MeraPahad Community Of Uttarakhand Lovers

माटु मा खत्यां दिन
कुई लौटे द्या म्यार
बौडी बौडी की जौं दिनु की
याद आंणी आज
खंदवार कुडी भीतर दबेगेन
द्याखो पाटी बुखल्या
कख गे ह्वाल कम्यडु क
उ बिंटा वाल डुखल्या
हरके फरके की छौं खुजणु
फांग्यु मा खत्युं बचपन
आंख्युं मा छुवाया सी आज
उदसी अयीं गिचपन
खुजणु छौं माटु मा
अपण कांच की गोली
पतनी कैं छानी दब्यां छन
दुवी गल्यों की दौंली
माटु मा खत्यां दिन
कुई लौटे .......
सर्वाधिकार सुरक्षित@सुदेश भटट(दगडया)

यैजा दीदों दौडी दौडी
त्याडों की रौडी मा
पुरणी याद आली तुमतै
त्याडों की रौडी मा
जलेब्युं की दुकनी
सरा सजीं रैली
चुडी कांडी चुंटी बिंदी
मेरी दीदी भुली मुलेली
कखी रस्साकसी की
खिंचमखींच मचीं राल
चुगलेर बगोट जी हैंसै हैंसै की
अंदड पलटांणा राल
बडु दा बी कबी ना कबी
बौ तै लेकी आल
पंजाब बिटी दा न बौ कुन
फोन भी कैर्याल
ख्याल म्यालों क पुरण दिन
फिर बौडी क यै जाल
जब दगड्या ब्योंली दिखंण
ख्याल म्यालों मा जाल
मेरी कबेलदारी की भी
राड घलीं दिन रात मा
पापा हमें भी जाना है
त्याडों गिंदी क म्याल मा
यैजा दीदों दौडी दौडी
त्याडों की रौडी मा
पुरणी याद......
सर्वाधिकार@सुदेश भटट(दगडया)

Sudesh Bhatt 

आज फिर खैरी
पहाड की लगोणा छौंऊ
खुद लगीं गौं की
ब्यथा सुणाणा छौंऊ
जनि दस पास कैरी
मी दिल्ली क्या औऊं
नौकरी क्या लगी की
मी गौं कभी नी ग्योंऊ
मैट्रो की सीढीयुं मा मी
रुल्दी खुजणा छौंऊ
बहुमंजिला लिप्टु तै
ग्युड चितांणा छौंऊ
जगजगा प्रदर्शनियुं मा
क्वादु झंग्वरु खुजणा छौंऊ
जख जांदु यी दिल्ली मा
वखी पतड्याणा छौंऊ
गैल्या दगडयों तै ब्हाटसप
फेसबुक मा खुजणा छौंऊ
बांजी तिबारी डिंडयाली रोज
मोबेल मा दिखणा छौंऊ
खंद्वार हुंयीं कुडी तै हम
लाईक करना छ्याऊ
घर जांण क जु नी बुदु
कमेंट मा दुख जतांणा छ्याऊ
आज फिर खैरी
पहाड की.......
सर्वाधिकार सुरक्षित@सुदेश भटट(दगडया)

बुड बुडया यखुली घरम
नाती नतणों कुन रगर्यांणा छन
लीडक ब्वारी कुटुमदरी लेकी
सैरबसी बण्यां छन
कांणी ह्वेग्या बुये घरम
फिर भी सार लगीं च
म्वाल पर ककडी जुगयीं
घीय की गुंदकी धरीं च
धारु पंद्यारु मा बुये
लाठी टेकी की जांणी च
ब्वारी बिचरी भग्यानी की
बंबई मा राणी बणी च
बाबा जी भी यखुली यखुली
त्यार सार लग्यां छन
तेरी स्कुल्या डरेश देखी
घुट घुटी दिन कटणा छन
बौडी जा रे कभी त यैजा
तेरी कन मुखडी लुकयीं च
गौं गुठ्यार कन बिसरी
तेरी जिकुडी गल्डी हुयीं च
बुड बुड्या यखुली घरम
नाती नतणो कुन......
सर्वाधिकार सुरक्षित@सुदेश भटट(दगडया)

कन निर्मोही ह्वे तु
हे बिधाता आज
राही जी तै लीगी तु
रुवाणा छन साज बाज
अब सौली जगजगा
कनमा घुराली
कौथिग क बाना बौ
सतपुली कनमा आली
अब देखेन लुणन दुण
कनमा भर्याल
भागा बे पंचमी भागा
गीत कु सुणालु
ठंडु मठु कैकी अब
चदरी कु हिरालु
पारभीड की बसंती तै
छोरी कु बतालु
भाना तै बांज कटण
दुर कु बुलाल
रुप की खज्यनी तै
भग्यनी कु बतालु
नथुली घंघाल कु
गीत कु लगालु
माया कु जंजाल तै
अब बुरु कु बतालु
देवी दयवतों तै हुडकी मा
अब कु नचालु
नौ खोली क सीयुं नाग
अब कनमा बिजले जालु
तिलै धारु बोला गीत
अब कु लगालु
समदंण्यु तै रीक अब
खुजणा ही रै जालु
त्यार बाना भाना
जोगी भेष कु धरालु
छुमा बौ बसंती छुमा
गीत कु लगालु
ईमारतु क जंगल मा
आदीम कु हर्चालु
प्रदुषण बढी ब्वाली तुमन
बसंत कनमा आलु
कन निर्मोही ह्वे तु
हे बिधाता.......
सर्वाधिकार सुरक्षित@सुदेश भटट(दगडया)सुर सम्राट चंद्र सिंह राही जी तै समर्पित श्रद्धांजली