MeraPahad Community Of Uttarakhand Lovers

******जनता बिचारी बलि बेदी चढ़ी*****



                      कवि- डॉ नरेन्द्र गौनियाल

स्वार्थ कि रीति मा,राजकि नीति मा।
जनता बिचारी, बलि बेदी चढ़ी।।

ढोल कि पोल खुली कि खुली।
आंखि उघाड़ी तू बी देख भुली।।

भाड़ मा जाये जनता फनता।
मुराद हो पूरी यूँका मन की।।

 अफु पेट भर्री गळदम सळदम।
भूख मिटे न मिटे जन की।

विकास-विकास की बड़ी बात करीं।
आंख्युं देखि सब नाश करीं।।

काम कबी क्वी करीं न करीं।
खीसौं माँ राशि धरीं ही धरीं।।

चांठों अर चेलों की,कैम्प अर मेलों की।
देखो जख बी भरमार पड़ी।

 मिले न मिले सुविधा कबी क्वी।
 रैगे जनता फिर हाथ ज्वड़ी।

आंख्युं कु खैड़ सी बाखरो बैड़ सी।
रिपु ह्वैगे तुम्हारो,पाणि मा गैड़ सी।।

लागद शूल सी तुम्हारी जिकुड़ी।
जैन नि करी तुम्हारा मन की।।

माल़ा हो गालुंद ट्वपलि हो डालुंद।
तुमारा तरपां देश जाव भ्यालुंद।।

 डॉ नरेन्द्र गौनियाल सर्वाधिकार सुरक्षित ..narendragauniyal@gmailcom                                           

कभित रात ब्यांली होलि सुबेर !
कभित खुलालि म्यरी खैरिकी घेड !!
कटैला यक दिन ई घोणा अँध्यारा !
कभित उजालु आलू यख फेर !!
साक्यो पुराणी बादलों मा " जोन "!
कभित ऐ जालि बोडि फिर भैर !!
बसग्याल जालू बिती यु अबत !
कभित बैणु मै बसंत मा ग्वेर !!
घुघूती बसालि मनमा कभि मेरा !
कबित आलू स्यु बक्त व वेर !!
सुपन्याँ मेरा सुपन्याँ हि नि राला !
कभित बिजालू यों सुपन्यों तें मैर !!
होला ई द्योयो देवता मेरा देणा !
कबि ना कबित मेरा भाग कि मुडेर.......!!

प्रभात सेमवाल ( अजाण ) सर्वाधिकार सुरक्षि

इनी मेरी क़ज़ाण च:"
********************
मैं तै न पूछा दिदौं कनी मेरी कजाण च
देखि नी होलि कभी कैन , इनी मेरी कजाण च
भैंसी सी खबड़ी वींकी, हाथी जनी चाल च
चमड़ी वींकी इन कोंगऴी, जनी गैंडा की खाल च
आँखा वींका ढढू जना, गधी सी आवाज च
जुवाँ मुंड पर इथ्गा छन, दिन रात की खाज च
मैं तै न पूछा दिदौं कनी मेरी कजाण च ..
*********************************************
मुखड़ी वींकी इनी प्यारी , जन खरस्यण्या कखड़ू हो
टंगड़ी वींकी मोटी इथ्गा, जन सुख्यूं सी लखड़ू हो
सुप्पा जन कान वींका, तिमला जन नाक च
कुकुर सी भुकुण मा वींकी, अपणी अलग धाक च
मैं तै न पूछा दिदौं कनी मेरी कजाण च
*********************************************
धम्म -धम्म जांदी जन, पैलवान क्वी तगड़ू हो
लट्ला वींका इन कुसज्जा , जन बाड़ी कु झंकड़ू हो
रंग वींकू क्या बतौण, जन फुक्यूं सी अरसा होंद
गलोड़ा वींका तिड़याँ इन, जन कट्ठऱ बगोट हो
थौऴ मा जाणै सिरड़ी गड़ी, मिन वा अब सजाण च
मैं तै न पूछा दिदौं कनी मेरी कजाण च
**********************************************
लम्बै वींकी इन ज्यादा, जन घौर की जन्दरी हो
मोटै इन च जन बोल्यो, क्वी लपेट्यीं मंदरी हो
पथा द्वि-एक भात खैकी ,आराम से सेंदी च
नींद मा रौंदी जब, बाघ सी वा घुरदी च
दगड़ी सेण बडू मुश्किल ,सेयाँ मा लतौंदी च
मैं तै न पूछा दिदौं कनी मेरी कजाण च
********************************************
झुमका पैरदी कान पर , जन मंदिरअ घंडलू हो
गौऴा पर माळा पैरदी , जन भैंसा कु संगळू हो
बाँदर सी खिर्स्येंदी वा, जब वीं मै पै गुस्सा आँद
सूपर्णखा सी दिखेंदी वा, जब मै वींका धोरा जांद
इन सैंदिस्ट खबेश से ,हराम सेण खाण च
मैं तै न पूछा दिदौं कनी मेरी कजाण च
*******************************************
कमर वींकी बरीक इन, जन डाळा कू गोळ हो
कपड़ा वीं पै इन लगदा ,जन रजै कू खोळ हो
भूत सी हैसण वींकू , थकलू जन खंगड़ौंद च
बचाण वींकू बकि बात कू , कागु जनी बसदी च ,
छुयूं मा सब हौरी जांदन, इन भारी बबाल च
मैं तै न पूछा दिदौं कनी मेरी कजाण च
***********************************************
मामला ब्यो कु हो त भुलौं, कै हैंकै कभी नी सुण
गढ़-कुमौ सरू एक हवे जाऊ पर अपणी कजाण अफ़ी ढूंढ़ण,
नी ढुंढल्या त कैन न कैन तुमतै फंसै देंण,
बिना दहेज़ कु कैन अपणु आईटम थमै देंण
जन मै सैणु तुम नि सैयां , इन मेरी इच्छा च
कवी तुम तै नी पुछू ,दिदौं कन तुम्हारी कजाण च
__/\___/\____/\____/\____/\____/\_____
मैं तै न पूछा दिदौं कनी मेरी कजाण च
*******************************
(अविनाश ध्यानी)
ग्राम -लिही (पौड़ी गढ़वाल)

बालापन की माया ज्वनी तक राया।
तैरा बगैर कुछ भी याद नी आया।
व हैँसदी मुखडी ऊ सरम्याली आँखी।
अज्यौँ तक भी ह्यै सँग्गी मेथै भरमाँदी.,.........,.2
बालापन की माया..,......

ऊ स्कूल्या क दिन जोँ दिन रव्वाँ दगडै हम।
तरसी गयोँ मैँ सुणणू तेरी चुडयूँकी छम छम।
कभी भरमणोँमा तू मेरा पैजी बजाँदी.,...............
अज्योँ तक भी ह्ये सँग्गी मेथै भरमाँदी...............
बालापन की माया........

ऊँ कौथग्यौँ की याद अज्योँ भी छन संग-संग।
कभी मिल करी ते तंग कभी तिल करी मेँ तंग।
कौथग्योँ की भीडा बीच दुयी आँखी ते खुज्यांदी..
अज्योँ तक भी हे संग्गी मेथै भरमाँदी..............
बालापन की माया........

समलौण्या च तेरी तस्वीर समलौण्य रै गैना।
सौँ करार टुटगैन सब्बी सुपन्या सच नी व्यैना।
तैरी चाँद सी मुखडी आँख्यूं रिटणी राँदी.......
अज्योँ तक भी है संग्गी मेथै भरमांदी...............
बालापन की माया........

लटुली बडी कयैन मैन जू तेथै छा छुट्टी प्यारी।
एक अधूरी कथ्था बणिगे तेरी मेरी य्यारी।
खुद तेरी आँसू मेथै भारी दै जाँदी...............
अज्योँ तक भी है संग्गी मेथै भरमांदी................
बालापन की माया ज्वनी तक राया.....

मनोज सिँह रावत (बौल्या)

दादा जी की बताईं बातों तें कविता कु रूप देण की कोसिस करी ,

जीवन का बाटा सौंगा नि
तु हिटदि रै कबि रुकि न

बसंत ओणा यक बक्त होंदु
बसंत ओणा सि पैलि सुखि न

खैरी हजार मिललि त्वैसणि
खैर्यों द्याखी कबि लुकि न

बैरी त्वै मिटाणा ताक मा रैला
मीटि जै पर कबि झुकी न

प्रभात सेमवाल (अजाण )सर्वाधिकार सुरक्षित