MeraPahad Community Of Uttarakhand Lovers

Shailendra Joshi
 
जिन्दगी जीणो किरण
लुछी तेरी बेसर्मी का बादलन
मेरी उज्यालि किरण
अंधेरु करी तेरी बेसर्मी का बादलन
लुटी इज्जत मेरी
तेरा मन का फतुरुन
कब तक राली स्या हवस
तेरा गात राकछस
मेरी मौत कु इंसाफ
मिल्लु कब तक मेरी देस कि
दीदी भूलियो तै
या लुटती राली आबरू
स्या ज़ुल्मयो हात उंद
रचना। ………शैलेन्द्र जोशी

Shailendra Joshi
January 25

फ्योंली बिगरैली द्याखा,
मंगसीर पिंगली ह्वेग्ये,
बुरांस कु मिजाज भी बदली,
पूष ललंगी कैग्ये
फ्योंली कु फूल तै
त्वे जनि कतामति चा छोरी
बसंत की नि करि जग्वाल
मौल्यार मा ही कतामति ह्वेगे
छोरा बुरांस कु फूल बि
त्वे जनि बैमान चा
बसंत की नि करि जग्वाल
मौल्यार मा ही कतामति ह्वेगे
ग्लोबल वार्मिंग कु सब्बसि जादा
असर हम मनख्यों मा चा
डाला बोटा पौन पंछी
फूल कांडा डाला सब्बि
हमरि चार पैथर चलदा
बचपन बिसरीकि कि हम मनखी
बगत से पैली ज्वान होणा छन
फ्योंली और बुरांस तै क्या बुन फिर
मौल्यार बिसरकि बिना बंसंत अया
ज्वान ह्वेकि
बंसत खौलिगे मेरु क्या रोल चा
जब सब्बि बगत से पैली जवान होणा छिन
रचना। .... शैलेन्द्र जोशी

Shailendra Joshi

January 24

अब क्वी मायादार बौण मा नि दिखदु
अब क्वी गौ गौलो मा प्यार नि करदु
क्या अब यी संगसार मा क्वी प्यार नि करदु
प्यार ना हो संगसार मा इन क्या कबि ह्वे सकदु
गैनि जमाना दीदा जब चढगे छौ जीतू
भरणा का प्यार मा खैट
अब मायादार घर बैठी कि करदा चैट
कै जमाना छौ भुला
जब रैदु छौ दगडू कु गैल
अब सब का मन मा ह्वे गे मैल
चैल पैल भी चा , भीड़ भी चा दुनि का यी मेला मा
इन बात नि चा दीदा कै ज़मना के बत्त करना छा
फेसबुक का ज़मना मा बिराणा बि अपणा छन
गौ कि छानी मा बैठे तुम कनेक्ट ह्वे सकदा
कै अमरिका गोरी मैम दगडी
क्या बुन भुला ज़मना ज़मना कि बात चा
संचार क्रान्ति संचार युग मा जीवन इन्नी चा
कविता शैलेन्द्र जोशी

Shailendra Joshi
January 23
छुई लगाणा तै
गिच्चु चैणु या दिमाग
तुम ही बोला
पर गिच्चु काम
सिर्फ बोलणु चा क्या
या खाणु
गिच्चु से ही क्रांति ऐ सकदी
गिच्चु से ही महाभारत ह्वे जांदी
गिच्चु से ही प्रेम होंदु
गिच्चु मा ही त् सारी जीवन कि
कथा व्यथा छन
पर गिच्चु खाली प्रिंटर चा दिमागो कु
असली फैक्टरी दिमाग कि ही चा
ज्यू गिच्चु का मुंड सैरा फगार
डाल देंदु
पर ज्यु भी चा
पर दुन्या नज़र मा गिच्चु बैमान चा
रचना। …शैलेन्द्र जोशी

Shailendra Joshi
January 22
काटी जाली कपास
मायादार छोरा कबिलाष
बातो कु रसिया
छोरा कबिलाष
चीफला मिज्याज
छोरा कबिलाष
हौसिया उमर
आंख्युन चलांदु छुरिया
छोरा कबिलाष
मै छोरी जुकुडी बसियु
छोरा कबिलाष
कुमरा सि बैचैन करदु
छोरा कबिलाष
सिब कि मूरत
छोरा कबिलाष
विष बि पै देलु
तेरा बाना
छोरा कबिलाष
मै छोरी कु भाग
तेरा हात
छोरा कबिलाष
रचना। …… शैलेन्द्र जोशी