MeraPahad Community Of Uttarakhand Lovers

                                        भीषम ! जरा ये रूंद नौनु तैं हँसै दे

                                        चबोड़्या -चखन्यौर्या -भीष्म कुकरेती

     
(s =आधी अ  = अ , क , का , की ,  आदि )

जु म्यार स्कूल या कॉलेजो दगड्या छन या म्यार गांवक पुरण लोक छन वु म्यार आजौ तीन चरित्र देखिक खौंळे जांदन कि मि चेन स्मोकर छौं , मि शराब बि पींदु अर सबसे बड़ी खौंळेणै बात च बल मि व्यंग्य लिखुद।
  सबसे जादा आश्चर्य म्यार दगड्यों तैं म्यार व्यंग्य लिखण पर हूंद।  वूंक बुलण च बल जो साम्यवादी , असलियतवादी साहित्य को प्रेमी ह्वावो वो हंसोड्या साहित्य लेखि नि सकुद।
जादातर लोग समजदन कि व्यंग्य साहित्य  हास्य साहित्य हूंद।
अधिकतर लोग समजदन कि मि महमूद या कपिल शर्मा जन हंसांदु।
 तबक छ्वीं छन मुंबई मा गढ़वाली समाज मा अफवाह फैलि गे कि मि हास्य -व्यंग्य लिखुद बस लोगुं मांग शुरू ह्वे गेन कि मि जोक्स सुणौ !
एक दिना बात च , मि सड़क क्रॉस करणु छौ कि समिण पार सैन सिंगन मै देखि अर  खत खत हंसण बिसे गे।  लोगुन समज वै पर पागलपन को दौरा पड़ि गे।
मी सैन सिंगम पौंछु अर पूछ - ये भै सैन सिंग क्या ह्वाइ भै ?
सैन  सिंगन और जोर से हंसद हंसद ब्वाल - ओ भैजि ! तुम तैं देखिक ही हंसी ऐ जांद , ही ही ही .... ।
मीन अपण कपड़ों पर ध्यान दे तो कपड़ा साधारण ही छा।  तो मीन पूछ- कनो क्या ह्वे ग्यायि ?
सैन  सिंग की हंसी बंद नि होणि छे , हंसद हंसद वैन जबाब दे - मीन सूण बल तुम गढ़वाळी मा जोक्स  लिखदा बल ! ही ही ही .... । जरा एकाद जोक त सुणाओ।  ही ही ही .... ।
 मीन बड़ी मुस्किल से सैन सिंग तैं समजाई कि मि व्यंग्य लिखुद ना कि जोक्स।  सैन सिंगs हिसाब से व्यंग्य अर जोक्स मा क्वी अंतर नी च।
एक दैं एक पछ्याण वाळ म्यार ड्यार ऐन अर बुलण मिसे गेन बल - भीषम यार ! मि उना कखि जाणु छ्यायि कि स्वाच कि चलदा चलदा गढ़वाळी जोक्स बि सूण ल्यूं।  जरा एकाद बढ़िया गढ़वाळी जोक्स सुणै दे।  दिखला कि गढ़वाळी अर हिंदी जोक्सुं मा क्या अंतर हूंद धौं।
मीन चायक  प्याला पकड़ांद पकड़ांद वूं तैं जब व्यंग्य अर जोक्स मा अंतर बिंगाइ कि व्यंग्यकार गंदगी दिखादं अर वीं गंदगी तैं साफ़ करदो तो वूं तैं चरचरी मिठि चाय बि क्वाथ जन कडुवी लग।
एक दैं एक सांस्कृतिक सभा मा उद्घोसकन अनाउंस कौर दे कि अब मुम्बई के घना भाई या मुबई के जूनियर महमूद श्री भीष्म कुकरेती गढ़वाली में जोक्स और चुटकले सुनाएंगे।
मीन जब लोगुं तै बताइ कि मि व्यंग्य लिखुद अर चुटकला नि लिखुद। मीन जब समझाइ कि व्यंग्य एक गम्भीर आलोचना हूंद अर व्यंग्य मा हास्य केवल मसाला जन हूंद  त एक  दर्शकै  आवाज आइ - जावो ! जावो ! बैठ जावो ! व्यंग्य क्वी सुणाणै चीज च ?
एक दिन हमर पट्टीक क्वी मोरि गेन।  मी बि श्मशान ग्यों।  जन कि रिवाज च बल कपाल क्रिया बाद मृतक तै श्रद्धांजलि दिए जांद।  खमण का अर मुम्बई मा नामी गिरामी सामजिक कार्यकर्ता श्री रमण  कुकरेती श्रद्धांजलि दीणो विशेषज्ञ छन. वू वैदिन नि ऐन।  त कैन बोलि दे - तै भीषम से ही श्रद्धांजली भाषण बुले द्यावो।  त पैथर बिटेन एक आवाज आइ ," श्रद्धांजलि दीण ! जोक्स थुड़ा सुणान !:
खैर मीन श्रद्धांजली वक्तव्य दे त लोगुं तैं भर्वस ह्वे कि मी गम्भीर वक्तव्य बि दे सकुद छौं।
 इथगा सालुं मा  मीन कुज्य़ाण कथगा दैं हरिशंकर परसाई जीक शब्द दोरैन कि "व्यंग्य जीवन से साक्षात्कार करता है , जीवन की आलोचना करता है , विसंगतियों , मिथ्याचारों और पाखंडो का पर्दा काटा करता है " पण अबि बि लोग बुल्दन बल "यार भीषम ! यु नौनु रुणु च जरा जोक्स सुणैक ये रुंदा तैं हँसै दे '


Copyright@ Bhishma Kukreti  21/11/2013

[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; अन्धविश्वास  पर चोट करते गढ़वाली हास्य व्यंग्य    श्रृंखला जारी ...]

                                        तेरि  गुळादंगी त पाप , मेरि गुळादंगी पुण्य ! 
                                             चबोड़्या -चखन्यौर्या -भीष्म कुकरेती

     
(s =आधी अ  = अ , क , का , की ,  आदि )

जब हम छुट छया त हमर कंदूडुंद  तेल जन कुछ शब्द भौरि भौरि डाळे गेन बल राजाशाही से बढ़िया लोकशाही हूंद।
पण मै लगद यु भ्रम च।  राजकरणी का  नियम सासत्व छन।  राजकरणी अपण कथगा बि रूप बदल द्यावो ,  चाहे राजा राज करे  चाहे जनप्रतिनिथि शासनाधीस ह्वावो , सबि जगा , हरेक समौ राजकरणी का छल -कपट इकजनि हूंद।
अब अचकाल सूचना माध्यमो आण से राजकरणी का कर्णाधारों नया नया कुकर्मी करतूत  हर पल समिण आणा छन ।
पण राजनैतिक नेताओं का बयानो अर कर्मों से पाप अर पुण्य की पूरी परिभाषा ही बदल गेन । पैल चोरी-जारी पाप छौ पण आज चोरी -जारी पाप बि ह्वे सकद अर महापुण्य बि ह्वे सकद।
आपकु   विरोधी दल गोरुक  पींडु खाव त पाप पण आप अफु  गोरु घास खाओ त वो पुण्यकर्म ह्वे जांद।  पाप -पुण्य की परिभाषा ही बदले  गे।
शब्दकोश आज बेकार ह्वे गेन।  डिक्सनरी का क्वी मोल इ नि रै गे।  भारतीय जनता पार्टी कुण कॉंग्रेस  वंशवाद त परिवारवाद च पण अकाली दल , शिव सेना , बीजू जनता दल को वंशवाद प्रजातंत्र तैं बचाणो बान महान औषधि छन।
ब्याळि तक नीतीश कुमार की जनता दल यूनाइटेड भाजपा क दगड़ छे त भाजापा एक महान धर्मनिरपेक्ष पार्टी छे।  जैबरि बिटेन जनता दल यूनाइटेड कु भाजापा से पलाबन्द खतम ह्वे तो नीतेश कुमार ऐंड कम्पनी वाळु कुण भाजपा खुन्कार , कुटिल , कातिल नॉन सेक्युलर पार्टी ह्वे गे। नीतीश कुमार ऐंड कम्पनीन अवसरवाद, सत्ता बान झूट -फरेबों की परिभाषा ही बदल दे।
जैबर तलक भाजापा नीतिस कुमार की सरकार मा छे त सरकार कर्मठ छे, विकासवादी छे , जन आकांक्षाओं तै पूरी करदि  छे पण इना भाजपा नीतेश से बिगऴयाइ , अलग ह्वाइ कि भाजपा वाळुकुण नीतेश सरकार लुंज , नाकाबिल , जनविरोधी ह्वे गे।  भाजापा वाळुन प्रशासनिक कर्मठता की परिभाषा ही बदल दे।
कोयला घोटाला की बात हूंदी त कॉंग्रेस बुल्दी बल न्यायालय तैं अपण काम करण द्यावो पण नरेंद्र मोदी का बारा मा बयान दीन्दन कि नरेंद्र मोदी तैं इस्तीफा दीण चयेंद। कॉंग्रेसन अभियोग , अभियुक्त ,अभियोगी की सम्पूर्ण जमी जमाई परिभाषा ही खतम कौर दे।
दिल्ली मा बलात्कार की घटना हूंद त भाजापा वाळु कुण बलात्कार की घटना शीला दीक्षित की नामकामयाबी ह्वे जांद पण मध्य प्रदेश का बलात्कार एक सामाजिक विसंगति का प्रतिफल ह्वे जान्दन। एक बलात्कार लौ ऐंड ऑर्डर से उपज्युं बलात्कार अर दुसर बलात्कार सामजिक बिसंगति से उपज्युं बलात्कार।  भाजापान लौ ऐंड ऑर्डर की डेफिनेशन ही  बदल दे।
भाजपा वाळु कुण जय ललिता का भ्रस्टाचार तो कॉंग्रेस की वक्रदृष्टि का फल च पण भाजापा वाळु कुण डीमके वाळु  भ्रस्टाचार बल एक जघन्य अपराध च।  भाजपा वाळुन करप्सन की डेफिनेशन ही करप्ट करि दे।
पैल जब भाजापा या कॉंग्रेस पर स्टिंग ऑपरेसन से क्वी अभियोग लगद छौ त केजरीवाल की महत्तवाकांक्षा रूपी आम आदमी पार्टी अभियोगी से तुरंत इस्तीफा की मांग करदि छे।  पण अपण स्टिंग ऑपरेसन तैं दुसर दल   की साजिस बतैक स्टिंग ऑपरेसन तैइ खारिज  कौर दींदन।  दूसरौ पाप पाप अर अपण पाप पुण्य ! दूसरौ गुण अवगुण अर अपण अवगुण सदगुण !
तहलका समाचार समूह अभियोग्युं तै अभियोग साबित हूंण से पैलि तुरंत फांसी पर लटकाणो मांग करद छौ (खासकर भाजापा संबंधी केस )। . पण   जब तहलका समाचार समूह का तेजपाल यौन शोषण केस को अभियोगी पाये गए तो तहलका समूह की मुखिया शोमा चौधरी न्यायिक प्रक्रिया , संवैधानिक प्रक्रिया , नागरिक का अपण अधिकार की बात करण मा लगि गे। अफु तैं  पाक -साफ़ की प्रतिनिधि बताण वाळि  शोमा चौधरीन दोगलापन ,दुत्तोपन ,  दुत्तीकरम की परिभाषा ही बदल दे। दुसरो कर्म पाप अर अपण बीभत्स दुस्कर्म भी पुण्य !
अब पाप अर पुण्य मा क्वी फरक , भेद , अंतर ही खतम ह्वे ग्यायि ।
अब त पाप पुण्य को मापदंड ही नि रे गे। पता ही नि लगणु कि पाप -पुण्य को असली मापदंड क्या च ?




Copyright@ Bhishma Kukreti  23/11/2013

[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; अन्धविश्वास  पर चोट करते गढ़वाली हास्य व्यंग्य    श्रृंखला जारी ...]

                                 नामर्दी की  परिभाषा राजा भरथरी अर तरुण तेजपाल का संदर्भ मा

                                            चबोड़्या -चखन्यौर्या -भीष्म कुकरेती

     
(s =आधी अ  = अ , क , का , की ,  आदि )

सूत्रधार - भरथरी उज्जैन देशौ  महान राजा छौ।  जैक रणिवास मा   सहतर से अधिक राणी छे। पण भरथरीक प्रेम राणी पिंगला से जरा बिंडी इ  छौ।  एक दिन वै तैं एक साधुन  अमर कीर्ति पाणौ  फल दे , भरथरीन वो फल अपण प्रेमी तैं दे , प्रेमिन वो फल अपण प्रेमिका एक वैश्या तै दें अर वीं गणिकान वो फल अपण कृपासिंधु विक्रमादित्य तैं दे दे। राजा भरथरी तैं या  बात पता लग तो वो प्रयाश्चित स्वरुप सन्यासी ह्वे गे।  एक दिन राजा भरथरी भिक्षा मांगणौ रानी पिंगला मा ऐ।  अलग अलग क्षेत्रों मा लोकगाथाउं भरथरी -पिंगला संवाद अलग अलग ढंग से गाये जांद।  पण यु संवाद  इन बि त ह्वे सकुद छौ।  सुणो अर द्याखो भरथरी -पिंगला संवाद!
भरथरी -हे माता  पिंगला भिक्षा दे दे ।
पिंगला -वो हो !  द्याखो ! दुनिया का महान ढोंगी मर्द आज मँगत्या भेस मा भीख मांगणु च. बोल पुरुषार्थ की भिक्षा द्यूँ या अनाज की भिक्षा ?
भरथरी - माते !  मानव तै कुटिल शबद शोभा नि दींदन
पिंगला -अच्छा ! हे कपटी मरद ! जब तुम्हारो सन्यासी हूण पर हम सहतर राणी रांड -विधवा जीवन  यापन करणा छंवां तो वो सभ्य मानव की पहचान च है ?
भरथरी -यो सौब पाप कर्मों फल च माते।  कर्मफल तो भुगण ही पड़दन।
पिंगला -हाँ कर्मफल या पाप तो तुम्हारो छौ पण हम सहतर स्त्री तुम्हरो पाप कर्मो फल भुगतान करणो मजबूर किलै करे गेवां ?
भरथरी -ये तो संसार का संसारी जाळ मा फंस्युं समाज से पूछ जैन यो सामजिक नियम बणयां छन।
पिंगला -अर भगोड़ो के सरताज ! तुम तै क्या पूछे जावो ?
भरथरी -मि बताइ सकुद कि ये भव संसार तैं कनै पार करे जावो अर परलोक प्राप्ति साधन बताइ सकुद !
पिंगला -हे कर्तव्य बिमुख्युं सम्राट ! हम सहतर राणियुं समस्या परलोक नी  च यो ही लोक च।
भरथरी -यांक उत्तर मीम  नी च !
पिंगला -तो फिर तुमन मी पर बेवजह शक किलै कार ?
भरथरी -मीन कीर्ति पाणो फल  त्वे तैं दे छौ अर तीन वो एक परपुरुष तै दे दे !
पिंगला -तो इखमा साबित कख हूंद कि वो मेरो प्रेमी छौ।  हमर आपस मा मधुर संबंध अवश्य  छा पण प्रेम तो नि छौ। तुम मर्द अफु त निष्ठावान नि रौंदा पण स्त्रियों से सौ प्रतिशत निष्ठा की ख्वावीश करदां। अर हे शंकित मर्द ! तुमन बगैर जाँच्या परख्यां सन्यास को निर्णय ले ल्याइ।  हे निरदयी मर्द! विवाहित ह्वेक , सहतर जनान्युं पति ह्वेक बि अपणो आप संन्यास लीणो निर्णय लीण एक पुरुषत्वहीन   को ही काम ह्वे सकुद।
भरथरी -पिंगला राणी ! अपुरुष  की उपाधि ठीक नी  च !
पिंगला -हाँ इन पुरुष तैं त अपुरुष ना किमपुरुष की उपाधि ही ठीक लगद।  पुरुष जब चाओ  जैक दगड़ चाओ  वैक दगड़ गैरमुनासिब संबंध बणै सकुद अर फिर वुं संबंधो तैं तोड़िक भजोड़ा बण सकुद।  यि  भजोड़ा मर्द मर्द ना बलकण मा केवल पुरुषत्वहीन  या केवल किमपुरुष ही ह्वे सकुद।
भरथरी -पिंगला मी इक अशोभनीय शब्द सुणणो नि अयूं छौ।
पिंगला -वाह मर्दों तै आयना दिखाओ तो क्रोध अर शब्द अशोभनीय ह्वे जांदन।  जो पुरुष अपण पाप प्रयाश्चित का खातिर अपण पौरुषीय जुमेवारी से भागो वो या तो पुरुषत्वहीन च या किमपुरुष च . वो  सन्यासी नी च वो नपुंषक च , नामर्द च। अर तुम पुरुषोंन एक पुरुषत्वहीन   विश्वामित्र तैं ब्रह्मर्षि की उपाधि बि दे जैन महर्षि  पद पाणो खातिर अपण बेटि शकुंतला छोड़ी, जैन अपण मानवीय उत्तरदायित्व नि निभाई ।
भरथरी -मि अब एक क्षण बि इक नि ठहर सकुद।
पिंगला -पुरुषत्वहीन तैं पुरुषत्वहीन ब्वालो तो वो इनि बहाना दींदु।

सूत्रधार -अब अचकाल एक समाचार रोज सुण्याणम आणो च कि तहलका पत्रिका का मुख्य सम्पादक तरुण तेजपालn  अपणि कनिष्ठ पत्रकारिण से द्वी दै छेड़ छाड़ कार।  अर फिर प्रयाश्चित   स्वरुप अफिक  छै मैना संन्यास ले ल्याइ। क्या तहलका पत्रिका का तरुण तेजपाल अर वैकि पत्नी का मध्य संवाद नि ह्वे हवालु ? अवश्य ह्वे होलु अर ह्वे सकुद च द्वी पति -पत्नी मध्य इन संवाद बि हे ह्वे होलु ' जरा सूणो अर द्याखो।
टीवी समाचार - तहलका पत्रिका की  कनिष्ठ स्त्री पत्रकार ने पत्रिका के मुख्य सम्पादक तरुण तेजपाल पर दो बार शारीरिक छेड़खानी का आरोप लगाया और तरुण तेजपाल ने प्रायश्चित स्वरुप पत्रिका से छह महीनो के लिए सन्यास की घोषणा कर दी है।
मिसेज तरुण तेजपाल (अट्टाहास करद करद )- वाह ! डियर तरुण !
तरुण तेजपाल - इख मेरि इज्जत ख़तम हूणि च अर तू इथगा जोरुं से हंसणि छे ?
मिसेज तरुण तेजपाल- हां हां ! याद च एक पार्टी मा मि एक मित्र का दगड़ घुल मीलिक छ्वीं लगाणु छौ अर डियर तरुण तीन पार्टी ही मा बबाल खड़ो कर दे छौ अर ड्यारम तीन म्यार दगड़  जु बरताव कार वो संबळिक आज बि मि तैं रूण आण बिसे जांद। 
तरुण तेजपाल-हाँ पण मि सहन नि कौर सकुद कि मेरी प्रिया कै हैंकाक ....
मिसेज तरुण तेजपाल-हा  ! हा ! मर्द चांदो कि पत्नी पर एकाअधिकार रावो  किन्तु अफु अपणी बेटि सहेली दगड़  शारीरिक संबंध बणाण मा क्वी बि शरम ल्याज ना हैं ?
तरुण तेजपाल-अरे क्षणिक भावनाओं को ज्वार भाटा मा इन ह्वे गे।  निथर …
मिसेज तरुण तेजपाल-हे राजनीति अर समाज मा  स्वछता को धड्वे, ओजस्वी , प्रखर पत्रकार ! एक बात बतावो  यदि यही आरोप मै पर लगदा तो तुम्हारि क्या प्रतिक्रिया हूंदी ?
तरुण तेजपाल-उं ! उं …
मिसेज तरुण तेजपाल-हाँ ! हाँ ! तुम जबाब ही क्या दे सकदवां ? मर्द स्त्री से एकनिष्ठा ही चांदो अर अफु जख चाओ उज्याड़ खैक ऐ जावो।   मर्दों तैं पत्नी से  एकनिष्ठा की शत प्रतिशत चाहत हूंदी ।
तरुण तेजपाल-उं ! उं …
सूत्रधार - मिसेज तरुण तेजपाल क्वी राणी पिंगला त छ ना जो अपण पति तै नामर्द, नपुंषक   या पुरुषत्वहीन बोलि द्यावो ।  हां आप ही फैसला कारो कि जु सम्पादक हारुँ  गुनाहों तैं त उजागर करण म बहुत ही माहिर च अर अफु इन बेहयाई , बेशर्मी को गुनाह कारो तो वो मर्द , मर्द च या नामर्द च , नपुंषक च या पुरुषत्वहीन च  ?


Copyright@ Bhishma Kukreti  26/11/2013
यह लेख सर्वथा काल्पनिक है।

[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; अन्धविश्वास  पर चोट करते गढ़वाली हास्य व्यंग्य    श्रृंखला जारी ...]

                        पहाडुं  शिक्षा गाड़ी पटरी पर किलै नी आणि च ?

                                        चबोड़्या -चखन्यौर्या -भीष्म कुकरेती

     
(s =आधी अ  = अ , क , का , की ,  आदि )

एक प्रवासी (जोर कै धै लगांदु )- अरे यी शिक्षा गाड़ी तैं क्या ह्वे भै ? बड़ी दरदनाक बात च कि हमार गांवक शिक्षा गाडी इंजिन  बुरी हालात मा च।
मुम्बई बिटेन आयुं प्रवासी  - मै लगद या गाड़ी पटरी से उतर गे।
दिल्लि बिटेन आयुं प्रवासी - नै नै गाड़ी त ऊनि च जन सन 1890 मा अंग्रेज यीं गाड़ी तैं ये गां मा ल्है छया।
अमेरिका बिटें अयुंप्रवासी  - हाँ  लगणु च गाड़िक अंजर पिंजर ढीला ह्वे गेन।
सबि प्रवासी -नै नै हमर गांवक शिक्षा गाड़ी दौड़न चयेंद।  हम सब तैं कुछ करण चयेंद।
एक प्रवासी इंजिनियर  - अरे इंजिन का अग्वाड़ी द्वी पहिया अलग अलग साइज का किलै छन ?
एक प्रवासी जणगरु - हाँ एक पहिया शिक्षक च अर हैंक पहिया शिक्षा प्रशासन च।
इंजिनियर -पण दुयुंक साइज अलग अलग च त गाड़ी पटरी से नि उतरलि त क्या ह्वालु ?
जणगरु -दुयुंक साइज एक बि ह्वै बि जालो तो शिक्षा गाड़ीन अग्वाड़ी नि बढ़ सकद।
इंजीनियर - किलै ?
जणगरु -एक वाममार्गी च त हैंक दक्षिण मार्गी च।  अंग्रेजूं टैम इ बिटेन द्वी पैया अलग अलग दिशा मा चलणा रौंदन।
इंजीनियर - कनो ?
जणगरु - प्रशासन बुलद बल बच्चों तैं शिक्षा नौकरी पाणो जरिया हूण चयेंद बस तो  शिक्षक बुलद बल  नौन्याळु आचार -विचार -ज्ञान -विज्ञान बढ़ाणो शिक्षा दिए जाण चयेंद।
इंजिनियर -हां सही बात त च कि नौन्याळु आचार -विचार -ज्ञान -विज्ञान बढ़ाणो शिक्षा दिए जाण चयेंद।
जणगरु -पण द्वी पहिया अलग अलग दिशा मा चलणा कोशिस करदन अर गाड़ी अग्वाड़ी ही नि बढ़द।
विशेषज्ञ -अर पैथर समाज , नेतृत्व का पहिया बि छन जो उत्तर या पश्चिम दिशा गामी छन। चार पहिया अलग अलग दिशा मा चलदन।
एक प्रवासी - अरे पर यूं  पहियों नट , बोल्ट , स्क्रू त ढीला हुयां छन।
एक ग्रामवासी - वांक बान दिल्ली बिटेन शिक्षा नीति संशोधन का टिक्वा बि त अयाँ छन।
जणगरु -पण वो अधकचा, अधकचरा  टिक्वा नट , बोल्ट , स्क्रू की जगा त नि ले सकदन ना ?
एक प्रवासी -अरे ये इंजिन बिटेन सड्याण किलै आणि च ?
हैंक प्रवासी विशेषज्ञ -पुराणो सिलेबस सौड़ी गे  तो   वांक दुर्गन्ध आणि च।
जणगरु -पण सरकार त पांच दस सालम सिलेबस बदलणि रौंद त फिर बि इथगा दुर्गन्ध किलै ?
विशेषज्ञ - असल मा सिलेबस पूरो नि बदल्यांद। तो पुरण सिलेबस नै सिलेबस तैं सड़ै दींदु।
इंजिनियर - एक बात बतावो ! शिक्षा इंजिन त जै बि हालत मा च स्यू त च।  पण शिक्षार्थी कख छन ?
ग्राम वासी -अब क्वी अपण बच्चों तैं गां मा नि पढ़ान्द।  सब्युं बच्चा  देहरादून या ऋषिकेशउंद पढ़दन।
कुछ  प्रवासी - हम सब तैं अपण मातृभूमि शिक्षा वास्ता कुछ ना कुछ करण चयांद ।.
एक बणिया - अरे जन शहरूं मा हूणु च तनि  कारो।  यीं खस्ता हालात की  , अंजर पंजर हुईं  शिक्षा गाड़ी नीलाम मा बेचीं द्यावो अर कैं प्राइवेट कम्पनी से  सेकंड हैंड शिक्षा गाडी ल्है आओ।
सबि प्रवासी - हम एक प्रस्ताव पारित करदवां कि हमर पहाड़ मा शिक्षा गाडी पटरी पर आण चयेंद। अर हम सब अपण गांवक शिक्षा गाडी पटरी पर लाणो संकल्प लींदा।
एक ग्राम वासी - तो सौब चलो पौड़ी जैक स्कूल इंस्पेकटर ऑफ स्कूल से बात कौरिक शिक्षा गाड़ी तैं पटरी पर लांदवां।
एक प्रवासी - अरे मि  त द्वी दिनों छुटि लेक सामूहिक नागराजा पूजन का वास्ता अयूं छौं।  मेरि त परस्यूं ऑफिस की महत्वपूर्ण मीटिंग च।
सबि - हाँ हम सब त द्वी या तीन दिनों कुण गाँव अयाँ छंवां . हमम टैम नी च।
सबि ग्रामवासी - त फिर अपण घड़ियाली आंसु  बगाण बंद कारो अर सुरक अपण अपण शहर जावो। हम गांवाळ  अफिक अपण समस्याउं  निदान करला !
 




Copyright@ Bhishma Kukreti  28/11/2013

[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; अन्धविश्वास  पर चोट करते गढ़वाली हास्य व्यंग्य    श्रृंखला जारी ...]

                                            प्रवास्यूं द्वी ब्यौ जरुरी छन !
                                       चबोड़्या -चखन्यौर्या -भीष्म कुकरेती

     
(s =आधी अ  = अ , क , का , की ,  आदि )

                   हाँ तुमन बि बुलण बल यु ढाँगुवाळ बि क्या टुटबाग सिखाणु च। कत्युंन बुलण भैरों ! ये सलाणी तैं इन असंवैधानिक छ्वीं लगांद शरम बि नि औणि ! कै कैन त बुलण बल तै कुकरेतीक हुक्का पाणि बंद करै दयावो। ह्वे सकद च द्वि चार मि तैं देखिक ही अपण ड्वार इ  बंद कौर द्याला बल दुनिया इकीसवीं सदी मा ऐ गे अर यु कळजुगि हम तैं खबेस जग मा दुबर लिजाणो कोशिस करणु च। ना ना ! म्यार बूड ददा से लेक अर में तक कैक बि द्वी ब्या नि छा कि मी द्वी ब्यौ की वकालत कौरु !
             हरेक प्रवासी द्वी ब्यौ जरुरी च जन राय , थिंकिंग , सोच विचार म्यार नि छन।  ना ही म्यरो मकसद च की भोळ प्रवासी घौर जैक अर हैंक ब्यौ कौरिक ऐ जैन।

                    असल मा परसि गां बिटेन घुमणा अयां डक्खु दा तैं छुड़णो जयुं छौ अर ट्रेन चलद दैं डक्खु दान बोलि बल हे  भीषम तुम प्रवासी जब तलक द्वी ब्यौ नि करिल्या तब तलक तुम गढ़वाळ विकास मा भागीदारी नि निभै सकदां !
 मि घंघतोऴयों ग्यों बल इ   डक्खु दा बोलि गे बल प्रवास्यूं द्वी ब्यौ जरुरी च पण असल मा क्या बोलि गेन।
                प्रवासी द्वी ब्यौ कु सीधा अर्थ च , सिम्पल मीनिंग च बल प्रवासी एक ब्यौ मुंबई मा हैंक ब्यौ गाँव मा। एक दैं म्यार मन मा ख़याल आयि कि डक्खु दा बोलि ग्याइ बल जब क्वी प्रवासी गाँव आल त वै तैं ड्यारम बि मुंड मा ठुंग मारणो कज्याणि मीलली।  ड्यारम बि कज्याणि कुखली मीललि जै से प्रवासी उख बि अपण पत्नी कुखलि मा मुंड धरिक द्वि झपांग निंद ले साको।
                     डक्खु दा कबि बि रसीली , सेक्सीली, श्रृंगार भरीं छ्वीं नि लगांद तो अवश्य ही डक्खु दा को अर्थ कुछ हौर च।
             मीन घड्याइ , मीन स्वाच कि यदि हरेक प्रवासीक द्वी ब्यौ ह्वाल त क्या ह्वे जाल।  सरल बात च जु पुंगड़ बांज पड़ीं छन , जौं बांज डांडों पुंगड्यूं मा कबि ग्युं हूंद छा उख अब कुंळै डाळ उपजी गेन ,   जौं पुंगडों मा   अब मळसु फुळणा छन वो सब पुंगड़ी फिर से आबाद  ह्वे जाला।
            जु तिभित्या तिबारी डंडेळि   आज खंद्वार बणी छन वो फिर से चकाचक ह्वे जाला।  आज प्रवास्यूं भैर जाण से जौं चौकुं मा   किनग्वडु डाळु  झाड़ झंकार हुयुं च वुं चौकुं मा फिर से हरेक संग्रांदि दिन फिर से औँज्युं नौबत बजलि।
  जब हरेक प्रवासी का द्वी ब्यौ होलु त जौं मकानुं मा उळकाणु वास करणा छन उख मनिखों वास -निवास होलु। जब हरेक प्रवासी द्वी ब्यौ होला त जख मुर्दा घ्वाडॊ मा जाणा च तब मुर्दा आदम्युं काँध मा जाला।
   पण फिर स्वाच क्या ग्रामीण गढ़वाळ बचाणो वास्ता क्या यो असंवैधानिक, अमानवीय , टुटबग्या, कुबगत्या , कुतरकीब ही आखरी रस्ता च ? क्या यु गढ़वाळ को दुर्भाग्य नी  च कि गढ़वाळ से पलायान की आंधी त नि रुके सक्याणि च पर लाचारीवस प्रवास्युं समिण द्वी ब्यौ करणो विकपल की बात करयाणि च ? आखिर ये आधुनिक , वैज्ञानिक युग मा क्वी ना क्वी तरकीब त होलि कि गढ़वाळ बि बच जाओ अर प्रवास्युं तैं द्वी ब्यौ बि नि करण पोडु !
      मीन खूब देर तलक स्वाच त पाइ बल आदर्श अध्यापक डक्खु दा की सलाह को असल अर्थ कुछ हौरि च।
        डक्खु दान मै सरीका प्रवासी पर व्यंग्य का बरछा , चबोड़ का बसूला चलाइ  अर चबोड़ -चखन्यौ मा ब्वाल बल गढ़वाल का विकास का वास्ता   प्रवास्यूं द्वी ब्यौ जरुरी छन !  डक्खु दा की हम मुंबई जन शहरों मा बस्याँ प्रवास्युं वास्ता असल मा एक धाद छे कि जु मुंबई मा समोदर का छाल  पर बैठिक गढ़वाल की बिगड़ती स्थिति पर मगरमच्छी आंसू बगांदन अर कबि बि ड्यार नि जांदन वूं तैं इक सेमीनार करणों जगा पर साल द्वी सालम अपण ड्यार जैक कुछ करण चएंद।
        डक्खु दान वूं प्रवास्युं पर शब्दों मार कार जु अफु त गढ़वाळो बाटु भूली गेन पण इक मंचों मा फोकट मा  गढ़वाल विकास पर भाषण दीणा रौंदन।  डक्खु दान  वूं प्रवास्युं  गाळ पर झनाटेदार थप्पड़ मार जौं तै शिक्षा बारा मा रति भर बि ज्ञान नी च वु इख मुंबई मा बैठिक गढवाल विश्वविद्यालय का सिलेबस तैयार करणा रौंदन।
 डक्खु दान वै पर चमकताळ लगाइ जु तीस साल से गढ़वाऴ नि गए वो गढ़वाळ पर्यटन विकास पर भाषण दीणु रौंद।

 असल मा डक्खु दा की प्रवास्यूं द्वी ब्यॉवक बात को अर्थ च कि प्रवास्यूं तैं खालि भाषण नि दीण चयेंद बलकण मा   गढ़वाळ जैक  भागीदारी निभाण चयेंद। प
***यह लेख 'पराज' पत्रिका के जनवरी 1991 अंक में प्रकाशित हुआ था। इस लेख परवुद्धिजीवीओं के मध्य एक सार्थक बहस भी मुम्बई में हुयी थी।
 
Copyright@ Bhishma Kukreti  30/11/2013

[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; अन्धविश्वास  पर चोट करते गढ़वाली हास्य व्यंग्य    श्रृंखला जारी ...]