नेता बणा दे
सुलार-कुर्ता सिला दे, फतुखी एक दिला दे,
मुंड मा ट्वप्ला धरा दे, मिथै नेता बणा दे।
पढ़े-लिखै बस की नी, इस्कोल मिल जाणु नी,
खैरि काम कन्नु नी, बिना कमया भि रैणु नी।
सुलार-कुर्ता सिला दे, फतुखी एक दिला दे,
मुंड मा ट्वप्ला धरा दे, मिथै नेता बणा दे।
शरम-ल्याज मी जम्मा नी, अकल की जर्वत नी,
भल्लि सीरत चैन्दी नी, स्वाणी सूरत जरूरी नी।
गाली तेरि सिखईं छी, चुगली कन्न आंदी चा,
बचन त्वड्ना जणदु छौ, कज्याण मेरी छ्वड़ि चा।
सुलार-कुर्ता सिला दे, फतुखी एक दिला दे,
मुंड मा ट्वप्ला धरा दे, मिथई नेता बणा दे।
चंदा ल्हीणु जणूदु छौ, झूठु रूणु आँदू चा,
रामलीला मा कतगै दा, बिलाप म्यारु कर्यू चा।
कभि पधानुकु टिकिट ल्य्होलु, कभि ब्लॉक कु चुनाव द्यखुलु,
कभि राज्य कु चुनाव ह्यलु, कभि संसद कु चुनाव लड़लु।
साल भर कु काम यो, बारा मैना कु धाम यो,
हींग चा न फिटकरी, रंग स्वाणु-स्वाणु यो।
सुलार-कुर्ता सिला दे, फतुखी एक दिला दे,
मुंड मा ट्वप्ला धरा दे, मिथै नेता बणा दे।