MeraPahad Community Of Uttarakhand Lovers

~कसूर~

यूं डांडी कान्ठियू क, ब्वाला क्या च कसूर
यूं रीता कूड़ी बाड़ीयू क, ब्वाला क्या च कसूर
किले हुयां छन मनखी, अपरी जलमभूमि से दूर
कूड़ी पुन्गडी अपणा बांजा करीक, बसी गीन दूर

उन्द जेकन उबक बाटू अब क्वी नी दिखदू
कथका धे लगाणू छौं, पर अब क्वी नी सुणदू
भासा ज़रा ज़रा क्वी बचांद, बाकी क्वी नी बिंग्दू
सबी कुमौनी गढ़वली, क्वी उत्तराखंडी नी दिखेंदू

दसा पर मेरी, तुमन कलम अपरी खूब तुडीन
गीत तुमन भी म्यार इने विने भी खूब लगेन
देस विदेस मा मेला खेला तुमन खूब करीन
म्यार नाम पर जगह जगह नोट खूब लुटीन

दीणा कू क्या जी नी दे, ये पहाड़ा न तुमते
बचपन बटी जवनी तक सैंती पाली अर पोसी
कुछ करण कू बगत आई, तुमन बस बोग मारी
मीते यखुली छोडी, परदेस मा करी जमे सारी

अबी कुछ नी बिगड़ी, सोची समझी बौडी आवा
अपरी जन्मभूमि ते देर सुबेर ज़रा देखी जावा
बाळ बच्चो ते लावा, वूं ते मेरी पछाण बतावा
जलमभूमि ब्वै समान हूंद, यू तुम जाणी ल्यावा

- प्रतिबिम्ब बड़थ्वाल

~अतुल्य उत्तराखंड~
देवभूमि च जे कू नाम, इन च हमर अपणु अतुल्य उत्तराखंड
संस्कृति अर संस्कार छन विरासत, इन पछाण च उत्तराखंड
गढ़वली, कुमौनी, जौनसारी जन भासा बढेदीन हमरी सान
डांडी - कांठी कू मुल्क, इख क धरती च हमर मान सम्मान

स्कन्द पुराणों मा उदृत च नौ कुर्माचल अर केदारखंड जे क
ऋषि अर मुनियों क च जख धाम, तपोभूमि बुल्दीन नाम वे क
बावन गढ़, चार धाम, पंच प्रयाग यी भूमि ते पावन छन बणाणा
गंगोत्री - जमनोत्री अजी भी छन जनमानस की तीस बुझाणा

कुमाॐ मंडल मा अन्दिन जिला अल्मोड़ा, चम्पावत, बागेश्वर
नैनीताल, पिथोरागढ़ अर दगड मा आंद वेक उधम सिंह नगर
गडवाल मंडल म अन्दिन जख पौड़ी, टिहरी, चमोली, हरिद्वार
रुद्रप्रयाग, उत्तरकाशी अर देहरादून, जख बटी चलदी सरकार

धौली, विष्णु गंगा अर मंदाकिनी छन अलकनंदा ते सजाणा
होंस, गिरी अर आसन नदी छन यमनोत्री की सान बढ़ाणा
राम गंगा, सोंग नदी, कोसी, गोमती गौरी अर पिंडर नयार
बगणा छन बिना रुक्याँ थक्याँ अर छन उत्तराखंड कू शृगार

म्याला थोलो की च या धरती, बारा बरसू मा आँद जख कुम्भ म्याला
दिबता बुलान्दीन जख जागर, डौंर थाली ढोल दमो छन वूका खेला
फूलो क घाटी, औली, चकराता, कोसानी, अर लैंसडौन ते नी भूल्या
ऋषिकेश, मसूरी, भीमताल अर हेमकुंड साहिब कू बाटू छन खुल्या

संस्कृति अर प्रकृति जख हंसदी खिल्दीन, घुघती जख रैबार पहुंचेदीन
कुयेड़ी जख खैरी सुणान्द, बुरांश अर फ्योली हमर पहाड़ ते सजादीन
बेडू, तिम्ला, हिसरा, काफल, झुंगर,बाड़ी कफली गीच मा पाणी लियांदीन
झोडा, छपेली, न्योली त रणसिंग, भेरी, मशुकबाज दगड रंगत मचेदीन

गीत संगीत पहाडा कू, खान्णी पीणी पहाड़ा की, घूमण घुमाण पहाड़ मा
अफ़ी आवा, दगडयो ते लावा, उत्तराखंडे की रौंतेली सान देखि कं जावा
छ पूरो बिस्वास मीते ‘प्रतिबिम्ब’, उत्तराखंड क अच्छू दिन बौडी क आला
भासा साहित्य भी खूब छ्वीं लगाला, खैरी न खुसी क दिन वापस आला
- प्रतिबिम्ब बड़थ्वाल

इलमतु दादा

कवि -जया नंद खुकसाल 'बौऴया'(1925 -स्वर्गीय , ऊण्यूँ असवाल स्यूं , पौ .ग. )

इंटरनेट प्रस्तुति -भीष्म कुकरेती

हैळ लगांदा बुखणा बुखांदा,
इलमतु दादा भदोड़ा बांदा।
कुरता चिरीऊँ ट्वप फट्यूं च ,
क्वाटा बौंळो सफाचट नी चा।
घुंड मा सुलार तैको फट्यूं चा;
झपड़म झपड़म हिटणा लग्युं चा।
रकर्याट कैकि पुंगडौ म आंदा , इलमतु दादा भदोड़ा बांदा।
बळद भि वैका ठडगैळ छीना ,
ढमणा दुयुं बैठयांऊ छिना।
रंगू काळा कबरीणा छिना ,
दांत भि ऊंका निखुऴयाउ छिना।
ठेलि ठेलि बि अगनै नि जाँदा , इलमतु दादा भदोड़ा बांदा।
हौळो कु वैकु हथनड़ु ,नी चा ,
निसुड़ा का मुख ऊनि ख्वंड्यू च।
यक सिंग्या ढांगो झिल्लो जुत्युं चा
जिमदार कना को क्वी ढंग नी चा
xx xxx
को छौ घसेर्यो सूणि लियां
घुतडु ब्वे मा इन बोलि दियां।
पल्य ख्वाळ जैकि छांच मांगी लयां ,
मी खुणि जरा सि छंच्या पकैयां।
ढया मा खड़ु ह्वै धाद लागांदा इलमतु दादा भदोड़ा बांदा।

From Ilmatu Dada (Poetry Collection)
Notes on The Poems Brought Realism in Garhwali Poetry

नि छौ खयाल कि तू परदेशो ह्वेली

रचना -- दुर्गा प्रसाद घिल्डियाल (1923 -स्वर्गीय , पंदाऴयू , पौड़ी गढ़वाल ) इंटरनेट प्रस्तुति और व्याख्या - भीष्म कुकरेती

जु मैं मु धर्युं छौ , त्वे देइ याले
अपणा हड्गौ रस , जु मैं मु बच्युं छौ
खलैकि यख की , बारा रस्याळी
विदेशु रण मा त्वे तैं पठै छौ।
निभैने तिन बल , भला ही काज
रखे तिन म्यरा , दूध कि लाज
नि छौ खयाल कि तू परदेशो ह्वेली
भरोसो छयो कि तु मैं मु ऐली।
छोड़ी पुराणी नई थैं अंग्यौणो
या प्रथा च भौत पुराणी
पर माँ त माँ च , इनो किलै नि सोची
बर्षु बटि च ज्वा त्वे तैं भट्यौणी।
तख रच्येंदी कविता गयेंदा गीत
पर याँन नि ढकेंदी म्यरि नाँग काँग
नि पौंछदि यख त्यरा गित्तु की भौण
सुद्दी -मुद्दी नि लगौणी लांग फांग।
भैरा का औंदन , मि तैं भ्यंटेणू
भितर जाणा छन भैर ढुंढणू
जु होन्दा सुमन सरीखा लाल मैं मू
मिन नि फैलौणा छा हाथ हाथ त्वेमू।
यख आग भभरौंद , लगदन बडूळी
मी दिन भूक नी रात सेणी
त्यरो याद कन्नो , उन्नि सि दिखेंद
सियां भुला की जसि भुक्की पेणी।
सर्वाधिकार @ दुर्गा प्रसाद घिल्डियाल परिवार

( साभार --शैलवाणी , अंग्वाळ )Copyright @ Bhishma Kukreti interpretation if any

Shailendra Joshi
 
नदियों कु अपणु एक संगीत च
सर सर सुर सुर स्वीस्याट कु
कखी गंग्लोड़ो टकरी बणदू क्वी गीत
पाणी मा कखी मांछा तैरी लगाणा गीत
कखी चखुली उड़ी फिर आणि पाणी मा
लगाणी नदी धुन मा मीठा गीत
कखी लहर च कखी भंवर
नदी पाणी मा लुक्यु च
कत्गा किस्मो गीत संगीत
हर पहर मा हर किस्मो संगीत
सुणादी नदी अपणा स्वीस्याट कु
चल छोरी देख नदी पवन कत्गा भलु
गीत गाणा चखुला भि इन्नु हाल मा
ढौल पुरौणा मिस्से मिस्सेकी
तू भी ऐजा फिर किश्ती मा बैठीकी
नदी सुर मा तू भी गीत लगैजा
मी सुणलू नदी का संगीत मा तेरु गीत....................शैलेन्द्र जोशी