MeraPahad Community Of Uttarakhand Lovers

गढ़वाली हास्य व्यंग्य साहित्य
चबोड़ इ चबोड़ मा, हौंस इ हौंस मा

 

                           गाँ मा लुखुन्दर अर मूस किलै नाचणा छ्या ? 


                                        चबोड्या- भीष्म कुकरेती


                 अच्काल जै बि टी.वी चैनेल द्याखो उख  खुरदरा व्यापार मा फोरेन इन्वेस्टमेंट पर इ बहस होणि च .

  मीन स्वाच  या घड्याइ कि जणे जावु कि खुरदरा व्यापार मा फोरेन इन्वेस्टमेंट  से क्या क्या क्या फैदा नुकसान ह्व़े सकदन. मि अपण गौं मा घूमु अर मीन पाई -
 
मीन घुंघरा काकि तै पूछ- ये काकि अब त भारत मा खुरदरा व्यापार मा फोरेन इन्वेस्टमेंट  आणु च त क्या क्या क्या फैदा  नुकसान ह्व़े सकदन?"

" कनो ?यू खुरदरा व्यापार मा फोरेन इन्वेस्टमेंट बि इनी च जन कोयला खदानों आबंटन ?"  घुरा काकि न उल्टा  मै पूछ

मि अग्वाड़ी ग्यौं अर काजल बोडि तै पूछ," बल बोडि अब त  भारत मा खुरदरा व्यापार मा फोरेन इन्वेस्टमेंट आणु च त क्या फायदा नुकसान होलु ?"

काजल बोडि न पूछ, " यू हज्या इख गौं मा आलु कि शहरूं  मा आलु ?"
 
मीन बताई कि यू इन्वेस्टमेंट या निवेश शहरूं मा इ होलू त काजल बोडि ले सन्यूँ /छन्यूँ ज़िना अटकण बिसे ग्याई . मीन पूछ,"क्या ह्वाई ए बोडि?"

काजल बोडि न ब्वाल," कुछ ना बुबा ! जब बि शहरूं मा कुछ होंद छौ त हमारो गाँ बिटेन जवान अर वूंकी ज्वानि शहरूं जोग ह्व़े जांदी छे अब मै तै पूरो भरवास ह्व़े ग्याई बल   म्यार गोरुन  बि शहरूं जिना भगण . जरा मि ऊं गोरुं तै ग्वाड़ी द्यूं कि शहरूं ज़िना नि भागन. लौड़ अर नाती नतणा त भागि छ्या अब गौड़- कलोड़  इ ये गाँ मा बच्याँ छन ऊँ तै  शहर भगण से त बचौं "
 
मि रूंदा सूरत से अम्बिका मास्टर जी मा गेऊं अर मीन पूछ," मास्टर जी भारत मा खुरदरा व्यापार मा फोरेन इन्वेस्टमेंट आणु च त क्या फायदा नुकसान होलु ?"

मास्टर जीन पूछ," या नै घटना कख होणि होली?"
 
मीन बताई ," देहरादून जन शहरूं मा इ भौत बडी तादात मा मौल खुलल अर कख?"

मास्टर जीन मोबाइल फोन उठाई अर फोन पर बुलण लगी गेन," ये परमा ! अरे ओ देहरादून मा क्वी क्या कति मौल खुलण वाळ छन . अरे  देहरादून मा जै जमीन तै मीन नागँवारा समजी छौ ना तु इन कौर वीं इ जमीन क वास्ता म्यार नाम से बयाना-पेशगी देदि. मि अबि इख गाँ बिटेन चलणु छौं अर श्याम दै तलक देहरादून पौंछणु छौं  अब त बड़ा बड़ा शहर ही बसण जोग राला."

मी कुछ दिन पैल रिटायर हुयाँ   हवलदार शेर सिंग भैजी क ड़्यार गेऊं . मीन पूछ, बल भैजी भारत मा खुरदरा व्यापार मा फोरेन इन्वेस्टमेंट आणु च त क्या फायदा नुकसान होलु ?"

शेर  सिंग भैजिन पूछ बल या क्या बीमारी च त मीन शेर सिंग भै तै खुरदरा व्यापार मा फोरेन इन्वेस्टमेंट  क बारा मा बताई.

ऊंन   एक फोन मिलाई अर बुलण बिसेन, " जेठू जी समनैन  ! उ अबि भीसम न बताई बल  शहरूं मा भौत सा मौल खुलण वाळ छन . त मतबल या च कि उख चौकीदारों कि जरूरत पोड़लि . ओ आप बुलणा छया कि क्वी सेक्युरिटि  एजेंसी खुले जाव त इन कारो आप तख  देहरादून मा एक सेक्युरिटि ख्वालो मी इख सौब जमीन जायजाद बेचिक सात आट दिन मा उख देहरादून इ ऐ जांदू. "
 
मि निरासा मा भौंपालु ल्वार काका  क अणसाळ ज़िना गेऊं .अच्काल जब बिटेन लोगुंन खेती बन्द कार त गौं मा मूस भौत हूण बिसे गेन  त अब भौंपालु काका न मूस फसाणो चुहेदानी   बणाण शुरू करी देन. मीन पूछ," काका भारत मा खुरदरा व्यापार मा फोरेन इन्वेस्टमेंट आणु च त क्या फायदा नुकसान होलु ?"

भौंपालु काकान पूछ," ब्यटा  ! यू क्वी रिजर्वेसन च?"

मीन जब काका तै खुरदरा व्यापार मा फोरेन इन्वेस्टमेंट क मतबल बिंगाई त भुंपालू काका न   वैबरी अपणि अणसाळ कि आग बुझाई अर अणसाळ इ तोड़ी द्याई

मेरी समज मा कुछ नि आई त मीन पूछ," ये काका यि क्या तुमन त अपणि अणसाळ इ  तोड़ी दे?"

ल्वार काका न बिंगाई," ब्यटा यांको साफ़ मतबल च कि अब हमर गाऊँ बिटेन सब्यूँन शहर चली जाण अर गाऊंन अब हौरि बि सफाचट खालि ह्व़े जाण त मी बि भोळ शहर जाणु छौं अर उखी चुहेदानी क अणसाळ खोलुद."

मी भोंपालू काका ड़्यार बिटेन  अपण ड़्यार औणु छौ त क्या दिखुद कि रस्ता मा लुखुंदर अर मूस नचणा छ्या अर गाणा गाणा छ्या , " जै हो भरात मा फोरेन इन्वेस्टमेंट की ! अब त गौं मा मनिख राला इ ना . अब त सबि  गावुं मा हम मुसुं  अर लुखुंदरूं को  इ राज होलु."

 

  Copyright@ Bhishma Kukreti 17/9/2012

गढ़वाली हास्य व्यंग्य साहित्य
चबोड़ इ चबोड़ मा, हौंस इ हौंस मा

                           

                             अहा वो  लौड़ख्यळया (बचपन ) दिन   अर  यू चाइल्डहुड 

                                                      चबोड्या- भीष्म कुकरेती


                           जब बि मि अपण बचपन समळदु अर आजौ  बच्चों क चाइल्डहुड दिखुद त मै लगद कि कुछ ना कुछ अंतर त छें च.

अब द्याखो ना तब जब हम छ्वटा छा त हम माटो से इथगा प्यार करदा छा कि हम माटु मा इ खिल्दा छया अर एक दें मुंड मा माटु  पोड़ी गे त आठ दस दिन तलक वै माटु तै अळगैक चलदा छ्या, खांदा छया अर सीन्दा छया. फिर आठ दस दिन परांत जब ब्व़े या बाबु तै लगद छौ कि अब हम बच्चा ये माटु तै जादा नि अळगै सकदवां त फिर वु लोग गाळि देकी हम तै नवान्दा छया अर फिर उ हमारो प्रिय माटो अर हमारा असली जीवन साठी जूं एक दगडडि भ्युं जोग हुन्दा छा. हम माटो अर जूं बगैर नि रै सकदा छया त फिर से माटू मा रबड्वेक  खिल्दा छ्या अर कुज्याण कखन हमर मुंड मा फिर से जूं ऐ जांदा छया. अब सुचदु त इन लगद जन बुल्यां हम माटो अर जूंको  बान इ जनम लीन्दा छया. अब कख रै ग्याई माटु अर जुऊँ से वु अथा प्रेम. अब त रोज नयेकि बचा लोग माटु अर जूं तै पनपण इ नि दीन्दन  अर फिर ब्व़े बाबु अपण बच्चो तै पर्यावरण विरोधी शैम्पो से नवान्दन  अर पर्यावरण बिगाड़दन . हमर टैम का बच्चा  अपण माटु अर अपण जानवरूं (जन कि जूं ) से प्रेम करदा छ्या त अबाक बच्चा माटु  अर से दूर इ रौंदन. जब बच्चा बचपन से इ अपण  माटु से प्रेम नि कारल त फिर देश प्रेम कखन आलो. इलै अबाक जवानु मा देशप्रेम काम पाए जांद.

 

         हम भगवान का दियुं जु बि चीज छयो  वै तै प्रसाद इ समजदा छया अर हरेक चीज से प्रेम करदा छया  . अब द्याखो ना हमारो सीम्प, हमारो आन्खुंक पीप अर पूठो गू सब भगवान कि इ देन च. हम बच्चा लोग भगवान कि यूँ देन से इथगा प्रेम करदा छ्या कि हमारि साँस रुक जांदी छे पन हम सीम्प पुंजण से घबरान्दा छया कि कखि भगवान नराज नि ह्व़े जाओ. आँख पीप से बजे जावन  पण मजाल च कि हम अर हमर दिखण वाळ आन्खुं पीप पूंजो धौं. प्रेम प्रेम कि या भक्ति भक्ति की बात छे अर इनी प्रेम हम भगवत देन गू से बि करदा छया. पूठों पर गूवक पपड़ लगी जावन पण हम पूठ नि धूंद छया कि कखि भगवानो दियुं  वस्तु गू हम से नि बिछुड़ जाओ. अब क बच्चों क नाक ना त सीम्प, ना आंखू मा पीप अर ना ही  पूठ पर गू दिखेंद. त इन मा भगवद प्रेम मा कमजोरी आणि च कि ना ? ए भै जब बच्चा  भगवानौ दियुं चीजुं से प्रेम नि करला त कनकैक यूँ बच्चों मा भगवद भक्ति आलि?

       हमारो टैम पर भाव प्रदर्शन खुले आम हूंद छौ . मनिखौ भाव प्रदर्शन रुके जाव त मनिख मानसिक रोगी ह्व़े जांद . वै टैम पर क्वी बि मानसिक रोगी नि होंद छौ किलैकि हम जोर से भारी भीड़ मा  सब्युं समणि पादि सकदा छा, डंकार  ले सकदा छा. अब त पदण अर डंकारण   सामाजिक गुनाह मा शामिल ह्व़े गेन. अर जब हम अपण प्राकृतिक भावु तै भैर आण से रुकला त हमारा बच्चा मानसिक रोगी ह्वाला इ.

     हमर टैम पर कबीर हमर समाज पर हावी छौ . हम ढाई अक्षर प्रेम तै अहमियत दीन्दा छा अर शिक्षा तै प्रेम का समणि शून्य माणदा छा. हम बच्चा  वै टैम पर गोर, से प्रेम करदा छा त स्कूल जाणो जगा गोर मा जाण जादा महत्वपूर्ण छौ. हम गोठ से प्रेम करदा छा त किताब पढ़न से जादा ग्वाठम रयाड चड़ण या भगळवट पर इ ध्यान दीन्दा छया.

  हमर बड़ा बूड हम कुणि बुल्दा छा कि कांडो मा नंगी खुट धारो अर अपण खुटों तै मजबूत बणाओ अर म्यार खुट इथगा मजबूत ह्व़े गे छ्या  कि जब बि मि नंगी खटुन सडक मा जान्दो ट सडक बुलण बिसे जांदी  कि जा जुट पैरिक आ त्यार कड़कड़ा खुट में फर चुभणा छन.  अचकालौ ब्व़े बाबु अपण बच्चों सणि बुल्दन बल ," अपने पैर बगैर जूतों के जमीन पर ना रखें कहीं आपके पैर मैले ना हो जायं ".

 हमर टैम पर गाळि गलौज अर आशीर्वाद मा क्वी फरक नि छौ.गाळि हमारि सांस्कृतिक धरोहर छे तब. हमर ब्व़े सुबेर सुबेर हम तै इन बिजाल्दी छे ," ये म्वाड़ मोरल त्यार, खाडुन्द करा कब बिजण तीन?", खाणा दींद दै ददि या बोडि या क्वी बि ह्वेन उ इन भट्यान्दा  छ्या,' ये कब लगाण तीन  तै पुटकि पर आग"  . अर जरा जादा खाण क मांगो त आशीर्वचन हुन्दा छा,"  भूत लगी गेन त्यार पुटुक पर ". यि गाळि  सौब बड़ों का पक्का आशीर्वाद छया अर या इ कारण च कि हम पर गाळियूँ से क्वी फरक नि पोड़दु    अर कूड़  पर गरम पाणि नि फुकेंदन . अचकालौ बच्चा तातो से तातो  पाणि से नि फुकेंदन पण गाळि सुणिक जळि क्या भरचे जान्दन.

 इनी कथगा इ अंतर छन म्यार लौड़ख्यळया (बचपन ) का दिनु मा आजौ बच्चों  चाइल्डहुड  मा.

 

 Copyright@ Bhishma Kukreti 21/9//2012

                   

गढ़वाली हास्य, व्यंग्य साहित्य

चबोड़ इ चबोड़ मा , हौंस इ हौंस मा

                             तीनि कचांग  लगाई अर त्वी  ऐ गे मलम लगाणो ?

                              चबोड्या: भीष्म कुकरेती

[हास्य-व्यंग्य;  जसपुर वासी द्वारा गढ़वाली में हास्य-व्यंग्य; ढांगू वासी द्वारा गढ़वाली में हास्य-व्यंग्य; गंगासलाणी द्वारा गढ़वाली में हास्य-व्यंग्य;सलाणी  द्वारा गढ़वाली में हास्य-व्यंग्य;  गढ़वाल वासी द्वारा गढ़वाली में हास्य-व्यंग्य; प्रवासी गढ़वाल  वासी द्वारा गढ़वाली में हास्य-व्यंग्य; उत्तराखंड वासी द्वारा गढ़वाली में हास्य-व्यंग्य; प्रवासी उत्तराखंडी द्वारा गढ़वाली में हास्य-व्यंग्य;मध्य हिमालयी द्वारा गढ़वाली में हास्य-व्यंग्य; हिमालयी द्वारा गढ़वाली में हास्य-व्यंग्य; प्रवासी मध्य हिमालयी  द्वारा गढ़वाली में हास्य-व्यंग्य; प्रवासी हिमालयी   द्वारा गढ़वाली में हास्य-व्यंग्य; प्रवासी उत्तर भारतीय द्वारा गढ़वाली में हास्य-व्यंग्य; भारतीय द्वारा गढ़वाली में हास्य-व्यंग्य; दक्षिण एशियाई द्वारा गढ़वाली में हास्य-व्यंग्य; एशियाई द्वारा गढ़वाली में हास्य-व्यंग्य; पूर्वी  महाद्वीपीय साहित्यकार द्वारा गढ़वाली में हास्य-व्यंग्य लेखमाला]

                                                 तीनि कचांग लगाई अर त्वी ऐ गे मलम लगाणो ? 

 

     ओहो ! मंमोहान जी ! परसी बड़ो घंघतोळ ह्व़े ग्याई जब आपन राष्ट्र तै रैबार द्याई. क्या बात च जी ? आपौ खुणि त लोग बाग़ बुल्दा छया बल  आप एक गैर राजनैतिक मनिख छन . पण इ सौब बेकार कि बात बुल्दन. आप से  बड़ो राजनीतिग्य अबि कवी नी च. आपि त ये रिफौर्म का तूफान लै छ्या अर जैन इथगा रगड़  बगड़ करी दे अर  अब आपि तूफ़ान से बचणो बान मनरेगा जन टेंट का कील घटणा छया. तुम्ही ने दर्द दिया क्या तुमि दवा भी दोगे ?

            वाह मनमोहन जी ! तुमसे बड़ो राजनीतिग्य कु ह्व़े सकदु जु पैल अपण मंत्र्युं तै , मुख्मंत्र्युं तै , एम्.पीयुं तै घूसखोरी करण दीन्दा अर फिर बुल्दां कि कोंग्रेस अर मेरी सरकार घूसखोरी रुकणा बान जमानो से कटिबद्ध च. वाह मनमोहन जी ! क्वी तुम मांगन  सीखो कि पैल कैकी अंगुळि काटो  अर फिर कट्या  पर अफिक मूतो बि. वाह साब क्या बात च हैं ! पैल जनता क अंग भग कारो अर फिर भसभसो /रीतो (खोखला) भाषण  से  सर्जरी कारो हैं! आप तै त इंटरनेशनल  मेडिकल कौंसिल से  नई डाक्टरेटकि डिग्री  मिलण चयेंद  कि जु दूसरों जिकुड़ी पर खुद चीरा लगान्द अर फिर भाषण का पेन रिलीवर बि दींदु. मनमोहन जी ! आप यीं भसभसी पेन रिलीवर कि दवा क पेटेंट करी द्याओ .अब जब इतिहास मा आप तै  बड़ो बेकार प्रधान मंत्री ही माने जालो त ह्व़े सकुद च ये भसभसो पेन किल्लर /रिलीवर की इजाद का बान इ सै आप अमर त ह्वेल्या.  तुमि ने डा  दिया तुम इ दवा भी दोगे ?

   अहा आपक भाषण बि क्या छौ हैं! भड़यइं चखुलि उड़ाण  मा आप त धूर्त से बड़ो धूर्त राजनीतिग्य तै बि मात दे सकदवां  भै!  कुज्याण कतगा   दिन, कथगा मैना , कथगा साल ह्व़े गेन धौं! आपन बोलि छौ कि बस भोळ आण द्याओ मैंगाई खतम इ समजो .वाह मनमोहन जी पैल आपि मंहगाई क एसिड कि बरखा करदवां अर फिर द्वी चारो तै मंहगाई को एसिड से बचणो छत्रा बंटदा . अर मजा या च कि आप  एंटी ऐसिडौ  छत्रा  बंटद  दै दगड मा डीजल पेट्रोल का बढया रेट का लूण-मर्च  बि घाव पर घसोड़ दीन्दा.  मनमोहन जी ! मारी अर वां पर महामारी क खेल सिखाणो बान  आप एक  इंटरनेशनल स्कूल खोलि इ द्याओ . इतिहास आप से सीखल कि कन पैल दर्द दिए जांद अर फिर दर्द मिटाणो  मलम से दर्द  हौरी बि  बढ़ए सक्यांद. हे महापुरुष ! जनता कु नयो दर्द से पुराणो दर्द बिसराणै /भुलाणो  कौंळ /तकनीक अन्वेषण का बान आप तै त भारत रत्न अर नोबल पुरुष्कार मिलण इ चयेंद.  आप ब्वालो त  मि सोनिया  बैणि से भारत रत्न क बान आपकी सिफारस कौरी द्यूं?

    आप पैल इन करतब करदवां कि मंहगाई उभारी खुण दौड़ण लगी जांद अर फिर आप वीं मंहगाई तै रुकणो बान आप फौरेन इन्वेस्टमेंट, उद्योगतियुं  तै सब्सिडी दीणो तंतर मंतर, झाड ताड़ करदवां पण या निर्भागण मंहगाई इन च कि आपक तंतर, मंतर, झाड ताड़ कु फरक यि बिथ्या पर हुंदी इ नी च . उल्टा आपक रिफौर्मी जंतर मंतर से या मंहगाई उड़ण बिसे जांद .

    इन च मनमोहन जी !  जब   क्वी बि डा  पुटुक मा ह्वाओ अर दुसर मिल्कौं सकासौरि मा मलम हत  खुटों पर लगैल त पुटकौ दरद त नि जालो हाँ हत खुटो पर नै बीमारी सौरि जाली . भैर मुल्कों सकासौरि जगा आप क्वी भारतीय हिसाबन रिफौर्म लांदा त ह्व़े सकुद च कि आप सचेकि इतिहास पुरुष बौणि जांदा. सकासौरी मा लौड़ गौड़ लमडाण इ छयाई, अनर्थ करण  इ छयाई  त ये मनमोहन जी ! आपन किलै अर्थशाश्त्र मा पी.एच डी. कार. पी एच.डी करणो असली   मकसद हुंद नई खोज करणो  ढब . पण आपन त नकलची बौणिक  अपण नाम बि गुवाई अर भारत को बि अनिष्ट कार , सबी जगा,  सबि दर्दों कि , सबी बीमार्युं की  एकी दवा नि होंदी  माराज. भारतीय मरज कि नई दवा खुज्याओ अर छ्वाड़ो ये नकलची रिफौर्म कि रट माराज .. 

     

Copyright@ Bhishma Kukreti 23/9/2012

गढ़वाली  में हास्य-व्यंग्य; जसपुर वासी द्वारा गढ़वाली में हास्य-व्यंग्य; ढांगू वासी द्वारा गढ़वाली में हास्य-व्यंग्य; गंगासलाणी द्वारा गढ़वाली में हास्य-व्यंग्य;सलाणी द्वारा गढ़वाली में हास्य-व्यंग्य;  गढ़वाल वासी द्वारा गढ़वाली में हास्य-व्यंग्य; प्रवासी  गढ़वाली   वासी द्वारा गढ़वाली में हास्य-व्यंग्य; उत्तराखंड वासी द्वारा गढ़वाली में हास्य-व्यंग्य; प्रवासी उत्तराखंडी द्वारा गढ़वाली में हास्य-व्यंग्य; मध्य हिमालयी द्वारा गढ़वाली में हास्य-व्यंग्य; हिमालयी द्वारा गढ़वाली में हास्य-व्यंग्य; प्रवासी मध्य हिमालयी द्वारा गढ़वाली में हास्य-व्यंग्य;प्रवासी हिमालयी द्वारा गढ़वाली में हास्य-व्यंग्य; प्रवासी उत्तर भारतीय द्वारा गढ़वाली में हास्य-व्यंग्य; भारतीय द्वारा गढ़वाली में हास्य-व्यंग्य; दक्षिण एशियाई द्वारा गढ़वाली में हास्य-व्यंग्य; एशियाई द्वारा गढ़वाली में हास्य-व्यंग्य; पूर्वी महाद्वीपीय साहित्यकार द्वारा गढ़वाली में हास्य-व्यंग्य लेखमाला   जारी ...

गढ़वाली व्यंग्य साहित्य

चबोड़ इ चबोड़ मा , हौंस इ हौंस मा

                           खावन प्यावन औरुक मार खावन गौरुक  (ब्लेम गेम्स)

 

                                             चबोड्या: भीष्म कुकरेती

 [व्यंग्य साहित्य; गढ़वाली व्यंग्य साहित्य; उत्तराखंडी व्यंग्य साहित्य; मध्य हिमालयी व्यंग्य साहित्य; हिमालयी व्यंग्य साहित्य; उत्तर भारतीय व्यंग्य साहित्य; भारतीय व्यंग्य साहित्य; एशियाई व्यंग्य साहित्य; जसपुर वासी द्वारा गढ़वाली व्यंग्य साहित्य; ढांगू वासी द्वारा गढ़वाली व्यंग्य साहित्य; गढ़वाली द्वारा गढ़वाली व्यंग्य साहित्य; उत्तराखंडी द्वारा गढ़वाली व्यंग्य साहित्य; मध्य हिमालयी द्वारा गढ़वाली व्यंग्य साहित्य; हिमालयी द्वारा गढ़वाली व्यंग्य साहित्य; उत्तर भारतीय द्वारा गढ़वाली व्यंग्य साहित्य; प्रवासी द्वारा गढ़वाली व्यंग्य साहित्य; गढ़वाली प्रवासी द्वारा गढ़वाली व्यंग्य साहित्य; प्रवासी उत्तराखंडी द्वारा गढ़वाली व्यंग्य साहित्य;प्रवासी मध्य हिमालयी द्वारा गढ़वाली व्यंग्य साहित्य;प्रवासी हिमालयी द्वारा गढ़वाली व्यंग्य साहित्य;प्रवासी उत्तर भारतीय द्वारा गढ़वाली व्यंग्य साहित्य;मुंबई वासी द्वारा  गढ़वाली व्यंग्य साहित्य;महाराष्ट्र वासी द्वारा गढ़वाली व्यंग्य साहित्य लेखमाला ]



     अपण कसूरो  जगा पर दुसर पर भगार लगाणो ब्लेम गेम बुल्दन अर गढ़वळि मा यां पर मिसल बि च बल खावन प्यावन  औरुक मार खावन गौरुक. उन मिसल औरी बि छन जन कि अपण पूठो गू हैंको पर पुंजण,  अपण अन्दाळो बान हांको तै गाळि  दीण .


              ब्लेम गेम या दुसर पर अपण कसूरो भगार लगाण एक टुटब्याग च. अब द्याखो ना वैदिन ब्य्खुन दै रामसरूप ग्वाठम  गोरु जग्वाळ मा छौ. नौनु ह्वाई वु हैंक ग्वाठम  अपण दगड्या क दगड  खिलबगाड़ लगि ग्याई अर इथगा मा बाग़  द्वी चिनख उठै क लीगे . रामसरूप न अपण बुबा पर इ भगार लगाई दे कि चिनखूं तंदला इ कमजोर छौ. रामसरूपौ बुबान अपण कज्याणि घमकै द्याई कि  वीन सुबेर सुबेर गाळि जी दे छौ. टुटब्याग म इन नि दिखे जान्द कि भगार कै पर लगणि च बस कसूरवारो काम हुंद बल अफ़ु तै बचाण.बाकी ब्व़े मार खै बि द्यालि त क्या ह्वाई  मि भतका-चटका  खाण से त  बचि ग्यों ना! 

 
   जब बि कैको नौनु इमतान मा फेल हूंद  त ब्व़े बाब शिक्षा विभाग कि डंडलि सजाण मा दिन रात एक करि दीन्दन. ब्लेम गेम एक मनोवैज्ञानिक बीमारी बि च.


            कसूर अपण अर भगार दुसर पर लगाणो उदारण  सेल्स लाइन मा मीन भौत दिख्युं च. सेल्स या ब्यौपार कम ह्वाओ त सेल्समैन बुल्दन क्या करां साब ! कंपिटीटर का रेट भौत कम छन अर यू सेल्समैन इन कबि नि बुल्दु कि ऑर्डर लीणों बीस दुकानु जगा वु पांची दुकानु  मा ग्याई . फिर हैंको बुल्दु बल साब ! टार्गेट कनै पूर हूण  कंपनी सर्विस ही भौत बेकार च. यू सेल्समैन कबि बि स्वीकार नि करदो कि ये तै दिन मा बि शराब पीणै  लत जि लगि ग्याई. तिसरु बुलद बल साब! अच्काल त सीजन इ नी च अर इन नि बुल्दु कि सेल्स टूर बिची मा छोडि वु चोरि  छिपी अपण गाँ ह्वेक आई.गां मा जमीन नि बिकी त भगार  हीण सीजन पर लगै दे. ब्लेम गेम या भगार लगाणो खेल मा इन नि दिखे जांद कि जैक लूण खाण हो वैक दगड इमानदारी बरतण चएंद. उन भगार लगाण  बहाना क एक रूप बि च.


          कथगा इ कसूरवार निर्दयी हून्दन. वो अपण गुनाह लुकाणो बान कैकी मौ जौ बि उजाड़ी दीन्दन.


   अच्काल त पत्रकारिता ब्लेम गेम की नई मिशाल  कायम करण मा लगीँ च. जख द्याखो भगार लगाणो समाचार छन, खास खबर मा भगार, पेज थ्री मा भगार, सम्पादकीय मा भगार, वित्तीय समाचारों मा भगार अर लांछन,  खेल जगत मा भगारों की भरमार. इन लगद जन पत्रकारिता क एकी ध्येय रै गै भगार लगाण.


           जरा प्रशासन मा नजर त मारो उख त एक विभागक  दुसर विभाग पर भगार लगाणो बान पांति लगी रौंदन. एक विभाग बुल्दु बल हमर इख काम  इलै  नि होणु च बल दुसर विभाग वळ फटाफट काम खतम करदन अर फाईलुं  चट्टा हमर विभाग मा लग जांद अर  इथगा जादा फाइल देखिक हमर विभगाक  लोग फगोसे जान्दन.


  भौत सा  संस्थानों मा जब बि क्वी कौनफेरेंस त ब्लेम एक पाळि बिटेन हैंक पाळि ज़िना  इन चलदन जन बुल्यां टेनिस कु खेल चलणु ह्वाऊ. एक हैंको पर ब्लेम कु बैक स्पिन करदो त समणि बिटेन क्रोस ओवर की भगार को जबाब ऐ जान्दो..  याँ मा  पीठ पैथर चतुर्थ श्रेणी का कर्मचारी बुलदा बि छन आज त ब्लेम गेम डे च.

  ब्लेम गेम माने अपण अंगुळि दुसरौ  तरफ कारो अर जरा कैकी अंगुळि तुमर तरफ आओ त वैकी अंगुळि इ ना मौणि मड़कै द्याओ .

  फिर ब्लेम गेम मा दुसरो ध्यान कै हैंकि जगा बौड़ये जांद अब जन कि कौंग्रेस न कोलगेट क दोष लुकाणो बान खुरदरा व्यौपार मा विदेशी निवेश आदि क योजना लागू कर दे .कम  पूँजी निवेश अर  कम उद्यम का वास्ता कथगा इ मंत्री संतरी विरोधी पार्टी वळु पर भगार लगै दीन्दन.

     कथगा इ नेता कै बि आन्दोलन, घटना या दुर्घटना तै विदेसी हाथ से जोड़ दीन्दन.  ब्लेम गेम या भगार लगाणो खेल को यू स्वर्णिम आधार च .

  अपण दिग्गी बाबू त माख बि मुर्दन त वांक दोष राष्ट्रीय स्वयं संघ पर लगै  दीन्दन.


 भारतीय जनता पार्टी दुसर पर भगार लगा न मा बि काम नि च. लोकसभा मा जोर जोर से घ्याळ करदन अर धमा चौकड़ी मचान्दन अर  फिर बेशरमी से सरकार पर भगार लगांदन कि सरकार लोक सभा चलाण इ नि चांदी.

  द्याख च आपन अपण शरद पंवार जी तै एक दिन बुलण बैठीन  बल खाण पीणो चीजों कि  मंहगाई रुकणो बान सरकार कुछ नि करणि च . ये म्यार भुभरड़  ! कृषि मंत्री इ सरकार पर भगार लगाणु बल खाद्य पदार्थों दम किलै बढ़णा छन? अर कवी पुछ ण वाळ बि नी च बल  ये भै मंत्री त सरकार कु अंग होंद कि ना ?   

 
  अब द्याखो ना वैदिन  खबर आई बल मनमोहन जीन सोनिया जी तै बताई बल कोयला खदानों क लाइसेंस दीण मा  अहमद पटेल (सोनिया जीक मुख्य सचिव) कि अहम भूमिका च. अब बथाओ भारत कु सबसे बड़ो साब बि दुसरो शिकायत कारल  त इनी त बुल्याल बल हमर प्रधान मंत्री बि बलम गेम मा माहिर इ ना ब्लेम गेम का बड़ा डाक्टर छन .

 
  ब्लेम गेम या भगार कु खेल मा कै ना कैकी बळि जरुरी हूंद. जन कि आदर्श घोटाला या हौरी बि घोटाला मा बळि क बुगठया  सरकारी ऑफिसर इ बणदन, दोषी नेता त उल्टा  यूँ बळि क बुगठयों   मौणि काटणो बान खुन्करी पळयांदु .


 एक बात सत्य च बल ब्लेम गेम या भगारो खेल मा छ्वटा छ्वटा प्यादा इ धराशयी  होन्दन बड़ा बड़ा शातिर त बच इ जान्दन . द्याखदी कलमाड़ी जी त ओलम्पिक खेल दिखणो बान लन्दन ह्वेक बि ऐ गेन.अर सी अम्बानी सरीखों क मैनेजिंग डाइरेक्टर जेल घूमी घामिक ऐ गेन अपण अनिल अम्बानी बुलणु राई बल मै त पता इ नी च कि म्यार संस्थान मा कु क्या करद. ब्लेम गेम या भगार लगाणो यो बि एक  सास्वत नियम च  कि अफु तै अजाण साबित करि द्याओ अर भगार से बची जाओ.

     

 


Copyright@ Bhishma Kukreti 25/9/2012

 व्यंग्य साहित्य; गढ़वाली व्यंग्य साहित्य; उत्तराखंडी व्यंग्य साहित्य; मध्य हिमालयी व्यंग्य साहित्य; हिमालयी व्यंग्य साहित्य; उत्तर भारतीय व्यंग्य साहित्य; भारतीय व्यंग्य साहित्य; एशियाई व्यंग्य साहित्य; जसपुर वासी द्वारा गढ़वाली व्यंग्य साहित्य; ढांगू वासी द्वारा गढ़वाली व्यंग्य साहित्य; गढ़वाली द्वारा गढ़वाली व्यंग्य साहित्य; उत्तराखंडी द्वारा गढ़वाली व्यंग्य साहित्य; मध्य हिमालयी द्वारा गढ़वाली व्यंग्य साहित्य; हिमालयी द्वारा गढ़वाली व्यंग्य साहित्य; उत्तर भारतीय द्वारा गढ़वाली व्यंग्य साहित्य; प्रवासी द्वारा गढ़वाली व्यंग्य साहित्य; गढ़वाली प्रवासी द्वारा गढ़वाली व्यंग्य साहित्य; प्रवासी उत्तराखंडी द्वारा गढ़वाली व्यंग्य साहित्य;प्रवासी मध्य हिमालयी द्वारा गढ़वाली व्यंग्य साहित्य;प्रवासी हिमालयी द्वारा गढ़वाली व्यंग्य साहित्य;प्रवासी उत्तर भारतीय द्वारा गढ़वाली व्यंग्य साहित्य;मुंबई वासी द्वारा गढ़वाली व्यंग्य साहित्य;महाराष्ट्र वासी द्वारा गढ़वाली व्यंग्य साहित्य लेखमाला जारी ...

व्यंग्य साहित्य गढ़वाली  भाषा में

चबोड़ इ चबोड़ मा , हौंस इ हौंस मा

                                 काका भतिजौ  खेल   

 

                                 चबोड्या: भीष्म कुकरेती


[व्यंग्य साहित्य; गढ़वाली व्यंग्य साहित्य; उत्तराखंडी व्यंग्य साहित्य; मध्य हिमालयी व्यंग्य साहित्य; हिमालयी व्यंग्य साहित्य; उत्तर भारतीय व्यंग्य साहित्य; भारतीय व्यंग्य साहित्य; एशियाई व्यंग्य साहित्य; जसपुर वासी द्वारा गढ़वाली व्यंग्य साहित्य; ढांगू वासी द्वारा गढ़वाली व्यंग्य साहित्य; गढ़वाली द्वारा गढ़वाली व्यंग्य साहित्य; उत्तराखंडी द्वारा गढ़वाली व्यंग्य साहित्य; मध्य हिमालयी द्वारा गढ़वाली व्यंग्य साहित्य; हिमालयी द्वारा गढ़वाली व्यंग्य साहित्य; उत्तर भारतीय द्वारा गढ़वाली व्यंग्य साहित्य; प्रवासी द्वारा गढ़वाली व्यंग्य साहित्य; गढ़वाली प्रवासी द्वारा गढ़वाली व्यंग्य साहित्य; प्रवासी उत्तराखंडी द्वारा गढ़वाली व्यंग्य साहित्य;प्रवासी मध्य हिमालयी द्वारा गढ़वाली व्यंग्य साहित्य;प्रवासी हिमालयी द्वारा गढ़वाली व्यंग्य साहित्य;प्रवासी उत्तर भारतीय द्वारा गढ़वाली व्यंग्य साहित्य;मुंबई वासी द्वारा गढ़वाली व्यंग्य साहित्य;महाराष्ट्र वासी द्वारा गढ़वाली व्यंग्य साहित्य ;राजनैतिक व्यंग्य, सामाजिक व्यंग्य , धर्म विषयी व्यंग्य ; शिक्षा संबंधी व्यंग्य ; खेल संम्बधी व्यंग्य ; आर्थिक नीति संबंधी व्यंग्य ; भाषा संबंधी व्यंग्य ; सांस्कृतिक व्यंग्य ; रोजगार संबंधी व्यंग्य ; वैचारिक स्तर के व्यंग्य ; पारिवारिक सम्बन्धो संबंधी व्यंग्य ; स्त्री उत्पीडन के व्यंग्य ; बाल उत्पीडन के व्यंग्य ; कृषि संबंधी व्यंग्य ; पलायन संबंधी व्यंग्य ; युवाओं की समस्या संबंधी व्यंग्य ;ग्राम विषयक व्यंग्य; शहर संबंधी व्यंग्य ; महानगर संबंधी व्यंग्य ; सिंचाई संबंधी व्यंग्य ; घोटालो संबंधी व्यंग्य ; वन घोटालो संबंधी व्यंग्य ; जंगल माफिया राज संबंधी व्यंग्य ; पोलिस संबंधी व्यंग्य ; विदेसी धौंस संबंधी व्यंग्य ; शराब संबंधी व्यंग्यलेखमाला ]

                                       काका भतिजौ खेल 

एक- हे चलो काका भतिजौ खेल खिलला.

हैंक बच्चा - हाँ हाँ बड़ो मजेदार खेल च !

तिसरु- ठीक च मी नौरतु याने सूत्रधार  बणदु   . अर तु स्वाग कुणि डाईलौग लेखिक दींद जा.

नौरतु (सूत्रधार ) - बदमासो कु खेल द्याखो

                     --- धुर्याओं क खेल द्याखो

                     -- गरीबी मिठाणो खेल द्याखो

                    ---- पैलाक मंगत्या , भिकारी अर आजौ  नेता क  एकी साल  मा खड़ी चमकदार कोठी द्याखो

                    -----   राजनीति मा 

                    ---छकटु (ठग) कु   छकटणु (ठगुण ) द्याखो 

                   --- कुर्सी पर परिवार वाद कु गोंद द्याखो

                    -- भाई भतीजा वाद कु रोग द्याखो

एक- अरे बन्द कर भौत  ह्व़े ग्याई. इ सौब. भलो छे कि जु तु बिहार अर बंगाल मा नि छे निथर त्यार  मुख प्रजातन्त्री म्वाळ से बन्द करे जांद.

नौरतु- आओ जरा महाराष्ट्र की परुशरामी धरती मा काका भतीजों खेल खिले जौ

काका- आ ये म्यरा भतीजा जरा बेवकूफ बणाणो खेल खिले जाओ.

भतीजा - काका सन सैंतालीस से यू खेल चलणु च अब दर्शक ब्वालो या जनता तै अब नेतौं द्वारा बेवकूफ बणाणो खेल से बिखलाण ह्व़े ग्याई

काका- त चल काका भतीजा क खेल दिखौला 

भतीजा- काका यु क्या सिंचाई विभाग मा  घोटालो जांच कु औडळ बीडळ  आणु च

काका- अरे क्या ह्वे ग्यायि । इन त सेंट्रल महाराष्ट्रा कोपरेटिव   बैंक घोटाला जांच कु ढांड बि पोड़ी छौ

भतीजा- पण काका इन लगणु च सिंचाई विभाग मा घोटालो जांच कु औडळ बीडळ खतरनाक च . जादा परेशानी वळ च.
 
काका- त इन कौर तू मंत्रालय जाण बन्द करि दे .अर  सिंचाई विभाग मा घोटालो को  ध्यान अपण 'मंत्रालय  नि जाण' पर लगै दे .

भतीजा- पण काका यू स्वांग त तुमन डिल्ली मा बि कौर छौ. जनता जन ढिबरों बात  त जाणि द्याओ पण अजकाल यि टी वी. चैनलुं  दरबार मा पत्रकार  अर विश्लेषकुं न जाणि जाण कि मी सिंचाई विभाग मा घोटालो अर सरासरी फाइल पास करणो ध्यान हटाणो बान   मंत्रालय नि जाणु छौं.

नौरतु- यूँ नेताओं स्वांग , टुटबाग द्याखो

काका - त इन कौर ब्रह्माश्त्र छोडि दे

भतीजा-  काका आपन त बथाई छौ कि छक कैकी खाओ पीओ अर भगार दुसर पर आण चएंद इ  ब्रह्माश्त्र हुंद

काका- अरे गलती ह्व़े ग्याई . उ छक कैकी खाओ पीओ अर भगार दुसर पर आण चएंद त टुटब्याग  शाश्त्र होंद.

भतीजा - त गुरु जन काका ! यू ब्रह्माश्त्र क्या हूंद ?

काका- त इन कौर तू उप मुख्यमंत्री पद से त्याग पत्र दे दी

भतीजा- याने लाल बहादुर शाश्त्री क तरां ?

काका - दिमाग खराब हुयूँ  च त्यार अर म्यार जु अछेकी त्यागपत्र या इस्तीफा द्योला !

नौरतु- यूँ नेताओं स्वांग , टुटबाग द्याखो

        - यूँ नताओं क कुकर्मी  स्वांग द्याखो     

        - नेताओं क भरम फैलाणो बेशरम जाळ द्याखो

         -नेताओं क बेवकूफ बणाणो खटराग द्याखो

         --- नेताओं क इस्तीफा क स्वांग द्याखो

 भतीजा- अर जु मुख्मंत्री  म्यार इस्तीफा स्वीकार करी  द्यालु त ?

काका- अबे बेवकूफ छे तू. मुख्यमंत्री त्यार इस्तीफा स्वीकार  कौरल त महाराष्ट्र अर डिल्ली मा सरकार भ्युं नि पोड़ी जालि?

भतीजा-  त ठीक च मी अबि इस्तीफा दे दींदु

काका- अबे नालायक ! पैल मि तै कोलकत्ता जाणि दे अर फिर इस्तीफा दे. जां से लगो कि त्यार इस्तीफा  स्वांग नी च असलियत च .

नौरतु- -- द्याखो द्याखो ! यूँ नेताओं क जंक जोड़ द्याखो

        --  यूँ नेताओं क सियीं जनता तै जौर, ज्वर कु इंजेक्सन दीण द्याखो

          --यूँ जनता जनार्दनो कु जंजाळ द्याखो.पावर कु पावर द्याखो 

           - जन सेवकुं  कि हिजड़ा जन , जनखा जन  जंवामर्दि  द्याखो

काका- हाँ मि कोलकत्ता पौंछि गयो अब तू उप मुख्यमंत्री पद से इस्तीफा दे दी अर घ्याळ इथगा हूण चयेंद कि महाराष्ट्र इ ना भारत का सबि भर्याँ  बाँध -डामुं पाणी सूखि जाओ.

एक चानेल- ब्रेकिंग न्यूज - उप मुख्यमंत्री न इस्तीफा द्याई

दुसर चैनेल- ब्रेकिंग न्यूज- महराष्ट्र मा सरकार तै खतरा

तिसर चैनेल- ब्रेकिंग न्यूज अब हम भारत मा 'कोयाला खदानों अर महराष्ट्र मा सिंचाई विभाग मा घोटालो समाचार अर विश्लेषण दीण सद्यानो खुणि बन्द करणा छंवां  अब  बीस पचीस दिन सिर्फ अर सिरफ़ उप मुख्यमंत्री क इस्तीफा कु घ्याळ ह्वालो

नौरतु- द्याखो द्याखो ! भारत मा ख़ास मुद्दों से  ध्यान बंटाणो खेल द्याखो

           - नेताओं क भूक, तीस, रोजी रोटी क कमी से ध्यान हटाणो  कमीनापंथी क हथियार द्याखो

खटकरी -अरे मि ईं दमानिया समानिया पर मान हानि क दावा करणु छौं

भतीजा - खटरागी खटकरी जी ! ये स्वांग कु स्क्रिप्ट मा त आपक रोल इ नि छयाई  . आप किलै ऐ गेवां ? ये स्वांग मा त मेरो इ इस्तीफा पर चर्चा क स्क्रिप्ट छौ

खटकरी- अरे ये स्वांगक स्क्रिप्ट मा समानिया दमानिया बि त नि छेइ  अर वा म्यार अर त्यार काका क खाओ पीओ अर बांटिक खाओ वळा संबंधो क बारा मा सबि टी वी चानेल अर अखबारों तै बथाणि च त मि ये स्वांग से भैर किलै रै सकदु .

नौरतु- अहा ! धुर विरोधी नेता अर सरकारी नेताओं क जुगलबंदी द्याखो. भैर दिखानो कुत्ता बिरळ कि लड़ाई अर भितर कावों क  भाई बंदी द्याखो.

---- अर सि द्याखो जनार्दन द्विवेदी कु  अपण ख़ास विरोधी खटरागी खटकरी जी तै बचाणो वकीली जिरह द्याखो

  -- खटरागी खटकरी जी क दगड्या उज्यळु  जावडेकर जी कु खटरागी खटकरी जी तै दूध कु धुयुं  साबित करणो  कुतर्की जबाब  द्याखो

  -- थैली क चट्टे  बट्टों  कु खिलवाड़ द्याखो

खुस पटेल- अब उप मुख्यमंती क इस्तीफा वापस नि ह्वालो . अब भतीजा क जगा बेटी उप मुख्य मंत्री होली

भतीजा - काका ! यू क्या च / मीन ट इस्तीफा इअली द्याई कि कि ..युत नियम विरुद्ध च . यू त स्क्रिप्ट मा छें इ छौ

काका- बेटा राजनीति मा स्वार्थ पूर्ती का सब चाल  जायज छन . अब मी चांदो कि मेरी बेटी तेरी जगा ल्याऊ . शतरंज अर राजनीति का खेल इकजनी होन्दन

नौरतु- वाह राजनीति की शतरंज का खेल द्याखो

बीस पचीस विधायक- भतीजा क इस्तीफा वापस नि ह्वाल त हम सरकार गिरे द्योला

काका - भतीजा यू त स्क्रिप्ट मा नि छयो 

भतीजा - काका यि सौब कौंळ मीन तुम मांगन इ सीखेन

काक- ओ मि बिसरी ग्यों कि च्याला बि गुरु पर भारी पोड़ सकुद . ठीक च त जन च तनी रौण दे . त्यार इस्तीफा रद्द ह्व़े जालो

नौरतु- नै नै यू स्वांग बन्द नि ह्वालू. रोज इनी स्वांग चलणा राला

जनता- अर में जनता क  क्या ह्वालू?

नौरतु- जब तलक तू इनी सिंईं  रैलि  तब तलक भारत मा  राजनैतिक- बेतुका, बदजात, बदतमीजी , बलात्कारी, लूटमारी , चोरी-जारी , बेशर्मी का स्वांग इनि चलणा  राल .

 

 


 


Copyright@ Bhishma Kukreti 28/9/2012

व्यंग्य साहित्य; गढ़वाली व्यंग्य साहित्य; उत्तराखंडी व्यंग्य साहित्य; मध्य हिमालयी व्यंग्य साहित्य; हिमालयी व्यंग्य साहित्य; उत्तर भारतीय व्यंग्य साहित्य; भारतीय व्यंग्य साहित्य; एशियाई व्यंग्य साहित्य; जसपुर वासी द्वारा गढ़वाली व्यंग्य साहित्य; ढांगू वासी द्वारा गढ़वाली व्यंग्य साहित्य; गढ़वाली द्वारा गढ़वाली व्यंग्य साहित्य; उत्तराखंडी द्वारा गढ़वाली व्यंग्य साहित्य; मध्य हिमालयी द्वारा गढ़वाली व्यंग्य साहित्य; हिमालयी द्वारा गढ़वाली व्यंग्य साहित्य; उत्तर भारतीय द्वारा गढ़वाली व्यंग्य साहित्य; प्रवासी द्वारा गढ़वाली व्यंग्य साहित्य; गढ़वाली प्रवासी द्वारा गढ़वाली व्यंग्य साहित्य; प्रवासी उत्तराखंडी द्वारा गढ़वाली व्यंग्य साहित्य;प्रवासी मध्य हिमालयी द्वारा गढ़वाली व्यंग्य साहित्य;प्रवासी हिमालयी द्वारा गढ़वाली व्यंग्य साहित्य;प्रवासी उत्तर भारतीय द्वारा गढ़वाली व्यंग्य साहित्य;मुंबई वासी द्वारा गढ़वाली व्यंग्य साहित्य;महाराष्ट्र वासी द्वारा गढ़वाली व्यंग्य साहित्य , राजनैतिक व्यंग्य, सामाजिक व्यंग्य , धर्म  विषयी  व्यंग्य ;  शिक्षा संबंधी व्यंग्य ; खेल संम्बधी व्यंग्य ; आर्थिक  नीति संबंधी  व्यंग्य ; भाषा संबंधी  व्यंग्य ; सांस्कृतिक व्यंग्य ; वैचारिक स्तर के व्यंग्य ; पारिवारिक सम्बन्धो संबंधी व्यंग्य ; स्त्री उत्पीडन के व्यंग्य ; बाल उत्पीडन  के व्यंग्य ; कृषि संबंधी  व्यंग्य ; पलायन संबंधी  व्यंग्य ; युवाओं की समस्या संबंधी  व्यंग्य ;ग्राम विषयक व्यंग्य; शहर संबंधी   व्यंग्य ; महानगर संबंधी  व्यंग्य   ; सिंचाई संबंधी  व्यंग्य  ; रोजगार संबंधी व्यंग्य ;घोटालो संबंधी  व्यंग्य  ; वन घोटालो संबंधी  व्यंग्य ; जंगल माफिया राज संबंधी  व्यंग्य ; पोलिस संबंधी  व्यंग्य ;  विदेसी धौंस  संबंधी  व्यंग्य ; शराब  संबंधी व्यंग्य  ल़ेखमाला जारी ...