MeraPahad Community Of Uttarakhand Lovers

बॉस संबंधी प्रहसन
-
बॉस संबंधी   हास्य , प्रहसन , खौंख्याट , जोक्स , चबोड़, मजाक , ठट्टा , मसखरी , लतीफा
-
इकबटोळ - गढ़वळिम सर्वाधिक व्यंग्य रचयिता - भीष्म कुकरेती   'चबोड़ाचार्य'   
-
वैदिन म्यार  बॉस लैम्बोर्गिनी कार से कार्यालय ऐन।
मीन वधाई दींद  ब्वाल - ब्वा क्या अनोखी कार च !
बॉसक टिप्पणी  छे - तू इनि   उत्कृष्ट परिश्रम करदा  जा तो मि  दुसर वर्ष हैंक मंहगी कार से औलु।
XX
बॉस तैं अब्दुल क अतिरिक्त क्वी  हैंक  चाय द्यावो तो बॉस कु क्रोध आठों आसमान म पौंछ  जांद  छौ।
आज सुबेर बॉसन  अब्दुल तैं  पूछ - तू  पिछ्ला आठ वर्षों से मै चाय पिलाणी  छे किन्तु कबि मीन चाय कप या प्लेट म खतीं नि देखि।  यांक रहस्य क्या च ?
 "जी सीड्यूं म चढ़ण  से पैल  मि  कप से एक  कुळ्ळापी लींदु अर  तुमर दरवज से भैर चाय कुळ्ळा पुनः कप म गिरायी  दींदु। " अब्दुलक उत्तर छौ
आज अब्दुल तैं  फेयरवेल पार्टी दिए  गे।
XX
म्यार बॉस मि  तैं  कम्प्यूटर बुल्दन।
ना ना कि मि तेज गुणा -भाग करदो।  किन्तु यदि क्वी म्यार दगड़ बात  नि कारो त मि  १५ मिनट पैथर से (go to sleep ) जान्दो।
XX
एकॉन  मैं  पूछ कि " यी तुम मैं ५लाख रुप्या  देल्या तो मि  तुमर बॉसक मर्डर कर  सकुद।  "
म्यार उत्तर छौ - अति आनंद  की बात च किन्तु ५ लाख कमांद कमांद  तीन वर्ष लग जाल।
XX
मीन अपण  बॉसौ  कुण  ब्वाल - साब तुम तै मेरी महावरी वेतन वृद्धि करण इ  पोड़ल।  निथर  तीन कम्पनी म्यार पैथर पड्यां  छन
बॉसन पूछ - कु  कु ?
म्यार उत्तर छौ - बिजली , टेलीफोन अर  कारौ  ईएमआई  कम्पनी।
XX
म्यार बॉसन मेकुण  ईमेल भ्याज - चौड़  एक प्रहसन भेज।
मीन ईमेल से उत्तर दे - बस मि ये इ काम पर काम करणु  छौ।
बॉस क उत्तर आयी - ब्वा यु जोक बड़ो हंसोड्या  च हैंक जोक बि  भेज।


Copyright, 2022

बॉस संबंधी   हास्य , प्रहसन , खौंख्याट , जोक्स , चबोड़, मजाक , ठट्टा , मसखरी , लतीफा  जारी रहेगा

आम व अन्य  फल सबंधी प्रहसन (जोक्स )

-
आम व अन्य  फल संबंधी   हास्य , प्रहसन , खौंख्याट , जोक्स , चबोड़, मजाक , ठट्टा , मसखरी , लतीफा
-
इकबटोळ - गढ़वळिम सर्वाधिक व्यंग्य रचयिता - भीष्म कुकरेती   'चबोड़ाचार्य'   
-
मेरि   ब्वेन बोलि बल वा आम कारम  बिसर गे अर  मि  तैं लाणो ब्वाल . पैथर ज्ञात ह्वे बल वीन  आम लेइ नि  छौ।  फोकट म बेकार क फलहीन (fruitless )  खोज ह्वे .
XX
नौनी (ऍम विक्रेता से ) - भया जी यी आम लंगड़ा इ छन ना ?
आम विक्रेता - आम लंगड़ा नि  हून्द  त  ठेला म बुकद क्या ?
XX
मास्टर जी - पप्पू १२ फलों नाम बता -
पपू - आम , बेदु , तिमल , हिस्र। ....
मास्टर जी १२ हौर फलों नाम बता ?
पप्पू - एक दजन आम।
XX
सुबर सुबर एक महिला अंग्रेजी म फल मंगणी  छे - आई  वांट डिस्टरवाइड हजबैंड, आई  वांट डिस्टरवाइड हजबैंड
फल बिचण वळ क बिंगण  म द्वी घंटा लगिन कि  वा नाशपति मंगणी  छे।
XX
मि आम खरीदणो  चौराह म ग्यों त  द्याख  एक बुडड़ी एक बच्ची पैथर दौड़नी छे अर  धै लगाणी  छे - ये डिग्री ! ये डिग्री !
मीन बुडडी पूछ - तुम यिं  तै  डिग्री किलै  बुलणा  छा ?
बुडड़ी  - मीन अपण  बेटी यूनवर्सिटी भेज तो उख  बिटेन  व यिं  तैं  लेकि आई  गे।

-
copyright 2022 
संबंधी   हास्य , प्रहसन , खौंख्याट , जोक्स , चबोड़, मजाक , ठट्टा , मसखरी , लतीफा

   
IPad कन उपयोग करण?

(चबोड़ाचार्य  क हास्य व्यंग्य शृंखला )
-
गढ़वळिम सर्वाधिक व्यंग्य रचयिता - भीष्म कुकरेती चबोड़ाचार्य'
-
अब जब iPad  आयी तो अवश्य इ  चलाण बि आण चयेंद।  तो आज सीखे जाय iPad  कन  चलाण .
कार्य नंबर १ - iPad तैं  ऑन  कारो।  बटन  क्वा  च ? सब बटनों तैं परखों क्वी  ना क्वी  त  होलु  इ  अर  कुछ समय उपरान्त ढबे जैल्या  कि  कु बटन क्यांक  च।
अब जब तुमर  समज म ऐगे कि को बटन क्या च तो तुमर मष्तिष्क म प्रश्न आलो बल माउस कख च ?
मतलब ? माउस ? अरे  भै ! iPad म माउस साउस कुछ नि  हूंद।  जन स्मार्ट फोन म माउस क स्थान पर टच स्क्रीन हूंद तनि iPad म बि।  तीर  (arrow) चलाण  सिखण  अर्थात iPad चलाण सिखण। हाँ एक दैं सीख जैल त  फिर सब कुछ सरल।  जनकि जड्डू म ठंडी ढंडी म पैल पािल कुद्दी मरणम च्याळ पड़दन पर कुद्दि मारणों बाद ठंड उंड सब समाप्त ह्वे जांद तनि iPad चलाण सिखणो  उपरान्त सब कुछ सरल ह्वे जांद।
हां  हां iPad भौत  कुछ कौर  सकुद।  तुम तैं इंटरनेट से जोड़ सकुद स्यु iPad. इंटरनेट मिलण  अर्थात ऐपल कु  सफारी।  नीलो बटन दबाओ तो सफारी खुल जाल अर्थात तुमर  इंटरनेट की दुनिया म प्रवेश ह्वे गे ।
हां हां iPadम पढे  बि सक्यांद।  बस द्वी दैं स्क्रीन पर खट खट  (जोर से ना हां ) कारो तो  स्कीन बड़ी ह्वे जाली अर सब अक्षर बड़ा बड़ा ह्वे जाला।  सिखण म देर लगदी अन्यथा iPad चलाण भौत सरल हूंद। पूष क मैना ढंडी म कुद्दि  मरण  से पैल  जड्डू लगद  बाद म कुद्दि मार द्यावो तो जड्डू गायब ह्वे जांद।  तनि iPad चलाण सरल ह्वे  जांद।
iPad भौत  सा ICon बटन छन जनकि app अर्थात application . पर चिंता नि  कारो धीरे धीरे बिंगणम ऐ  जालो कि app  क्यांकुण  च।  iPad खरीदणो  अर्थ हूंद धैर्य नि खूण।
धीरज धारो अबि  भौत  कुछ सिखणो कुण  च।
लिफाफों चित्र क अर्थ च तुमर संदेश या तुमकुण  रैबार।  तुमर ईमेल पता अर पासवर्ड सेटिंग म हूंद।  सेटिंग setting  क्या च ? यु एक जटिल जाळ च।  वास्तव म जब तुम दुकानम iPad खरीददा  तो तुम तै पूछी सेल्समैन setting  सेट कौर दींद  किन्तु तुम iPad खरीदणो  पुळ्याट म याद नि  रखदा कि  तुमन setting म क्या सेट करवाई।
हां हां  तुम संदेश भेज सकदां  अर  रैबार पढ़  सकदां।  संदेश लिखणो कीबोर्ड ? तुम बि ना ? बिजली क  आटा  चक्की जग म घट , घराट या जंदरौ लगाणा छा।  अंगुळी फिराण सीखो अर  स्वयमेव इ  की बोर्ड समिण  ऐ  जालो।  आज ना भोळ स्वयं सीख जैल्या।  धीरज अर  धैर्य राखो .
कैमरा बि  च ? हैं  तुम बि  ना ? चुनाव क ऋतू ह्वावो अर  राजनैतिक दल यि   फ्री , सि  फ्री  की छ्वीं  नि  लगाल ? जब ५०० रुपया क मोबाइलम कैमरा च तो iPad म कैमरा नि  होलु।  बस कैमरा  Icon दबावों अर
कैमरा उपस्थित ह्वे  जालो।  सब कुछ क्लियर ह्वे जालो एक बार सीख ल्यावो कि iPad कनो  उपयोग करण।
हाँ हां  iPad म facebook , twitter , संगीत (music ) सब कुछ च।
Games ? हां  हां  गेम्स app बि  छन।  जुवा खिलणौ उयार iPad सिखांद च अर तुम तै ना सै नई पौध तै  जुआरी निर्माण म iPad भौत सहायता करदो। 
Siri ? हां  Siri  बि  च ज्वा  बुल्दि = में आइ  हेल्प यू ?
पेन्सिल - हाँ हां  मिल जाली।
शेष बथ  दस  मिनट  म नि  सिखाये सक्यांद। iPad उपयोग कारो बार बार उपयोग कारो सब कुछ सीख जैल्या।
हैं  ? चीनी स्मार्ट फोन अर  iPad म क्या अंतर च ? उन  यि प्रश्न लोअर लोअर क्लास  मेंटलिटी वळ करदो इख तलक कि लोअर मिडल क्लास वळ बि इ प्रश्न नि करद कि iPad अर  चीनी स्मार्ट फोन म क्या अंतर हूंद।
तुम जन लुइस फिलिप्स या रियर रैबिट कमीज अर  फुटपाथ म रेडीमेड कमीज म अंतर नि पुछदा तनि iPad अर  चीनी स्मार्ट फोन म अंतर नि  पुछण चयेंद।  जन  गूंगा अमृत अर कड़ो क्वाथ  क स्वाद अंतर  नि  बतै  सकद  तनि iPad अर  चीनी स्मार्ट फोन म अंतर नि  बताये सकेंद।


Cpyright@ Bhishma  Kukreti, 
व्यंग्य म कथा काल्पनिक च।   हास्य श्रृंखला आगे भी जारी रहेगी