आकर्षक भोजन रेसिपी लिखणो आधारभूत टिप्स
-
भीष्म कुकरेती
-
फेसबुक आण से हम मादे भौत सा रचनाधर्मियों तैं बड़ो माध्यम मिल गे। अभिव्यक्ति कु सागर मिल गे . इनि गृहणियों तैं भोजन पकाणो ब्यूंत , विधि रेसिपी साझा करी प्रसिद्धि पाणो एक बड़ो माध्यम बि मिल गे।
भौत सा मित्रोंन पूछ बल आकर्षक रेसिपी /पाक विधि लिखणो उपाय बि सुजावो। तो मेरी बिठलर दगड्याण्युं आदेश पर लिखणु छौं बल कन रेसिपी /पाक विधि लिखण -
१- अपण दर्शक /पाठकों तै जाणों - सबसे पैल यु जणन आवश्यक च तुमर दर्शक (यूट्यूब ) अर पाठक (फेसबुक आदि ) कु छन , च व भाषा क्या च। यूंको आकर्षण केमा होलु।
२- विवरणात्मक भोजन पाक विधि आकर्षक , आकर्षक आवश्यक च - शीर्षक आकर्षक हूण चयेंद अर विवरणात्मक हूण चयेंद जन - तरला दलाल द्वारा भरवां आलू टिक्की चाट या तरला दलाल द्वारा आलू गोभी पंजाबी रेसिपी।
३- रेसिपी म एक द्वी वाक्य शुरुवात म ल्याखो कि किले या भोजन पाक विधि आवश्यक च पढ़ण या दिखण जनकि - करेला एक स्वास्थ्यवर्धक भोजन च तो करेला पकाणो विधि आण जरूरी बि च। -
४- फ़ूड प्रोसेसिंग समय /भोजन प्रसंसकरण समय - प्रोसेसिंग (कटण -छंटण -सुधारण , छूक्यल उतारण आदि ) कु समय लिखण से पाठकों तै सुविधा हूंद। ।
५ - पकाणो समय - पकाण म कथगा समय लगल भी सुविधाजनक च। कुछ भोजन म कुकिंग समय व बेकिंग समय व सळाणो (चिलिंग ) समय क महत्व हूंद तो बताण आवश्यक च। माइक्रोवं म पकाण हो तो समय , तापमान आदि सुचना दीण चयेंद।
६- कथगा मनिखों कुण च - मात्रा से पता चलद कि कथगा मनिखों कुण भोजन ह्वे सकद
७- अ से ह क्रम म भोज्य पदार्थों की सूची - आलू , खरबूजा बीज , गुड़ , चुकंदर , जीरा , प्याज , हल्दी क्रम म सामन कु नाम द्याओ
८ - मात्रा अर संख्या ल्याखो - सामग्री समिण मात्रा ग्राम व लहसून या तेल १ चमच जन सूचना दीण से पाठक निश्चिंत रौंद।
९- उपकरणों अर आकार की सूची दीण लाभकारी च अर विशेष उपकरण की सूची अवश्य - सामन्य उपकरणों नाम दीण क अलावा विशेष उपकरण जन इडली मेकर , स्टीमर , माइक्रोवं , एयर फ्रायर आदि क सूचना लाभकारी व प्रभावकारी हूंद। चकली मेकर , जनकि जलेबी बणानो कपड़ा , छलनी आदि की भी सूचना लाभकारी हूंद।
१०- भण्डारीकरण की सूचना - कुछ भोजन तै वै बगत ही नि खाये जांद बल्कण म बाद म उपभोग हूंद जन मिठै , अचार , बिस्किट , सॉसेज , मसला आदि को बाद म उपभोग तो भण्डारीकरण की उचित सूचना आवश्यक हूंद कि स्टोरिंग सही हो।
११- कब तक खाण की सूचना - भौत सा भोजन कु उपभोग समय बताण भी आवश्यक हूंद तो सूचना दे दीण चयेंद।
१२- पोषक तत्वों की सूची - जख तक हो पोषक तत्वों की सूचना दीण से उपभोक्ता तै लाभ हूंद।
१३- आकर्षक स्टाइल दार फोटो - फोटो खिंचण से पैल आकर्षक कनो फोटो होली की कल्पना आवश्यक च अर वे हिसाबेँ ही फोटो खैंचण चयेंद।
एक उदाहरण
आयुर्वेदिक झंग्वर क पौष्टिक सुपाच्य छंछिया /पळ्यो
झंग्वर उत्तराखनडौ सैकड़ों साल बिटेन एक पारम्परिक स्वादिस्ट व सुपाच्य आनाज राय अर झंग्वरौ छंछिया बि आदि काल से इ प्रचलित च।
सामान -
उपकरण - लोखरै कड़ै , कांसी या स्टीलौ पलटा या डाडू
भोजन सामग्री (५ मनिखों कुण ) -
झंग्वरक चौंळ - २०० ग्राम
छांच - एक लीटर (बिंडी खट्टी न हो तो बेहतर )
लूण अर मसाला - स्वादानुसार
आयुर्वेदिक झंग्वर क पौष्टिक सुपाच्य छंछिया /पळ्यो पकाणो ब्यूंत /विधि
कड़ै म पाणी उबाळो , उबलण म झंग्वरक चौंळ , लूण , मसल डाळो अर १० मिनट तक पकण द्यावो। अब छांच डाळो अर थड़कण तक लगभग ८ मिनट तक थड़कण द्यावो।
कांसी या स्टीलक थाळी म प्रोसो पीतळ या ताम्बा थाळी म नि धरण व परोसण।
बिन लूण मसाला क बि बणद अर गुड़ डाळो त मिठ पळयो बि।
स्वाद - हळको खट्टो पर स्वादिष्ट व सुपाच्य
ऋतू - सबि ऋतुओं म किन्तु पहाड़ों म आज बि रात नि खाये जांद।
पोषक तत्व - औषधि गुण वळ च अर कब्ज आदि म भलो
Copyright @ Bhishma Kukreti 2021
गढ़वाली भोजन पाक विधि रेसिपी लिखने की सलाह , कुमाउँनी भोजन की रेसिपी /पाक विधि लिखने की सलाह , हरिद्वार भोजन की रेसिपी /पाक विधि लिखने की सलाह , मारछा भोजन रेसिपी लिखने की सलाह , आकर्षक भोजन रेसिपी लिखणो आधारभूत टिप्स , रेसिपी कैसे लिखी जाती है टिप्स
