MeraPahad Community Of Uttarakhand Lovers

भोजन ही रोग उतपन्न व रोग समाप्त करद
-
चरक संहितौ सर्व प्रथम  गढ़वळि  अनुवाद   
 खंड - १  सूत्रस्थानम , 28 th  अठाईसवाँ  अध्याय   ( विविधशित पीतीय   अध्याय   )   पद  ४   
  अनुवाद भाग -  २५१
गढ़वाळिम  सर्वाधिक पढ़े  जण  वळ एकमात्र लिख्वार-आचार्य  भीष्म कुकरेती
s = आधी अ
-
      !!!  म्यार गुरु  श्री व बडाश्री  स्व बलदेव प्रसाद कुकरेती तैं  समर्पित !!!
-
ये आहारन तीन वस्तु बणदन -  प्रसाद रूपी रस ,किट्टं या आहार भाग अर  मल।  यामादे किट्ट  भागन पसीना , मूत , मल , वायु , पित्त , कफ अर कन्दूड़ , आँख , दुःख , आज , कूप , प्रजनन का उपमान हूंद।  अर दाड़ी , बाळ , रोम , मूछ , नंग आदि तै पुष्ट कारी हूंद। 
आहारक रस रुपए प्रसादन रस , रक्त मांस , मेद , अस्थि , मज्जा , शुक्र , ओज तथा पृथ्वी - तेज , २ वायु , आकाश पंचभूत त  इन्द्रिय निर्मित करदन।  अत्यंत शुद्ध रूप म वायु , शरीर तै बंधण वळ स्नायु , शिरा अदि संधियां , आर्तव व दूध निम्रं करदन।  यी सब मल नामक धातु या प्रसाद रूप धातु , रस अर मल द्वारा पुष्ट हूंदा आयु अनुसार परिणाम से निर्मित हूंदन।  ये अनुसार शरीर क आपण  स्वरुप स्थिर हूण पर धातु साम्यवस्था म रौंदन।  प्रसाद रूप धातुओं क क्षय व वृद्धि जु निमित्त लेकि हूंदी वो आहार क कारण ही हूंद।  इलै  आहार द्वारा क्षय व वृद्धि का समय उतपन ह्वेका आरोग्यता उतपन्न हूंद।  इनि किट  व मल बि आरोग्य सम्पादन म सहायक हूंदन।  अपण परिमाण से बिंडी वड़ यां किट  अर  मल बि भैर निकाळि शीत  से उतपन्न मल तै उष्ण , उष्ण से उतपन्न हुयुं मल तै शीतपरिचर्या से मल शरीर क धातुओं तै समान्यवस्था म रखद।  मल का धातुओं सोत्र गमन करण का मार्ग छन अर सत्र जु जै  जैक छन  वो धातुओं तै पूर्ण करदन ।   ये प्रकार से  पूरो शरीर खायुं , पियुं , चाट्यूं , दन्तं काटयूं , आहार रुपया रस से भरपूर हूंद. रोग बि ये शरीर म खाइक , पैक , चाटिक , कातिक ही हूंद।  यूं  मदे हितकारी धातुओं सेवन हितकारी व अहितकारी धातु सेवन अहितकारी हूंदन। ४।   
 -
*संवैधानिक चेतावनी : चरक संहिता पौढ़ी  थैला छाप वैद्य नि बणिन , अधिकृत वैद्य कु परामर्श अवश्य लीण
संदर्भ: कविराज अत्रिदेवजी गुप्त , भार्गव पुस्तकालय बनारस ,पृष्ठ   ३७५ -३७६
सर्वाधिकार@ भीष्म कुकरेती (जसपुर गढ़वाल ) 2022

योगिनी एकादशी व्रत कथा
-
सर्वप्रिय लेखिका अनिता नैथानी ढौंडियाल
-
हिन्दू धर्म ग्रंथों मा हर इगादसी कु अलग-अलग महत्व बतयेगी यांका हि वजा से यूं कु नौं भि अलग अलग रखे गी।हर साल मा चौबीस इगादसी होंदंन। मलमास कि इगादस्यूं तैं मिलैकि इ छब्बीस ह्वे जंदन।यूं इगादस्यूं मा एक इगादसीअसाड़ा मैना कि कृष्ण पक्ष की इगादसी च जैंतै योगिनी इगादसी बोल्दन।यांकू बर्त लेण से सौब पापूं कु नास ह्वे जांद अर ये लोक मा भि सुख अर परलोक मुक्ति मिल जांदी। बर्त कथा माभारत क टैमै बात च एक बार धर्मराज युधिष्ठिर न भगवान श्री कृष्ण म बोली कि हे त्रिलोकीनाथ मिन जेटा मैना कि शुक्ल पक्ष कि निर्जला इगादसी की कथा सुणी। अब कृपा करी असाड़ा मैनै कृष्ण पक्षै इगादसी कथा सुणावा। श्रीकृष्ण भगवान न बोली हे पांडु पुत्र असाड़ा मैनै कृष्ण पक्षै इगादसी कु नौ योगिनी इगादसी च ये बर्त से सौब पाप खतम ह्वे जंदन।यु बर्त ये लोक भोगी परलोक मा मुक्ति देण वालू होंद।हे धरमराज या इगादसी तिन्नी लोकूं मा प्रसिद्ध च तुम तैं मि परणौं कि कथा सणौदु, ध्यान से सुणा। कुबेर नौ कु एक राजा अलकापुरी नौ की नगरी मा राज करदू छौ।वु शिव भक्त छौ। वेकु हेममाली नौ कु एक यक्ष सेवक छौ जु पूजा कु तैं फूल लौदु छौ।हेममाली की विशालाक्षी नौ की भौत सुंदर स्त्री छै। एक दिन वु मानसरोवर से फूल लेकि ऐ। पर फूलूं तैं रखी अपणी घौरवली दगड़ रमण कन लगी अर दुफरु ह्वेगी राजा कुबेर हेममाली का सारा लग्यूं रै जब द्वफरा ह्वेगी त वेन भौत नाराज ह्वेकि अपणा सेवकों तैं आदेश दे कि पता लगावा कि हेममाली अबी तक फूल लेकि किलै नि ऐ। जब सेवकोंन पता करी त राजा तैं सब बात बतै।य बात सूणी राजा कुबेरन हेममाली तैं बुलै।डौरन कंबदू कंबदू हेममाली राजा समण ऐ। वे देखी राजा तैं भौत गुस्सा ऐ वेकाओंट गुस्सन फफरौंणा छा। राजन बोली हे पापी तिन मेरा पूजनीय देबतौं की बेजत्ती कै देबतौं क देव शिवजी कु अपमान कैरी, मि त्वे तैं शराप देंदू कि तू स्त्री क बिछोह मा तड़पी मृत्युलोक मा जैकी कोड़ी कु जीवन जी कुबेरा शरापन वु धरती मा पोड़ी अर कोड़ी ह्वेगी।वेन भौत कष्ट भोगनी पर शिव की किरपा से वैकी बुद्धि खतम नि ह्वे अर वे तैं पूर्व जनमै भि याद रै। अपरा पुरणा जनमै याद करी वु हिमालै पहाड़ क तरफ चल गी।चलदा चलदा वु ऋषि मार्कण्डेय क आश्रम मा पौंच गी वु ऋषि भौऔत बड़ा तपस्वी छा व ब्रम्मा जन दिखेणा छा। ऋषि तैं देखी हेममाली वख गै अर वूंका खूट्टौं मा पोड़ गी। मार्कण्डेय ऋषि न पूछी कि तिन इना क्य करम कन्नी कि तेरी य दसा हूईं च। हेममाली न सैरी बात बतै अर बोली कि कृपा करी क्वी उपाय बता जासे मेरी मुक्ति होव। मार्कण्डेय ऋषि न बोली कि तिन सब सच सच बतै ये वास्ता मि तेरा उद्धारौ एक बर्त बतौंदू। यदि तू असाड़ा मैनै कृष्ण पक्षै योगिनी इगादसी कु बर्त बिधि बिदान से कल्लू त तेरा सौब पाप खतम ह्वे जाला। ऋषि की बात सुणी हेममाली भौत खुश ह्वे अर वेन बिधी बिदान से योगिनी इगादसी कु बर्त करी।जांसे वे तैं सौब सुख प्राप्त ह्वैनी। भगवान श्रीकृष्ण न बोली हे राजन ये बर्त कथा कु फल अट्ठासी हजार बामण जिमौंणा क बराबर होंदूं।ये बर्त नसब पाप खतम ह्वे जंदन अर प्राणी मोक्ष प्राप्त करी स्वर्ग कु अधिकारी बण जांदू।

शनिवार  व्रत  कथा
-

सर्वप्रिय लेखिका अनिता नैथानी ढौंडियाल
-
 एक बार सब्या नौग्रहौं सूर्य, चंद्र, मंगल, बुध, वृहस्पति ,शुक्र,शनि, राहु और केतु मा बहस ह्वेगी कि सम्मा बड़ु कु छ।सबी आपस मा लड़ण लग्गैं अर क्वी फैसला नि होण पर देवराज इन्द्र म फैसला करणू पौंछ गेनी। इन्द्र ईं बात से घबरैं गेनी अर फैसला करणू ना बोल दे। पर ऊन सला दे कि इबरी धरती मा भौत सच्चू राजा बिक्रमादित्य छ,वी ईं बातौं फैसला कर सकदन। सब्या ग्रह एक दगड़ राजम पौंच गेनी अर अपण बात बतै।अर फैसला करणू बोली।राजा भौत परेशान ह्वेगी कि कैतैं बि छ्वटु बतै त वु नाराज ह्वे सकदू।तब राजा दिमाग मा एक तरकीब ए। वेन सोना चांदी,कांसा,पितलु,कांच,रांगा ,जस्ता, अभ्रग अर लुआ सिंगासण बणवैनी अर सब्यूं तै अपणा अपणा सिंगासण मा बैठणू बोली। जु आखिरी सिंगासण मा बैठलू वी सबसे छ्वटू होलू। अब लुआ सिंगासण सबसे बादम होण से शनिदेव सबसे बाद मा बैठिनी।ए वास्ता वी सबसे छ्वटा मनै गेनी।ऊन सोची कि यु राजन जाणबूजी करी।ऊन नाराज ह्वेकि राजम बोली कि हे राजा तू मैं तैं नि जणदू। सूरज एक राश मा एक मैना, चन्द्रमा सवा द्वी मैना द्वी दिन, मंगल डेढ़ मैना, वृहस्पति तेरा मैना,बुध अर शुक्र एक एक मैना घुमदन, पर मी ढै से सड़े सात साल तक रौंदु। बड़ौ बड़ौ कु बिणास कर्यूं च मेरू। श्री राम की साढ़ेसाती औंण पर ऊंतै बणवास ह्वे,रावण तैं बांदरौं कि सेना से हरण पोड़, अब तू सावधान रै। इन बोली शनिदेव नाराज ह्वे किवख बटीचल गेनी। कुछ टैम बाद राजा की साढ़ेसाती ए ।तब शनिदेव घोणौं कु ब्यपारी बणी वख ऐ ऊं दगड़ी भौत कै बड़ियां घोड़ा छा। जब राजा तैं पता चली त वेन अपड़ा घोड़ा वाला तैं बड़िया बड़ियां घोड़ा लेणू बोली त वेन कै बड़िया घोड़ा लेनी अर एक सबसे बड़िया घोड़ा राजा तैं दे।जन्नी राजा वे घोड़ा मा बैठि वु घोड़ा जंगल मा भाग गि अर गैब ह्वेगी अर राजा भूकु तीसू भटगुणूं रै।तब एक ग्वेरन वे तैं पाणी पिलै।राजन खुश ह्वेकि वेतैं अपणी गुंठी देदे। अर अफु नगरौ चल गी वख वेन अपणु नौ उज्जैनौ रौण वालू वीका बतै। वख एक सेठा दुकानम पाणी पेकि आराम करी ।किसमत से वेदिन सेठै भौत बड़ी बिक्री ह्वे।सेठ खुश ह्वेकि वेतैं अफु दगड़ अपणा घौर लीगी अर खाणू पेणू खलै। वख वे तैं खूंटी पर हार टग्यूं दिखे जैतैं व खूंटी घुलणी छै । थोड़ा देरम वु हार गैब ह्वेगी । जब सेठन देखी कि हार गैब ह्वेगी त वेन समजी कि वीका नी चोरी होलू। वेन वीका तैं कोतवाल म पकड़वै दे। फिर राजान भि वेतैं चोर समजी हाथ खुट्टा कटवैकी नगर से भैर फिंकवै दे।वख एक तेली तैं वे पर दया ऐ अर वेन वीका तैं अपड़ी गाड़ी मा बैठै दे।वु अपणी जीबन बल्दूं तैं हंकण लग गी। वे टैम राजा की शनि दशा खतम ह्वेगी बषगाल औंण पर वु मल्हार गाण बैठ गी।उबरी वु जै नगर मा छौ वखै राजकुमारी मनभावनी तैं वु इतगा अच्छू लगी कि वीन मन ही मन कसम खै कि वा वे राग गाण वाला दगड़ हि ब्यो कल्ली।वीन दासी तैं वे तैं ढुंढणू भेजी। दासी न बतै कि वु एक चौरंगिया च। पर राजकुमारी नि मानी।अगला दिन वा अनशन पर बैठ गी कि ब्यो कल्ली त वे ही दगड़। जब भौत समझौण पर भी नि मानी त राजन वे तेली तैं बुलै अर ब्यो की तैय्यरी करणू बोली। तब वेकू ब्यो वीं राजकुमारी दगड़ ह्वे। एक दिन सैदीं दां सुपिना मा शनिदेव न राजा मा बोली कि देखी तुमुन मैं तैं छ्वटु बतै कि कतगा दुःख झेली। तब राजन वूंसे माफी मांगी प्रार्थना करी कि हे शनिदेव जन दुःख मैं तैं दे कै हौर तैं नि देनी। शनिदेव मान गेनी अर बोली कि जु मेरी कथा अर बर्त करलू वेतैं मेरी कै भि दशा मा क्वी दुःख नि होलु।जु हमेशा मेरू ध्यान करलू,अर किरमोलौं तैं आटू देलू वेका सब मनोरथ परा होला। तब राजा हाथ खुट्टा भी वापस कर देनी। सुबेर राजकुमारीन देखी त वा हकबक रैगी। तब वीकन वींतै बतै कि वु उज्जैन कु राजा विक्रमादित्य च। सब्या भौत खुश ह्वेनी।सेठन जब सुणी त वु खटृटौं मा पोड़ी माफी मंगण लगी।राजन बोली कि यु त शनिदेवौ प्रकोप छौऔ। या मा कैकू क्वी दोस नी च। तब सेठन निवेदन करी कि मै तैं शान्ति तबी मिलली जब तुम मरा घौर चली खाणू खैला।सेठन राजै खूब आवभगत करी तब सबुन देखी कि जु खूंटी हार घुलणी छै वै अब वे तैं उबलणी च।सेठन कै मोहरैं देकी राजौ कु धन्यवाद करी अर अपणी नौनी श्रीकंवरी दगड़ ब्यो करणू निवेदन करी।राजन भी खुशी से हां बोली। कुछ टैम बाद राजा अपणी द्वी राणीयूं मनभावनी अर श्रीकंवरी अरकै साजो-सामान लेकी उज्जैन नगरी तैं चली।वख भी पुरवासियौंन सीमा पर हु वेकु स्वागत करी।सैरा नगर तैं खूब सजै की सबुन खुशी मनै।राजन घोषणा करी कि मिन शनिदेव तैं छ्वटु बतै जबकि असल मा वु ही सबसे बड़ा छन। तब बटी सैरा राज्य मा शनिदेव की कथा अर पूजा नियम से होण लगी।सैरी प्रजा न भौत टैम खुशी अर आनन्द से बितै।जू क्वी बि शनिदेव की ईं कथा तैं सुणदु अर पड़दू च वेका सैरा दुःख दूर ह्वे जंदन। बर्ता दिन ईं कथा तैं जरूर पणन चैंदी।

अनुपान क गुण व हित
-
चरक संहितौ सर्व प्रथम  गढ़वळि  अनुवाद   
 खंड - १  सूत्रस्थानम , 27th  सत्ताइसवां  अध्याय   ( अन्नपान
-
विधि   अध्याय   )   पद  ३१७  बिटेन  ३२३   तक
  अनुवाद भाग -  २४५
गढ़वाळिम  सर्वाधिक पढ़े  जण  वळ एकमात्र लिख्वार-आचार्य  भीष्म कुकरेती
s = आधी अ
-
      !!!  म्यार गुरु  श्री व बडाश्री  स्व बलदेव प्रसाद कुकरेती तैं  समर्पित !!!
-
अनुपान  (जु कै औषधि तै शक्ति प्रदान करद ) - जु पदार्थ आहार गुण का विपरीत ,अर जु  धातु  विरोधी नि होवन अपितु सास्म्य रखद  होवन सि अनुपान प्रशस्त छन।  यव: पुरुषीय अध्याय म ८४ प्रकारक आसव छन।  जल पीण या नि विचार कोरी हितकारी जल पीण  चयेंद। वायुदोष म स्निग्ध अर उष्ण , पित्तविकारम मधुर अर शीतल , कफ म रुखो अर उष्ण अर क्षय म रस उपयोगी च। 
उपवास से , मार्ग चलण से , बिंडी या उच्च बुलण से , अति स्त्री संग वायु धुप , पंचकर्मों या अन्य कारणों से थकान म अनुपान दीण से अनुपान म दूध अमृत जन पथ्य व हितकारी हूंद।  म्वाट शरीर वळ तैं पाणि म शाद सेवन उत्तम च।  जौं तै मंदाग्नि ह्वावो , अनिद्रा ह्वावो , तंद्रा शोक , भय , कलम से थक्यां , मद्य मांस सेवन करण वळुं कुण मद्य अनुपान उपयोगी च।
अनुपान क गुण - अनुपान शरीर क क तर्पण /तृप्ति करद , शरीर अर  जीवन तै पुष्ट करद , तेज बढ़ांद , खायुं भोजन से मिलिक शरीर म मिल जान्दो, खायें भोजन तै पचांद ।  मिल्युं अन्न तै तुड़द अर अलग अलग करद।  शरीर म कोमलता लांद , आहार तै क्लिन्न करद , पचांद अर सुखपूर्वक पचैक, शीघ्र शरीर म पंहुचायी दीन्द।   ३१७ -३२३। 

 -
*संवैधानिक चेतावनी : चरक संहिता पौढ़ी  थैला छाप वैद्य नि बणिन , अधिकृत वैद्य कु परामर्श अवश्य लीण
संदर्भ: कविराज अत्रिदेवजी गुप्त , भार्गव पुस्तकालय बनारस ,पृष्ठ   ३७०
सर्वाधिकार@ भीष्म कुकरेती (जसपुर गढ़वाल ) 2022

मासौ सैंण नैली बाजार रामलीला हवाई
पब्लिका बीच मंजू भली बांद राई। 

जूनी को गरण  हे मंजू , जूनी को गरण  हे मंजू
राति बारा बजी हवाई सीता कु हरण।
 
मसौ सैंण नैली बाजार रामलीला हवाई
पब्लिका बीच मंजू भली बांद राई। 

खाई जाला आम हे मंजू, खाई जाला आम
मासो सैंण ऐकी मंजू ह्वेगे बदनाम।

मसौ सैंण नैली बाजार रामलीला हवाई
पब्लिका बीच मंजू भली बांद राई। 

कपड़ों को थान हे मंजू, कपड़ों को थान
नैली बाजार आंदि मंजू रामलीला का बान।

मसौ सैंण नैली बाजार रामलीला हवाई
पब्लिका बीच मंजू भली बांद राई। 

पाणी को गिलास हे मंजू पाटीसैण प्यूला
म्यारु यनु विचार चा मंजू ब्याऊ कैरी द्यूला।

 मसौ सैंण नैली बाजार रामलीला हवाई
पब्लिका बीच मंजू भली बांद राई। 

- लोक गीत।