म्यार गौं गुठ्यार मा
अब कुछ नी राई
ना त छांतु टाट पल
अर ना पाथु राई
बांजी कुडी हुंयी च
भीतरी डाली जमीं च
ताली लगीं भैर बटै
मौ दिल्ली जयीं च
अंणो गुरों की जंदर्युं पर
कन अंग्वाल भटीं च
चुलख्यंदों मा पुंछडी धरीं
सील्वटों मा सीयीं च
बारा नाजु की दबली बुये की
कन ट्वटकां हुयीं च
मेरी पाटी बुखल्या कुजंणी
कै क्वांण पडीं च
दीदी भूल्युं तै गंज्यली
उरख्यली धै लगांणी च
ताम की पींड की तौली
दुधाल गौडी खुज्यांणी च
म्यार गौं गुठ्यार मा
अब कुछ नी राई
ना त छांतु टाट पल
अर ना पाथु......
सर्वाधिकार सुरक्षित @लेख सुदेश भट्ट "दगडया"