MeraPahad Community Of Uttarakhand Lovers

 XXX   दारु स्त्रोत्रम XXX

Poet Harish Juyal

 

विश्वेश्वराय 'सुरा' पिये , प्याज की दाणी म घुट्टी लगे

भेळउन्द प्वडाय मुंड कच्याय , कुकरोन तैकू थ्व्बड़ो चटाय

 

              भ्रात्री स्नेह उपदेसिका

ख़ास भायुं मा खुंकर्यूळ हवायो एका कारिज मा हैंकु नि आयो

इका उन्नति मा हैंकु जळन्ति म मनुष्य रुपेण ढयबराश्चरंती

 

                   हरिओम् तत्सत्

 

जुमळी दिदा ब्वाद हरिओम तत्सत , सम्सूत रातिम ब्वादा सरांद

भैर कनु रौंद नमो शिवाय: ,भितरम जैक भुटुवा खुज्यांद

 

            तीर्थ जातरा समापन पूजा

 

काकी बदरीनाथ जातरा बटे आई , कुडै मुंडळी मुंग झट्ट गाई

यकचुट गाळयों परसाद द्याई, घरम्याळी काकी नमो नमस्ते

 

                    ख्व्बळया

 

ख्व्बळया गिची से कबि छंच्या कबि चुनमुंडू कबि बडी पकाणम

च्यूड़ा बुखाणम त कनक्वे चपाणम , बिभूक्षितम किम ण करोति पापम

 

                    विद्यार्थी

 

मैच चेष्टा ब्व्गठया ध्यानम , सुंगर निद्रा तथैव च

डिग्ची हारी किताबी त्यागी , विद्यार्थी पाँच लक्षणम


 

दारु

दारु !
पगळीं च बगणि च
डांडी कांठ्यों धारु धारु
पीड़ बिसरौण कु
माथमि, द्यब्तौं सि सारु

गंगा उंद बगदी
दारु उबां-उबां टपदी
पैलि अंज्वाळ् अदुड़ि/
फेर, पव्वा सेर
जै नि खपदी
हे राम! दअ बिचारु

गबळान्दि बाच
ढगड्यांदि खुट्टी
अंगोठा का मुखारा
अंग्रेजी फुकदी गिच्ची
कुठार रीता शरेल् पीता
ठुंगार मा लोण कु गारु

पौंणै बरात
मड़्वयों कु सात
बग्त कि बात
दारु नि हात
त क्य च औकात
छौंदि मा कु खारु

नाज मैंगु काज मैंगु
आज मैंगु रिवाज मैंगु
दारु बोदा त
दअ बै क्य च फारु

Source : Jyundal (A Collection of Garhwali Poems)
Copyright@ Dhanesh Kothari

न उन धरम्यालु आगाश न उनि मयलू यखै धरती,
अज्याण ओखा छिन पैंडा मनिखि अणमील चौतरफी,
चुचों चखुला भि डाला बोटा भी उपरी यखा,
में घोर छोड्यावा......।
हैजी सार्यूं मा फूली गे होलि........।

रंदा तुम डुटि सर्यादिन मी यखुलि भमाण क्वाटर मा,
न क्वी छुंई बथ न धै धवडी ढक्यांछिन दुवार घरु घरु मा,
छिभै ये निरभै परदेश मा तुम रौणा त रा
में घोर छोड्यावा......।
हैजी सार्यूं मा फूली गे होलि........।

#बौल्या

"मडुवे की रोटी, सिसोँड़े का साग
बाँज की लकडी की करारी आग,

चौमासा की बरखा,ह्रयून्द कि आग
मुंगरी कि रोटी पिन्डालु कू साग

आषाड कि रोपणी,भादो का घाम
सौण की बरखा,अशूज कु काम

ह्रयून्द क मैना की लम्बी लम्बी रात
अहा कन च अपणा गौँ की बात.

update by-अतुल गुसाईं

चौंठी भुक्कि

छौं मि ये ही मुल्क कु,
भुलिग्यों यख कि माया
भुलिग्यों वा चौंठी भुक्कि,
कोख जैंन मि खिलाया

कन नचदा रांसौं मण्डाण,
चड़दा कन युं ऊंचा डांडौं
क्या च कौंणि कंडाळी कु स्वाद,
हिसर खिलदा कन बीच कांडौं
भुलिग्यों दानों कु मान,
सेवा पैलगु शिमान्या

कैन बंटाई पुंगड़्यों कि धण,
द्याई कैन गौं मेळ्वाक
कख च बगणि धौळी गंगा,
गैन कख सी कांद काख
याद नि च रिंगदा घट्ट,
चुलखांदों कि आग खर्याय

रुड़्यों धर मा फफरांदी पौन,
ह्‍युंदै कि निवाति कुणेटी
मौ कि पंचमी, भैला बग्वाळ्,
दंग-दंगि सि पैडुल्या सिलोटी
बणिग्यों मि इत्यास अफ्वु मा,
बगदिग्यों थमण नि पाया

Source : Jyundal (A Collection of Garhwali Poems)
Copyright@ Dhanesh Kothari