ब्वे/मां
-
मातृ दिवस पर विशेष गढवाली lok geet
-
रचना : प्रेमलता सजवाण
कुण्डलिया छन्द
( 1 )
तू हि सृष्टि, सृजन भि तू ,कनक्वै करु बखान।
तेरि माटि से जन्मणा , त्वै से पाणा प्राण ।
त्वै से पाणा प्राण, फलदि फुलदि रैणि काया।
त्वैसे मंथा पैकि, त्वैसे बण हमरि काया।
ईश्वर ल अपरि जगम, ब्वै धरति म भेजि तू।
प्राणि जगत थै अपरि, कोखि मा पलदी ब्वै तू।
( 2 )
अपरो ल्यो कु दूध बणै, पिलै बणाणी गात।
तींदि गदेली जने स्यै ,सुख्यां म मेरि गात।
सुख्यां म मेरि गात ,अफ बिज्यीं रैन्द रात्यूं ।
हुंगरा सूणिकि ब्वै , ब्वगाणी अमरित छात्यूं।
ब्वै कि करंगुलि पकडि़, दुन्यां जहान भि बिसरो।
त्वै बिना आज भि ब्वै, ध्यान नि रखि सकदु अपरो।
( 3 )
ग्वाई लगै, था लीणू , सिखुणु मि हिटणु, दौड़णु।
भगदै हि रै ग्यो अब ब्वै ,कखिम था नि ले सकणु।
कखिम था नि ले सकणु,तेरि खुचलि याद आणी।
मुण्ड मलसि सिवालिणि , आँख्यु मा निन्द रुसाणी।
बडु शरैल त ह्वै ग्या , लोग भि बडु ब्वना छाई।
छ्वटु खुचिल्या ह्वैके, मि लगाण चान्दू ग्वाई।
( 4 )
फंची कुटरि बंधणि रै ,सेर पाथेक हैंसि ।
बगत कुबगतों धरणि ब्वै, धोति कि गेड़म पैंसि।
धोति कि गेड़म पैंसि, कि हथ नि पसरण प्वाड़लो।
लूण र्वटि खाणि सीखि, ज्यांल नाक बच्यु रालो ।
तेरि शिक्षा दीक्षा कि, दगड़ बंधि रैन्द फंची ।
आज कीसा खालि नि ,तेरि सीख बंधि फंची ।
( 5 )
महिमा तेरि कनकै गौ,आखर भि त्यारा छन
पैलु शब्द भी ब्वाल माँ ,वु सदनि याद रैगिन।
वु सदनि याद रैगिन, तिथै को जि बिसरि ह्वालो।
ब्वै खुट्टो चार धाम ,वृद्धाश्रम म यु कु ह्वालो ।
ब्वै ल पाल घिमसाण , वु मिलि पालि नि साका माँ ।
"प्रेम" जब ब्वै बणि ग्यो,त मिल जाण तेरि महिमा।
प्रेमलता सजवाण..।
