MeraPahad Community Of Uttarakhand Lovers

म्यार गौं गुठ्यार मा
अब कुछ नी राई
ना त छांतु टाट पल
अर ना पाथु राई
बांजी कुडी हुंयी च
भीतरी डाली जमीं च
ताली लगीं भैर बटै
मौ दिल्ली जयीं च
अंणो गुरों की जंदर्युं पर
कन अंग्वाल भटीं च
चुलख्यंदों मा पुंछडी धरीं
सील्वटों मा सीयीं च
बारा नाजु की दबली बुये की
कन ट्वटकां हुयीं च
मेरी पाटी बुखल्या कुजंणी
कै क्वांण पडीं च
दीदी भूल्युं तै गंज्यली
उरख्यली धै लगांणी च
ताम की पींड की तौली
दुधाल गौडी खुज्यांणी च
म्यार गौं गुठ्यार मा
अब कुछ नी राई
ना त छांतु टाट पल
अर ना पाथु......
सर्वाधिकार सुरक्षित @लेख सुदेश भट्ट "दगडया"

कांड क डालुंद जैली
तेरी झूगली टुपली
डुंग पडल तेरी गैर्युं मा
अर तेरी घोटालों की फैलों मा
बदला की राजनिति कु
अयुं नयी रिवाज
चम्मचों की लंगार लगीं
म्यार उत्तराखंड मा
कखी घ्वाडा मर्यांणु च
कखी खली कुट्यांणु च
बिकाश की कुई बात नी
दीदों उत्तराखंड मा
आपदों की मार मा
अंध्यरु हुयुं पाड मा
एसी मा पडी पडी क
भाषंण ड्यारदूंण मा
लंबु कुर्ता अर चिपक्युं सुलार
पैन जुगा तीन नी रांण
अब क चुनौ मा दादा
तेरी खत्ता खंणै जांण
कांड क डालुंद जैली
तेरी झुगली.....
भ्रष्टाचारी सम्मानित नेतों तै समर्पित सर्वाधिकार @सुदेश भट्ट "दगडया"

रगर्यांणु छौं
कुरच्यांणु छौं
जग जगा
पतड्यांणा छौं
खैरी बिपदा
फजल बटै की
ब्याखन तक मी
खांणु छौं
नौकरी नी
चाकरी नी
लमडंणा छौं
फूटपाथों मा
नौकरी की
खोजा खोज
दिन दुफरा अर
घामों मा
रोज ईंटरब्यु
दीण लग्युं मी
बडी बडी
कंपन्यों मा
आंद जांद
धक्का मुक्की
खांदु दगडयों
मी मैटरो की
रेलों मा
चितै ग्यों मी
यै की दगड्यों
यीं नरबैगी
दिल्ली मा
म्यार मुल्क
जन कखी नी
ठाट बाट
दुनिया मां
रगर्यांणु छौं
कुरच्यांणु......
सर्वाधिकार सुरक्षित @सुदेश भट्ट दगडया

मैट्रो क कुरच्याट मा
गाड्यूं कु पुंप्याट मा
रगाबगी हुंयी दीदों
दिल्ली क रगर्याट मा
अपुंण पर्या कुई नी यख
रुप्यों की बस माया च
घामु मा छौं लरक तरक
दिल्ली का फूटपाथों मा
डबखा डबखी रोज दीदों
नौकरी खुज्यांणु छौं
पेट क खातिर दीदों
गाली सेठुक खांणु छौं
औल पौली छोडी कुडी
बांजी कैकी यैग्यों मी
बांजी तिबरी डिंड्याल्युं की
खुद लगीं यी दिल्ली मा
मैट्रो कु कुरच्याट मा
गाड्यूं क पुंप्याट ......
सर्वाधिकार सुरक्षित@सुदेश भट्ट "दगडया"

कुडी क यैथर पैथर
डाल जम्यां छन पाड मा
तालों पर भी फांक फूट्यां छन
चाबी धरीं च बंबै मा
बचपन भीतर ग्वाडी गुडी की
तालु लगै की चली गेनी
गोर कसयुं जोग कैकी जु
भांड ठंटर्यों तै दे गेनी
बुबा ददों की समलौंण यख
आज दिखेंणी जरा जरा
यनी डाल जामल भीतर्युं पर
वा भी दबे जाली कैदिन सरा
कुडी क दार पटल टुटगेन
गैंणा गिंण्यांणा भीतर बीटी
यीं कुडी क मौ भग्यानी
बंबै दिल्ली गेन जब बिटी
बौडी की यैजा दगड्यों म्यार
बचपन अपणु टीपी जा
बुबा ददों की यीं समलौंण तै
द्वी हथ्युं न उकरी जा
कुडी क यैथर पैथर
डाल जम्यां छन पाड मा
तालों पर भी डाल जम्यां छन
चाबी धरीं च बंबै.....
सर्वाधिकार सुरक्षित लेख@सुदेश भट्ट "दगडया"फोटो साभार भगवान सिंह रावत