MeraPahad Community Of Uttarakhand Lovers

गज़ल

BY : पयाश पोखड़ा
Garhwali Ghazal by Payas Pokhara
******
छाळा फुफरा नि दिखांदु अब जाण-पच्छ्याण मा ।
लुणी लसाक सि द्याख लोगु का ब्वन-बच्याण मा ।।
मेरि चुलखंदि कि छुवीं अब गौं-गळ्या मा चलिगीं ।
बरसू बीतला मीथैं ईं दिवलि का छेद बुज्याण मा ।।
आंख्यूं की डिमडळ्यूं मा कबरि तक रैलु अटक्युं ।
उमर बीति जालि हमरि सैन-सक्ति अजमाण मा ।।
किलै रुणा छवा तुम ए बगत का मिज़ाज देखिक ।
बगत थैं जरसि बगत नि लगदो बगत बदलाण मा ।।
अब कै खुणै कुछ नि बरज़दा हमर गांवा का लोग ।
मुंड-मुंडीत छाया कभि जंद्यौ ट्वप्ला बदलाण मा ।।
अाज कत्गा तरक्की कै ग्याई यो एटमी जमनो ।
भौत मज़ा आणु च लोगु थैं ढुंगौंल कच्याण मा ।।
कनमेसिक उलखणि सि सुभौ च त्यारु "पयाश"।
पैनि धार ख्वींडे ग्याइ मुरक्या बांज लच्छ्याण मा ।।
© पयाश पोखड़ा 27022020.

गज़ल
*******
गढवाली गजल
गजलकार :पयास पोखडा
-
भटुळ्युं थैं आगिम् डळ्दा द्यखणा छन वो ।
मुंजईं जिकुड़्यूं थैं जळ्दा द्यखणा छन वो ।।

ह्यूं बणिगै खुद अर एड़पट्ट ह्वैगिन पराज ।
घामम् कळ्यज़ि थैं गळ्दा द्यखणा छन वो ।।

सुपिन्या उकळि लग्यान अंग्वाळ ब्वटणा को ।
रस्ता-बाटों स्वीणों थैं चळ्दा द्यखणा छन वो ।।

हैंसदा फूलु का कुटमणा भि निमिड़ि गैं आज ।
बगैर हवा का डाळि थैं हळ्दा द्यखणा छन वो ।।

घर-गौं छोड़ि अपणो झणि कब घर बौड़ ह्वालु ।
द्वि बूढ-बुढ्यौं थैं पुटगि पळ्दा द्यखणा छन वो ।।

बस भोळ की आस मा अभितलक बच्युं चा ।
ये बिसवास थैं माटम् रळ्दा द्यखणा छन वो ।।

झूट ब्वलदंरों देखिक रौंस लगणि च "पयाश"।
सीदु-सच्चु आदिम थैं टळ्दा द्यखणा छन वो ।।

© पयाश पोखड़ा 21112019.

धार -खाळ

:शिवदयाल शैलज
Garhwali poem by Shiv Dayal Shailaj
-
"जो बरखि नि साका ; वो बसगाळ हुयां छौं !
क्यऽ पुछणै हाल ? हम त धार-खाळ हुयां छौं !!

विकासै -बादल ; सरकरि - सरग मा हेरणा !
धार-खाळूं सूखी ; चाळ -खाळ हुयां छौं !!

जब स्वीणूं द्यखणम् ;आँख्यू बरगबांज कै !
तबित् अपड़ि निंदि क अफि ;ढंगरचाळ हुयां छौं !!

भयात मा झगड़ा अर खिर्तूम -खिर्तू देखी !
सैणा मा रैकि बि ;उंदार - उकाळ हुयां छौं !!

कबि त हमरि एकता का गीत लगदा छा !
नै जमना मा अगास - पताळ हुयां छौं !!

ब्याळि तलक त् हम बिना ;गफ्फा नि घुटेयू !
आज हम तुमर ;जिया को जंजाळ हुयां छौं !!

ये मुल्का हालूंम् कनिकै रैण सूणिल्या ?
हम त भैऽ क् सौं ; भीटा मा कि फाळ हुयां छौं !!
शिवदयाल शैलज

आस म सांस
-
प्रेरणादायक गढ़वाली कविता

कवि –डा वीरेंद्र बर्त्वाल

An inspirational Garhwali Poetry
By ‘Dr. Virendra Bartwal
-

लग्यूं छौं उकाल़ि कबि त सम्यार आलो
कबि त जमली बिज्वाड़ अर फुलार आलो
यूं सुखा गदनों मा कबि त छलार आलो
कबि त होला म्यरा बि द्यबता दैंणा
कबि त म्यरा हिस्सा कु डड्वार आलो।
लग्यूं छौं उकालि कबि त सम्यार आलो
कबि त भर्यलु पोटगु अर डकार आलो
कबि त वूंका गौं बिटि रैबार आलो
कबि त जालि खैरी अर उलार आलो।
-@डा.वीरेंद्र बर्त्वाल
देव प्रयाग , 2020

खुसुर फुसुर
-
बचपन का आनन्द पर एक गढवाली कविता

कवि :जगदम्बा चमोला

Garhwali Poem Memorising Pleasurful Childhood
By Jgdamba Chamola
-

क्वे भी गम को लेश नि छौ
बस सारो सुख छौ अपड़ा दम पर
ल्वोण त्यौल की चिंता छै ना,
सामाजिक बन्धन छौ हम पर
ना भोळ भविष्ये खोज खबर
ना रोग सोग छौ कुछ भी हम पर
हर्ष उलार छौ संग्ति खत्यों, जब
बचपन छौ हर कदम कदम पर
यन नीं दुख नी रैन ह्वला, पर
नजर नि रौन्दि छै कै भी गम पर
दुख भी च्योत च्यत्यण कनकै छौ
टक त रौन्दि छै बग्वळ्या बम पर
धूळो माटो सबकुछ छौ पर
यथ्या मा भी जचणां रौन्द छा
खुशी यथ्या छै स्यंया मा भी
बचपन मा हम हसणा रौन्द छा
आज त सब कुछ सबूं मूं पर
सब दीन हीन तौहीन बण्यां छिन
यन लगणूं जन बचपन सब्वा
अंगरेज्वा आधीन धर्यां छिन
Copyright@ Jagdamba Chamola ----2020