कुच त बोल्दे
मन मेरु तू बोव्ल जी
भेद जीयु कु अपरू खोव्ल जी
देक इन ना तू भाना बना
य्खुलि बैठ ना अपरी छँवि तू लगा
मन मेरु तू बोव्ल जी
भेद जीयु कु अपरू खोव्ल जी
सब कुच च त तैमा दडियुं
किलै की च मन तू बस भैर बस्युं
इन सीकेसैरी ना कैरा जी
किलै लगा दील तिल अपरा मा पैरा जी
मन मेरु तू बोव्ल जी
भेद जीयु कु अपरू खोव्ल जी
तू कख कख रे मेरु जीयु भागी रे
हे पहाड़ी तू रैगे सदनी अभागी रे
तिथे यख कख ना मिल ध्याड़ी जी
कन कै तू खालु आच क्वादु बाड़ी जी
मन मेरु तू बोव्ल जी
भेद जीयु कु अपरू खोव्ल जी
बंदरों सुंघरूं सब स्यारी उजाड़ी रे
बांजा पौड़ीगे आच बाची पुंगड़ी सारी रे
अब कया करलु जीकोडी तू मेरु जी
सबु तिकड़म व्हैगे कंडली जनि घैरु जी
मन मेरु तू बोव्ल जी
भेद जीयु कु अपरू खोव्ल जी
मन मन मा सदनी इनि छँवि दडी रैगे
भेद मन का कबी ना ऐ मन कु भैर ऐगे
जियुंदगी मेरी इनि पहाड़ मा गै जी
कैल नि जाणी कैल नि यख मी समझी जी
मन मेरु तू बोव्ल जी
भेद जीयु कु अपरू खोव्ल जी
बालकृष्ण डी ध्यानी
देवभूमि बद्री-केदारनाथ
मेरा ब्लोग्स
http://balkrishna-dhyani.blogspot.in/search/में पूर्व प्रकाशित -सर्वाधिकार सुरक्षित
