MeraPahad Community Of Uttarakhand Lovers

शान्ति प्रकाश जिज्ञासु की द्वी पंगत वळि छिटगा

१- प्यार
प्यार करण वळु कैकु बुरु नि सोच सकदू
आंसू अपड़ा बगै सकदू कैका dekh नि सकदू
२-घ्यू
द्वी रूप्या सेर घ्यू खै अब सौ रूप्या कु भी नी च
खाण वळा आज भी छन पर ऊ घ्यू नी च .
३- सारु
कैकु तै तुमारो नौ कु सारु नी च
मंगदरा तै आग क्या खारु नी च
४- सौतेलु
आज जाणी मिन सौतेलु कन हूंद
बुबाई जगा छोडि बिस्वम कूड़ी बणान्द
५- पंछी
पंछ्युंन ऊन घरूं ऐकी क्या कन्न
जौं घरूं बैठ णु चौक नि छन
६- भूख
इन लगणु यू कळजुगौ आख़री रूप च
अपड़ा फैदा तै फंसाण कै निठुरो की भूख च .
७- पता च
तिन हूण अबि और बडू त्वे पता च
वां का बा द तिन मै मा आण मै पता च

छिटगा कविता गढवाली कवितौं एक शैली च . छिटगा माने छिटक या छिटग मतबल ड्रौप (Drops ), माने - छींटे. गढवळि साहित्यौ नामी सुकट्वा (समालोचक, समीक्षक ) वीरेंद्र पंवार लिखदन बल - " छिटगा पाण्या बि ह्व़े सकदन अर कछीला (क्जीर, कीचड) बि ह्व़े सकदन.मेरी नजर मा छिटगौं का कुछ रूप यू छन एक भड़कदी रूड्यू छिटाञद बरखा का, एक कछीला (कजीर) छिटगा , एक आग बुझाणो पाण्या छिटगा ,एक मुजदी आग सुल्काणो घी का छिटगा, एक कोरा भात भपाण्यो पाण्या छिटगा, एक वेसुध पड्या मनिख तैं होश मा ल्हौणू पाण्या छिटगा. इन माणे जांद बल छिटगा , अपणी छाप जरूर छोड़दन. साहित्य मनिख तै बिजाळणो काम करदु. इलै जब वे पर छिटगा मनन होऊ त इना होण चेंदन जु ताडौं काम कन्नु. वै तै जज लै ड्यों, आँखा-कन्दूड़ खोळ दयावान".
छिटगा कविता द्वी पंगत की या चार पंगत की होन्दन अर यूंक असर भौत जादा होंद जन कि कवि विहारी क क्विताऊ मा होंद - गागर मा समोदर . छिटगा अर दोहा मा भेद च कि दोहा क अपण मीटर/सिलेबस का नियम छन पण नियमों से छिटगा मुक्त च
छिटगा मुक्तक काव्य च. गढवाली मा शान्ति प्रकाश जिज्ञासु न सबसे जादा छिटगा कविता लेखिन या छपैन. कुछ उदाहरण \
Copyright@ Shanti Prakash J igyasu

सुद्दी रकोड़ा रकोड़
रचना --दिनेश ध्यानी

सुद्दी
रकोडा रकोड
बिना बाती
चबोड़
क्यांकू इत्गा
घमंड त्वे अरे तु बि मनखी ही त छै।

कै थैं
कुछ नि
समझदी
कैकु ब्व्ल्यू
तु नि मन्दी
अफ्वी तैं
भारी चितौंदी.

निरबै- निरसा
माटी मनखि छै
निवसे कि रैदी
अगास जनै
देखी की
नि खौलेदि।

करम गति
अरे
विचार से होंद
मनखि बडु
जरा यीं बातौ
विचार कै लेह्दी । … दिनेश ध्यानी १७/७/१५

Bhishma Kukreti
17 hrs ·

गढ़वाळ का सच्चा कवियों से प्रार्थना (1920 से पहले की कविता )

रचयिता -- चंद्रमोहन रतूड़ी (गोदी , टिहरी 1880 -1920 )

क्या हम कवि पुत्र सरस्वती का
ब्रह्मा की अंधी अर काळि सृष्टि
का आँख मुखीर स्वयं विधाता -
क्या हमन कैकि करणी अपेक्षा ?
क्या छन स्त्रियों का मुख नेत्र पद्म,
बिना हमारी प्रतिभा की किरणयों ?
क्या बीरू का कर्म विचित्र अद्भुत,
बिना हमारी फिरदार बाणी ?
हे नी छ क्या या प्रकृति ही सारी,
निर्जीव बेढंग अर शून्य जंगळ
देवत्व , सौंदर्य , सहानुभूति -
संचारणी शक्ति बिना हमारी ?
तजिक तब सब ग्लानि , लीक बाणी की बीणा
प्रमुदित मन से आपुच्च स्वरसे ही अपणा
परबत बण गंगा बद्री केदार राजा
सब भड़ गढ़ का यै देश की कीर्ति गायैं। .
(चंद्रमोहन रतूड़ी जीक कविता क्लिष्ट ही छन )

भगवान सिंह जयाड़ा's photo.
भगवान सिंह जयाड़ा

-----सौण की कुरेड़ी------
-----------------------------------------
डांडी कांठ्यों मां प्यारी कुरेड़ी छैगी ,
झम झम बरखा अब बसगाळ लैगी ,

सूखी धरती माँ अब हरयाली छैगी ,
डाली बुटल्यों मां कन मौल्यार ऐगी ,

कुरेड़ी लौंकणी छ गाड़ गद्न्यों बीच ,
कभी छैं जांदी ऊँची डांड्यों का ऐंच ,

सौंण कुरेड़ी देखि डरदु जिया मेरू ,
डरूदु मन देखि ,बिकराल रूप तेरु ,

पहाड़ का लोगु मां अब दहसत व्हेगी ,
पिछली आपदा कु डर दिलु मां रैगी ,

अबकी ना बरखी यन हे बरखा राणी ,
सभी लोगु लाज राखी और बात माणी ,

ऐंसु बसगाळ यनि अनहोणी ना होऊ ,
पहाड़ मेरा अबकी शुख शान्ति रौऊ ,

देवी देबतौ अब तुम राख्यान ध्यान ,
ये बसगाळ पहाड़ मां शुख शांति रान ,

बिपदा पैली जन अब कभी नि आऊ ,
जन जीवन सदानि यख खुशहाल रौउ ,

डांडी कांठ्यों मां प्यारी कुरेड़ी छैगी ,
झम झम बरखा अब बसगाळ लैगी ,
------------------------------------------
द्वारा रचित >भगवान सिंह जयाड़ा
दिनाक >१८/०७/२०१४
सर्ब अधिकार सुरक्षित @
http://pahadidagadyaa.blogspot.com/

जगमोहन सिंह जयाड़ा जिज्ञासु
14 hrs ·

मेरी गढवाळि कविता (खाज) कू एक अंश।

खाज.....

उठिं छ,
सब्‍यौं फर आज,
सवाल छ,
क्‍या होन्‍दु खान्‍दु ह्वैग्‍ाि,
हमारु समाज....

-जगमोहन सिंह जयाड़ा जिज्ञासु,
रचना सर्वाधिकार सुरक्षित
दिनांक 23.7.2015