MeraPahad Community Of Uttarakhand Lovers

                              स्कुलौ सिलेबस अर असलियत

                               चबोड़्या -चखन्यौर्या -भीष्म कुकरेती


 इख शहरम प्याज अब प्रागैतिहासिक चीज ह्वे ग्याइ अर इनि हाल राल त कुछ दिनुं मा इतियासौ किताबुं मा लिखे जालु बल कबि भारतीय प्याज बि खांद छा ।
सुन्दर काका ड्यार जायुं छ्यायि अर बौन कुछ ना कुछ भेजणि छौ जन चूड़ा -भट आदि । त मीन स्वाच बौ कुण बोलुं बल भट उट नि भिजण बलकणम द्वी चार दाणि प्याजक भेजि द्याओ ।
मि -समनैन बौ !
बौ -चिरंजी रौ !  ये कन बत्वार आइ तुम तिन्युं कुण ! ज्यु बुल्याणु च तुम तैं जिंदि खड्यार द्यूं ! 
मि -हैं ! क्या बुनी छे ?
बौ -अरे तेकुण नि बुलणु छौं । यी तीन काल छन जो ! द्वी नाती अर एक नातण ! युंकुंण बुलणु छौं ।
मि -क्या कार तौन ? उज्याड़ खलैक ऐ गेन क्या ?
बौ -उज्याड़ खलाणौ चिंता अब कख च ? उज्याड़ तब होंद जब खेती ह्वावो !
मि -त बच्चों तैं बीच दुफरा मा गाळी ?
बौ -अरे तिनि स्कूल बिटेन अबि ऐन । आज यूंक छ्मै परीक्षा का  परिक्षा पत्र लेक ऐन।परीक्षा मा अंट-संट लेखिक ऐ गैन !
मि - हैं ! अंट संट ?
बौ -हाँ । सवाल छौ "प्रतिपक्ष राजनैतिक दल की भूमिका पर अपने विचार लिखें  "। त स्यु बड़ लेखिक ऐ ग्यायि " प्रतिपक्ष की केवल एक ही जुम्मेवारी होती है कि संसद ना चले और हमारे देश का प्रतिपक्ष यह भूमिका भली भाँती निभा रहा है ।"
मि -ल्याख त वैन सही च !
बौ - क्यांक सै ल्याख ! किताबुं सिलेबस मा त कुछ हौरि लिख्युं च ।
मि -हैंकान क्या कार ?
बौ -प्रश्न छौ " भारत का राष्टीय खेल क्या है और  उसका हमारे देश में क्या महत्व है ?"
मि -त हैंक नातिक  जबाब क्या छौ ?
बौ -वैन लेखि दे "बल  हमारा राष्ट्रीय खेल इन्डियन प्रीमियर क्रिकेट लीग है ।जिसमें क्रिकेट के अतिरिक्त सट्टा (बेटिंग )   खेल भी साथ में खेला जाता है जिसमे जनता , लीग मालिक, फ़िल्मी हस्तियाँ और खिलाड़ी बड़े मनोयोग से भाग लेते हैं ।
मि - बात  त सै च !
बौ -ह्यां पण किताबुं सिलेबस मा त लिख्युं च बल हॉकी राष्ट्रीय खेल च ।
मि -अर नातणन क्या ल्याख ? 
बौ - प्रश्न छौ " संयुक्त परिवार के लक्षण बताइए " ।
मि -नातणन क्या जबाब दे ?
बौ -वीं नर्भागणन लेखी दे कि पत्येक सयुंक्त परिवार मा एक बुडड़ि हूंद जैं तैं 'बा' बुलदन , एक  तीन बड़ा बच्चों की माँ होंदी ज्वा पन्दरा सोळा  से बड़ी नि दिख्यांदी । संयुक्त परिवार का प्रत्येक सदस्य एक दुसरौ पीठ पर छुर्रा भोंकण म लग्युं रौंद ।
मि -हैं ?
बौ -हाँ अर ईं निर्भागणन उदाहरण बि देंन। जथगा बि टीवी सीरियल चलणा छन वूंक उदाहरण देकि ईन सिद्ध कौरि  बल संयुक्त परिवार मा  हर समौ हल्दी घाटी की लड़ाई या महाभारत हि चलणु रौंद ।
मि -पण यी बात कखन लेखि यूं बच्चों न ?
बौ -टीवी देखिक अर क्या !
मि -ये मेरी ब्वे !
बौ -चुप रावो ! बिंडी उदाहरण देल्या त गुदुल फ़ोड़ि द्योल हाँ !
मि -क्या ह्वाइ ?
बौ -अरे गां का हौरि स्कुल्योंन क्या ल्याख वांक बात बथाणा छन !
मि -क्या हौर बच्चोंन बि इनि कुछ उत्तर दे ?
बौ -हाँ इनि जन अजीब अजीब उत्तर !
मि -जन कि ?
बौ -जन कि सवाल छौ बल भारत मा प्रधान मंत्रीक  चुनाव कन हूंद त एकान लेखि दे बल कौंग्रेस का प्रधान मंत्री सोनिया गांधी क मर्जी से बणद अर बीजेपी क प्रधान मंत्री राष्ट्रिय स्वयं संघ निर्धारित करद अर बकै टॉस पद्धति से  !
मि -पण इखमा गलत क्या च ?
बौ -अरे पण किताबुं मा इन नि लिख्युं च । स्कूलूं सिलेबस को हिसाब अर असलियत मा अंतर हूंद अर बच्चों तैं असलियत छोड़ि सिलेबस का हिसाब से ही उत्तर दीण जरुरी च ।
मि -अब क्या करलि तू ?
बौ -जन हर दफां करदु अर क्या !
मि -क्या ?
बौ -मास्टरों तैं प्रति स्कुल्या हजार रूप्या देलु अर बच्चों मार्क्स ठीक करौलु !
अब जब  शिक्षा की गंध -बॉस की छ्वीं लगणि ह्वावो  त प्याज को छौंका मरणो तुक नि होंद अर मीन फोन काटी दे ।

Copyright@ Bhishma Kukreti 26/8/2013



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...] 

नीचानगर  !

                       चबोड़्या -चखन्यौर्या -भीष्म कुकरेती
            हिंदी सिनेमा को नामी निर्देशक चेतन आनन्द भौत पुराणि फिलम छे 'नीचा नगर '। यीं फिलम मा चेतन आनन्दन एक नयो प्रयोग कौरि छौ बल जब बि कै बड़ो -धनी मनिखौ डायलौग ह्वावन तो कैमरा तौळ रौंद छौ जां से वो उच्चु मनिख उच्चु दिख्याओ । फिर जब बि क्वी निम्न वर्ग को चरित्र ह्वावो त कैमरा मथि रौंद छौ जां से चरित्र छुट दिखाये जावु । यांक आलावा जब बि निम्न अर उच्च वर्ग का द्वी चरित्र इकदगड़ि ह्वावन त उच्च चरित्र थोड़ा मथि खड़ो रौंद छौ अर निम्न चरित्र कम उंचाई पर खड़ो रौंद छौ । फिल्मांकन से उच्च अर निम्न वर्गीय भेद बथाणो नायाब कौंळ ( कला ) , ब्यूंत (शैली , तरीका ) छौ ।
  परसि यमकेश्वर बिटेन गढ़गौरव का सम्पादक शैलेन्द्र थपलियाल जीक  फोन आयि - भीषम जी चुंकि अब जनान्युंम कुटण पिसणो काम नी च त अखबार बंचणा रौंदन अर अच्काल जनान्युं मांग च बल मनमोहन सिंह जी पर कुछ ल्याखो । पण इन ल्याखो कि कबि कैमरा तौळ हो त कबि कैमरा मथि हो ।
मीन ब्वाल -थपलियाल जी फिलम हूंदी त मि एक दै मनमोहन सिंह जीक फोटो धार मा धौरि दींदु अर कैमरा तौळ अर दुसर दै मनमोहन जी तै गदन बिठा दींदु अर मथि धार मां कैमरा धौर दींदु।
थपलियाल जीन बोलि बल - आप हि देख ल्यावो कि क्या करण पण मनमोहन जीक चरित्र दर्शांद दै नीचा नगर जन प्रयोग हूण चयेंद ।
अब सम्पादकों अर सेठ लोगुं क्या जाणु च बोलि दीन्दन इन हूण चयेंद त बस हूण चयेंद ।
       मीन स्वाच बल मनमोहन जीक गाह , पंजाब पाकिस्तान मा जनम लीण से लेक वित्त मंत्री बणन तक की यात्रा दिखांद दै कैमरा तौळ इ रालो बल एक गरीब घर को नौनु ऑक्सफोर्ड बिटेन अर्थ शास्त्र मा डॉक्टरेट कारो त कैमरा तौळ ही राल अर मनमोहन जीक जात्रा डाँडो मा इ दिखाए जालि । मनमोहन जीक संयुक्त राष्ट्र मा काम करद दै बि कैमरा तौळ ही रालो अर मनमोहन जी अळग धार मा इ हिटद दिखाए जाला । फिर मनमोहन सिंह जीक रिजर्व बैंक ऑफ इंडिया को गवर्नर बणद दै बि कैमरा भ्यूं रालो अर मनमोहन सिंह जी मथि रिजर्व बैंक ऑफ़ इंडिया क बिल्डिंग मा चढ्या राला । कु भारतीय मनमोहन सिंह जी से प्रेरणा नि लीण चालो कि एक गरीब घर कु नौनु बि रिजर्व बैंक कु गवर्नर बौण सकुद च ? मनमोहन सिंह जी जब वित्त मंत्री क शपथ लींद दिखाये जालो तबि बि कैमरा तौळ रालो अर मनमोहन सिंह जी डांड मा राला । फिर कैमरा मथि डांड मा जालो अर दिखाए जालो कि जब मनमोहन सिंह जी न शपथ ले छे त भारतीय अर्थ व्यवस्था मृतप्राय: अवस्था मा छे , डाक्टरोंन आस छोड़ि दे छे अर सरा भारतवास्युं  टक -निगाहें प्रधान मंत्री नर  सिम्हा राव अर वित्त मंत्री मनमोहन सिंह जी पर छे ।
  फिर कैमरा तौळ चली जालो अर मनमोहन सिंह जी रिफौर्म को झंडा लेकि एवरेस्ट मा चढ्या छन अर शायद मनमोहन सिंह फिलम को यो ही भागचमकीला -गर्वीला भाग होलु । कैमरा तौळ होलु अर भारतीय उच्चा डाँडुं माँ इम्पोर्टेड पेन्सिल , इम्पोर्टेड रबर, इम्पोर्टेड रुमाल , आयतित बंडी , आयातित सिगरेट , इम्पोर्टेड  गणेश जी की मूर्ती , इम्पोर्टेड माटो द्यु लेक खुश छन । कैमरा तौळ अर पहाड़ों मा विदेशी मैग्जीनो मनमोहन सिंह जी की बडै का बैनर लग्याँ छन । कैमरा तौळ अर भारतीय डांड मा खुस कि विदेशी लोग मनमोहन सिंह जीक प्रशंसा करणा छन ।
    अर जब मनमोहन सिंह जी प्रधान मंत्री बणिन त मि कैमरा तौळ ल्हीगो कि मनमोहन जी उच्चा दिख्याला पण कुनगस कखि मनमोहन जी नि दिख्याणा छया बस सबि डाँडु मा सोनिया गांधी या राहुल गांधी दिख्याणा छ्या ।प्रधान मंत्री कुर्सी उच्चि जगा मा छे पण कैमरा की पकड़ माँ केवल छाया बैठिं छे अर कुजाण किलै वा छाया बि सोन्या गांधी की छाया हि दिखेणि छे । मनमोहन सिंह जीक गंध -बॉस प्रधान मंत्री कुर्सी नजीक बि नि छे। मीन अपण कैमरा लाल कृष्ण अडवाणी जी अर दिग्विजय सिंह जीम बि दिखायि पण कैमरा मा सोनिया गांधी
की ही परछाईं दिखे ।
 मीन कैमरा भारतीयों जिना  घुमा तो ऊंक क मनसा छे कि प्रधान मंत्री त प्रधान मंत्री हूंद वो क्वी क्लर्क नि होंद । भारतीयुं  मन मा प्रधान मंत्री माने सर्वे सर्वा पण म्यार कैमरा मनमोहन सिंह जी तैं पकड़ी नि सकणु छौ जो मनमोहन सिंह जी तैं प्रधन मंत्री सिद्ध कारो ।
म्यार कैमरा मंत्री परिषद की बैठक मा बि ग्यायी तो उख बि प्रधान मंत्री क कुर्सी मा सोनिया गांधी की छाया बैठिं छे । मनमोहन सिंह जी कखि नि दिख्यायि । लोक सभा अर राज्य सभा मा म्यार कैमरान मनमोहन सिंह जीक फोटो ले पण वा फोटो एक लाचार मनिखौ फोटो छे उखमा कखि बि प्रधान मंत्री की अनवार नि छे ।
भारतीयों हिसाब से भारत तैं इमानदार मंत्री , बेदाग़ मंत्री चयान्दन अर ये हिसाब से म्यार कैमरान मनमोहन सिंह जी तैं इमानदार पायी पण एक इमानदार प्रधान मंत्री का अधिसंख्य दागी मंत्र्युं क्लास लीणु अर मंत्री छन कि बेलगाम हुयां छन । म्यार खुफिया कैमरा मा उल्टां भौत सा मंत्री प्रधान मंत्री तै दनकाणा छ्या ।
म्यार कैमरा मा एक भारतीय प्रधान मंत्री दागी मंत्र्युं दाग लुकांद पाए गे ।
म्यार कैमरा मथि डांड गे त कैमरा तै मनमोहन सिंह जीक प्रधान मंत्रित्व काल मा सामजिक मूल्यों , सार्वजनिक -राजनैतिक -प्रशासकीय मूल्यों माँ गिरावट ही दिख्यायि अर इथगा गिरावट तो भारतीय इतिहास मा कबि नि दिखे गे छे । देश की संपदा  की लूट खसोट अपण चरम सीमा पर छे । भारतीय उत्पादन उद्यम की जगा बिचौलिया उद्यम की जादा मांग दिख्याणि छे।
जै रिफोर्म की  जै जैकार हूणि छे वै ही रिफौर्म की थू थू हूणी छे । अर म्यार कैमरा समिण एक बैनर छौ जैमा लिख्युं छौ - रिफौर्म करणाइ त भारत को हिसाब से कारो , उधार-पगाळ को विचारों  से रिफौर्म नि होंद। म्यार कैमरा मा मनमोहन सिंह जी एक अर्थ शास्त्री को हिसाब से बि  निम्न वर्ग मा हि दिख्याणा छया ।
म्यार कैमरा मा भारत नीचानगर सि दिख्याणु छयो अर वै  नगर मा नीच प्रवृति की तादात बढ़णि छे !




Copyright@ Bhishma Kukreti 28/8/2013



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...]   

सैकड़ो साल पुरण बौड़ौ डाळ कटि गै

                                                    भीष्म कुकरेती


              म्यार ददा बुल्दा छा बल यू बौड़ौ डाळ म्यार बूड ददा का पड़ददा का बि पड़ ददा से बि पैल बिटेन इखम छौ।  इखमा ददि ददा तैं दनकांदि छे बल सीधा ब्वाला ना कि गां बसण से बि पैल यु बरगदौ डाळ इखम छौ।
ब्याळि वू ऐन अर ये सैकड़ों साल पुरण बौड़ौ डाळ, कथगा हि ग्वाळ ( तना ) वाळ डाळ काटि चलि गेन। 
यु बट वृक्ष नि कट हमर गांवक पछ्याणक, हमर गौं विशेषता हि कटि गे।  हमर गाँवक नौं हि बौड़ तौळक गाँ छौ अब बौड़ कटे गै त हमर गौंवक  नौ बटबिहीन गौं त नि ह्वे जालु ?
 सैकड़ों साल पैल जु कीड़-मक्वड़ ये बौड़म  ऐ होला अर अब उंकी नसल जो ये बौड़ पुटुक पऴदि -भरदि छे उ कख जाला ?
सैकड़ों किसमौ कीड़-मक्वड़ अलग अलग किसमौ चखुलों तै आकर्षित करदा छा अब जब वो कीड़ नि छन त क्या म्यार गाँ मा अलग अलग किसमौ चिड़िया आलि? अर आलि बि त जब बौड़ नि द्याखल त क्या वु  चखुलि निरस्याल ना ?
जु ये बौड़ का वासिंदा चखुल छया वु अब कख जाला ?
जु अलग अलग समौ पर चीन -रूस बिटेन प्रवासी पंछी आंदा छा , अपण घोंसला बणान्दा छा , बच्चा जणदा छा अर फिर छुट छुट बच्चों तैं लेकि रूस -चीन का तर्फां उड़ि जांदा छा। बौड़ डाळ ऊँ प्रवासी परिंदों कुण प्रसूति गृह बि छौ अर बालबाड़ी बि छौ।  अब कख अपण घोल बणाला ?
वै बरगदौ परताप हमर गां मा सुबेर चार बजे से लेकि रात आठ बजि तलक अलग अलग तरां कि चखुलों बसणो संगीत बजणु रौंद छौ अब हम कखन वो प्राकृतिक संगीत सुणला ?
हर मौसम मा कुछ चिड़िया बदल्यांद छा अर हम तै अलग अलग मौसम मा अलग अलग चखुलुं अलग अलग गीत -संगीत सुणणो मिल्दु थौ अब कखन हम वै संगीत सुणला ?
हमर कथगा इ रिस्तेदार त ख़ास मौसम मा हमर गां इलै आंदा छा कि वो नया नया चखुल देखि साकन।  क्या वो रिस्तेदार अब बि हमर गां आला ?
ये बरगदौ पेड़ तौळ हमर संस्कृति बि पळदि छे -पुसदि छे।  अब कखन हम वीं संस्कृति तै वापस लौंला ?
ये बौड़ डाळौ बगल मा मथै सरा गां कौंक बुसड़ अर लखुड़ु कठघळ छया।  कीट -पतंगों-पंछियुं   कुण बरगद, बुसड़ अर लखुड़ु कठघळ बसेरा अर खाणकौ अटूट समीकरण बण्यु छौ अब वो समीकरण टूटि गै त हमर गांवक वातावरण नि बदल्यालु ?
ये बरगद क ठीक तौळ बीस पचीस उर्खयळ छया जख हमर गांवक सबि जनानी सटी , कौणि , झंग्वर कुटदा छा । भौत सा चखुल इन्तजार मा रौंदा छा कि जनानी कुटणो आवन अर वो उर्ख्यळो आस पास चुग्गा चुगन ! सुबेर घाम आंदी कुटणो आवाज अर चखुलुं बसणम एक प्रतियोगिता शुरू ह्वे जांद छे।  पता नि चल्दो छौ चखुलुं बसणम जादा मजा च कि कुटणै आवाज मा जादा मजा च।  अब बरगदअ  पेड़ कटे गे त मनुष्य अर पक्षियों बीच जो सामजस्य बण्यु छौ वै प्राकृतिक सामंजस्यौ क्या ह्वाल ?
ये बौड़ तौळ बच्चों प्ले ग्राउंड बि बणि गे छौ जख सैकड़ों साल से बच्चा खेल खिल्दा छा ? अब बच्चों कुण नयो प्ले ग्राउंड कु बणाल?
हमर गोर बछर , कुत्ता, बिरळ  बि छैलौ  बान दुफरा मा ये बरगदौ डाळ तौळ बैठि जुगार लींदा छा। 
ये  बरगदअ  तौळ पथर घिसे घिसेक अफिक बैठक बणि गे अर सैकड़ों साल से बैक , बड़ा छुटा इखम उठदा- बैठदा  छया।  इख तलक कि पंचैत बि इखमि बैठदि छे।  ब्यौ बरात्युं कुण फौड़ बि इखमि बौड़ से हटिक  दस गज दूरम   पकदो छौ।   अब कखम लोग छैल लाला अर कखम दगड़ि  बैठला  ?
 अब यू बौड़ कटि गे।  सैकड़ो साल बिटेन जु गांवक इतिहासौ गवाह छौ , जो हमर गांवक विरासतौ पोषक छौ वो ब्याळि काट दिए गे।
मोटर सड़को रस्ता मा यू डाळ आणु छौ त यू बौड़अ  कटे गेयि।
पण दस मीटर तौळ बि त मोटर सड़क जै सकदी छे ?
अब ये बौड़ तै जळैक क्वीला बणल। क्वीला बिचे जाला  अर वै पैसा से आधुनिक सुविधा संपन एक अति आधुनिक पंचैत घर बौणल।  सैकड़ों साल की विरासत जळैक विकास अर आधुनिकता लयाणि च ।     
     




Copyright@ Bhishma Kukreti 30/8/2013

फेस बुक की लाइक्याण ( Like की गंध /बास )

                   चबोड़्या -चखन्यौर्या -भीष्म कुकरेती

   अब  फेस बुक इन यथार्थ ह्वै ग्यायि कि परसि एक ब्यौ मा मेरि ब्वै सब्युं समिण बुलण बिसे ," म्यार भीषम त मि तैं फंड धुऴयुं समजद।"
   भुंदरा बौन बोलि ," ए जी ! क्या बुलणा छां ? भीषम त तुमकुण इथगा चीज लांदु, ; इख तलक कि तुमर बान अपण घरवळि  दगड़ लडै झगड़ा तक करदु !
ब्वेन बोलि," यि सौब दुनिया तैं दिखाणौ ढ़ोंग छन।  मि तै भलु माणदु त मि तैं फेसबुक मा Like नि करदो।  तीन साल बिटेन सार लग्युं छौं कि म्यार भीषम मि तैं Like कारल पण दुन्या तैं रोज Like करदो पण मेकुणि वैक Like हर्चीं छन। सी कथगा इ नौन छन रोज अपण ब्वे तैं पिटदा छन , धमकांदा छन पण  फेसबुक पर रोज दस दै अपण ब्वे तै  Like करदन।  इन ह्वाइ 'लौ बाणी' (अच्छा चरित्र ) का नौन !
अब हरेक मा की ख्वाइस होंद कि वींक नौना -नाति -नातण वीं तै फेसबुकम हर दै Like कारन !
पंडि  जी बि फेस बुक की Like की अहमियत पछ्याणि गेन अर अब वो ब्यौ मा सात फ्यारा नि लिवांदन बलकणम अब ब्यौ मा अठौं फेरा लिवांदन।  अठौं फेरा मा ब्योला तैं कसम खाण पुड़द ," अब जब तू मेरी अर्धांगनी बन जायेगी तो मै फेसबुक या अन्य सोसल ग्रुप में सदा हर समय तुझे Like करूंगा। "
फेस बुक की Like अब हमर भाषा मा कथगा इ आण -पखाण , मुहावरा लै गै।  सि परसि घना काका  अर सुंदरि  काकि मा तून लगि गेन।
घना काका -त्वे पर रति भर की बि तमीज नी च।   त्यार सवर देखिक त क्वी बि  त्यार हथन पाणि बि नि प्यालु।
सुंदरि काकि -अरे तुम कुण इ मि फंड धुऴयूँ छौं।  जरा फेस बुक मा जावो त सै त पैल्या कि अमेरिका , रूस , जापान क्या चीन का छ्वारा बि मि तैं प्रेम से Like करणा रौंदन अर दगड़म रसीला कमेंट्स बि भिजणा रौंदन।
फेस बुक की Like अब सामाजिक पद, सामाजिक रूतबा , सोसल स्टेटस कु चिन्ह , सिम्बल बणि गे।
अब नौनि अपण दगड़्याणियुं तैं इन दनकांदन ," तु क्या मेरी बरोबरी करिल ? मीम फेस बुक मा पांच हजार परमानेंट , दस हजार टेम्पोरेरी Like करण वाळ छन। "
अब फेस बुक का Like तुलना करणौ माध्यम ह्वे गे ।
कैं सभा मा कै बड़ आदिमौ परिचय इन दिए जांद ," श्री खुंखार सिंग जी परिचय का मोहताज नि छन।  रोज फेस बुक पर हजारों संख्या मा खुंखार सिंग जी कुण Like आणा रौंदन।  "
अब मृतक तैं श्रधांजलि इन दिए जान्दि ," स्वर्गीय घपरोऴया जीम कार , मकान, चमचौं फ़ौज सब त छैंइ छौ दगड़म ट्वीटर अर फेस बुक पर लाखों Like करंदेर बि छया। 
अब साहित्यौ आलोचना मा इन लिखे जांद , " भीष्म कुकरेती तैं अब आलोचना करण बंद करि दीण चयेंद।   यद्यपि भीष्म कुकरेती न ब्रह्मा नन्द ध्यानी की कवितौं बुरी तरां से आलोचना कार , काट कार पण आलोचना से क्या हूंद ब्रह्मा नन्द ध्यानी का भंडार मा अबि   तलक अड़तालीस हजार Like छन। उना भीष्म कुकरेती ब्रिजेन्द्र सिंह की कवितौं इथगा बडै करदन पण आज तक इथगा सालुं मा ब्रिजेन्द्र सिंह को फेस बुक भंडार मा केवल दस Like इ छन।   "
Like अब एक पुण्य जन धन च।  Like जळण या  इर्ष्या को माध्यम बि बणि गे अर एक अपण दगड़्या क Like से जळिक इन बोदु ," साला घर से नगा है अर अपण फेस बुक का Like संख्या पर इथगा घमंड करुद जन बुल्यां मुकेश अंबानी ह्वालु  ! "
Like शंका बि लांदु।  एक बेटी क मंगतेर  बुबा फेस बुक की Like पर इन बुलुद ," हां छ्वारा तैं फेस बुक मा Like करण वाळ त सैकड़ों छन।  पण क्या सचमुच मा यू नौनु इथगा मयळ होलु ? कखि मेरी बेटि अणभरवस त नि होलु ?"
Like से पैदा हूण वाळ दैन्य , हर्ष , आवेग , विषाद, उग्रता , चिंता , श्रम , उन्माद आदि भावों से अब ब्लड प्रेसर अर हार्ट अटैक की बीमारी बि बढ़णा छन। 
जब कैक फेस बुक मा Like कम ह्वावन तो वो मन मारणो बान अपण मन तैं समजांदु ," फेस बुक का Like माया च , मोह च , मिथ्या च , झूठ च ।  "   
 



Copyright@ Bhishma Kukreti 1/9/2013



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...] 

                      भूतूं ब्यथा-कथा

                     चबोड़्या -चखन्यौर्या -भीष्म कुकरेती
                                                 

एक भूत - वेरी डेड इवनिंग
दुसर भूत -वेरी डेड इवनिंग  टु यूं टू
भूत १- क्या बात त्यार मुक सुज्युं च दिन मा निंद नि आयि ?
भूत २- अरे ये कलजुग मा इ मनिख ना त आफु  चैन मा छन अर ना हि हम भूतुं तैं चैन से सीण दींदन।  त्यार क्या च ! तु त भांगै गोळि खैक फकोरिक से जान्दि त त्वै क्या पता आज दिनम इख श्मशान  पर क्या क्या स्वांग , कना -कना नाटक ह्वेन !
भूत १- अरे भै जब श्मशान स्थल पर बि यि मनिख कुत्ता -बिरळो  तरां लड़दन त इन मा निंद आन्दि नी च त मि भंगुल पेक से जांदु।  अछा बथादि कि आज दिनम क्या ह्वाइ जो त्वै तै निंद नि आयि ?
भूत २ - हूण क्या छौ ! एक बुडड़ि क डेड बौडी आयि त वींक चार नौनु मादे क्वी बि मुंड मुंड्याणो तयार नि छौ
भूत १- किलै क्वी बि अपण ब्वे कुण मुंड्याणो तैयार नि ह्वे ?
भूत २ - अरे हरेक बुलणु कि मीन ब्वे पर सबि भायुं से जादा खर्च कार त मि किलै मुंड्यौ ? हरेकक अपण ब्वे पर कर्युं खर्चाक बही खाता लेक आयुं  छौ।    पट्ठोंन एक सर दर्द की गोळि क बि हिसाब लिख्युं छौ। चार घंटा तलक मुर्दा बिचारि घाम मा सुखणु राइ , इख तलक कि  जादा से जादा मड्वै  मुर्दा तैं बगैर लखड़ दियां वापस चलि गे छा पण यूं चार भायुं झगड़ा नि निपट। 
 भूत १- फिर क्वी नि मुंड्याइ? बिचरि ! बरखी  बाद हमर  दगड़ भूतुं गाणी मा ऐइ  जालि !
भूत २ - ना फिर ऊंन अपण मुंडीतौ एक गरीब तै पैसा  देक  पटाई अर फिर वो वीं बुडड़ि कुण मुंड्याइ   अर वी ध्याड़ी (दैनिक वेतन ) हिसाब से क्रिया मा बि बैठल।   
भूत १- अब बथावो ध्याड़ि (दैनिक भत्ता ) पर मृतक  -क्रिया मा भुर्त्यौ बैठणो दिन बि ऐ गेन। या त एक मुर्दा बात ह्वे त तू बुनु छौ सरा दिन भर काईं काईं हूणु राई ?
भूत २ -हाँ एक हैंक मुर्दा आइ  त वु पुरुष मुर्दा तीन घंटा तलक घाम मा सुकणु राइ अर तीन भाई लड़णा रैन। इख तलक कि तिन्युं मा हाथा -पाई बि होइ।  पुलिस आयि त तौंकि हाथापाइ -मारामारी बंद ह्वे।   
भूत १- कनो क्वी बि नौनु अपण बुबाकुण मुंडेणौ तयार नि ह्वाइ ? क्या तौं तैं मृतक-क्रिया मा बैठणौ भुर्त्या नि मील ? 
भूत २ -नै रे नै ! हरेक नौनु चाणो छौ कि वु बुबाक बान मुंड्यावो अर केवल अर केवल वु इ मृतक क्रिया मा बैठो ! 
भूत १- वाह ! क्या आज ये कलजुग मा इन बुबा प्रेमी पुत्र पैदा हूणा छन ?
भूत २ -ना रै ! बुबा प्रेमौ बान वो नि मुंड्याण चाणा छा।  बलकणम बात कुछ हौरि छे।   
भूत १- क्या ?
भूत २ -वो क्या च ! बुड्या मोरद दै बोलि ग्यायि कि जु पुत्र वैक बान मुंड्याल अर मृतक -क्रिया मा बैठल वै नौनु तैं फ़्लैट को अतिरिक्त स्टोर रूम मीलल ! 
भूत १- औ त स्टोर रूमौ बान सबि भाइ बुबाकुण मुंड्याण चाणा  छा अर मृतक -क्रिया मा बैठण चाणा छा।   
भूत २ -हाँ ! निथर क्वा च अचकाल जो ब्वे बुबौं बान मुंड्याणु ?
भूत १- फिर कु मुंड्याई ? कैन लगाइ चिता पर आग ?
भूत २ -कैन बि ना !
भूत १- त ?
भूत २ -त क्या जब तिन्युं मा मारामारी -हाथापाई ह्वे अर पलिस आयि त पुलिस केस बणी गे अर अब केस न्यायालय मा चलि गे कि स्टोर रूम कै तैं मीलल।
भूत १- अरे पण चिता पर आग कैन लगाइ ?
भूत २ -कैन लगाण छौ ? पुलिस का एक सिपाहीन चिता पर आग लगाई अर क्या ?
भूत १- हाँ ! हम भूतुं मा एक आण (मुहावरा ) च बल -भायुं  झगड़ा मा पंच  कुखड़ खावन  अर परधान बुगठ्या  !
भूत २ - हाँ
भूत ३- वेरी डेड इवनिंग टु आल ! अरे यूं मनिखों क क्या ह्वाल ?
भूत १- औ त बिजि गेवां ?
भूत ३- अरे बिजिक बि क्या फैदा ? वो हमन सोचि छ्यायि कि चूंकि यु श्मशान हम लैक नि रै ग्यायि त हम अब शहरी श्मशान छोड़ि ग्रामीण श्मशान मा  डाळळा।  वांक क्या ह्वाइ ?
भूत २- हाँ यार जथगा जळदि ह्वावो हम तै शहर छोड़ी   ग्रामीण श्मशान चलि जाण चयेंद !

-----------------------------------------------------------------------------------------------
कल पढिये कि भूत शहरी श्मशान छोड़ ग्रामीण श्मशान क्यों जा रहे हैं ?

Copyright@ Bhishma Kukreti 3/9/2013



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...]