद्यालयक शुल्क अलग-अलग छन।येक अलावा हर देशक रौण सौणक,खाण पीणक खर्च अलग-अलग हुन्दन।ये वास्ता देश अर संस्थानक चयन करद दफैं आप तै अपर बजटक भी ध्यान रखण प्वाडल।

4 : -               :- छात्रवृत्तियां :-
कई विश्व विद्यालय,महाविद्यालय अर अन्य संगठन विदेशी नौनु,/नौन्यूं तै छात्रवृतिक तौर पर पूरी या आंशिक वित्तीय सहायता दीन्दन। आप इन क्वी छात्रवृत्ति पै साको त आप कम खर्च मा ही पढ़े कौर सकद छ्या।

5  : -     :  -  नौकरी में मदद :-
अलग-अलग विश्व विद्यालयोंक तुलना आप विदेशी छात्रों तै रोजगार प्राप्त कनक वास्ता मिलण वाली सहायतक अनुसार भी कौर सकद छ्या।उद्योगोंक वूं विश्व विद्यालयों से कन सम्पर्क छन अर अलग-अलग विषयों मा वूंक क्षमता कन च येक विशेष ध्यान रखे जा।कई विश्व विद्यालय अपर अनुभवी कैरियर सुझावकर्ताओंक सेवा नौनु/नौन्यूं तै प्रदान करदन। यी सुझावकर्ता फोन से,ईमेल से या फिर अमणी समणी मिली कन
नौनु/नौन्यूं तै सही कोर्सक,कैरियरक चयन कनमा मदद करदन।या सुबिधा विश्व विद्यालय मा प्रवेश लीण से पैली दिए जान्दी अर पढ़ैक दौरान ग्रेजुएशन पूर हुणक बाद भी जारी रौंदी। ये सम्बन्ध मा जरुरी कार्यशाला लगेकि भी बच्चोंक सहायता करे जान्दी जैसे वूं मा नौकरी पाणक कौशल विकसित ह्वे साक।

6 : -       विभिन्न सेवाएँ :-
विश्व विद्यालय अंतर्राष्ट्रीय नौनु/नौन्यूं तै अलग अलग प्रकार की सेवाएँ दीन्दन। यूं सेवा मा उख पहुँचण से पैली सेवा अर उख पहुँचणक बाद मिलण वाल द्वी सेवा ही सम्मलित छन।वीजा प्राप्त करणक सेवा आव्रजन सम्बन्धी सेवा शामिल छन।यूं सेवाओंक बारे मा भी ढँग से पता कौर लीण चयान्दु ताकि आप यूं सेवाओंक पूर लाभ उठे साको।

7 : - समाज की उपलब्धता :- हर येक विश्व विद्यालय मा आपक रुचिक अनुसार अलग अलग सांस्कृतिकसमाज हुन्द।विद्यार्थियोंक संघ विभिन्न प्रकारक समाजक संचालन करदु।इखमा नृत्य व संगीत से लेकर एनिमल वेलफेयर आदि से जुड़ीं अलग अलग समाज भी शामिल हुन्दन।इखमा छात्र/छात्रा अलग-अलग लोगों से मिल सकदन और वू इन छात्रोंक सम्पर्क मा भी ऐ सकदन जु वूंक तरा विषय पढ़णा छन। क्वी भी छात्र/छात्रा समाज से  जुड़ सकदन।उन अगर आप विदेशों मा पढ़णक जाणा छ्या त आप तै उखक अलग संस्कृति अर जीवनशैली कुण पैली बिटिक तैयार रौण चयान्दु।इन समाज आप तै उख बसण मा अर नै दगड्या बणाण मा मदद करदु।

8 : - लोकेशन :- अपर रुचिक अनुसार आप अपर पसन्दक शहरक चुनाव कौर सकद छ्या।आप कै शान्त अर छुट कस्बा मा स्थित महाविद्यालय मा पढ़ण चाणा छ्या या फिर अपर पसन्दक क्वी व्यस्त शहर या समन्दरक पास स्थित स्थान मा।यी सब आवेदन कन से पैली तय कौर लेल्या त आप तै बाद मा येक फैदा ह्वाल।
9 :- ट्रैवल डोकोमेन्ट अर वीजा क इंतजाम :- यी स्वाभाविक च कि विदेशों मा पढ़णकुण आप तै पासपोर्टक जरुरत प्वाडली वे वीजा प्राप्त कन भी जरुरी ही च।कई देशों मा आप स्टूडेंट वीजा लेकन ही पढणकुण पहुंच सकदा। सभी जरुरी दस्तावेज अर आवश्यक स्वीकृतियों तै समय से पूर कौर दीण चयान्दु।अगर यूँ मा देर ह्वे ग्या त आप तै वे देश मा जख आप पढ़णा छ्या दिक्कतोंक सामना कन पोड सकिद च।

10 :- आवास :-
अपर पसन्दक विश्व विद्यालयक चयन करद समै ही आप अपर रौणक ठिकणकुण भी आवेदन कौर द्या।विश्व विद्यालयों मा विदेशी छात्र/छात्राओंक रौणक व्यवस्था रौंदी।अधिकतर विश्व विद्यालय छात्र/छात्राओं  तै महाविद्यालयक कैंपस मा ही या वेक ही नजदीक रौणक व्यवस्था प्रदान करदन।अगर आप अपर रौणक व्यवस्था अफिक कन चाणा छ्या त कौर सकद छ्या या फिर अपर दगड्यों दगड़ भी रै सकद छ्या।
=
अमेरिका में शिक्षा कैसे पायें , जर्मनी में शिक्षा कैसे पायें , ऑस्ट्रेलिया में शिक्षा पाने हेतु निर्देश , विदेश में शिक्षा , ब्रिटेन में शिक्षा पाने हेतु क्या करें ,  यूरोप में शिक्षा हेतु उचित कार्य , कनाडा में कैसे शिक्षा लें