बीजेपी मंगणी दुबट की पुजा
कांग्रेस मंगणी तिबट मा
युकेडी अर छुट मुट दल सी
सार लग्यां छन चौबट मा
बीजेपी की घात घतयीं
उल्ट तवा मा कांग्रेस कु
द्वास लगीं च पुजा मगणी
टंगडी अब घ्वाडा की
युकेडी क भी किरै किरै की
खुब घड्यली मिसयीं च
परगट ह्वा हे चुनौ देवता
खुब रट लगयीं च
छुट मुट दल पर पौन छाया
डमाटकडी तौंकी लगयीं च
कबी कैंडिल मार्च मा कबी
धरना प्रदर्शनों मा पुज्यांणा छन
हरदा कुन हरक सिंग
काल भैरों बंण्यु च
उल्ट तवा कु नाच नचै दे
बिजय बहुगुंणा भुनु च
शैला रांणी चैंपियन जी भी
डौंड्या नारसिंग बंण्या छन
गणेश जोशी दा हपार द्याखो
सतों द्वार मा फंस्या छन
नयी नयी दुकान राजनिति की
जगजगा खुल्यां छन
घाम अछल्याल सरकार फुकेली
जयद्रथ की आश लग्यां छन
अब 28 मा जलकट्या कु
दिन जगरी कु कर्युं च
राजनिति की जैंती ड्यारदूंण
सरा मल्सु फुल्युं च
बीजेपी मंगणी दुबट की पुजा
कांग्रेस मंगणी तिबट मा
छुट मुट दल.....
सर्वाधिकार @लेख सुदेश भट्ट "दगडया"