MeraPahad Community Of Uttarakhand Lovers

अमिताब बच्चन की  फिल्मोंन अन्ना आन्दोलन नेस्ताबूद कार

 
                  भकलौण्या : भीष्म कुकरेती

जी हाँ ! मि धै लगैक बुलणु छौं बल अमिताभ बच्चन की फिल्मों भ्रष्टाचार विरुद्ध अन्ना आन्दोलन नेस्ताबूद कार  I
हाँ हाँ ! मि खुले आम , बीच बजार मा अर इन्टरनेट कु थौळम गर्जिक -बर्सिक बुलणु छौं बल अन्ना आन्दोलन खतम करण मा अमिताब बच्चन फिल्मो  योगदान च I
हाँ भै हाँ ! मि बगैर भंगुल -दारु पेक बथाणु छौं बल भारतम संसाधनों पर लग्युं भ्रष्टाचार  को कीड़ो विरुद्ध बिगुल बजाण वळु  अन्ना आन्दोलन कि मुखर आवाज बंद करणों  वजै अमिताभ बच्चन की फिल्म बि छन I
बोलि याल ना कि मि ढोल घुरैक  , दमौ बजैक कन्टर बजैक,  सबि हिदुस्तान्यूं तैं धाद दीणु छौं बल अन्ना आन्दोलन पर अमिताभ बच्चन की फिल्मोंन पाणी फ्यार, अन्ना आंदोलन को जजबा अमिताभ बच्चन की फिल्मोंन खतम कार , अमिताभ बच्चन की फिल्मोंन अन्ना आन्दोलन क जड़नास कार I अन्ना आन्दोलन जो समाजम एक उथल-पुथल , बदलाव  लाण वळ थौ अमिताभ बच्चन की फ़िल्मोन वै आन्दोलन की भ्रूण हत्या करी दे ! अमिताभ बच्चन की फिल्मोंन अन्ना आन्दोलन कि कमर तोड़ि I
क्या बुना  छंवां बल  मि बौळे ग्यों ? तुमर विचार से -सुचण से   मि पगलै ग्यों ?
न्है न्है ! ब्याळि  डाक्टरन  पूरो चेक अप कार अर डाक्टरन ब्वाल बल जब आदिम पर बिंडी बीति जान्दि तो वो कारणों जड़ तलक पौंछणो कोशिस करदो I
अब आप ही बथावो कि सहत्तर -अस्सी को दसकम अमिताभ बच्चन की फिलम हिट किलै ह्वेन ? आखिर हिन्दुस्तानी -पाकिस्तानी -बंगलादेसी -नेपाळी -श्री लंकाई किलै अमिताभ बच्चन की फिल्मो दीवाना ह्वैन ?
जब हिन्दुस्तानी -पाकिस्तानी -बंगलादेसी आदि अपण व्यवस्था , अपण शासन , अपण प्रशासन , अपण धर्मुं ठेकेदारुं , समाजौ ठेकेदारों से त्रस्त , भयभीत , पीड़ित , दुखी ह्वे गे छा , डौर गे छा I समाज तैं , व्यक्ति तैं व्यवस्था को प्रताड़ना से मुक्ति को क्वी आस , क्वी  साधन , क्वी माध्यम नि दिख्याणु छौI  व्यक्ति एआरएम समाज मा  आशाहीन मानसिकता ऐ गे छे, समाज अर व्यक्ति किम कर्तव्य को भंवरों बीच फंसी गे छौ तो  अमिताभ बच्चन की विद्रोही आवाजन , अमिताभ की फिल्मों मा विजय नामौ चरित्र का समाज तैं दबाणै  व्यवस्था  का विरुद्ध विद्रोही स्वरों , एकाधिकारी व्यवस्था विरोधी डायलौगूं से हम तैं लग कि हम तैं अभिब्यक्ति मिलि गे  भारतीय उपमाहाद्वीप का जन मानस तैं लग कि अमिताभ बच्चन विजय ही तो  प्रतिछाया च I  अमिताभ को चरित्र याने विजय आम भारतीय उपमहाद्वीप का  लोगुं अभिव्यक्ति को प्रतिनिधि बौण गे I लोगुं तैं लग अब विजय ही कुप्रशासन खतम कारल I जनता तैं लग अब विजय नामक  अकेला व्यक्ति ही हम तैं जगा जगा बैठ्याँ एकाधिकारियों से मुक्ति दिलाणम   काफी च I लोगुन तैं पूर्ण विश्वास ह्वे गे बल विजय नामक केवल एक चरित्र सबि तरां को अनाचार्युं , अत्याचार्युं , व्यभिचार्युं, दुराचार्युं , पतितों   तैं ख़त्म कौर द्याल I भारतीयोंन अमिताभ बच्चन को चरित्र तैं सच समजी याल I
 पण असलियत , हकीकत , वास्तविकता , रियलिटी कुछ हौरि छौ I अमिताभ बच्चन की फिल्म एक अकेला व्यक्तिवाद तैं दिखाणु छौ कि  दमघोटू दुर्व्यवस्था तैं नेस्ताबूद करणों बान  बस समाज मा एक 'विजय' चरित्र काफी च अर समाज केवल दर्शक बण्यु बि रालो तो भी 'विजय' नामौ चरित्र मुक्ति दिलै द्यालो I अमिताभ बच्चन की अधिकतर फिल्मों मा दुराचार , अनाचार , अत्याचार मिटाणो बाण केवल एक ही व्यक्ति 'विजय'  दिखाये गे अर समाज की भूमिका केवल मूक दर्शक की दिखाए गे I
जब कि असलियत मा जरूरत विजय की भी छे जो हमारी अभिव्यक्ति को प्रतिनिधित्व अवश्य कारो अर समाज मूक दर्शक नि रावो बलकणम  समाज अपणो सामाजिक, सामूहिक भागीदारी निभावो I जब एकाधिकारी या अनाचारी व्यवस्था   ह्वावो तो वीं ताकतवर , खतरनाक व्यवस्था तैं बदलणो बान   व्यक्ति तैं सामूहिक रूप से लड़ण जरूरी च I  दक्षिण भारतीय फिल्मों पर नजर डाळो  त उख बि ऐम . जी रामचंद्रन , ऐन . टी . रामाराव या आज का चिरंजीवी , रजनीकांत,  आदि की फिल्मोंन  भी वाही भूमिका निभाई जो अमिताभ बच्चन की फिल्मोंन निभाई याने समाज मूक दर्शक अर एक व्यक्ति दुराचार -अनाचार नाशक !
अन्ना हजारे मा भारतीयों न 'विजय' चरित्र  द्याख अर सरा उप महाद्वीप आशावंत ह्वे ग्याइ कि अब हम तैं 'विजय' चरित्र मीलि ग्याइ अर समाजान अन्ना हजारे या 'विजय' नामक चरित्र तैं  समर्थन , सहयोग दे जन लोगुंन ऐम . जी रामचंद्रन , ऐन . टी . रामाराव या आज का चिरंजीवी , रजनीकांत, अमिताभ की फिल्मों तैं समर्थन दे पण जो समाज से अपेक्षित/आशा  छौ वो समाजन नी दे I समाज से अपेक्षित छौ कि अन्ना हजारे दगड़ भागीदारी निभावो पण हम तो अमिताभ बच्चन की फिल्मों का व्यसनी ह्वे गेवां अर एक व्यक्ति का भरोसा बैठि गेवां अर अपणी भागीदारी निभाण बिसरी गेंवाँ I
यदि हम दैंत -दिवतौं इतिहास पर बि नजर मारवां तो हम दिखला कि शिवजी , विष्णु जी या अन्य देवियों -दिबतौं अकेला कारनामा से दैंत -राक्षस खतम नि ह्वेन . शिवजी , विष्णु , देवी का भौं भौं रूप दैन्तों  से रोज लड़णा रैन पण दैंत मूल नाश तब  बि नि ह्वे I दैंत मूल नाश तबि ह्वे जब दिबतौंन सामूहिक भागीदारी निभाई अर वो सामूहिक भागीदारी छे ' समुद्र - मंथन' I  समुद्र मंथन ' सामूहिक भागीदारी को एक अनूठा मिसाल छौ जख मा 'विजय ' चरित्र शिव -विष्णु -ब्रह्मा रूप छा पण  दिबता कट्ठा ह्वेक दैंत संघार को करतब मा शामिल छा I 'समुद्र मंथन ' मा एक एक दिबता को महत्व छौ, एक एक दिबता की अपणी अलग भूमिका छे अर तबि दिबतौंन दैंतों तै हमेशा क बान (सदा के लिए)  कमजोर बणाइ , दैंत खतम करे गेन I
यदि अन्ना हजारे जन आन्दोलन तैं सफल करण तो प्रत्येक जण -बच्चा याने व्यक्ति तैं अपण भागीदारी भि निभाण पोड़ल जन हरेक दिबतान राक्षस मूलक यज्ञ 'समुद्र मंथन ' मा निभाई छे I

Copyright @ Bhishma Kukreti  12/8/2013

 गरीब -गुरबों-दलितों  रामायण मा बाल-कांड की जगा भेदभाव काण्ड
            चबोड़्या -चखन्यौर्या -भीष्म कुकरेती
 
 मी सुचणु छौ बल रामायण या महाभारत मा जु बि मुख्य कथा छन वो राजा , राजकुमार या राजकुमार्युं मुतालिक ही छन अर बडो मिजाज , बड़ो हिसाब ही यूँ महाकाव्यों मा च  I
यदि वाल्मीकि कई गरीब पर या हरिजन आधारित कथा पर रामायण लिखदा त क्या हूंद ?
 
              वाल्मीकि या तुलसीदास कृत रामायण मा दशरथ राजा छौ त वैक इख वशिष्ठ , श्रृंगी , विशवामित्र जन बड़ा बड़ा ऋषि आंदा छा पण दलितों रामायण मा गरीब या दलित दाशरथौ इख बड़ा बामण त छवाड़ा मड़घटौ  भैड़ा बामण बि नि आंद किलैकि बामणु बि जजमानी बारा मा अपण स्टैण्डर्ड हूंद . जू बि  दक्षिणा   दीण लैक ह्वावो वो ही बामणु लैक जजमान हूंदो I तो दलित या श्रीहीन दशरथ का तिनि ब्यौ टकों ब्यौ (जख मा बर बरातम नि जांद ) ही हूंदा I
                 दलित दशरथ या तो बड़ा लोगुं गू फेड़दु या कैका पुंगड़ु मा मजदूरी करदो I इनि  कौंसिला (कौशल्या ), कैकेयी अर सुमित्रा बि मजदूरिन हि हूंदा I रामायण मा जब  राम पैदा हूणो  बगत आयि तो कौशल्या बान तरा तरांका  सुख साधन जुटाये गेन I गरीब -दलित चरित्रों आधारित रामायण मा कौशल्या बान बि दशरथ सुख अर साधन जुटांदो I जख कैकियी अर सुमित्रा माय दशरथ का चार बेऴयूँ मादे एकि दै खाणक़ खांदा उख कौंसिला (कौशल्या ) तैं द्वी बगत रूखा सूखा दिये जांदो . अर कौशल्या भगवान से प्रार्थना करदी बल क्या वा हर समय अशाबंद (गर्भवती ) रै सकदी क्या ? गर्भवती रौण मा दिन मा एक बार खाणक़ मिलण तो बड़ी बात ह्वे की ना ? उना कैकेयी अर सुमित्रा निरंकार से प्रार्थना करदी बल वूं तै बि गर्भवती बणाये जावो ! कैकेयी -सुमित्रा बच्चों बान गर्भवती नि बणन चांदा पण चार टैम मा द्वी टैम खाणकौ लोभ मा गर्भवती बणन चांदा I
                 जब वाल्मीकि का रामचंद्र पैदा ह्वेन तो दाई -आयायूं की भीड़ का बीच पैदा ह्वेन I दलितों को रामायण को रामचंद्र बि भीड़ का बीच ही पैदा होंदु पण वीं भीड़ अर वाल्मीकि रामयण की भीड़ मा जमीन असमानों अंतर हूँद I जख वाल्मीकि को रामचंद्र राजमहल मा पैदा होंद त दलितों रामायण को रामचन्द्र तब पैदा हूंद जब कौशल्या कै राजमहल की चिणै बगत मजदूरी करणि होलि I कौशल्या का मुंड मा पथर हूंद अर इनि मा रामचंद्र पैदा हूंद I जख वाल्मीकि रामायण मा रामचंद्र को पैदा हूण मा अयोध्या की जनता जोर जोर से 'बधाई हो ! बधाई हो ! राज्किमार पैदा हुए हैं ' को नारा लगांदी अर सरा अजोध्या मा हल्ला हूंदो त दलित रामयण मा कूड़ो ठेकेदार अर हौर बड़ा कारिंदा हल्ला करदा कि "तैं कौंसिला मजदूरिन को बहार कारा ". ठेकेदार मजदूरों तै डांटदो " क्या बै ! एक कुत्ते का पिल्ला जैसा ही तो पैदा हुआ है फिर तुमने काम बंद क्यों किया ? चलो काम करो I "
दलित रामायण माँ मजदूर रामचन्द्र जन्म पर खुसी नि मनै सकदा बल्कि बेबसी , कुंठा का शिकार ही होंदा कि हम मजदूरों क्या बेबसी च कि मजदूरी करद बच्चा पैदा हूंदन अर चैन से खुसी का इजहार बि नि करी सकदा !
कौंसिला नंगी बच्चा लेकि अपण अधछंयीं झुपडि मा इखुली आंदी I
               दशरथ का परिवार मा बच्चा का आण पर ख़ुशी जरूर होंदी पण दुःख बि उथगा ही जादा होंदु बल कि यु बच्चा रात पैदा होंद त कौन्सिला तै आज की मजदूरी त मिल्दि I सब्युं तैं एकि मलाल हूंद कि आज कौंसिला की मजदूरी मारे गे I दशरथ कौन्सिला तै गाळि बि दींदो " तै नौनु तैं जरा चार पांच घड़ी पैथर जनम नि दे सकदी छे ? साली तैं इथगा बि ज्ञान नी च कि गरीबों तैं दिन मा पैदा नि करण चएंद I "
 दसरथ का घौर बुड्याँद दें नौनु ह्वाइ तो जशन मनाण बि जरूरी छौ अर खुसी -खुसी दशरथन अपण एकमेव गैबण बखरी बेचि दे अर वांसे चषक (शराब ) अर चखना खरीद अर दगड्या  मजदूरों तैं रात जीमण दे I
           ज्य्ख वाल्मीकि -तुलसी रामयणम रामचंद्र  को बचपन राजमहलम बीतद उख दलित आधारित रामायणम रामचन्द्र को बचपन कौन्सिला जख बि मजदूरी करणों जावो तखी रामचंद्र तै बि लिजांदी छे I जख बाल्मीकि -तुलसी रामायण मा रामचन्द्रन पांच  साल तक राजमहल का गद्दों सुख भ्वाग उख दलित रामायण का रामचंद्र का बचपन पुंगडुम, खल्याणम, बौणम , खंद्वारुंम ,  चिण्यान्द कूडो मा माटु -पथरों -कीच , धूल -गंदगी मा बितद I
 जब बाल्मीकी का रामचन्द्र पांच साल को ह्वाइ तो संसार का लोग रामचंद्र तै पकड़णो बान  प्रतियोगिता मा खड़ा रौंदा छा पण दलित रामायण मा बिट्ठ ( स्वर्ण लोग ) ही ना बड़ी जाती का हरिजन बि रामचन्द्र की छाया से दूर रौणै कोशिस करदा I रामचन्द्र तैं दलित हूणों अहसास बचपन से ही ह्वे जांदो अर कबि कबि त बालक रामचंद्र अपण छाया से दूर भाजि जावो कि कखि या छाया सवर्णो नि ह्वावों I पांच साल की अवस्था आंद आंद दलित रामायण मा रामचंद्र पचास दै सवर्णों अर बड़ी जातिक हरिजनों गाळी -मार - उलाहना खैक डमडमो -ढीठ ह्वे जांदो I
               दलित रामायण मा पांच साल को रामचन्द्र तैं खाणको स्वाद तो पता नि चौलल पण दलित हूणो अनुभव पूरो ह्वे जालो I जख बाल्मीकि रामायण मा रामचंद्र तै अक्षर ज्ञान सिखाणो बान महर्षि ,ब्रह्मर्षि ग्यानी ऐन उख दलित आधारित रामायण का रामचन्द्र "अछूत कहींका, दलित की औलाद , तू हरिजन है दूर हट; हम पर नही लग, हम स्वर्ण हैं तू शूद्र है ; हम कुलीन हैं तू नीच है ; हम शिर से पैदा हुए हैं तुम लोग पैर के अंगूठे से पैदा हुए हो " जन ज्ञान पांच सालुं मा बगैर उपाध्याय का ही सीखि लींदु . बल्मीकि का रामचंद्र गुरु वशिष्ठ  से ब्रह्म ज्ञान सिखद त दलित रामयण का रामचन्द्र जाती -व्यवस्था को पूर्ण व्यवहारिक ज्ञान बगैर गुरु का ही सीखी लीन्दो I   
   दलित की रामयण मा बालकांड ना भेद -भाव का काण्ड-खुब्या हूंदा  I
दलित रामयण में रामचंद्र का बल कांड भाग -2 में जारी ….
Copyright@ Bhishma Kukreti 14/8/2013

[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...]   

                          तंबाकू ब्यापार्युं हड़ताल

                     चबोड़्या -चखन्यौर्या -भीष्म कुकरेती


प्रजातंत्र मा सरीफ मनिख जैकि  जमीन जायजाद लुठे जावो वो रावो या नि रावो पण धुर्या मनिख को गलत सलत कामौ अधिकार पर जरा ठेस लगदी तो वो इन तड़कद जन बुल्यां ऐटम बम फुटि गे हो धौं ।
ब्याळि महाराष्ट्र का तमsखु   बिचण व़ाळुन हड़ताल त्यौहार मनायि अर मोर्चा लोक -नृत्य-गीत मा भाग ले । कै दिन मोर्चा लोक -नृत्य-गीत सामजिक अधिकार बचाणो   अर सामाजिक चेतना वास्ता प्रयोग हूंदा छा अब मोर्चा लोक -नृत्य-गीत अपण धौंस दिखाणो, अपण ताकत दिखाणो, हैंको अधिकार लुठणो, हैंको  मौतौ इंतजाम करणों, हम कथगा कमीना छंवां -या म्यरो ये क्षेत्र पर क्या रौब च यु दिखाणो बान प्रयोग करे जांद । वो दिन अब इतिहास का हिस्सा ह्वे गेन जब मोर्चा लोक -नृत्य-गीत एक पूज्य नृत्य -गीत माने जांद छौ अब त मोर्चा लोक -नृत्य-गीत एक स्वार्थ पूरक नृत्य -गीत माने जांद ।
अब बताओ महाराष्ट्र सरकारन तमाखु बिक्री कम ह्वावो को इंतजाम करणों बान खुले आम तमाखु बिचणो बाण कुछ नियम स्वीकृत करेन तो तम्बाकू विक्रेता सरकार से चिरड़े गेन , टोबेको सेलर्स सरकार से नराज ह्वे गेन कि लोगुं तैं कैंसर से मारणो लाइसेंस हम से सरकार  नि लूठि सकदी । तम्बाकू विक्रेता संघन मोर्चा घड्यळ उर्यायि कि स्वास  रोग से लोगुं तैं ज़िंदा लाश बणाणो  हमर संवैधानिक अधिकार नि छिने जावन । मोर्चा दिवता जात्रा, घड्यळम  अर भंडारोम जागरी इन जागर लगाणा छया -
जो तम्बाकु से लोगुं तैं मारणो  हमर मूल भूत अधिकार लूठल वै तै हम विधयाक जोग नि रखला । वीं सरकार तैं हम गिराए द्योला ।
जो तम्बाकू से लोगुं मा कैंसर फैलाणो हमर अधिकार पर ठेस लगालो वैकी गद्दी पर हम ढसका लगौला ।
लोगों को मारने का हमारा जन्म सिद्ध अधिकार हमें वापस कारो -वापस कारो ।
क्या ह्वाइ जो तम्बाकू सेवन से राज्य मा लाखों लोग मरणा छन पण तम्बाकू विक्री से राज्य को GDP तो बढ़णि च कि ना ? तो GDP क नाम पर - लोगो की हत्या का अधिकार हम तैं वापस कारो-वापस कारो ।
तम्बाकू विक्री समर्थक जागर्युं दलील छे कि हम हर साल कैंसर अस्पताल अर स्वास रोग चिकत्सालय तैं भीख दींदा हि छंवाँ तो फिर तम्बाकू से जन -हत्या रोकणै क्या जरुरत च ?
  प्रजातंत्र मा अब हम खुले आम हत्या करण तैं बि जन्म सिद्ध अधिकार माणदवाँ ।
प्रजातंत्र मा गैर सामाजिक कार्यों तै बि हम संवैधानिक अधिकार बथाण मा नि शर्मांदा ! उल्टां जो हम तैं गैर सामाजिक काम करण से रुकद वै तैं हर तरां से पिटण -चुटणो तयार रौंदा ।
जम्हूरियत पर एक दाग च कि संख्या का बल पर जबरन जम्हूरियत का जनाजा बि निकाळ सकदवां  ।
प्रजातंत्र की एक परेशानी  या बि च बल व्यक्ति हित का वास्ता प्रजासत्तात्मक रास्ता का बल पर   प्रजाहित , जनहित की हत्या बि कराये जांद ।
यो सबि माणदन बल शराब अर तम्बाकू समाज का वास्ता नुकसानकारी च पण राज्य मालगुजारी , राजस्व का नाम पर हम सब खुलेआम मनुष्य -बूचड़खाना बचाणा रौंदा उल्टां मनिखौं तैं काटणौ  बूचड़खानौ याने शराब अर तम्बाकू की फैक्ट्रियों तैं बनि बनिक इमदाद अर कर लाभ बि दींदा जाँ से तम्बाकू अर शराब की फैक्ट्रियां जादा से जादा सामजिक नुकसान कौर साकन । इथगा भयंकर विरोधाभास जनतंत्र मा इ दिखे सकद ।
पण जै प्रजातन्त्र मा संसद या विधान सभा तैं नि चलण  दीण अपण  मौलिक अधिकार ह्वावो अर संसद या विधान सभा चलाण दुसरौ कर्तव्य माने जांद उख खुलेआम , सब्युं समिण  जनसंघार करणों बान सत्याग्रह, मोर्चा बंदी , घेरा बंदी , हड़ताल तो   होलु ही । जै देस मा संसद मा सांसद द्वारा 'भ्रष्टाचार रोकणो  लोकपाल बिल' फाड़े जालो उख मनुष्य हन्ता, जनहत्यारा  तंबाकू निर्माता -तम्बाकू विक्रेता हड़ताल त कारल ही कि -हे सरकार ! तू हमारो मनुष्य हत्या को मौलिक अधिकार तैं नि छीनि सकदी , हे सरकार प्राणी -हत्या हमारो जन्म सिद्ध अधिकार च अर तू हमारो ये हत्या को अधिकार नि लूठी सकदी ।



Copyright@ Bhishma Kukreti 17/8/2013

[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...]

                                     प्याज ! त्यार कथगा रूप ?

                               चबोड़्या -चखन्यौर्या -भीष्म कुकरेती


   इतिहास बतांदो बल मनिख  पांच हजार साल पैल प्याज खाण सीखि गे छौ ।  इतियासकार बुल्दन बल सबसे पैल पाकिस्तान अर इरान मा प्याजै खेती पवाण लग ।  चीन मा पांच  हजार साल पैल प्याजौ सग्वड़ हॊन्दा  छा । पुरण जमन मा यूनानी (ग्रीक ) बि प्याज तैं दवा माणदा  छा ।
                     कबि प्याज गरीब -गुरबों खाणो छौ बल  एक जखेली प्याज मा चार रुटि खै ल्यावो ! इजिप्ट /मिश्र मा पिरामिड बणाण वाळ मजदुर कच्चो  प्याज अर मूळी मा रुटि खांद छया । मिश्र मा प्याज तैं पुजद बि छा ।
आज प्याज का भौत सा रूप ह्वे गेन अब प्याज गरीबुं से भौत दूर ह्वे ग्यायि । जु प्रेम भाव कबि छौ, प्याजौ वो प्रेम भाव अब गरीबों पर नि रै गे  ।
अब प्याज अमीरुं जीमणु   पंगत मा दिखेंद या काळो बजार्युं क्वा ठों या गोदानुं मा । प्याज अब एक रत्न ह्वे ग्यायि जै पर अब केवल धनी लोगुं कब्जा च ।
हाँ अब धनी लोग पंचकवल का रूप मा दीन -दुखी -कोढियूँ तैं प्याज दान /भीख दीन्दन ।
आजाद भारत का रानीतिक इतिहास मा प्याजकथा अब  पंचगीत कथाओं मा से एक कथा च - इमरजेंसी , दिल्ली मा जनता राज , एच डी देव गौड़ा प्रधान मंत्री बणण, बोफोर्स कांड अर मैंगु प्याज से भाजापा राज्य सरकारूं  पतन। प्याज वोट मापक यंत्र ह्वे ग्यायि। प्याज की कीमतुं  से पता   चलदो बल लोग कैं पार्टी वोट द्याला ।
              प्याज कमाण वाळ (पैदा करण वाळ ) प्रदेस खासकर महाराष्ट्र का प्याज ब्यापारी प्याज की कीमत उंद -उब कौरिक राज्य सरकारूं निंद खराब करणा रौंदन । प्याज अब एक खेल बि ह्वे गे जैमा गरीब लोग बगैर मौत का ही  मरणा रौंदन ।
              प्याज रुलांद च गरीबों तैं अर जैं पार्टी तैं प्याजौ कारण बोट नि मिल्दन । किसानुं तैं जो दिखदन बल हम तैं त पांच रुपया कीलो ही मिल्दन पण बजार मा साठ रूप्या कीलो प्याज बिकणु च ।
           प्याज हंसांद च केवल काळुबजार वाळु तैं अर बीचवाळ बणियों तैं ।
             हमार उदार आर्थिक नीति का यि कुहाल छन बल पैल हम एक रूप्या लेक थैला भर प्याज लांद छया अब थैला भौरिक रूप्या मा एक दाणि प्याज आंद  ।
            प्याज अब राजनैतिक -आर्थिक तांत्रिक विद्या  मा पंचचक्र च -प्याज राज चक्र, प्याज भंडारीकरण  चक्र , प्याज बिचौलिया चक्र , प्याज निर्यात चक्र , प्याज मंडी चक्र । हरेक चक्र मा कथगा इ चक्रव्यूह छन जै तै आम जनता पार नि करी सकदी । प्याज का भीतर उथगा परत (छुक्यल) नि होंदन जथगा  कृषक से आम जनता तक प्याज पौंछाणो बीच मा परत (बिचौलिया ) होंदन । हरेक छुक्यल इथगा मुनाफ़ा कमांदु कि जनता की टक अर कमर ही टुटि जांद ।
   प्याज अब केवल प्याज नि रै ग्यायी बलकणम प्याज अब संसद अर विधान सभा मा व्यवधान पैदा करण को माहामारी हथियार ह्वे ग्यायि प्याज अब संसद अर विधान सभा की कार्यवाही स्थगित करणों एक विध्वंसक आयुध ह्वे ग्यायि । राजनैतिक पार्ट्यु बान प्याज हुंकार च डुंकरताळ च । प्याजै कीमत आम जनता का बान हुंडन (सुन्न ) होणै  एक जहर च, जहरीला  अनेस्थिया च ।
         प्याज अब सामाजिक रुतबा पाणों एक आभूषण ह्वे ग्यायि जो प्याज खांदो वो ही मातबर माने जांद ।
          प्याज अब गरीबों बान हीण,छ्वाड़ -तीरौ  , दीन, तुच्छ , नाचीज , हूणो निसाणी च। प्याज आम मनिखों बान  कमजोर हूणो  सूचक च ।
               प्याज की बेलगाम बढ़दी  कीमत बथांद बल भारतंम  कुरज्या फ़ैलि गे । प्याज की कीमतों मा असामयिक वृद्धि सिद्ध करदी कि भारतम अधेरगर्दी को राज च । प्याज की अंदादुंद मूल्यवृद्धि बथांदि की हिन्दुस्तान मा काणा -अंधा -बहरा -संज्ञाशून्य  राज करणा  छन  ।
              जु प्याज की कीमतों तैं स्थिर नि कौर सकणा छन वु बेशरम , बेहया लोग खाद्य सुरक्षा की बात कौरिक आम लोगुं बीच बजार मा बेज्जती करणा छन ।
               जु प्याज जन आम खाद्य पदार्थ तैं आम खाद्य पदार्थ नि राख साकल वु क्या भारत तैं खाद्य सुरक्षा द्याल ?


Copyright@ Bhishma Kukreti 22  /8/2013






[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...]   

                      सन्  2113 मा हिंवल-गंगा संगम फूल चट्टी मा अग्यौ अर उपद्रव

                                   चबोड़्या -चखन्यौर्या -भीष्म कुकरेती           

         
              सन्  2114  सालम  भारतम आम चुनाव होला त इंडिया की हरेक स्ट्रीट 2113 में गृह युद्ध मैदान बणि जालो । चूंकि आन्दोलनकारी , आन्दोलन विरोधी अर आम जनता तैं अयोध्या मुद्दा से बिखळाण पोड़ि जाल तो राजनैतिक लोग  धर्म का नाम पर नया नया जगौं पर   धार्मिक विवाद खड़ा करि द्याला अर इनि एक निसुऴजण्या विवाद फूल चट्टी मा पैदा खड़ा कर दिए जालु । उन त बकै समय पर कुत्ता बि फूलचट्टी  तैं पुछणो नि आंदो पण जनि चुनाव नजीक आंदन हरेक रानीतिक दल पूंछ उठैक फूलचट्टी  तैं गृह  युद्ध का मैदान बणै दींदन। अब फूलचट्टी  भारत का राजनैतिक दलों कारण इथगा  प्रसिद्ध   ह्वे ग्यायि कि अमेरिका , अफ्रीका का पाठ्यपुस्तकों मा बि फूलचट्टी  विषय 'फूलचट्टी  एक आधुनिक युद्ध स्थल ' नाम से पढ़ाये जांद अब यूँ देसूं मा कुरुक्षेत्र का बारा मा नि पढ़ाये जांद किलैकि हिन्दुस्तान की साख गिराणो बान फूलचट्टी  जि ऐ गे ।

              अब जन कि सन् 2114 चुनावों साल होलु  त अवश्य ही 2113 उपद्रवों साल होलु । हमेशा की तरह अब फूलचट्टी  मा बि युद्ध का डंका बजि गेन । इन्टरनशनल हिन्दू ओर्गेनाइजेसन तैं याद आयि कि अबि बि फूलचट्टी  को विवाद तो सुऴजि नी च तो यीं संस्थान फूलचट्टीम बिखोती समौ पर जो फूलचट्टी  मादेव की परिक्रमा होंदी छे वीं परिक्रमा तैं सरादुं  बगत करणों निर्णय ल्यायि अर राज्य सरकार तैं बतै द्यायि कि हमन सरादुं टैम पर फूलपुर मादेव की परिक्रमा करण अर इन बि बथाइ बल या परिक्रमा हिंवल उद्गम स्थान चैलुसैण से  पौखाल, बगुड्या, गड़बड़ेथ, कटघर ह्वेक फूलचट्टी  पौंछलि  । उत्तराखंड मा समाजवादी पार्टी को राज च त मुख्य मंत्री विनोद बडथ्वाल  इन्टरनशनल हिन्दू ओर्गेनाइजेसन की परिक्रमा से बितकि गेन । बडथ्वालन घोषणा कार कि ईं परिक्रमा से उत्तराखंड का त ना पण हौर प्रदेश का मुसलमान भड़की जाल तो सरकार यीं परिक्रमा तै नि होण देलि ।
  सरा दुन्या का हिन्दू परेशान छन  कि फूलचट्टी  मा सरादुं मा क्यांक परिक्रमा ? अर हिन्दुस्तान का मुसलमान परेशान कि कैन ब्वाल कि हिन्दुस्तान का मुसलमान फूलचट्टी  मादेव की परिक्रमा से भड़की जाल ? मुसलमानों नेताओंन बयांन  बि देन कि पौड़ी गढ़वाल की ढांगू -उदयपुर , अजमेर , डबराल स्यूं , लंगूर पट्टीयूं  मा क्वी बि मुसलमान नि रौंद त हिन्दू लोग जु चावन सि कारन । पण समाजवादी पार्टी का विनोद बडथ्वाल तैं धार्मिक विवाद बढ़णो खतरा लग तो ऊंन सबि इन्टरनशनल हिन्दू ओर्गेनाइजेसन का नेताओं तैं जेलम बंद करि दे   अर अब वास्तव मा माहौल तनावपूर्ण ह्वे ग्यायि । इन्टरनशनल हिन्दू ओर्गेनाइजेसन का नेता त चांदा हि इ छा कि समाजवादी पार्टी की सरकार वूंकी परिक्रमा रोकन अर समाजवादी पार्टी बि चांदी छे कि इन्टरनशनल हिन्दू ओर्गेनाइजेसन परिक्रमा अर फूलचट्टी  की बात उठावन जां से समाजवादी पार्टी मुसलमानों खैरख्वाव पार्टी माने जावो । सब तैं पता च अब ऐ साल फूल चट्टी का नाम पर बहुत सा जगा धर्म का नाम पर अग्यौ अर उपद्रव जरूर होला ।
       पण ढांगु -उदयपुर का लोग आहत  छन कि वूंकी ज्वा  समस्या च वा तो पिछला पचास  साल से जख्या -क तखी च ।  असल मा जब बिटेन मोटर सड़क बणिन त  ढांगू -उदयपुर , अजमीर  , डबरालस्यूं , लंगूर पट्टीयूं  लोग अपण मुर्दा जळाणो फूलचट्टी आण बिसे गेन । पण फूलचट्टीम हमेशा से लखडु कमी रौंद त लोगुंन निर्णय ले कि इलेक्ट्रिक चिता दहन कक्ष बणये जावो । यूं पट्टीयूं  लोगुंन अपण गेडिन रूप्या देकि इलेक्ट्रिक चिता दहन कक्ष की पौ (आधार ) खोदि दे । यांकि  खबर इन्टरनशनल हिन्दू ओर्गेनाइजेसन अजमीर पट्टी  शाखा प्रभारी ऋषि कंडवाल तैं लग तो ऊँन घोषणा करी दे कि एलेइक्ट्रिक  दहन कक्ष याने हिन्दू धर्म को नाश ! अयोध्या आन्दोलन अब चलदो नि  छौ अर कृष्ण जन्म भूमि या बाबा विश्वनाथ मंदिर आन्दोलन मा कबि बि गर्मी नि आयि तो इन्टरनशनल हिन्दू ओर्गेनाइजेसन निराश बैठ्या छा ।  ये ऑर्गेनाइजेशन तैं फूल चट्टी माँ संभावना नजर आयि अर वूंन घोषणा कौरि दे कि वो औंसी रात इलेक्ट्रिक चिता दहन कक्ष की पौ (आधार ) तै ध्वस्त कौरि देला अर वै बगता मुख्य मंत्री सचिदा नन्द बडथ्वाल (विनोद  बडथ्वाल का बुबा जी ) न घोषणा करी दे कि इलेक्ट्रिक चिता दहन कक्ष की पौ (आधार ) तै ध्वस्त करणों अर्थ च कि अल्प संख्यकों की धार्मिक भावना को ठेस ! अर सचिदा नन्द बडथ्वाल की सरकारन इन्टरनशनल हिन्दू ओर्गेनाइजेसन का आन्दोलन कार्युं पर गोली चलवाइ दे । बस हिन्दू अर अल्प संख्यक समाज का मध्य तनाव पैदा ह्वे ग्यायि । तनाव न अंतर्राष्ट्रीय रूप ले ल्यायि अर पाकिस्तान का चार हिंदू परिवार पकिस्तान छोड़ि भारत ऐ गेन । अब फूल चट्टी राजनैतिक अर धार्मिक अखाड़ा बौणि गे ।

            जब बि आम चुनाव नजीक आंद इन्टरनशनल हिन्दू ओर्गेनाइजेसन फूल चट्टी मा कुछ ना कुछ आन्दोलन करद अर  विरोध मा इन्टरनशनल अल्प संख्यक ओर्गेनाइजेसन हैदराबाद , अलीगढ आदि जगा सरकारी बस फुकण मिसे जांदन ।
        बाइसवीं सदी मा असंख्य बदलाव ऐ गेन पण स्वार्थी राजनैतिक अर धार्मिक नेताओं को कुचक्र , कुचाल, कागरी (हीन ) रस्ता , कुराही , कुजंत्र , कुचर्या , नि बदल अर जनता यूँका जाळ मा फंसणि रौंद ।

Copyright@ Bhishma Kukreti 24/8/2013



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...]