MeraPahad Community Of Uttarakhand Lovers

                                               क्या मुझे कॉंग्रेस में शामिल हो जाना चाहिए ?

                                 घपरोळया , हंसोड्या , चुनगेर ,चबोड़्या -चखन्यौर्या -भीष्म कुकरेती     

(s =आधी अ  = अ , क , का , की ,  आदि )

घरवळि -तुम से त कुछ बि उम्मीद लगाण बेकार च।
मि -ह्यां क्या ह्वाइ ?
घरवळि -तुम से भलो तो वो हारीलाल ही ठीक छौ।
मि -कु हरिलाल ?
नौनु -पापा ! वो देहरादून में नही है एक अंकल जो जब भी कोई हारता है  अंकल उसकी तरफ चले जाते है।  जब पाकिस्तान युद्ध हार गया था तो अंकल पाकिस्तान जाने के तयार हो गए थे।
मि - पर ये बगत हरिलाल कु प्रसंग किलै आई ?
नौनु - कॉंग्रेस पार्टी 2014 का चुनाव जो हार गई है।
मि -तो ?
घरवळि -तो क्या ! तुम तैं कॉंग्रेस मा शामिल नि हूण चयेंद ?
मि -क्या कॉंग्रेस मा शामिल हूण चयेंद ?
घरवळि -हाँ , तुम अबि कॉंग्रेसौ ऑफिस जावो अर कॉंग्रेस मा भर्ती ह्वे जावो।
मि -हैं ! उल्टी अहल्या कहींकी ! अरे अजकाल त कॉंग्रेसी भाजपा मा जाणो भगणा छन अर तु बुलणि छे कि कॉंग्रेस मा भर्ती ह्वे जा !
घरवळि -नै नै ! 130 साल पुराणी कॉंग्रेस मा भर्ती हूणों टैम च।
मि -भागवान ! तृणमूल कॉंग्रेस , वाईएसआर कॉंग्रेस का लोग गुंदकी खाणो उम्मीद मा भाजपा मा शामिल हूणा छन अर तू आदेश दीणी छे कि मि तैं कॉंग्रेस ज्वाइन करण चयेंद।
घरवळि -हाँ फिर भी तुम तैं कॉंग्रेस ज्वाइन करण ही चयेंद।
मि -भौत  सा आम आदमी पार्टीका लोग , इख तलक कि भौत सा बामपंथी विचारधारा का लोग अब आरएसएस की विचारधारा तैं है भारत लैक समझिक भाजपा का द्वार पर खड़ा हुयां छन।  जख मिठु तख मक्खी अर किरम्वळ।
घरवळि -कॉंग्रेस तैं तुम्हारी जरूरत च।
मि -पर किलै च कॉंग्रेस तैं मेरी जरूरत ?
घरवळि -चूँकि कॉंग्रेस तैं विरोध करण कतै नि आंद तो तुम कॉंग्रेस मा भर्ती ह्वे जावो !
मि -क्या मतबल ? कॉंग्रेस तैं विरोध करण नि आंद ?
घरवळि -हाँ ! कॉंग्रेसी सरकार त चलै सकिद पर जब बि विरोध करण ह्वावो तो कॉंग्रेसी फिस्सड्डी साबित ह्वे जांदन।
मि -जन कि ?
घरवळि -जन कि सि परसि (27 /5 /2014 ) चुनाव हर्युं अजय माकनन  ई -बयान दे बल चूँकि स्मृति ईरानी ग्रेजुएट नी च त वा मानव संसाधन मंत्री लैक नी च।
मि -हाँ बहस लैक विषय त छ कि ना ?
घरवळि -ख़ाक च यु बयान बहस लैक ? जब विरोधी पार्टी सरकारी पार्टी पर भागार , अभियोग , लांछना लगावो तो सरकारी पार्टी तैं कैं मुद्रा मा आण चयेंद ?
मि -जब बि विरोधी पार्टी सरकारी पार्टी पर अभियोग लगावो तो सरकारी पार्टी तैं डिफेंसिव मोड याने रक्षात्मक मुद्रा मा आण चयेंद।
घरवळि -पर ब्याळि त विरोधी दल कॉंग्रेस का नेता अजय माकन का बयान से भाजपा आक्रमक मुद्रा मा छे अर कॉंग्रेस डिफेंसिव मोड मा छे।
मि -हाँ टीवी चैनलों मा बहस का दौरान इन लगणु छौ जन बुल्यां कॉंग्रेसन क्वी बड़ो भारी गुनाह कर दे हो अर भाजपा का प्रवक्ताओंन  कॉंग्रेस तैं अभियुक्त साबित करी दे।
घरवळि -द्याख नी तुमन ! भाजपाई कॉंग्रेसी प्रवक्ताओं से पुछणा छा कि सोनिया गांधी मा क्वा डिग्री छे , इंदिरा गांधी कथगा पढ़ीं लिखीं छे ? ग्यानी जैल सिंग कै कॉलेज गे छा ?
मि -अर विचारा कॉंग्रेसी जबाब बि नि दे सकणा छा।
घरवळि -अर हरेक कॉंग्रेसी अलग अलग रक्षात्मक भौण मा जबाब दींद दै रुणफती हूणु छौ।
मि -अजय माकन का बयान से कॉंग्रेस्यूं मा ही फूट पड़ीं दिखेणी छे अर भाजपा मा गजब की एकता !
घरवळि -जब बि आक्रमण करण ह्वावो तो क्या करण चयेंद ?
मि -जब बि चाहे राजनैतिक आक्रमण ही किलै नि ह्वाउ आक्रमण हमेशा शत्रु का  सबसे कमजोर पक्ष /नस पर करण चयेंद कि शत्रु तिलमिला उठे , शत्रु त्राहिमाम त्राहिमाम करण लग जावो ! आक्रमण से शत्रु का सैनिकों मा भगदड़ मचण चयेंद।
घरवळि -पर इख त कॉंग्रेसन बचकाना आक्रमण कार अर आक्रमणकारी ही त्राहिमाम -त्राहिमाम करणु छौ अर कॉंग्रेस मा भगदड़ मचीं छे , कॉंग्रेस मा ही घपरोळ  मचि गे अर अपणा ही तीर से कॉंग्रेस घायल ह्वे गे।
मि -भई ! कॉंग्रेस इथगा दिन सरकार मा राइ तो कॉंग्रेस्यूं तैं विरोध करण कतै नि आंद।
घरवळि -तबि त मि बुलणु छौं कि तुम कॉंग्रेस मा शामिल ह्वे जावो अर कॉंग्रेस तैं आक्रमण रणनीति सिखावो कि आक्रमण से शत्रु घैल हूण चयेंद ना कि आक्रमणकारी। 
मि - हाँ आक्रमणकारी तैं विरोधी की दुखती रग दबाण चयेंद ना कि अपणी दुखदी नस ही दबै द्यावो।
घरवळि -आक्रमण से विरोधीक   ड्यार आग लगण चयेंद ना कि अपण कैम्प मा ही अग्यो ह्वे जावो। इलै इ त मि बुलणु छौं कॉंग्रेस तैं विरोध करण सिखाणो बान तुम कॉंग्रेस मा शामिल ह्वे जावो।



Copyright@  Bhishma Kukreti  29/5/2014 
   
*कथा , स्थान व नाम काल्पनिक हैं।
Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language  , Mockery in Garhwali Language, Send-up in Garhwali Language, Disdain in Garhwali Language,Hilarity in Garhwali Language, Cheerfulness in Garhwali Language
[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वाले द्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा  पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक द्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य, राजनेताओं द्वारा अभद्र गाली पर हास्य -व्यंग्य    श्रृंखला जारी  ]

                             भौं भौं राजनीतिज्ञों अगला सौ दिनौ अलग अलग प्राथमिकता

                             घपरोळया , हंसोड्या , चुनगेर ,चबोड़्या -चखन्यौर्या -भीष्म कुकरेती     

(s =आधी अ  = अ , क , का , की ,  आदि )

अचकाल सब्युं पर मोदीफिलेसिया (मोदी से प्यार ) सॉरी गे , इख तलक कि रोज सुबेर सेक्युलरिज्म नक्वळ (नास्ता )  खाण वाळ नेता अजकाल डेवलपमेंट का ब्रेकफास्ट करणा छन। इनि जब 27/5/2014s कुण प्रधानमंत्री नरेंद्र मोदीन अपण मंत्र्युं कुण अगला सौ दिनूं प्राथमिकता बणानो ब्वाल त सरा भारत मा हरेक राजनीतिज्ञ अगला सौ दिनौ कुण अपणी  प्राथमिकता बणाण मा व्यस्त ह्वे गेन।
मीन स्वाच कि यदि मि विभिन्न नेताओं से मुखाभेंट करलु अर पुछलु कि -नेता जी आपक अगला सौ दिनौ कुण प्राथमिकता क्या च तो उत्तर इन ह्वाल -
बाबा रामदेव - में पर लग्यां कोर्ट केस खतम करण मेरी प्राथमिकता च अर अगला साठ मैना तलक  तक यही प्राथमिकता राली।
डा मुरली मनोहर जोशी - बुड्यान्द दैं क्या प्राथमिकता ह्वे सकद ? एक महत्वपूर्ण मंत्रालय पाण और क्या ?
डा रमेश निशंक -कै बि तरांसे बीसी खंडूड़ी अर कोशियारी तैं मंत्री बणन से रुकण ही मेरी प्राथमिकता छे अर ताउम्र राली।
सतपाल महाराज - बस कुछ विधयाको तैं कॉंग्रेस से दल बदलाण  अर हौर क्या ?
हरीश रावत - हरेक भाजपा विधायकों तैं ससंदीय सचिव बणाण मेरी प्राथमिकता च।
महारष्ट्र कु कॉंग्रेसी - महराष्ट्र मा हमन आण वाळ विधान सभा चुनाव त जितण नी च त मेरी प्राथमिकता च कि इन बहाना खुजे जाव कि खुद हाइ कमांड मेकुण चुनाव नि लड़णो कमांड दे द्यावो।
महारष्ट्र कु भाजपा नेता - मि तैं पता च कि अबै दैं भाजपा -शिव सेनान विधानसभा चुनाव जितण त  अगला सौ दिनौ कुण मेरि प्राथमिकता च कि भाजपा मा अपण  विरोध्युं सफाया करे जावु।
सुशील कुमार शिंदे - अगला सौ दिन मा मि वुं महारष्ट्र का वुं कॉंग्रेस्यूं तैं एक्सपोज करुल , नंगा  करुल जौन पार्टीघात करिक मे तैं हरायी ।
अरविन्द केजरीवाल - अगला सौ दिन मा मि  सौ -द्वी सौ U -Turn लीणो प्लान बणानु छौं।
मुलायम सिंह यादव - अगला सौ दिन तक मि अर लाल कृष्ण आडवाणी जी कै मानसिक चिकित्सालय की खोज मा रौला जख जैक हम द्वी प्रधान मंत्री बणनो भूत उतारणो इलाज करौला।
हरयाणा कु मंत्री - अगला चुनाव तो हमन जितण नी च तो अगला सौ दिन मा मीम एकी प्राथमिकता च कि मि वूं फाइलुं तैं जळाणु रौल जैमा पकड्याणो डौर हो।
कमल नाथ - मेरी त एकि प्राथमिकता च कि मि कनकैक बि मि लोकसभा मा लीडर ऑफ अपोजिसन बौण जौं।
विजया राजे सिंधिया - कै बि तरां से अपण युवराज तैं केंद्रीय मंत्री बणवै द्यूं।
यशवंत सिन्हा, कल्याण सिंह ,धुमाल , रमण  सिंह, रामविलास पासवान - हम सबकी अगला सौ दिन मा एकी प्राथमिकता राली कि हमर शहजादा केंद्रीय मंत्री बौण जावन !
जसवंत सिंह -अगला दिनों सौ मा मेरी एकी प्राथमिकता च कि " घर का बुद्धू लौंडे के साथ घर को लौट आया" कहावत तैं चरिथार्त करूँ ।
लालू प्रसाद यादव - कै बि तरांसे नीतेश कुमार का जड़नाश !
नीतेश कुमार - अपण कपाळ फोड़न और क्या ?
ममता बनर्जी - मै प्राथमिकता से नही हूँ बल्कि प्राथमिकता मेरे से है ।
करुणा निधि - कै बि तरांसे मेरी बेटी जेल जाण से रै जाव।
 कॉंग्रेसी नेता - राहुल गांधी पर टिक्वा/टेक  लगाण कि जांसे वो नेता लैक व्यवहार करण लग  जावन।
सोनिया गांधी - अपण नौनाक भविष्य की चिंता मा नींद नि आदि तो नींद आणो बान कैं दवाई की खोज मेरी प्राथमिकता च।
आजम खान - म्यार भैंसु देखभाल का वास्ता टिप टॉप -चुस्त पुलिस इंस्पेक्टर की खोज अर वैक अप्वाइंटमेंट करण मेरी प्राथमिकता च
डिम्पल यादव - ससुर जीक समिण विरोध्युं तैं गाळी दीण सिखण मेरी प्राथमिकता च।
मायवती (पर्ची मा पौढ़िक ) - उत्तर प्रदेश माँ हर रेप पर मि प्रेस कॉन्फ्रेंस करुल कि उत्तर प्रदेश मा राष्ट्र पति शासन लगावो।
अखिलेश यादव - अगला सौ दिन मा बलात्कार केसुं कु विश्व रिकार्ड तुडन मेरी प्राथमिकता च।


Copyright@  Bhishma Kukreti  31/5/2014 
   
*कथा , स्थान व नाम काल्पनिक हैं।
Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language  , Mockery in Garhwali Language, Send-up in Garhwali Language, Disdain in Garhwali Language,Hilarity in Garhwali Language, Cheerfulness in Garhwali Language
[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वाले द्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा  पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक द्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य, राजनेताओं द्वारा अभद्र गाली पर हास्य -व्यंग्य    श्रृंखला जारी  ]

                         भूतपूर्व कॉंग्रेसी मंत्री से कॉंग्रेस की हार पर बातचीत

                          घपरोळया , हंसोड्या , चुनगेर ,चबोड़्या -चखन्यौर्या -भीष्म कुकरेती     

(s =आधी अ  = अ , क , का , की ,  आदि )


कॉंग्रेस 2014s  लोकसभा चुनाव हारी त गे पर अबि तलक पता नि चौल कि इथगा बुरी तरां से कॉंग्रेस चुनाव किलै हार । यदि मेरी बातचीत कै भूतपूर्व कॉंग्रेसी मंत्री से हो तो वा बातचीत इन होली।
मि -ब्याळै मंत्री जी ! या रौंका धौंकि किलै ?
भूतपूर्व कॉंग्रेसी मंत्री -अरे मंत्री निवास जि छुड़ण पड़णु च तो लोकनिर्माण मंत्री से कनेक्सन जुगाड़ भिडाणु छौं कि सरकारी आवास की सुविधा रावो।
मि -पर दिल्ली मा त आपक आलिशान बंगला छन फिर चिंता क्यांकि ?
भूतपूर्व कॉंग्रेसी मंत्री -म्यार दिमाग खराब हुयुं च जो मि ब्याळै मंत्री ह्वेक अपण बंगला मा रौं।
मि -हाँ ! या बात त सै च।
भूतपूर्व कॉंग्रेसी मंत्री -हाथी मर भी जाए तो लाख का होता ही है , मंत्री ना सही हूँ।
मि -कुछ पता बि चौल कि कॉंग्रेसै इन कुगति किलै ह्वे ?
भूतपूर्व कॉंग्रेसी मंत्री -भै ! सुणन मा आणु च कि राहुल जी  आसपास का लोग खोज मा लग्यां छन।  जैदिन कॉंग्रेस का अधिकृत बयान ऐ जाल मि बि धड़ले से बोली द्योलू कि कॉंग्रेस की हार का क्या कारण छन।
मि -फिर बि आप का ख़याल से क्या क्या ख़ास कारण रै होला ?
भूतपूर्व कॉंग्रेसी मंत्री -मेरी त पक्की राय च कि कॉंग्रेस संगठनन काम नि कार याने कॉंग्रेसी कार्यकर्ताओंन काम हि नि कार।
मि -कॉंग्रेसी कार्यकर्ताओं से क्या अपेक्षा छे ?
भूतपूर्व कॉंग्रेसी मंत्री -अरे राहुल गांधी जीन बताई त च कि कॉंग्रेस राज मा क्या क्या ह्वाइ।
मि -पर इख्मा कॉंग्रेसी कार्यकर्ता बीच मा कख आई गेन ?
भूतपूर्व कॉंग्रेसी मंत्री -अरे यूँ अळगसि , लम्पट कार्यकर्ताओंन लोगुं बीच जैक बताइ इ नी च कि कॉंग्रेस सरकार इथगा बड़ा बड़ा काम करणी च। 
मि -पर आप मंत्री लोग बि त जनता तैं बथै सकदा छा कि तुम जनहित मा क्या क्या करणा छा।
भूतपूर्व कॉंग्रेसी मंत्री -अरे हमन तो विज्ञापन करी त छा कि सरकार क्या क्या करणी च।
मि -हाँ पर जनता तैं पता इ नि लग कि सरकार बि कुछ करणी च।
भूतपूर्व कॉंग्रेसी मंत्री -वी त मि बुलणु छौं कि कॉंग्रेस का महामंत्री अर कार्यकर्ता सब बेकार ह्वे गेन यूंन सरकारी विज्ञापन देखिक , पौढ़िक जनता तैं बात पंहुचाई इ नी च।  अब्स्युलेटली कम्युनिकेसन गैप राइ।
मि -आपन अपण महामंत्र्युं तैं समझाई तो ह्वाल कि सरकार क्या क्या काम करणी च।
भूतपूर्व कॉंग्रेसी मंत्री -साले सब हरामखोर है । यी महामंत्री राहुल जीक आस पास मंडराणा रौंद छा पर कबि बि हम मंत्र्युं पास पुछणो नि ऐन कि सरकार क्या क्या करणी च।
मि -हाँ या बात च।
भूतपूर्व कॉंग्रेसी मंत्री -हाँ !यदि कॉंग्रेस का संगठन का लोग हम मंत्र्युं पास आंदा , हम मंत्र्युं तैं पुछदा कि सरकार क्या करणी च अर फिर हमर काम तैं जनता तक पंहुचांदा तो कॉंग्रेस का इथगा बुरा हाल नि होंद। 
मि -पर आप बि त कॉंग्रेस कार्यकर्ताओंमा जैक  बथांदा रै होला कि सरकार क्या क्या काम करणी च ?
भूतपूर्व कॉंग्रेसी मंत्री -फिर वी बात ! भई हम मंत्री छया तो संगठन का लोगुं अर कार्यकर्ताऊं  कर्तव्य छौ कि मंत्र्युं पास आवन।  मंत्र्युं काम थोड़ा हूंद कि कार्यकर्ताऊं पास जावन।
मि -तो कार्यकर्ता आपक पास आंद ही नि छया ?
भूतपूर्व कॉंग्रेसी मंत्री -आंद किलै नि छया पर सब अफुकुण ठेकादारी लीणो आंद छा।  पिछ्ला पांच सालुं मा मीम जनहित का काम का वास्ता एक बि कार्यकर्ता नि आयि जु बि आयि ठेकेदारी लीणो वास्ता आयि।
मि -पर आप तैं पता ही नि चौल कि लोगुं मा कॉंग्रेस का विरुद्ध इथगा अधिक आक्रोश च?
भूतपूर्व कॉंग्रेसी मंत्री -वी त मि बुलणु छौं कि कॉंग्रेसी कार्यकर्ता इथगा निठ्ठला , निकज्ज ह्वे गेन हम मंत्र्युं तैं पता ही नि चौल कि लोग हमसे नराज छन। अरे यी कॉंग्रेसी कार्यकर्ता जनता का बीच जावन तो यूँ तैं पता चल जांद कि जनता क्या सुचणी च पर यी त बस अपण ब्यापार बढ़ाण मा लग्यां रैन।  सरासर कम्युनिकेसन गैप ह्वे गए छौ।
मि -जन कि ?
भूतपूर्व कॉंग्रेसी मंत्री -जन कि क्या ? स्यु हमन  बड़ी मुस्किल से चुनाव से ठीक पैलि फ़ूड अधिकार बिल पास कराइ पर हमारा कार्यकर्ता इथगा बेकार , लुंज , अळगसी   ह्वे गेन कि यूंन जनता तैं बताइ इ नी च कि राइट टु फ़ूड बिल क्या च ? फोकट का खाण वाळ ह्वे गेन जि यी कॉंग्रेसी कार्यकर्ता अर कार्यकर्ता काम नि करदन अर फिर फजीत हम नेसनल लेवल का नेताओं की हूंद।
मि -एक बात बथावदी कि राइट टु फूड बिल क्या च ? 
भूतपूर्व कॉंग्रेसी मंत्री -यार मीन फ़ूड मिनिस्टर तैं रैबार बि दे छौ कि फ़ूड बिल कु संक्षिप्त (ब्रीफ ) रूप रेखा भेजी द्यावो पर सरकार मा बि त काण्ड लग्यां छा , आज तक भूतपूर्व खाद्य मंत्रीन फ़ूड बिलक जिस्ट (संक्षिप्त ) नि भेजि। टोटल कम्युनिकेसन गैप।  अब क्या बोलुं कि  गैप से हम बड़ा नेताओं तै बि हरण पोड़।
मि -अब अग्वाड़ी क्या प्लान च ?
भूतपूर्व कॉंग्रेसी मंत्री -बस राजयसभा की सीट मिल जावो तो मजा से पांच साल कट जाल।



Copyright@  Bhishma Kukreti  2/6/2014 
   
*कथा , स्थान व नाम काल्पनिक हैं।
Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language  , Mockery in Garhwali Language, Send-up in Garhwali Language, Disdain in Garhwali Language,Hilarity in Garhwali Language, Cheerfulness in Garhwali Language
[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वाले द्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा  पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक द्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य, राजनेताओं द्वारा अभद्र गाली पर हास्य -व्यंग्य    श्रृंखला जारी  ]

         कखि प्र.मं.  नरेंद्र मोदी जोगेश्वरी पोस्ट ऑफिस दिखणौ आल त ?

                  घपरोळया , हंसोड्या , चुनगेर ,चबोड़्या -चखन्यौर्या -भीष्म कुकरेती     

(s =आधी अ  = अ , क , का , की ,  आदि )


               अजकाल सबि जगा नरेंद्र मोदी की ही चर्चा च। अबि द्वी -तीन दिन पैल नरेंद्र मोदिन केंद्रीय मंत्रालयुं सेक्रेटिर्युं मीटिंग मा ब्वाल बल सब्युं तैं अपण कार्यालय मा सफै ध्यान रखण पोड़ल अर ऑफिस मा कखि बि फाइलुं  चट्टा नि दिखण चयेंद।  अहमदाबाद मा नरेंद्र मोदिका नजदीकी बुल्दन बल नरेंद्र मोदी तैं गंदगी अर फाइलुं से इनि  चिढ़ च जन ममता दीदी तैं कम्युनिस्टुं  से चिढ च। 
   दिल्ली मा नरेंद्र मोदिका कुछ करिब्यूंन मि तै सूचना देकि नरेंद्र मोदी  कखि बि , कै बि शहर मा बगैर बतायां केंद्रीय कार्यालय दिखणो जाण वाळ छन। अर नरेंद्र मोदीक सरकारी दफ्तर दिखणो मुख्य उद्येस्य रालु कि दफ्तर मा सफै च कि ना अर सब फ़ाइल निबटाइं छन कि ना। 
बस जैदिन बिटेन नरेंद्र मोदीक करीबीन सूचना दे कि प्रधान मंत्री केंद्रीय सरकार का कै बि कार्यालय की बगैर सूचना दियां चेकिंग कर सकदन तो मेरी भूक -तीस -निंद हर्ची गे। मि डर्युं छौं कि कखि नरेंद्र मोदी हमारा प्यारा पोस्ट ऑफिस दिखणो ऐ गया तो क्या ह्वाल ?
            हरेक भारतीय सरकारी दफ्तर अर सरकारी कर्मचारी -कारिंदा से चिरड्यान्द च फिर चाहे उ दफ्तर रासन कार्ड बणाणो हो , ब्लॉक हो , पीएफ -पेन्सन ऑफिस हो , बिजली -पाणी दफ्तर हो आम भारतीय यूं दफ्तरुं मा आण नि चाँद अर भगवान याने सेक्युलर खुदा से ख्वाइस करद कि कबि बि कै सरकारी कर्मचारी से क्वी काम नि पड़ो।
सरकारी दफ्तरों व सरकारी कर्मचार्युं मा एकि सिरफ़ एकी सरकारी दफ्तर च जै से आम भारतीय घृणा नि करद अर एकी सरकारी कर्मचारी च जैसे हरिया काका जन मजदूर अर मुकेश अम्बानी सरीखा धन्ना सेठ बि वै सरकारी कर्मचारी से प्रेम करद अर वु सरकारी कर्मचारी छन पोस्ट ऑफिस का पोस्टमैन अर पोस्ट ऑफिस का कर्मचारी।  आप इनकम टैक्स कमिश्नर तैं  कोढ़ी हूणों श्राप दीणा रैल्या  किन्तु पोस्टमैन अर पोस्ट मास्टर , पोस्ट ऑफिस का रजिस्ट्री बाबू या टिकेट -स्टैम्प बाबू तैं कबि बि तुमन गाळी नि दे होलि।  रोज तुम रिस्तेदारुं  आण से अर मेमानुं खिदमत से तुम परेसान ह्वे जैल्या किन्तु तुम ईश्वर याने सेक्युलर खुदा से इबादत करदां कि पोस्टमैन रोज तुमर ड्यार आवु।  आज चाहे सूचना प्रसारण का कथगा ही माध्यम ऐ गेन , टेलीग्राम बंद ह्वे गेन पर डाकिया  बाबू से हमर प्रेम खतम नि ह्वे।
 इनि मुंबई मा जोगेश्वरी मा पोस्ट ऑफिस च , जख पोस्ट मास्टर बाबू जी छन , रजिस्ट्री बाबू जी छन , सेविंग अकाउंट बाबू जी छन , अर अब त बिजली -टेलीफोन बिल का बाबू जी छन अर सबसे बड़ा छन हमर पोस्टमैन साब।  मि अपण घौर का बाद पोस्ट ऑफिस से प्रेम करुद।  रिस्तेदारुं से अधिक मि पोस्टमैन साब तैं इज्जत दींदु।
मि तैं डौर लगणी च कि कखि अपण प्रधान मंत्री जोगेश्वरी पोस्ट ऑफिस चेक करणो ऐ तो क्या ह्वाल ?डॉरान म्यार प्राण सुकि जांद।
           सबसे पैल त पता इ नि चलद कि पोस्ट ऑफिस कखम च।  सरकारी फ़ाइल का हिसाब से एक दीवार पर दिशा मार्गदर्शक तीर का साथ पोस्ट ऑफिस का बोर्ड लग्युं च किंतु असलियत मा वीं दीवार पर ट्युसन क्लासेज , समाप्त हुयी जवानी पुनः प्राप्त करें , साडी -रसगुल्ला सेल आदि का बोर्ड इथगा ज्यादा छन कि पोस्ट ऑफिसौ साइन बोर्ड दिखेंद इ नी च।  हाँ रोड साइड पर द्वी हरा अर लाल लेटर बॉक्स देखिक अंदाज लगाण पोड़ल कि सैत च ह्वे सकुद च इखपुण कखि पोस्ट ऑफिस ह्वावु।  लेटर बॉक्स का पास पोस्ट ऑफिस हूणै गारंटी नी च किलैकि मुंबई मा रेलवे स्टेसन या बस स्टौपूं पास लाल लेटर बॉक्स मिल जांदन। हाँ जखम पोस्ट ऑफिस ह्वाऊ उखम लेटर बॉक्स की गारंटी हूंद।  जोगेश्वरी मा नटवर नगर रोड पर लेटर बॉक्स से पता नि चलुद कि इखम पोस्ट ऑफिस च पर लेटर बॉक्सुँ पास एक टेबल पर रजिस्ट्री , मन्योडर आदि कु काम करण वाळ से अवश्य पता चल जांद कि इखम अवश्य ही पोस्ट ऑफिस च।  जोगेश्वरी मा बि लाल हौर लेटर बॉक्सुँ पास की एक टेबल मा रजिस्ट्री , मन्योडर फौर्मुं से पता चल जांद कि जरूर इखपुण कखि पोस्ट ऑफिस च। टेबल पर पोस्ट ऑफिस कंसल्टेंट की दुकान हूंद।
      मि तैं डौर च कि जब नरेंद्र मोदी जोगेश्वरी पोस्ट ऑफिस विजिट पर आला तो मोदी जी तैं रोड  का किनारा टेबल लगैक बैठ्युं पोस्ट ऑफिस सलाहकार से ही पता लगल कि जोगेश्वरी पोस्ट ऑफिस कखम च।  खैर मोदी जि एक ग़ुरबट जन रस्ता से बिल्डिंग भितर पोस्ट ऑफिस का समणि जाला तो मोदीजिन अपण सेक्रेटरी से सीधा बुलण कि अंग्रेजुं जमानो मा सि लग्युं पुराणो धुराणो साइन बोर्ड बदला तो सेक्रेट्रिन बुलण कि चूँकि सरकार खामखाँ का खर्चा बचाणो बच्चनबद्ध च तो बोर्ड नि बदले सक्यांद।  यांपर मोदीजी सेक्रेटरी से ब्वालल कि बोर्ड नि बदल सक्यांद  तो  साइन बोर्ड दुबर पेंट तो कारो।  इखपर सेक्रेटरी कु जबाब होलु कि चूंकि पोस्ट ऑफिस एक रिहायसी बिल्डिंग मा च तो साइन बोर्ड का वास्ता आधा फ़ीट चौड़ु अर द्वी फ़ीट बोर्ड ही लग सकुद अर बोर्ड पर पेंटिंग करे जाल तो बोर्ड मा चार भाषाऊं अंग्रेजी , मराठी , हिंदी अर उर्दू मा इबारत लिखण पोड़ल अर बोर्ड कु साइज इन च कि चार त क्या एक भाषा मा बि अड्रेस पेंट नि ह्वे सकुद।  बिचारा नरेंद्र मोदी निरसे जाला कि प्रधान मंत्री ह्वेक बि जोगेश्वरी पोस्ट ऑफिस तैं नया बोर्ड नि दे सकदन।
निरस्यां नरेंद्र मोदी जनि पोस्ट ऑफिसक ड्वार पर जाला तो ऊंक समझ मा नि आल कि वु पोस्ट ऑफिस मा अयां छन कि कै गोडाउन मा अयां छन अर पोस्ट मैनूं तैं छोड़िक यु पता लगाण कठण ह्वे जाल कि ग्राहक कु छन अर पोस्ट ऑफिस का कारिंदा कु छन।  कारिंदौ कुण टेबल छन , कुर्सी छन किन्तु सुबेर इथगा अधिक डाक आदि कि हरेक टेबल अर कुर्सी मा डाक ही डाक धर्युं रौंद अर डाकिया व डाक विभाग का बाबू व चतुर्थ श्रेणी का कारिंदा डाक छंटण मा व्यस्त रौंदन।  इन मा अधिकतर ग्राहक बीच मा गलती से घुस जांदन अर जन कि सब जाणदन कि हिन्दुस्तान मा पोस्ट ऑफिस का ही सरकारी कारिंदा इन छन जो जनता तैं झिड़कद नि छन तो ग्राहकुं तैं हौर ग्राहक ही बतांदन कि जना  खिड़की छन ऊना रजिस्ट्री , मन्योडर , सेविंग, स्टैम्प बिक्री , बिल भरान आदि कु काम हूंद। भारत मा पोस्ट ऑफिस ही एक इन कार्यालय हूंदन जख आप तैं सरकारी कर्मचारी ना त सींद मीलल ना ही निठल्ला मीलल अर मोदीजी अवश्य ही पोस्ट ऑफिस का कारिंदों व्यस्तता से पुळयाल अर भविष्य मा उत्तराखंड हॉर्टिकल्चर विभाग का निट्ठल्ला कर्मचार्युं तैं भाषण दयाला कि काम करण सिखण हो तो जोगेश्वरी पोस्ट ऑफिस का कर्मचार्युं से सीखो।
मोदी जी जब पोस्ट ऑफिस की मेज कुर्सी द्याखल तो कुर्सी -मेजुं रंग देखिक दंग रै जाला कि लकड़ी को रंग इन अजीब किलै ह्वे गे।  पोस्ट ऑफिस की रिपोर्ट बतांद कि कबि एक इंच मोटी परत की अर एक बाई एक पाया वाळ मेज ये पोस्ट ऑफिस मा  भिजे गे छे किन्तु रुपयों की सेविंग का साथ पोस्ट ऑफिस की मेजों पर धूल -गर्द आदि की भी सेविंग बड़ी तत्परता से हूंद तो अब हरेक मेज की  परत की मोटाई तकरीबन चार इंच ह्वे गे अब धूळ -गर्द अर मेज की लकड़ी मा फर्क करण मुस्किल च।  नरेंद्र भाई अपण सेक्रेटरी तैं मेज कुर्सी से धूळ -गर्द की सफाई का आदेश द्याला तो सेक्रेटरी ब्वालल कि या धूल -गर्द पचास साल पुराणी च तो इन ओल्ड  ऐसेट , प्राचीन सम्पति , पुरातन परिसम्पति की सफाईका  निर्णय केवल  आर्कियोलॉजिकल सर्वे निदेशक हे दे सकद तो बिचारा नरेंद्र मोदीजीक सरकारी कार्यालयों मा सफाई प्रेम का परखचा उडी जाला।
नरेंद्र मोदी फिर ग्राहक सेवा स्थल का पास का वातवरण द्याखल तो बेहोस हूणै स्थिति मा जाण वाळ ह्वे जाल।  मोदीजी तैं समझ मा इ नि आल कि यु स्थल गूंद , लाख , फटयाँ स्टाम्पुं गटर च कि ग्राहक सेवा स्थल च।  वो सेक्रेटरी तैं ग्राहक सेवा स्थल की सफाई का आदेश द्याला तो सेक्रेटरी ब्वालल कि चूँकि इन तरह की सफाई का वास्ता पर्यावरण विभाग से अग्रिम आज्ञा जरूरी च अर पर्यावरण का मामला मा पीएमओ अनावश्यक दखलंदाजी नि करद।  सेक्रटरी नरेंद्र मोदी जी तैं सरदार सरोवर डाम की याद दिलाला कि भूतपूर्व प्रधान मंत्री की इच्छा हूण पर बि प्रधान मन्त्रीन सरदार सरोवर की ऊंचाई बढ़ाणो वास्ता पर्यावरण विभाग मा दखलंदाजी नि कार।  चूँकि भारत मा प्रधान मंत्री बि पर्यावरण विभाग से पंगा नि ले सकुद तो बिचारा सफाई प्रेमी नरेंद्र मोदीजी अपण सि मुख लेक पोस्ट ऑफिस से भैर ऐ जाला।  इथगा मा भूतपूर्व प्रधान मंत्री मनमोहन सिंह कु फोन  आलो ," नरेंद्र भाई ! मीन सूण कि आप जोगेश्वरी पोस्ट ऑफिस की विजिट पर छंवां ?"
नरेंद्र भाइक उत्तर होलु ," हाँ मनमोहन जी !"
मनमोहन सिंह जी ब्वालल ," नौ साल पैल मीन बि जोगेश्वरी पोस्ट ऑफिस विजिट करि छौ।  क्या आप ये पोस्ट ऑफिस की सफाई करवै सकदा ?"
नरेंद्र मोदीक जबाब होलु ," मैं लगद कि जब तलक ब्रिटिश राज का सन 1858 मा बणयां नियम नि बदल्याल तब तलक भारत का क्वी बि प्रधानमंत्री पोस्ट ऑफिस जन छुट केंद्रीय सरकारी कार्यालय की सफाई नि करवै सकद। "
मनमोहन जीन टौन्ट कसला  ," याँकुण त तुम्हारी सरकार तैं कथगा इ संवैधानिक अनुच्छेद बदलण पोड़ल। "
"हाँ " नरेंद्र भाइक जबाब होलु
मनमोहन जी बताल ," अर यांकुण तुम तैं लोकसभा अर राजयसभा मा बिल पास करण पोड़ल। "
"हाँ "
" आप लोकसभा मा तो बिल पास करै देला पर राजयसभा मा क्या करिल्या ?" मनमोहन जीन पूछ
"कुछ समझ मा नि आणु च। " नरेंद्र भाइक जबाब छौ।
"ठीक च तुम लोकसभा मा कॉंग्रेस तैं लीडर ऑफ अपोजिसन बणाओ त कुछ हद तलक राजयसभा मा हम बिल पास करौला।  एक द्वी दिन मा जबाब दे देन। " इन बोलिक मनमोहन जीन फोन काटी दे
 


Copyright@  Bhishma Kukreti  7/6/2014 
   
*कथा , स्थान व नाम काल्पनिक हैं। 

Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language  , Mockery in Garhwali Language, Send-up in Garhwali Language, Disdain in Garhwali Language,Hilarity in Garhwali Language, Cheerfulness in Garhwali Language
[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वाले द्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा  पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक द्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य, राजनेताओं द्वारा अभद्र गाली पर हास्य -व्यंग्य    श्रृंखला जारी  ]

                       हरीश रावत से भाजपा नेता किलै निरस्याणा छन ?

               घपरोळया , हंसोड्या , चुनगेर ,चबोड़्या -चखन्यौर्या -भीष्म कुकरेती     

(s =आधी अ  = अ , क , का , की ,  आदि )

भाजपा नेता -भै ये मुख्यमंत्री हरीश रावत का चालचलन हम तैं ठीक ठाक नि लगणा छन।
मि ------ कनो क्या अफवाह फैलीं  च कि हरीश रावत बि डा रमेश निशंक जन अपण जवानो  जवान नारयण दत्त तिवारी का रस्ता पर हिटणा छन ?
भाजपा नेता -ना भै ना ?
मि ------तो क्या समाज मा छवि बण गे कि हरीश रावत जी बि हड़क सिंग जीक तरां बेटी -ब्वार्युं दगड़ छेड़खानी करदन।
भाजपा नेता -वी त रूण च कि हरीश रावत पर जनान्युं प्रेमी जन अभियोग नि लगणु च। मि त बुलणु छौं कि हरीश रावत जी कॉंग्रेसी कल्चर पर नि चलणा छन।
मि ------हैं ! क्या हरीश रावतन राहुल गांधी तैं लीडर ना जोकर ब्वाल ?
भाजपा नेता -नै नै हरीश रावतन इन क्वी बयान नि दे कि राहुल गांधी जयूँ बित्युं लीडर च , किदलु च।  पर हरीश रावत कॉंग्रेस हिसाब से काम नि करणा छन।
मि ------क्या हरीश रावत जीन  उत्तराखंड से उर्दू भाषा हटाई आल कि जु तुम बुलणा छंवां कि हरीश रावत कॉंग्रेस का हिसाब से काम नि करणा छन।
भाजपा नेता -नै भै हरीश रावतन बि उत्तराखंड मा उर्दू गिरती दशा पर अत्यंत चिंता जताई।  पर फिर बि हरीश रावत गैर कॉंग्रेसी मुख्यमंत्री तरां व्यवहार करणा छन।
मि ------गढ़वाली -कुमाउनी भाषा पर कथगा खर्च करे जाव यो पुछणो उत्तराखंड  का मुखिया  हरीश रावत जी दिल्ली राहुल निवास नि जांदन ?
भाजपा नेता (गमगीन ह्वेक )-नै नै !  ये मामला मा हरीश रावत पक्का कॉंग्रेसी छन अर हरेक हफ्ता हनुमान मंदिर की जगा राहुल निवास मा आरती उतारणाs जांद छन।
मि ------द लगा सुंगरुँ दगड़ मांगळ ! भै जब हरीश रावत हर हफ्ता राहुल गांधी चरण स्पर्श का वास्ता दिल्ली भागणा रौंदन तो आप कनै बोल सकदन कि हरीश रावत गैर कॉंग्रेसी मुख्यमंत्री जन व्यवहार करणा छन।
भाजपा नेता (गंभीर ह्वेक ) -ठीक च कि हरीश रावत सोनिया वंदना हेतु हर हफ्ता दिल्ली जांदन किन्तु उ जू बि उत्तराखंड मा करणा छन वो कॉंग्रेसी मुख्यमंत्री का हिसाब से नि करणा छन। 
मि ------क्या हरीश रावत भूतपूर्व मुख्यमंत्री विजय बहुगुणाक तरां निठ्ठला बैठ्याँ दिख्यांदन ?
भाजपा नेता  (एकदम से गुस्सा मा भड़किक )- वांकि त रूण च कि हरीश रावत निठ्ठला बैठ्याँ नि दिखेंदन।
मि ------तो क्या हरीश रावत  निर्णय कि मंत्रीमंडल बैठक अल्मोड़ा मा हो क्वी बुरु काम च , गैरमुनासिब काज च ?
भाजपा नेता (चिरड़ेक )- वांकि त रूण च कि हम भाजपा वाळ हरीश रावत  निर्णय की आलोचना नि कौर सकणा छंवां।  हम बस औपचारिक रूप से ही बरानामौ विरोध जताणा छंवां।
मि ------क्या गैरसैण मा विधान सभा सत्र बुलाण क्वी गैर वाजिब कार्य च ?
भाजपा नेता (भुनी मुंगरी दाणि जन उछिन्डेक)   -भीषम जी ! लगता है तुम कॉंग्रेस  हाथों बिके हुए लेखक हो।  यही तो रूण च कि हम गैरसैण मा विधानसभा सत्र बुलाणो विरोध नि कौर सकदवां।
मि ------ जरा विरोध करिक दिखावा त सै जैं जनतान  तुम तैं लोकसभा चुनाव जिताइ वै जनता जुते द्याली।
भाजपा नेता (ह्यळीक भौण मा रुंद सि )  -वही तो मै कह रहा हूँ कि हरीश रावत जी गैर कॉंग्रेसी मुख्यमंत्री  तरह व्यवहार कर रहे हैं।
मि ------क्या हरीश रावत केदारनाथ पुनर्निर्माण कार्य निरक्षणौ बान केदारनाथ नि गेन ?
भाजपा नेता (तिड़केक )  -ओहो रूण यांकि त च कि हरीश रावत बबरट्या  कामगति मुखिया जन काम करणा छन।
मि ------क्या हरीश रावत विकास अर जनकल्याण का काम नि करणा छन ?
भाजपा नेता (अत्यंत गुस्सा मा ) -गुड़गोबर यी त हूणु  च कि हरीश रावत विकास अर जनकल्याण पर ध्यान दीणा छन अर अपण कुर्सी बचाण पर ध्यान नि दीणा छन।
मि ------क्या हरीश रावत अनिर्णय की स्थिति मा छन ?
भाजपा नेता (बिकराळ ह्वेक )  -काण्ड यी त लगी गेन कि हरीश रावत की छवि एक निर्णय लीण वाळ मुख्यमंत्री की बणनि च।
मि ------कनकै
भाजपा नेता (निराशा मा ) -हरीश रावत का जनसम्पर्क हम भाजपा वाळु तरां च।
मि ------जन कि ?
भाजपा नेता (आंख्युं मा अंसदारी ) -जन कि र गणमान्य लोगुं तैं अर मीडिया तैं रोज सुबेर इंटरनेट से पता चल जांद कि आज मुख्यमंत्री कु क्या प्रोग्राम च अर ब्याळि मुख्यमंत्रीन क्या क्या कार।
मि ------नेता  यु त उत्तराखंड की दृष्टि से भलो काम च कि लोगुं तैं पता लगणु च कि उत्तराखंड मा कुछ कामकाज हूणु च अर हमर मुख्यमंत्री कामगति मुख्यमंत्री च।
भाजपा नेता (किड़कताळी मारद )   -अरे जनता का बीच  मेसेज -सूचना पंहुचो कि मुख्यमंत्री कामगति च अर निर्णायक च पर तो नरेंद्र मोदी जी को एकाधिकार छौ।
मि ------पर आप तैं क्या परेशानी च कि हरीश रावत काम करणा छन अर ऊंक जनसम्पर्क करणो ढंग बि प्रशंसनीय च
भाजपा नेता (जन बुल्यां क्वी सगा संबंधी मोरी गे हो ) -यदि मुख्यमंत्री बढ़िया ढंग से काम करण लग जाल तो हम भाजपा वाळुन क्यांक विरोध करण ?
मि ------तो आप रचनात्मक विरोधी की भूमिका निभावो। याने कंस्ट्रक्टिव अपोजिसन की भूमिका !
भाजपा नेता -बाइ द वे ! यी कंस्ट्रक्टिव अपोजिसन हूंद क्या च ?



Copyright@  Bhishma Kukreti  9/6/2014 
   
*कथा , स्थान व नाम काल्पनिक हैं। 

Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language  , Mockery in Garhwali Language, Send-up in Garhwali Language, Disdain in Garhwali Language,Hilarity in Garhwali Language, Cheerfulness in Garhwali Language
[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वाले द्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा  पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक द्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य, राजनेताओं द्वारा अभद्र गाली पर हास्य -व्यंग्य    श्रृंखला जारी  ]