MeraPahad Community Of Uttarakhand Lovers

                                         वैबर्या पंचायत चुनाव अर आजs पंचायत राज चुनाव

                                                      चबोड़्या -चखन्यौर्या -भीष्म कुकरेती


             मि तैबरै बात करणु छौं जब हमर गाँ मा केवल ग्राम पंचायत छै अर तब हमर इख पंचायत राज नि ऐ थौ।
अहा तब बि हमर गाँ मा ग्राम पंचायतौ  चुनाव हूंद था अर अब बि पंचायत राजौ चुनाव हूंदन।  तब बि गौं लोगुं तै मुंडरु हूंद थौ आज बि मुंड फूटै से लोगुं तैं मुंडर हूंद।
पंचायत चुनाव  सुचना आवो  ना कि सरा गाँ सुंताळ मा चलि जांद छौ कि कै तैं पंच प्रधान बणौला ? आज बि पंचायत राज मा समस्या - पंच -प्रधान कै तैं चुनणौ की ही  च बस आयाम -डाइमेंनसन बदलि गेन।
जब वै बगत मि छ्वटु छौ अर हमर प्रजातंत्र बि ग्वाइ लगान्द लगान्द जवान हूण बिसे गे छौ त सरा गां परेशान रौंद छौ कि प्रजातंत्र तै जवान हूणों बान पंच -प्रधान कखन लौला  ? तब पंच -प्रधान बणणो क्वी तयार नि हूंद थौ। अर अब परेशानी या च कि  जौंक बुबाको जनम गां मा बि नि ह्वे वी बि विजय बहुगुणा   अर साकेत बहुगुणाक  तरां पंच -प्रधान -सरपंच -जिला परिषदौ चुनाव लड़णो मैदानी लठैतुं दगड़ ऐ जांदन। कोठी दिल्ली -देहरादून मा अर चुनाव लड़न गढ़वाल का गांवुं मा।
तब गां वाळ फिकर का मारा सींद नि छा , खांद नि  छया।  जब क्वी बि पंच -प्रधान बणणो तयार नि हूंद छौ त इकै आदिम तैं पंच बणणो बान लोग बारा बारा दिन ,छै छै राति वै मनिखौ चौक मा पड्याँ रौंद था अर तब तक डट्याँ रौंद था जब तलक वू मनिख पंच बणणो हाँ नि बोलि दयावो।  याने लोग हैंक तैं पंच बणाण मा एक द्वी  मैना व्यस्त रौंदा था।  लोगुंम द्वी मैना तक एकी काम रौंद छौ कि कनि कौरिक बि ग्राम प्रधान अर पंच मिल जावन !
अब बि परिस्थिति तकरीबन ऊनि च पण तरीका दुसर ह्वै गे। अब जब तलक चुनाव नि ह्वै जावन तब तलक हमर  चौक मा  चुनाव प्रत्यासी क लठैत मैदानी पिस्तौल लेक बैठ्या रौंदन अर हम  यूँ दिनु प्रर्त्यास्युं दियीं लठैत जेड सेक्युरिटी मा रौणो मजबूर रौंदा।
तब पंचैत मा माल -मलाई नि हुंदी छे त क्वी पंच -प्रधान बणणो तयार नि हूंद थौ अर सरा गां तैं पंच प्रधान बणाणो बान मेहनत करण पोड़द छे।
अब पंचैत मा इथगा माल -मलाई च कि दुधि बच्चा बि प्रधान बणणो बान पर्चा भौरिक ऐ जांद।  प्रवासी जु अपण ब्वे -बुबा मरण पर गां नि आंदन वो बि चुनाव लड़णो या चुनाव लड़वाणों बान गां ऐ जांदन।
हौर दिनों जै गां मा कवा बि नि दिखेंदा छा उख अचकाल चुनावी कवारौळी मचीं रौंदी , किलैकि समणी पर सब्युं तैं मनरेगा , जनरेगा अदि की मलाई  जि दिख्यांदी।
जख प्रेम की बंसुळी बजदी छे उख अब युद्ध की रणभेरी बजदी।
जख पैल पता इ नि चलदो छौ कि ये गां मा कथगा जाती छन उख अचकाल पंचैत चुनावुं  बगत एकि चुलखन्दो मा भाइ -भाइ अलग अलग पक्वड़ पाकंदन। अजकाल जाति नि बंटेंदन भयात बंटेदि। गुटबन्दी , जाती -बंदी आज चुनाव का जर -जेवर -जवाहरात -गहणा ह्वे गेन।
अजकाल पति अपण वाइफ़ पर बि बिश्वास नि करदो अर बुबा अपण नौनु पर भरवस नि करदो त कुंठित ह्वेका सबि दारु क तलौ मा डुबकी मारणा रौंदन।  दारु पर ही अब सब विश्वास करदन।  प्रत्यासी बि शराब पर विश्वास करदो कि वोटर शराब पेकि मेरि भकलौण मा आलु त वोटर बि शराब पर विश्वास करदो कि जु जादा शराब पिलालु वो ही ग्राम हितैषी होलु।  शराब भरोषा दिलाणो माध्यम ह्वे ग्यायि। 
 
पैल लोग पंच -प्रधान इलै बणदा छा कि सेवा करे जावो आज लोग पंच  -प्रधान इलै बणदन कि सरकारी योजना से मेवा खाए जावो।


Copyright@ Bhishma Kukreti  30  /9/2013



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...]

                                          गांधी जयंती च त  विरोधी नेताs   घौरन शराब मंगै दे !

                                                    चबोड़्या -चखन्यौर्या -भीष्म कुकरेती


मन्त्रीs घरवळि - सुणो ! भौत दिन ह्वे गेन दगड़म फिलम नि देखि !
मन्त्री  -त्वै तैं इन बात याद तबि आंदन जैदिन म्येखुण  एक घड़ी फुरसत नि रौंद।  पता च क्या च आज ?
घरवळि - क्या च ? मि तै क्या पता ? मि त वीमेन वेल्फियर  कामुं मा जि व्यस्त रौंद !
मन्त्री -आज गांधी जयन्ती च !
घरवळि (दांतुं तौळ जीब ) -  मेरि ब्वे मीन त आज सुंगरो शिकार मंगाईं च।
मन्त्री  -त क्या ह्वाइ ? आज म्यार बुबा क श्राद्ध थुका च जु ये घौरम शिकार नि बौणलि।
घरवळि - वौ आज त तुमकुण खाणै त राइ दूर बीड़ी पीणै फुरसत बि नि होलि ?
मन्त्री -खैर बीड़ी त मि कार मा इ पे लेलु।
घरवळि - अच्छा वो राजघाट पर कथगा बजि प्रोग्राम च ?
मन्त्री  -साढ़े आठ बजि अर मीन ठीक इख बिटेन आट बजे पैटण।
घरवळि - त पौणे आट बजे मि अपण मौसि जंवै बुलै द्युं ? वु फिर एक बलात्कार प्रयास मा फंसण वाळ च।
मन्त्री -अरे वैकुण  बोल अब जनान्युं हंटिंग  बंद कौर कुछ हौर चीजुं अयेड़ी ख्यालो !
घरवळि - अब रजवाड़ा खानदान कु च त अयेड़ी खिल्यां बगैर रै बि त नि सकुद ना !
मन्त्री  -वै तैं श्याम दै डिन्नर पर बुलै दे। डिन्नर टेबल मा सब बात ह्वे जालि।
घरवळि - त तुम अबि बिटेन अचकन -टुपला पैरिक तैयार ह्वे गेवां ?
मन्त्री -अरे कंस्टिट्वेंसी से म्यार घोर समर्थक  आणा छन। 
घरवळि - कु कु ?
मन्त्री  -एक त वु आणु च जैन म्यार बुलण पर विरोधी क टांग तोड़ी छे अर हैंक जैन अग्यो लगै  छौ।
घरवळि - अछा ! गाँधी समाधि बाद क्या प्रोग्राम च ?
मन्त्री -वैक बाद एक अन्तराष्ट्रीय संस्था क प्रोग्राम च उख 'आज भी सत्य का औचित्य है 'पर भाषण च
घरवळि - ये सत्य पर याद आयि ब्याळि  सीबीआई कोर्ट मा तुमर पेशी छे।  उख क्या ह्वाइ ?
मन्त्री  -मीन इन झूठ ब्वाल कि सीबीआई क्या स्कॉटलैंड वाळ बि हमर सर्वोच नेता पर हाथ नि लगै सकदन।
घरवळि - फिर वीं मीटिंगों बाद क्या प्रोग्राम च ?
मन्त्री -वीं मीटिंगों बाद मीन ' गांधी जी के लेखों में लुप्त होते जंगली जानवर और पक्षियों का सन्दर्भ ' पर भाषण दीणों जाण।
घरवळि - ये पक्षियों पर याद आई।  मौसी जंवै बान तीतर , बटेर अर मोर कु मटन मंगाण पोड़ल ! अर वु पुरण सप्लायर त अचकाल नेता ह्वे ग्यायि।
मन्त्री  -वो सेक्रेटरी बिटेन  हैंक नयो  सप्लायरो  फोन नम्बर ले ले।
घरवळि - फिर वांक बाद घौर ऐ जैल्या कि ?
मन्त्री -नै नै आज गांधी जयंती च त पैल एक जगा 'शराब की लत में डूबा भारत ' पर भाषण दीणों जाण अर अंत मा रात सात बजे  तलक 'धुम्रपान ख़त्म कैसे हो ' पर भौत ही बड़ी प्रदर्शनी च त मीन ही वांक उद्घाटन करण।
घरवळि - भौत बड़ी प्रदर्शनी ? क्या यीं प्रदर्शनी क स्पोंसर सरकार च ?
मन्त्री  -ना ना ! 'धुम्रपान ख़त्म कैसे हो' प्रदर्शनी क प्रायोजक दुनिया की सबसे जादा बिकण वाळ  सिगरेट  ब्रैंड च
घरवळि - ये मि त बिसरि  ग्यों . मौसी जंवै त एक ख़ास शराब पींदन अर आज त वाइन शौप बंद रौंदन।
मन्त्री -अरे पड़ोस मा म्यार घोर विरोधी नेता छन।  वूंक इखन वा ख़ास शराबै तीन बोतल मंगै दे।
घरवळि - हाँ बिचारा भला आदिम छन।  बार बगत पर हमर काम ऐ जांदन।

(इस लेख को वास्तविक बनाने की  कोशिस में यदि सच्ची घटना का जिक्र हो गया हो तो मुझे कतई माफ़ नही करना )
Copyright@ Bhishma Kukreti  2/10/2013



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...] 

                                               कोका कोला द्वारा  जल जीरा की बेज्जती !

                                                 चबोड़्या -चखन्यौर्या -भीष्म कुकरेती

कोका कोला -हटो ! हटो ! मि ऐ ग्यों ! मि ऐ ग्यों ! भैर जावो।  भैर ह्वे जावो।
 जल जीरा -क्या च यु  त्यार बुबाक फ्रिज  च जु बेज्जती करणु छे अर   बुलणु छे -हटो ! हटो
कोका कोला -देख दुकान्युं मा जु बि फ्रिज छन वो सब म्यार मालिकाक छन।
 जल जीरा -सूण यु  घौर च समझे।  क्वी दुकान नी च जु तू इथगा रौब से बात कौर !
कोका कोला -देख मि तुम सरीखा छुट मुट ड्रिंकुं दगड़ बात नि करदो।  आइ फील इंसल्ट  इन टाकिंग विद यु टाइनी ब्रैंड
 जल जीरा -ये जादा अंग्रेजी नि झाड़ हाँ ! मि संस्कृत मा बुलण बिस्योल त फिर त्यार मुख पर ताळु  जालु
कोका कोला -सुण बै जल जीरा ! क्या औकात च तेरि जु मेरि दगड़ बात कौर ? फिर जख तलक संस्कृत को सवाल च- इण्डिया मा कु समझद संस्कृत ?
 जल जीरा -ठीक च ठीक च।  पण म्यार दगड़ इज्जत से बात कौर। 
कोका कोला -तेरी इज्जत क्या च हैं ?
 जल जीरा - मी भारत मा द्वी हजार साल से छौं।
कोका कोला -तो ?
 जल जीरा -कम च कि मि भारत  घरों मा द्वी हजार साल से आयुर्वेदिक पेय छौं।
कोका कोला -अबै जब इंडिया मा आयुर्वेद  ही अपण महत्व की लड़ाई  लड़णम नाकामयाब  च त ते सरीखा पेय की क्या औकात ?
 जल जीरा -ये औकात पर नि जा हां !
कोका कोला -किलै नि बतौं त्वे तैं तेरि औकात।  ऐक्स्पाइरी डेट निकळ ग्यायि अर अबि तलक सि फ़्रिजौ कूण्या पर अनाथ जन पड्यूं छे।
 जल जीरा -ये अनाथ नि बोल हाँ म्यार बिरतांत ढाई हजार साल पैलाक चरक संहिता मा बि च हां
कोका कोला -अबै आज की बात कौर कु पुछद त्वै सरीका ड्रिंक तैं। कथगा भारतीय चरक संहिता बारा मा जाणदन ?
 जल जीरा -पण यु त तू बि जाणदि कि रियलिटी मा मीमा त्वे से जादा  स्वास्थ्यवर्धक इंग्रेडिएंट छन। 
कोका कोला -ठीक च कि त्वैमा हेल्दी इंग्रेडिएंट छन पण लोग त यी समझदन कि ओनली कोका कोला इज  ''रियल थिंग ' अर बाकि सब बेकार छन।
 जल जीरा -अरे कै झूट तैं हजार दैं दुरावो। रिपीट कारो त वु झूट सच ह्वे जांद अर लोगुं तैं सच झूठ लगण बिसे जांद।
कोका कोला -यही तो मार्केटिंग है !
 जल जीरा -हाँ मार्केटिंग पावर का बल पर ही तो तू अब हम सरीखा स्वास्थ्यवर्धक पेयुं /ड्रिंकुं तैं हीन समजदी।
कोका कोला -ओ बेवकूफ ! ओल्ड रग ! मि त्वै तैं हीन नि समजदु बलकणम भारतीय त्वै सरीखा पारम्परिक , काम का  पेय पदार्थ तैं हेय दृष्टि से दिखदन।
 जल जीरा -वी त रुण च कि भारतीय मानिक चलणा छन कि जो बि इम्पोर्टेड चीज च वो अमृत च अर जो बि भारतीय चीज च वो दकियासूनी च।
कोका कोला -अर इन्डियन त्वै तैं महत्वपूर्ण स्वास्थ्य वर्धक पेय समझ बि ल्यावन त क्या ह्वे जालो ?
 जल जीरा -अरे रिसर्च अर डेवलपमेंट से मि तैं बोटलिंग लैक बणांदा अर मार्केटिंग करदा त जल जीरा की पूछ कोका कोला से जादा हूंदी
कोका कोला -क्या त्वै तैं पक्को विश्वास च कि भारतीय अपण पारम्परिक खाद्य पदार्थों पर अन्वेषण कारल ?अर कामौ पारम्परिक पदार्थों तैं बचाला ?
 जल जीरा -वी त रुण च कि अशोक महान का बाद भारतीय समाज निर्माणकारी समाज छोड़िक बिचौलिया समाज ह्वे ग्यायि।
कोका कोला -यां पर आइ एग्री विद यु कि भारतीय समाज लौह अयस्क निर्यात करण मा विश्वास करदो अर  वै माटु से लोहा बणाण मा विश्वास नि करदो।
 जल जीरा - ट्रेडिंग संस्कृति मा त इनि ह्वाल.
कोका कोला -तो फिर किलै मेरी समणी इथगा अक्कड़ दिखाणि छे ?
 जल जीरा -अब त अक्कड़ बि खतम ह्वै  गे।  किलैकि भारतीय हम तैं कूण्या मा बि जगा नि दींदन ।

Copyright@ Bhishma Kukreti  4 /10/2013



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...] 

                                         कुपोषण का प्रति सहानुभूति -सांत्वना का छै बूँद आंसू

                                               चबोड़्या -चखन्यौर्या -भीष्म कुकरेती
कुपोषण ( जोर जोर से किरांद/ रूणु ) च )-  ये ब्वे !  अब मीन नि बचण ! अब सरा भारत  से  म्यार सुफड़ा हूण वाळ च।  अच्छा भारत मा ना सै पण गुजरात मा मेरी चिता जरुर जगण वाळ च।
एक आवाज -हैं ! ये कुपोषण जु तू हमेशा अट्टाहासी हंसी हँसदो छौ अर आज ह्यळि गाडि गाडिक मृत्यु -सूचक रुण रूणु छे ?
कुपोषण (और जोर से किरांद)- हां भारत मा म्यार  दिन बस खतम हूण इ वाळ च! मेरि डंडलि (अर्थी ) सजण इ वाळ च।  अब मीन नि बचण !  हे ब्वै ! जथुग खाण छौ मीन सि ख़याल अब मेरि निखणि हूणि वाळ च।   औ ! मेकुण  झ्यार (भयंकर बीमारी ) ऐ ग्यायि , ह्ज्या जन बीमारी ऐ ग्याइ !
वै आवाज - हे भै मालन्युट्रिरेसन ! तू तो हमेशा यमराज जन निडर , निश्चिंत , रागस जन निर्द्वंद रौंद थौ अर आज इन रूणु छे जन बुल्यां  ज्युंरा त्यार समणी बैठ्युं ह्वावो !
 कुपोषण (बदहवासी मा हौर जोर से कष्टदायक रुण )- हां  मौत समणि दिख्यांदि त  यमराज बि रुण बिसे जांद।
हैंकि आवाज - अरे  तलक तू बतैल ना , हम तैं कनकै पता चलण कि ह्वाइ क्या च ?
मालन्युट्रिरेसन (बौऴयांद /पागलपन मा उठा पोड़ी करद -करद ) - हाँ जै पर बितदी वी जाणदु कि क्या ह्वाइ !
बच्चों पालन पोषण मा असावधानी (प्यार से कुपोषण तैं एक जगा मा बिठांदु ) -ये म्यार प्रिय से प्रिय भाणजो !  ह्वेक बता कि क्या ह्वाइ। म्यार हूंद त्वै तैं किलै लग बल  तेरि मौत अति नजीक च ?
कुपोषण - बच्चों पालन पोषण मा असावधानी मामा ! आज गुजरात  कंट्रोलर ऑफ ऑडिट जनरल याने कैग की रिपोर्ट आयि बल गुजरात मा हर तिसुर बच्चा कुपोषण कु शिकार च।
 बच्चों पालन पोषण मा असावधानी (ढाढस का भाव मा )- प्रिय भणजु ! पैल त भारत मा सरकारी रिपोर्ट से सरकार  निंद कबि नि बिजद। अर गलती से मिस्टेक ह्वे बि जावो अर सरकारी तन्त्र चेति बि जावो त मि छौं ना ! अरे जब तलक ब्वै बाब अपण बच्चों स्वास्थ्य का प्रति असावधान रालो तब तलक त्वै पर  भारत मा  क्वी लात नि मार सकुद।  अब उठ अर भैर जा खेल अर चट से  हजार -द्वी हजार बच्चों तैं मारिक आ।
मालन्युट्रिरेसन ( जोर जोर से  रुंद रुंद ) -पण कैग रिपोर्ट से लोग  अपण बच्चों पोषक तत्वों प्रति सजग ह्वै ग्यायि त फिर म्यार क्या ह्वालु ?
भारतीय सामजिक विन्यास (कुपोषण कु पीठ मलासदु ) हे म्यार घिरळु ! ये म्यार भतिजु ! जब तलक मि छौं त भारत मा समाज मा बालिकाओं प्रति भेद भाव अवश्य ज़िंदा रालु त क्या च तू लाखों बच्चियों तैं एक साल ना त पांच साल की आयु मा भी मारि सकद कि ना ?
कुपोषण (फिर जोर से रूंद )- काका ! अर जु कखि भारतीय अपण बेट्युं तैं महत्व   दीण हरु कौर द्याल तो ?
गलत विश्वास  (कुपोषण क आंसु पुंजद - पुंजद ) ये ल्वाळ कुपोषण  ! जब तलक भारतीय म्यार कारण सांस्कृतिक विरासत पर चिपकणै आदत नि छ्वाड़ल या स्वास्थ्य संबंधी अंधविश्वास नि छ्वाड़ल तब तलक क्वी बि त्यार बाल बि बांका नि कौर सकुद। 
स्वास्थ्य संबंधी अंध विश्वास (सांत्वना दींद)  हाँ हे भुला ! म्यार रौंद रौंद त भारतीय गर्भवती स्त्रियों तैं पूरो भरपेट अर पौष्टिक भोजन दीण से त राइ।  जब तलक मेरी हकूमत भारत मा च तब तलक भारत मा सैकड़ों स्वास्थ्य संबंधी अंध विश्वास राल अर इन तेरो यानी कुपोषण को भी राज दगड़ मा चलणु रालु।
मालन्युट्रिरेसन (अपण छाती पीट पीटिक रूंद )- अर कखि भारतीयों मा चेतना ऐ ग्यायि तो ? फिर मि त कखि जोग नि रौलु ?
पुरुष मानसिकता (कुपोषण कु बिखर्यां बाळ ठीक करद -करद ) - ये म्यार लाटो ! म्यार अधिपत्य जब तलक रालो त त्यार बि राज रालु। देख जब तलक ब्वेऊंक/माऊंक बच्चों लालन पोषण पर अधिपत्य नि ह्वावो तो समजि ले कि त्यार क्वी कुछ नि बिगाड़ सकुद।
कुपोषण (इन किरांद  आग मा जळणु ह्वावो ) -अर अब जब जनानी बि नौकरी करण लगि गेन त जनानी अपण बच्चों भोजन मा पोषक तत्वों पर  देला कि ना ?
सामाजिक मजबूरी (मालन्युट्रिरेसनक  धूंद -धूंद )- बेटा ! चिंता नि कौर।  जख ब्वे बाब द्वी नौकरी करदन उख बच्चों मा जंक फ़ूड , आलतू -फालतू खाणो आदत बढ़दी, कुटैमौ खाणा खाणै आदत बि बढ़दि।
 मालन्युट्रिरेसन- (जोर की चिल्लाहट ) -पण जब पैसा ऐ जांद तो ….
अप्रभावकारी शिक्षा (कुपोषणक मुंड मलासद -मलासद ) - कुछ नि हूंण ।  ,  मन से डौर निकाळ फेंक।  म्यार रौंद रौंद ये भारत मा कुछ नि ह्वै सकद।
कुपोषण (फिर ऐड़ाट -भुभ्याट करद )-   अर भारतीय सरकार त गरीबी हटाण चाणि च।
राजनैतिक गुळादंगी -पैंतराबाजी (मालन्युट्रिरेसन तैं दुधारी पिलांद )- ब्यटा ! जब तलक म्यार राज च तो भारत से गरीबी त नि हट सकद।  देख गुजरात की सरकार विरुद्ध कैग की रिपोर्ट आइ  तो कौंग्रेस -भाजपा मा  प्रत्यारोप का बम चलण शुरू ह्वे गेन  अर ये चकर मा मूल विषय याने कुपोषण जन संवेदनशील की बात कखि नि हूण।  कुपोषण ख़तम करणै  जगह भाजपा वाळुन  राहुल गांधी पर लांछन लगाण कि राहुल भारतीय परोंठा की जगा इटालियन पिजा खांद अर कॉंग्रेसियुंन  पर भगार लगाण कि भले ही मोदी भारत को  प्रधान मंत्री क ख्वाब दिखणु च पण अबि बि गुजराती फाफड़ा खांद अर मद्रासी इडली डोसा  नि खांद। भारतीय जनता पार्टी का नेता नीतीश कुमार पर भगार लगाला कि बिहार मा पांच साल से तौळक  80  % बच्चा कुपोषण  का शिकार छन।   फिर बिहार का जनता दल युनाइटेड का नेता बिहार मा कुपोषण का क्या हाल छन की बात छोड़िक   नरेन्द्र मोदी पर लांछन-भगार लगाला कि चूंकि नरेन्द्र मोदी धर्मनिरपेक्ष नी च तो मध्य प्रदेश मा 60 % बच्चा कुपोषण से अंडरवेट  (उम्र का लियाज से कम वजन ) छन।  कौंग्रेस राष्ट्रीय स्वयं संघ पर लांछन लगालि बल चूँकि भारत मा हिन्दू वादी तागत बढ़णि च त  पंजाब, हरियाणा अर जम्मू -कश्मीर मा नौनी कम पैदा हूणा छन। बस एकाद दिन मा  कुपोषण की बहस नरेन्द्र मोदी सेक्युलर च कि ना अर राहुल गांधी मा नेतृत्व का गुण छन कि ना पर अटक जालि अर तू मजा से अपण राज्य फैलाव मा लगि जैलि।
कुपोषण (हंसी खुसी पंड़ो नचण लग जांद ) - अरे हां जब तलक भारत मा राजनैतिक गुळादंगी -पैंतराबाजी राली म्यार क्वी कुछ नि बिगाड़ सकुद।  जै जै बोलो राजनैतिक गुळादंगी की -जय हो राजनैतिक पैंतराबाजी की !
भारतीय न्याय पद्धति -खामोश !  ! मि ज़िंदा छौं अर क्रियाशील बि छौं।
( एकदम सन्नाटा )



Copyright@ Bhishma Kukreti  7  /10/2013



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...] 

                                           चिठि मा लेखि दियां  बल जुपिटर क्या चीज ?

                                              चबोड़्या -चखन्यौर्या -भीष्म कुकरेती
     

(s =आधी अ )

 ब्याळि  जनि टीवी चैनलों मा कौंग्रेस कुंवर राहुल गांधी क भाषण प्रसारित ह्वे कि किताबुं दुकान्युं मा भौतिक शास्त्र किताबुं खरीद बढ़ी गे।   बजार मा भौतिक शास्त्र की किताबुं हर्चंत ह्वे गे अर सामान्य ज्ञान की किताबुं खपत बढ़ी गे।
मीन एक भाजापाs नेता पूछ ," कख भागणा छा  ? क्या पैथर खदुळ कुत्ता पड़्यां छन जु  हवा की गति दगड़ छौंपा दौड़ करणा छां ?"
भाजापाs प्रवक्तान  भगद भगद जबाब दे ," मि फीजिक्सs  किताब खरीदणो जाणु छौं। "
मीन पूछ ," किलै ?  जवानी मा दस पास नि कार त बुढ़ापा मा दस पास करणाइ क्या ?"
भाजपा प्रवक्तान जबाब मा ब्वाल ," ना ना जुपिटर की क्या वेलोसिटी हूंद पता लगाणो बान किताब खरीदणो जाणु छौं । "
मीन ब्वाल ," जुपिटर की वेलोसिटी 45300 कीलोमीटर  प्रति घंटा च। "
भाजपा प्रवक्ता उखमि खड़ो ह्वेक भाषण दीण बिसे गे ," भाइयो ! राहुल गांधी दलितों को  कमजोर बनाने पर तुले हैं। NDAक  सरकारौ बगत हमारा दलित अध्यक्ष बंगारू लक्षमण जीन बोलि छौ बल दलितों तैं 45301  किलोमीटर प्रति घंटा भागण चयेंद अर राहुल गांधी आज बुलणा छन कि दलितों तैं 45300 कीलोमीटर  प्रति घंटा ही भगण चयेंद।  राहुल गांधी चांद ही नीन कि दलित और तेजि से दौड़ लगावन। यो दलितों अपमान च। "
इना भाजपा प्रवक्ता दलितों वेलोसिटी कम करणों बान राहुल गांधी पर भगार , लांछन , आरोप -प्रत्यारोप का बम ग्वाळा  छुड़णा छा उना एक कॉंग्रेसी नेता मुंड मा फ़ूड  सेक्युरिटी की  फाइलुं फंची  लेकि लचकद लचकद भागणै स्वांग करणा छा।
मीन पूछ ," कख जाणा छंवां ?"
कॉंग्रेसी प्रवक्तान गुस्सा मा ब्वाल ," मि चलणु नि छौं बलकणम भागणु छौं "
.मीन ब्वाल , " चलो बतावा कि  बुढ़ापा मा केकि रेस मा शामिल हूणा छंवाँ। "
कॉंग्रेसी प्रवक्तान जबाब मा ब्वाल ," मि भौतिक शास्त्र की किताब खरीदणो जाणु छौं  ."
मि -हैं  बुढापा मा भौतिक शास्त्र की किताब ?"
कॉंग्रेसी प्रवक्ता - हां वू जुपिटर का बारा मा पता लगाण कि यु  जहाज भारत मा कब आयि ?"
मि - जुपिटर हवाई जहाज नी च बलकणम वृहस्पति ग्रह च।
कॉंग्रेसी - ये मेरि ब्वे ! अर या वेलोसिटी क्या हूंद ?
मि - वेलोसिटी माने गति , स्पीड।
कॉंग्रेसी - अरे पण कु बताल कि वृहस्पति ग्रह की गति से दलित  विकासौ क्या संबंध ?
मि -वृहस्पति ग्रह की गति सबि ग्रहों मा सबसे जादा च।
कॉंग्रेसी बजार जाणो जगा अपण ड्यार जिना भगण बिसे गे।
मीन पूछ -क्या ह्वाइ ? ड्यार जिना भगण बिसे गेवां?
कॉंग्रेसी -अरे ,  अपण मुसदुंळ  पुटुक बैठ जांदु।   हाई कमांड वाळ बि कनफणि सि  अजीब भाषा प्रयोग करदन कि हम जनता तैं समझै इ नि सकदां कि नेता जीन क्या ब्वाल ? उल्टां हम तै जनता का बीच रक्षात्मक मुद्रा मा जाण पोड़द।
इना कॉंग्रेसी नेता डौरन अपण मुसदुंळ जीना ग्यायि कि उना बिटेन एक स्थानीय असली बाबा साहेब  आंबेडकर  पार्टी कु  दलित नेता भागद भादग आइ ।
मीन पूछ - क्या तुम बि भौतिक शास्त्रौ किताब खरीदणो जाणा छंवां ?
असली बाबा साहेब आंबेडकर पार्टी नेता - नै नै म्यार पैथर 'बिलकुल असली बाबा साहेब आंबेडकर पार्टी' , 'सत्य मा असली बाबा साहेब आंबेडकर पार्टी', 'नित्य और एकी असली बाबा साहेब आंबेडकर पार्टी', 'भविष्य की असली असली बाबा साहेब आंबेडकर पार्टी' का दलित नेता थमळि लेकि मि तैं कच्याणा आणा छन।
मि - किलै ?
असली बाबा साहेब आंबेडकर पार्टी नेता- मीन बयान दे कि दलितों तैं चंद्रमा की गति से भगण चयेंद।
मि - तो ?
असली बाबा साहेब आंबेडकर पार्टी नेता- तो क्या ! हरेक बाबा साहेब अम्बेडकरी पार्टी का अलग अलग विचार छन।  एक पार्टीक बुलण  च बल दलितों तैं मंगल की गति से भगण चयेंद , त हैंक दलित पार्टी बुलणि च दलितों तैं बुद्ध ग्रह की गति से दौड़ण चएंद त क्वी शुक्र की गतिक समर्थन मा कुलाड़ी पैन्याणु च।
 सबि दलित नेता एक हैंकाक पैथर हथियार लेक दौड़णा छया अर धै लगाणा छया " हमे चंद्रमा की गति चाहिए ', "नहीं हमें मंगल की गति चाहिए ", बकबास दलितों को बुद्ध ग्रह  की गति से भागना चाहिए ", " सरासर झूठ ! हमे शनि की गति से  चाहिए। "……
एक दलित शौचालय की सीढ़ी मा कुछ लिखणु छौ।
मीन पूछ - ये भै तुम  क्या लिखणा छंवां ?
दलितन राहुल गांधी कुण लिखिं चिट्ठी दिखाई।  चिट्ठी मा लिख्युं छौ -
धतूरा को बीज , कुंवर जी धतूरा को बीज 
चिठि  माँ लेखि दियां कुंवर जी , जुपिटर क्या चीज , जुपिटर क्या चीज?
धतूरा को बीज , कुंवर जी ! धतूरा को बीज
चिठि  माँ लेखि दियां कुंवर जी, वेलोसिटी क्या चीज. क्या चीज ?
नेताओं का  वायदा , कुंवर जी नेताओं का वायदा !
चिठि मा लेखि दियां कुंवर जी, दलितों तैं जुपिटर वेलोसिटी से क्या फायदा , वेलोसिटी से क्या फायदा ?
तमाकुs  कु खिकराण  , कुंवर जी   तमाकुs  खिकराण
चिठि मा लेखि दियां कुंवर जी, दलितुंन  या वेलोसिटी कखन लाण ,कखन लाण ?
गधौं को किराण  , कुंवर जी   गधौं को किराण 
दालितुन या वेलोसिटी  कनकै लाण , कुंवर जी या वेलोसिटी कनकै लाण, कनकै लाण ?
शादी ह्वे , ह्वे पाणि पिठाइ, कुंवर जी पाणि पिठाइ
चिठि मा लेखि दियां नेहरु जीन  अर इंदिरा जीन  या वेलोसिटी किलै लुकाइ , दलितुं से या वेलोसिटी किलै लुकाइ ?


Copyright@ Bhishma Kukreti  9  /10/2013



[गढ़वाली हास्य -व्यंग्य, सौज सौज मा मजाक मसखरी  दृष्टि से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य श्रृंखला जारी ...]