MeraPahad Community Of Uttarakhand Lovers

अंतर्राष्ट्रीय महिला दिवस
-
सरोज शर्मा-जनप्रिय गढ़वाली साहित्य -234
-   
अंतराष्ट्रीय महिला दिवस क आयोजन एक श्रम आंदोलन छाई, जैकु संयुक्त राष्ट्र न सालाना आयोजन कि स्वीकृति दयाई, ऐ आयोजन कि शुरुआत क बीज 1908 म तब प्वाड़ जब न्यूयार्क शहर म 15 हजार महिलाओ न काम का घंटा कम करण और बढ़िया वेतन और वोट दीण कि मांग क साथ विरोध-प्रदर्शन निकाल।
ऐका एक साल बाद अमेरीकी सोशलिस्ट पार्टी न पैल दा राष्ट्रीय महिला दिवस मनाण कि शुरुआत कैर, पर ऐ दिन थैं अंतराष्ट्रीय बनाण क विचार क्लारा जेटकिन नौ कि महिला क दिमाग म ऐ, ऊन अपण ई आइडिया 1910 म काॅपहेगन म आयोजित इंटरनेशनल कांफ्रेंस ऑफ वर्किंग वीमेन म द्या छाई,
ऐ कांफ्रेंस मा 17 देशु कि सौ महिला प्रतिनिधियो न हिस्सा ल्या, सब्यून क्लारा क सुझाव क स्वागत कैर, ऐ का बाद अंतराष्ट्रीय महिला दिवस पैल बार 1911 म ऑस्ट्रिया, डेनमार्क, जर्मनी, स्विट्जरलैंड म मनयै ग्या, ऐकु शताब्दि आयोजन 2011 मा मनयै ग्या, ऐ लिहाज से 2021 म दुनिया 110 वां महिला दिवस मनैली,
हालाँकि अधिकारिक तौर पर ऐ मनाणा कि शुरुआत 1975 म तब ह्वै जब संयुक्त राष्ट्र न ऐ आयोजन थैं मनाण कि शुरुआत कैर, संयुक्त राष्ट्र न 1996 मा पैल दा ऐका आयोजन मा थीम अपणै, व थीम छै 'अतीत क जश्न मनावो, भविष्य कि योजना बणाव,
महिलाए समाज मा, राजनीति मा, अर्थ शास्त्र म कख तक पौंछिन ऐ का जश्न का तौर पर इंटरनेशनल वीमेंस डे कु आयोजन हूंद,
लेकिन ऐ आयोजन क केंद्र म प्रदर्शन कि अहमियत रै, महिलाओ क साथ हूण वली असमानताओ थैं लेकि जागरूकता बणाण क विरोध म ई प्रदर्शन हूंद, ऐ क आयोजन 8 मार्च कु हूंद, क्लारा न जब अंतराष्ट्रीय महिला दिवस कु आइडिया द्या छा, तब ऊं न कै खास दिनकु जिक्र नि कैर छा, कि महिला दिवस क आयोजन कै दिन ह्वा, 1917 तक कुछ भि स्पष्ट नि छा, साल 1917 मा रूस कि महिलाओ न रोटी और शांति कि मांग क साथ चार दिनो क विरोध प्रदर्शन कैर, तत्कालीन रूसी जार थैं सत्ता त्याग करण प्वाड़, अंतरिम सरकार न महिलाओ थैं वोट दीणक अधिकार भि द्या,
जै दिन रूसी महिलाओ न विरोध प्रदर्शन शुरू कैर वू रूस मा इस्तेमाल हूण वल जूलियन कलैंडर क मुताबिक, 23 फरवरी और रविवार क दिन छा, ऐ दिन ग्रेगेरियन कलैंडर क मुताबिक, आठ मार्च छाई, तब से ऐ ही दिन महिला दिवस मनयै जांद,
महिला दिवस क रंग छन
बैंगनी, हरा,और सफेद- ई सब्या इंटरनेशनल वीमेंस डे का रंग छन,
अंतराष्ट्रीय महिला दिवस कैंपेन क मुताबिक बैंगनी रंग न्याय कु और गरिमा क सूचक च, हैर रंग उम्मीद कु, सफेद शुद्धता कु सूचक मनै ग्या, ई तिन्या रंग 1908 मा ब्रिटेन कि वीमेंस सोशल एंड पाॅलिटिकल यूनियन ( ड्बलूएसपीयू ) न तै करिन,
अंतराष्ट्रीय महिला दिवस न अपण अभियान म ब्वाल कि एक शताब्दि क बाद हम लैंगिक समानता हासिल नि कैर सका, हम लोग अपण जीवन म लैंगिक समानता नि देख पौंला, न हि हमरा बच्चो मा क्वी देख पालु ।
महिला दिवस कि आवश्यकता
इतगा हि न, यूएन वीमेन क हाल का आंकड़ो का मुताबिक कोरोना संक्रमण का चलता ई खत्म ह्वै सकद जु लैंगिक समानता कि लड़ाई मा पिछल 25 सालों मा हासिल ह्वाई, करोना महामारी क रैण से महिलाए घरेलू कामकाज कनी छन और ऐ कु असर नौकरियो और शिक्षा क अवसरो मा भि दिखे जाल,
हालांकि करोना संकट क बाद भि इंटरनेशनल वीमेंस डे-2020 क दौरान कै प्रदर्शन द्यखणकु मिलिंन, ऐ मा ज्यादातर प्रदर्शन शांतिपूर्ण छा, पर किरगिज कि राजधानि बिशकेक म पुलिस न दर्जनो महिला कार्य कर्ताओ थैं गिरफ्तार कैर,
देश की महिला कार्यकर्ताओ क मनण च कि महिला अधिकारो की स्थिती पैल से खराब च, हिंसक धमकी और कानूनी मामलो क बाद भि पाकिस्तान का कै शहरो मा विरोध प्रदर्शन देखणा कु मिलिंन,
मैक्सिको मा महिलाओ का प्रति हूण वली हिंसा का बड़दा मामला देखदा हुए 80 हजार से ज्यादा लोग प्रदर्शन मा शामिल हूंई, लेकिन 6 से ज्यादा लोग घायल हुंई, रैली शांतिपूर्ण ढंग से छै पर पुलिस वलो क मुताबिक पेट्रोल बम फेंके जाणक बाद ऊंथैं टियर गैस चलांण प्वाड़,
पिछला कुछ सालो मा महिला आंदोलन कि स्थिती बेहतर ह्वाई, ऐ साल अमेरिका मा कमला हैरिस क तौर पर पैल पैल काली महिला और एशियाई मूल कि महिला उपराष्ट्रपति क पद पर पौंछ,
साल 2019 मा फिनलैंड म नै गठबंधन सरकार चुनै ग्या जैकु नेतृत्व पांच महिलाओ क हाथ मा छाई,
वखी उत्तरी आयरलैंड म गर्भपात गैर कानूनी करार कियै ग्या, ऐ का अलावा सूडान मा महिलाऐ कन कपड़ा पैरलि इन कानून वापस लियै ग्या।
ऐ का अलावा ऐ दौरान Me Too अभियान कु असर भि द्यखणक मिल, ऐ कि शुरुआत 2017 मा ह्वै जै का तहत हैशटैक क साथ सोशल मीडिया म उत्पीड़न और यौन उत्पीड़न क खिलाफ आवाज उठाण शुरू कैर,
अब ऐ कु चलन दुनियाभर बढ़ ग्या जौ ई बतांद कि अस्वीकार्य और अनुचित व्यवहार बर्दाश्त नि कियै जाल, और यूं मामलों भा हाई प्रोफाइल लोगों थैं सजा भि मिल।

विश्व उपभोक्ता दिवस
-
सरोज शर्मा-गढ़वाली जन प्रिय साहित्य
-

प्रत्येक वर्ष 15 मार्च कु उपभोक्ताओं क अधिकारो और आवश्यकताओ क बार मा जागरूक करण खुण विश्व उपभोक्ता दिवस मनयै जांद।
15 मार्च 1962 म राष्ट्रपती जाॅन एफ कैनेडी द्वारा अमेरिकन कांग्रेस थैं संदेश भेजि संदेश मा ऊन उपभोक्ता क अधिकार क मुद्दा थैं औपचारिक रूप से संबोधित कैर ,इन करणवला वू पैला नेता छाई,
विश्व उपभोक्ता अधिकार दिवस क पिछल इतिहास ई च कि पैल उपभोक्ता आंदोलन 1983 मा दिखे ग्या, और तब बटिक हर साल महत्वपूर्ण मुद्दों और अभियानो म कार्रवाई करण क ऐ दिन मनयै जांद।
विश्व उपभोक्ता अधिकार दिवस 2021 कि थीम Tackling plastic pollution च,ई जागरूकता बणाण और विश्व स्तर म उपभोक्ताओ थैं ज्वडियूं रा। अंतिम वर्ष कि थीम The Sustainable Consumer छै, ऐ वर्ष कु अभियान उपभोक्ता सरकारों और व्यवसायो क वैश्विक प्लास्टिक प्रदूषण संकट से निपटांण पर ध्यान केंद्रित कैरिक केंद्रीय भूमिका निभै सकद।
उपभोक्ता और वै का प्रकार
उपभोक्ता वू च जु जरूरत खुण उत्पाद खरीददू च और वैक उपभोग करद, वू उत्पाद या सेवा थैं दुबरा नि बेच सकद, लेकिन उपभोक्ता ये थैं अपणि आजीविका और स्वरोजगार अर्जित करण खुण करद।
उपभोक्ता क प्रकार
वाणिज्य उपभोक्ता, विवेकाधीन खर्च करणवल उपभोक्ता, बहिर्मुखी उपभोक्ता,और इन्फीरियर गुड्स उपभोक्ता।

विदेशोंमा होलि जन त्यौहार
-
सरोज शर्मा-जनप्रिय गढ़वाली साहित्य
-   
होलि एक प्रमुख त्यौहार च, भारतीय ऐ थैं धूमधाम से मनंदिन, दुनियाभर मा जख भि भारतीय समुदाय रैंद वख होलि कु त्यौहार मनयै जांद,
होलि जन त्यौहार दुनिया क अलग अलग हिस्सों म भि मनयै जांद, ई सब्या त्यौहार ऊं देशू का स्थानीय या लोक त्यौहार जना ही छन, जनकि होलि आस्था क लोक पर्व च,
न्यूजीलैंड मा
न्यूजीलैंड क अलग अलग शहरू मा हर साल रंग क त्यौहार मनयै जांद, छै दिन तक चलण वल उत्सव मा लोग पार्को मा रंग बिरंगा कपड़ा पैरिक मुंडमा हैट लगैकि अंदिन, और एक दूसर क शरीर म रंगो से पेंटिंग करदिन,
ऐ त्यौहार क मनाण क उदेश्य पुरणि यादों थैं भुलैकि सकारात्मक नजरिए से अगनै बढ़न च,
रोम मा भि होलिका दहन जन त्यौहार
रोम मा रेडिका क त्यौहार मनाण कु चलन च, होलिका दहन जन ही यै दिन कै ऊंचि जगा मा बोनफायर कियै जांद लोग नचदा और गीत गंनदिन,
कै मैना चलणवल ई त्यौहार क उदेश्य नै फसल क स्वागत कन च, रेडिका वख अन्न कि देवी भि मने जांद, साथ ही आग जलाण क उदेश्य बुरि शक्तियो थैं नष्ट करण कु च,
स्पेन म टोमाटिना फेस्टिवल
स्पेन म हर साल टोमाटिना फेस्टिवल मनयै जांद, और फिल्म जिंदगी ना मिलेगी दोबारा कि वजा से ई काफी लोकप्रिय ह्वाई, ई भि होलि जन त्यौहार च जु टमाटरों से ख्यलैजांद और खूब नाच गांणा हूंद।
थाईलैंड मा भि सांग्क्रान होलि ही जन त्यौहार च, ऐ मा लोग मठों मा जैकि भिक्षुओ थैं दान दिंदिन, और एक दुसर पर सुगंधित जल छिड़किक मनंदिन, ऐक उदेश्य बैर भाव मिटै कि प्रेम से रैणा क संदेश च,
पेरू क इनकान फेस्टिवल
होली जन ही च ई भि रंग बिरंगा कपड़ा पैरिक लोग घूमदिन, शहर मा झांकि निकलै जांद, पांच दिन कु ई उत्सव फसल प्रेम और समृद्धि कि कामना खुण हूंद,
नेपाल म
नेपाल मा ऐ थैं फाल्गुन पूर्णिमा
(फागु पुन्हि) भि बवलदिन
नेपाल क अलग अलग जगौ मा रीति-रिवाज मा भिन्नता च,
काठमांडू मा यै अवसर पर एक सप्ताह खुण नारायणहटी दरबार म बांस क स्तम्भ गढै जांद, यै किस्म किस्म का कपड़ा लटकयै जंदिन, यी बांस क स्तम्भ भगवान कृष्ण द्वारा तलाब म स्नान करणवली गोपिकाओं क स्मृति क प्रतीक च, स्तम्भ गढ़ना क बाद होलि आरंभ हूंद, काठमांडू मा रंग का दगड़ पाणि कु भि खूब प्रयोग हूंद, नेपाल क हिमाल और पहाड़ी इलाका की मुख्य होलि भारत से एक दिन पैल मनयै जांद, पर तराई मा भारत कि होली वल दिन हि मनयै जांद, तराई कि होलि बिहार कि फगुआ जन मिलदी जुलदी च,
होलि एक हिन्दु त्यौहार च पर नेपाल मा हिन्दु और बौद्ध धर्मावलम्बी (नेवार जाति)द्विया यै त्यौहार थैं हर्षोल्लास से मणांदा छन।

नवरात्रि विशेष  किस्त-----

Ashwini Gaur from Rudraprayag
-

    ---- हमारा लोक मा बसीं ---'बीं माता'------

 केदारघाटी की तीन गौं मा, रचीं-बसीं     लोकपरंपरा----------
केदारखंड नागपुर-केदारघाटी मा, रचीं-बसी संस्कृति, आस्था, विश्वास अर प्रकृति से जुड़ाव की, अलगे तस्वीर दिखौंदि।
हिन्दु नवसंवत्सर पर, जख ईं घाटी मा, बच्चों कु फूलदेई त्योहार, जोर-सोर से फ्योंली, बुरांशि, पैंया फूलों दगडि प्रकृति कु स्वागत करी होंदु, तखि चैत मैना मा, फूलदेई का बाद ही, केदारघाटी मा एक रोचक लोकपरंपरा कु त्योहार भी उर्यें जांदू 'बीं माता'।
'बीं माता' मतलब बिधात्री देवी, वरदात्री माँ, जैकि हर्यालि दगडि, मुंड माथम धरीं सर्वमनोकामना पूरी ह्वे जांदि।
बीं कु लोकपर्व केदारघाटी का तीन गौं- अंद्रवाडी, देवशाल (द्यूशाल), अर रविग्राम ( रविगौं),
तीन साल का अंतराल पर बारी-बारी से,यौं गौं मा बीं कौथिग उर्यें जांदू, यानि एक साल मा, यौंमदि एक ही गौं ये कौथिग कु गवै बणदू।
अंद्रवाडी का सेमवाल बामण परिवार अंद्रवाडी बटि नमोली तोक तक बस्यां छिन, यनि देवशाल का देवशाली बामण ह्वोन या रविगौं का जमलोकी बामण। यि सब लोग देश-प्रवास बटि भी, 'बीं माता' का ये पावन पर्व पर, अपड़ि थाति बौड़ी जांदन। तन-मन अर धन से बड़ी आस्था का दगड़ि, अपड़ि चिरपुराचीन परम्परा से जुड़ि जांदन।
'बीं कौथिग' की लोकपरंपरा, गढकुमौं की धियांण 'माँ नंदा देवी'  से जुड़ी च, यख नंदा तै बेटुली जन मांण्दन,अर सैरू गढकुमौं नंदा कु मैत मंण्ये जांदू।
कखि न कखि, ये लोकपर्व मा भी एशिया की सबसे बड़ी पदयात्रा 'नंदाराजजात' की झलक दिखैंदि।
गौं की ही क्वे मौं (परिवार) बीं माता तै न्यूतुदू, अर अपडा घौर मु हैर्याळी डाल्दू,
रातभर बीं-नंदा मांई का लोकजागर, बुजुर्ग बड़ी तन्मयता से लगौंदा। तखि नै पीढ़ी भी यौं लोकजागरों तै गांदि।
बचपन मा मैं भी ईं लोकपरंपरा कु साक्षी बण्यूं अंद्रवाडी गौं मा, तब रात-रात हम यौं जागर सुंण्दरा छा--

-----------'कां केलो तिरणी चार्यो
                  तूम्हरा घौर घर बासा ल्यौली,
                         सुदि बुधी नारी
                               नन्यौ त्वे अंकारा द्यौ।

       तुमारा घौरौऽ---- 
               घर बासा ल्योली-----
                      सुद-बुद्धि,   नारी---
                                त्वे औंकारा ळयो"
रात का तीनी पहरों मा, जागरण करी लोकजागर की धुन माहोल तै भक्ति मय बणै जांदि, ये अवसर पर ही पुरांणि पीढ़ी नै पीढ़ी तक लोकपरंपरा अर लोकसंस्कृति भी सरकदि जांदि। सैरा गौं का लोग यूँ दिनों बीं धियांण तै बेटी जन पूजी-पठैक खूब मान सम्मान दैंदा।
ये दौरान बीं माता की एक बड़ी मूर्ति भी तैयार कर्दा, अर खूब मान सम्मान पूजा पाठ करीतै, आखिरी दिन ईं बीं माता की प्रतिमा अर बीं माता का नौं कि डाळी हर्यालि तै मुंड मा बड़ा सम्मान का साथ गाजा बाजा लिकरी एक द्वी किलोमीटर पदयात्रा दगडि भगवान शंकर का मंदिर का नजीक पाणी स्रोत कुंआ या पंध्येरा तक स्यळौंणौ लिजांदन।
बीं का यौं गौंऊं मा भगवान शंकर का मंदिर छिन, जख बीं माता तै बिदै करी लिजांईं जांदू।
एक तरफां या तस्वीर बेटी बिदै से कम भावुक नि ह्वोंदि ये दौरान जख सबि मैती मुल्कि क्षेत्रीय लोग बीं तै बिदा कन जांदन, सबि लोखूं की आंख्यू मा दणमण आंसू छलकदन, सबका मन मा बेटी का ईं विदै पर जख, आंसू रंदन तखि ईं बेटी तै फ्येर तीन साल मा जल्दी ही मैंत औंण कु भी निवेदन भगवान शंकर से कर्ये जांदू।
बीं का यौं तीनी गौंऊं मा भगवान शंकर का मंदिर छिन।
पूजा-पाठ दगडि हैर्याळी तोड्यें जांदि, अर माथम का दगड़ि सब लोखूं तक पौंछाईं जांदि, लोग दूर-दूर तक
रिश्तेदारों तलक ये बीं कु माथम-प्रसाद पौछौंदन अर जौं-जस की कामना कर्दन।
ईं बिदै मा शामिल कौथिग उर्येंण वौळा परिवार का सदस्य जब वापस घौर जांदन त घर मा बड़ा बुजुर्गों कु आशीष ल्यौंदन।
ये दौरान लगभग गौं का घर-घर मा संजोळी पर हैर्याळी उगै जांदि अर स्यळौंणौ बीं दगड़ि लिकरी जांदि।
यि अद्भुत अर रोचक लोकपरंपरा छिन हमारी थाति की, यौंमदि सहेजणों अर लोकजागर संरक्षण कनै दिशा मा भौत सारा लोग काम भी कना छिन जौंमा प्रोफेसर डी आर पुरोहित जी, सुधीर बर्त्वाल जी, दीपक बैंजवाल जी समेत भौत सारा संस्कृति कर्मी लग्या छिन।
वाकई हमुतै अपड़ि संस्कृति माटी थाति पर गर्व मैसूस ह्वोंदू,
कि हम नंदा का मैती छिन--------
--@अश्विनी गौड़ दानकोट अगस्त्यमुनि रूद्रप्रयाग बिटि।

तकनीकी विषयोंक मातृभाषा मा शिक्षा :-

संकलन :- रुपेश कुकरेती

हाल ही मा केंद्रीय शिक्षा मन्त्रिन विद्यार्थियों तै अपर मातृ भाषा मा शिक्षा करणक वास्ता,रोडमैप तैयार कनकुण एक कार्यदल गठन कार जैक प्रमुख बिन्दु निम्न छन:-

:-कार्य दल:-
अध्यक्षता :- येक स्थापना सचिव उच्च शिक्षा अमित खरेक अध्यक्षता मा करे जाली।

उद्देश्य :- येक उद्देश्य प्रधानमंत्रिक दृष्टिकोण हिसाब से विद्यार्थी अपर मातृभाषा मा व्यावसायिक पाठ्यक्रमों जन कि चिकित्सा इंजीनियरिंग कानून आदि मा नौन/नौनी अगने बढ़ साक अर अपर लक्ष्य तै प्राप्त कौर साक। यी राष्ट्रीय शिक्षा नीति द्वी हजार बीसक(2020) च जु कक्षा 8 तक क्षेत्रीय भाषा मा पढ़ण अर पाठ्यक्रम तै एक इन भाषा मा तैयार कन पर केंद्रित च कि वू विद्यार्थियोंकुण सहज ह्वा।

कार्य :- यी विभिन्न हितधारकों द्वारा दिये ग्ये सुझावों तै ध्यान मा रखल अर एक मैना मा अपर रिपोर्ट प्रस्तुत कारल।

:- क्षेत्रीय भाषाओं मा तकनीकी शिक्षा प्रदान कनक कारण :-

रचनात्मकता तै बढ़ाण :- यी दिखे ग्या कि मानव मस्तिष्क वीं भाषा मा सहजता से ज्ञान प्राप्त कनमा सक्षम हुन्द जमा वू सुचण विचणक आदि हुन्द।जब विद्यार्थियों तै क्षेत्रीय भाषाओं मा समझये जान्दु विशेषकर मातृ भाषा मा त वू विचारोंक अभिव्यक्ति या वे विषय तै सरलता से ग्रहण कौर लींदन

कई देशों द्वारा अभ्यासरत :- विश्वक कई देशों मा कक्षाओं मा शिक्षण कार्य विभिन्न क्षेत्रीय भाषाओं मा करे जान्दु चाइ वू फ्रांस ह्वा रुस ह्वा या फिर चीन ह्वा जख 300 से ज्यादा भाषाएँ अर बोलियाँ छन।

समावेशी बनाना :- यी सामाजिक समावेशित साक्षरता दर मा सुधार,गरीबी मा कमी अर अंतर्राष्ट्रीय सहयोग मा मदद कारल। समावेशी विकासकुण भाषा एक उत्प्रेरकक कार्य कौर सकिदि च। मौजूदा भाषीय बाधाओं तै हटाण से समावेशी शासनक लक्ष्य प्राप्त कन मा मदद मिल सकिदि च।

मुद्दे :- क्षेत्रीय भाषाओं मा तकनीकी शिक्षा दीण कुण शिक्षकों तै ऑडियो ट्रांसलेशन टूल्स से तकनीकी सहायतक अलावा अंग्रेजी पाठ्यपुस्तकों अर क्षेत्रीय भाषाओं मा सन्दर्भ सामग्रिक दगड़ दगड़ शाब्दिक माध्यम मा कुशल हुणक आवश्यकता प्वाडली।

:- क्षेत्रीय भाषाओं तै बढ़ाणक वास्ता सरकारक पहल :-
हाल ही मा घोषित राष्ट्रीय शिक्षा नीति 2020 क्षेत्रीय भाषाओं मा शिक्षा तै बढ़ावा दीणक मुख्य पहल च।

वैज्ञानिक अर तकनीकी शब्दावली आयोग(कमीशन फॉर साइंटिफिक एण्ड टेक्निकल टर्मिनोलॉजी-cstt) क्षेत्रीय भाषाओं मा विश्व विद्यालय स्तरक पुस्तकों तै बढ़ावा दीणकुण प्रकाशन अनुदान दीणु च। येक स्थापना 1961 मा सभी भारतीय भाषाओं मा तकनीकी शब्दावली विकसित कनक कुण करे ग्या।

केंद्रीय भारतीय भाषा संस्थान(सेंट्रल इंस्टिट्यूट ऑफ इंडियन लैंग्वेजेज- ciil) मैसूरक माध्यम/सहायता से राष्ट्रीय अनुदान मिशनक(एनटीएम) क्रियान्वयन करे जाणु च। जैक तहत विश्व विद्यालयों अर कॉलेजों मा निर्धारित विभिन्न विषयोंक पाठ्यपुस्तोंक आठवीं अनुसूची मा शामिल सभी भाषाओं मा अनुवाद करे जाणु च। CIILक स्थापना वर्ष 1969 मा शिक्षा मंत्रालयक प्रशासनिक नियन्त्रणक तहत करे ग्या। भारत सरकार द्वारा लुप्तप्राय भाषाओं तै संरक्षण अर बढ़ावा दीणक कुण " लुप्तप्राय भाषाओंक सुरक्षा अर संरक्षणकुण योजना क (SPPEL) क्रियान्वयन करे जाणु च। विश्व विद्यालय अनुदान आयोग(यूजीसी)देश मा उच्च शिक्षा पाठ्यक्रमों मा क्षेत्रीय भाषाओं तै बढ़ावा दीणक प्रयास करदु अर केंद्रीय विश्व विद्यालयों मा लुप्तप्राय भाषाओं कुण केंद्रक स्थापना से सम्बन्धित योजनाओंक तहत कुल नौ केंद्रीय विश्व विद्यालयों तै वित्तीय सहायता प्रदान करदु। हाल ही मा केरल राज्य सरकार द्वारा शुरु करे ग्या "नमथ बसई" कार्यक्रमन राज्यक जनजातीय बच्चों तै शिक्षा प्राप्त करण कुण मातृभाषाओं तै अपनाण मा,सहायता प्रदान कनमा महत्वपूर्ण भूमिका अदा कार।

वैश्विक प्रयास :-

वर्ष 2018 मा चीनक चांग्शा शहर मा सयुंक्त राष्ट्र शैक्षिक वैज्ञानिक अर सांस्कृतिक संगठनक (यूनेस्को) यूएलु घोषणन अल्पसंख्यक भाषाओं अर विविधतक रक्षा कुण दुनिया भरक देशोंक मार्गदर्शन कन मा महत्वपूर्ण भूमिका निभै। सयुंक्त राष्ट्र महासभन वर्ष 2019 तै स्वदेशी भाषाओंक अंतर्राष्ट्रीय वर्ष घोषित कार।येक उद्देश्य राष्ट्रीय क्षेत्रीय अर अंतर्राष्ट्रीय स्तर पर स्वदेशी भाषाओंक संरक्षण कन,वूंक समर्थन कन अर वूं तै बढ़ावा दीण च। स्थानीय भाषाओंक रक्षा कुण संवैधानिक अर कानूनी अधिकार अनुच्छेद 29 च।यी बतान्दु कि भारतक राज्य या भारतक कै भी भाग मा निवासी नागरिकों तै अपरी विशेष भाषा,लिपि या संस्कृति तै बणये रखणक अधिकार ह्वाल। अनुच्छेद 120 मा संसदीय कार्यवाही कुण हिन्दी या अंग्रेजी भाषक उपयोग करणक प्रावधान च लेकिन दगड़ मा संसद सदस्यों तै अपर मातृ भाषा मा अभिव्यक्तिक अधिकार भी दीन्दु।
भारतीय संविधानक XVll अनुच्छेद 343 से 351 तक आधिकारिक भाषाओँ से सम्बन्धित छन।अनुच्छेद 350A प्राथमिक स्तर पर मातृ भाषा मा शिक्षा की सुविधा दीन्दु। अनुच्छेद 350B भाषायी अल्पसंख्यकों कुण विशेष अधिकार दीन्दु। अनुच्छेद 351 हिन्दी भाषक विकासकुण निर्देश जारी कनक शक्ति दीन्दु।
भारतीय संविधानक आठवीं अनुसूची मा 22 आधिकारिक भाषा सूचीबद्ध करे ग्येन जु निम्न छन:-
असमिया,उड़िया,कन्नड़,कश्मीरी,उर्दू कोंकणी,गुजराती,डोगरी,तमिल,तेलुगु, नेपाली,पंजाबी,बांग्ला, बोडो,मणिपुरी,मराठी,मलयालम,मैथिली, संथाली,संस्कृत,सिंधी अर हिन्दी।
शिक्षा क अधिकार (RTE) अधिनियम 2009 क मुताबिक जख तक सम्भव ह्वा शिक्षा कु माध्यम बच्चक मातृभाषा हुणी चयाणि च।