MeraPahad Community Of Uttarakhand Lovers

                        मंत्री त आंद जांद रौंदन पण प्रशासनिक सेवा  अटल रौंदि

                                  चुनगेर ,चबोड़्या -चखन्यौर्या -भीष्म कुकरेती       


(s =आधी अ  = अ , क , का , की ,  आदि )

              राज्य शिक्षा मंत्री घ्याळ दा आज एकाद घंटा कुण खाली छा याने प्राइवेट सेक्रेटरी या चीफ एज्युकेशन सेक्रेटरी बिहीन छया।  घ्याळ दा तैं समज मा ऐ गे कि मंत्र्युं हालात बद्रीनाथ जी जन च। गढ़वा राजा बद्रीनाथ का नाम से राज करदा छा।  सब सुकर्म या कुकर्म बद्रीनाथ जीक नाम से ही हूंद छा अर बिचारा बद्रीनाथ जी सिर्फ पत्थर बौणिक  कुकर्म देख सकद छा अर कुछ कौर नि सकद छा।  अबौ समौ पर बि मंत्री असल मा एक मूकदर्शी हूंद अर चलदी तो प्रशासनिक अधिकार्युं  की ही च।
 घ्याळ दाक प्राइवेट सेक्रेटरी माणावाल जी अर चीफ एज्युकेशन सेक्रेटरी रावत जी , एज्युकेशन सेक्रेटरी कौशिक जी , परमानेन्ट अंडर सेक्रेटरी चड्ढा जी अर डेप्युटी सेक्रेटरी सबि राज्य चीफ सेक्रेटरी द्वारा बुलाईं मीटिंग मा जयां छया।
यदि सेक्रेटरी नि ह्वावन तो मंत्री बैशाखियुं बगैर डूंड मनिख ह्वे जांद।  सेक्रटरी नि ह्वावन तो मिनिस्टर लकवा मार्युं मनुष्य जन ह्वे जांद।
घ्याळ दा अपण ऑफिस मा बैठ्याँ छा अर मेज मा एज्युकेशन मिनिस्टर की कार्य दैनंदनी याने डायरी पड़ीं छे। यद्यपि डायरी एज्युकेशन मिनिस्टर की च पण डायरी भरणो काम मंत्री जीक प्राइवेट सेक्रटरी करद। या डायरी  हर समय माणावाल जीक  रौंद। जल्दी बाजी मा आज माणावाल जी यीं डायरी मिनिस्टर साब की मेज मा छोड़ी चलि गेन।
घ्याळ दा मा करणो कुछ नि छौ त डायरी दिखण लगी गेन।  अगला एक साल तक का वास्ता मंत्री जीक हरेक  दिन का अप्वाइंटमेंट छौ।
डायरी दिखद दिखद घ्याळ दा तैं एक कागज मील डायरी पर चिपकायुं छौ। लेटर हेड  इन्डियन ऐडमिनिस्ट्रेटिव सर्विस ऐसोसिएसन लखनऊ कु छौ।  अर शीर्षक छौ प्रशासनिक अधिकार्युं वास्ता अमर नियम।  तारीख 22 दिसंबर 1997।  .
प्रशासनिक अधिकार्युं वास्ता अमर नियम इन छा -
१- मंत्री आंद छन जांद छन।  औसतन एक मंत्री विभाग मा अठारा मैना कुण ही रौंद।
२- प्रशासनिक अधिकार्युं मुख्य जुम्मेदारी च कि मंत्री लोग विभाग का बजट अपण मर्जी से खर्च नि कारन।  मतबल प्रशासनिक अधिकारीक कर्तव्य च कि मंत्री तैं खर्च करण से रुकण।  इखमा मंत्री तैं मानसिक परेशानी हूणी ह्वावो तो हूण द्यावो।
३- मंत्री  तैं हर समय, प्रत्येक पल  मानशिक परेसानी मा रौण चयेंद ; आतंकित रौण चयेंद, मंत्री का आस पास -हर बगत  अफरा तफरी को माहौल  हूण  चयेंद।  राजनीतिज्ञ पैनिक अवस्था पसंद करदन ।  राजनीतिज्ञ अफरा तफरा से प्यार करदन। राजनीतिज्ञ हर समय क्रियाशील रौण चांदु। आतंकित अवस्था या अफरा तफरी की  स्थिति याने पैनिक सिचुएसन  से रणजीतिग्य क्रियाशील रौंद।  राजनीतिज्ञ इन क्रियाशीलता तैं अपण सफलता समजद।
 ४-जब भी क्वी मंत्री कुछ भी चाहे सही बात बि ब्वालो  तो भी प्रशासनिक अधिकारी तैं पैल ना बुलण चयेंद।  मंत्री की जायज मांग  पर भी बहस करण चयेंद। . आखिर विधायक  क्वी जनता का चुन्यूं प्रतिनिधि छैंइ नी च। वै तैं त राजनीतिक दल चयन करद याने मनोनीत करद अर जनता राजनीतिक दलों द्वारा मनोनीत सदस्यों मादे कै एक कु चयन करद।
५- कै बि विधान सभा मा सौ विधायकों मादे कम से कम पचास सरकारी दल का हूँदन। यूं पचास मादे पंद्रा विधायक इथगा बुड्या अर मुर्ख हूंदन कि अपण गां क्या अपण परिवार मा बि मुखिया पद लैक नि रै जांदन। पचास विधयकों मादे पंद्रा विधयाक जवान अर अनुभवहीन हूंदन।  पांचेक  विधायक त इन हूँदन जौं तैं खौड़ सुरणै बि तमीज नि हूंद।  बस पचास विधयकों मादे दस या बारा ही मंत्री बणन लैक हूँदन।  पण राजनीतिक दलों मा चुनाव जितणो ध्येय का कारण क्वी बि मंत्री बौण जांद।
६- याने मंत्री बणणो बान क्वी प्रोपर सेलेक्सन प्रोसेस अर प्रशिक्षण नि हूंद।  प्रजातांत्रिक व्यवस्था मा क्वी  बि मोळ माटौ मादेव मंत्री बणी जांद।
७- - याने कि मंत्री बणणो चुनाव प्रक्रिया ही गलत च तो हम प्रशासनिक अधिकार्युं प्रमुख कर्तव्य च कि इन लियाकत हीन मंत्र्युं से सही निर्णय लिवावां याने निर्णय हमारो हो अर ठप्पा योगयताहीन मंत्री को हो। राजा महानंद ह्वावो या चन्द्रगुप्त मौर्य ह्वावो निर्णय तो प्रधान आमात्य  राक्षस या महा आमात्य चाणक्य को ही हूण चयेंद।
 शिक्षा मंत्री घ्याळ दा प्रशासनिक अधिकार्युं वास्ता अमर नियम पौढिक आश्चर्य चकित ह्वे गेन कि आम लोग तो सुचदन कि मंत्री काम करदन जब कि काम क्वी हौरी करदन। 




   Copyright@ Bhishma Kukreti  13 /1/2014


[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  के  जाती असहिष्णुता सम्बंधी गढ़वाली हास्य व्यंग्य; ढांगू वाले के  पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले के  भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले के  धर्म सम्बन्धी गढ़वाली हास्य व्यंग्य;पौड़ी गढ़वाल वाले के वर्ग संघर्ष सम्बंधी गढ़वाली हास्य व्यंग्य; उत्तराखंडी  के पर्यावरण संबंधी गढ़वाली हास्य व्यंग्य;मध्य हिमालयी लेखक के विकास संबंधी गढ़वाली हास्य व्यंग्य;उत्तरभारतीय लेखक के पलायन सम्बंधी गढ़वाली हास्य व्यंग्य; मुंबई प्रवासी लेखक के सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक का सरकारी प्रशासन संबंधी गढ़वाली हास्य व्यंग्य; भारतीय लेखक के राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य    श्रृंखला जारी  ] 
                   

                           पटवार्युं कुछ किस्सा

                          चुनगेर ,चबोड़्या -चखन्यौर्या -भीष्म कुकरेती       

(s =आधी अ  = अ , क , का , की ,  आदि )

                  पटवार्युं बाराम जख जावो तख कुछ ना कुछ किस्सा मीलि जाला ।  आज बि पटवारी हमर समाजौ  कुण  आवश्यक अर महत्वपूर्ण बीमारी च।  सयेद बि नी च अर फिकेंद बि नी च। समाज पटवारी तैं भ्याळ जोग करण चांद अर सरकार चांदी बल बजट ह्वावो तो हरेक गां मा एक पटवारी चौकी खुले जावो।
                        पुरण जमानो ना म्यार जमानो मा बि पटवारी चपड़ासी कु रुतबा डिस्ट्रिक्ट कलेक्टर  से जादा छौ।  नाक से अधिक महत्व नाक का बाळ होंदन ।
              चपड़सी जी क लाठ  छुम छुम आवाज करदो छौ।  लाठ पर बंध्यां जौं घुंघरू आवाज से नचणा ज्यु बुल्याण चैंद छौ वु घुँघर लोगुं तैं डरांदा छा।
लोग बुल्दा बि छा हमर गां मा ज्यूंरा भेजि देन पण पटवारी जीक चपड़ासी जी तैं नि भेजिन।  ज्यूंरा त एक मनिख उठैक लिजालो पण पटवारी चपड़ासी खेत -पुंगड़ अर इज्ज्त ली जांदो छौ।  पटवारी चपड़ासी की भली सूरत बि डरांदी छे।  सुल्तानु डाकू से लोग इथगा नि डरदा छा जथगा पटवारी क चपड़ासी से डरदा छा।
               एक दैं बल हमर गां मा पटवारी जीक चपड़ासी हर हफ्ता भामा दाजिक इक  आणु राइ।  ना तो पटवारी जीक चपड़ासी जीन बवाल ना ही भामा दाजिन ब्वाल कि पटवारी जीक चपड़ासी जी बार बार किलै आणा छन। गां वाळ परेशान छा।  परेशानी बात ही छे।  कैक इक यमराज आवु अर कैक जान नि लीजावो इन ह्वैइ नि सकद ऊनि कैक इक पटवारी जीक चपड़ासी जी इथगा दिन आवन अर कूड़ी पुंगड़ी नीलाम नि ह्वावो इन नि ह्वे सकुद छौ। लोगुंक  समज मा नि आणु छौ कि भामा दाजीक क्वा पुंगड़ी नीलाम होलि धौं । खैर  जौंक टक्क भामा दाजीक स्यारुं पर छे ऊन पटवारी चौकी जाण शुरू कार पर तबी बि पता नि चौल कि भामा दाजीक क्वा पुंगड़ी नीलाम हूणी च।  आखिरैं जब पता चौल कि भामा दाजीक पुंगड़ी नीलाम नि हूणि च त सरा गां वाळ निरसे गेन।  करुण रस का  रसिया बि दुखी ह्वेन अर इर्स्या  से पैदा हुयुं रस का जळतमार रसिया बि निरसे गेन कि भामा दाजिक पुंगड़ी नीलाम नि होणि च।  असल मा पटवारी जीक चपड़ासी जीक डूंडो स्याळ छौ अर भामा दाजिक बबराट से भरपूर स्याळि छे।  भामा दाजिक ससुर जी बेटिक हजार रुपया मांगणा छा अर चपड़ासी जीक ससुर जी पांच सौ रुपया से अळग एक धेला  बि दीणो तयार नि छा।  अर चपड़ासी जी निगोसिएशन का वास्ता भामा दाजिक ड्यार आंद छा।  अंत मा इथगा निगोसिएशन का बाद भामा दाजिक कामगति स्याळि क कीमत सात सौ रुपया फिक्स ह्वे अर पटवारी जीक चपड़ासी भामा दाजिक साडो भाइ बणी गेन।  गां वाळ खुस ह्वे गेन कि अब पटवारी जीक चपड़ासी हमर बि रिस्तेदार ह्वे गेन।  पण गां वाळु कुण  या खुसी जादा दिन नि रै।  अब भामा दाजी कै तैं बि चपड़ासी जीक नाम से डराइ दींद छा।  जब तलक पटवारी जीक चपड़ासी नौकरी पर रैन भामा दाजिक बि अडगैं (क्षेत्र ) मा रौब रैन।  तब बुले जांद छौ कि राजा का कुत्ता का साडो भाइ हूण बि बड़ी बात हूंद।
     अजकाल बुले जांद कि पुलिस वाळ अपण टारगेट पूर करणो बान गुनाहगारों तैं त नि पकडदी पर बेगुनाहों तैं पकडदी।  या बात ब्रिटिश काल मा पटवार्युं पर बि लागु हूँद छौ।  स्वतंत्रता आंदोलन का बगत मथिन बिटेन पटवार्युं कुण अंग्रेज साबुं ऑर्डर आंद छौ कि ये मैना इथगा कॉंग्रेसी पकड़ण जरुरी च तो पटवारी लोग कै तैं बि कॉंग्रेसी बतैक पकड़ लींद छा।  वै बगत बि पहाड़ का कॉंग्रेसी शहरूं मा आंदोलन करदा छा जन कि उत्तराखंड क्रांति दल या परिवर्तन पार्टी ग्रामीण कृषि विकास का आंदोलन देहरादून का घंटा घर का तौळ चलांदन।  हमर क्षेत्र मा पटवारी जी तैं खुज्याण से बि कॉंग्रेसी नि मिलेन त पटवारी जीन दसेक इन लोग पकडिन जु हौळ लगाणा छया अर सब तैं पौड़ी लीगेन।  यूं हळयों पर ब्रिटिश सरकार का विरुद्ध साहित्य बँटणो , कुप्रचारो अभियोग लगायुं छौ।  पौड़ी मा  मजिस्ट्रेट साबन कैदियों तैं पूछ कि तुम ब्रिटिश राज का विरुद्ध छवां तो तब सबि  कैदियूं तैं पता चौल कि गुरख्याणि ख़तम ह्वे गे।
          अबि हमर छ्वाड़ एक घटना ह्वे गे एक पटवारी शिल्पकार छा।  असलम पटवारी या पुलिसमैन की जात नियुक्ति का बगत ही हूंद बाकि तो पटवारी या पुलिस की जात नि हूंद।  हां त एक आदिमन चिरडेक पटवारी चौकी म ऐक पटवारी तैं गाळि देदेन।  पटवारी वै आदिम तैं लेक लैंसडाउन ली गे  अर वैपर जातिगत   शब्दों गाळि दीणो अभियोग मा बंद करै दे।  मजिस्ट्रेट का समिण पता चौल कि अभियुक्त बि शिल्पकार छौ।  राज कैक बि ह्वावो पटवारी अर पुलिस कु काम बेग़ुनाहूं तैं पकड़नो बि च।


***  भोळ कुछ हौर किस्सा



Copyright@ Bhishma Kukreti  23  /1/2014

[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वाले द्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा  पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक द्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य    श्रृंखला जारी  ] 

           राहुल जी ! जनसम्पर्क से कुछ नि ह्वाइ त विज्ञापन जि क्या मुखड़ि लाल कारल ?

                                  भीष्म कुकरेती       



               अचकाल लोकसभा चुनावुं  कारण सब पर विज्ञापन कु  काल भैरव लग्युं च।  क्वी राजनीतिज्ञ अपण मुख पर रंगुड़ लपोड़ीक कैमरा समिण आणा छन , क्वी नेता चूना पोतिक फोटो खैंचाणा छन।  क्वी मुख्यमंत्री  उत्तरप्रदेश का लोगुं तैं बताणु च बल उत्तरप्रदेश मा ताजमहल च , क्वी विज्ञापन मा बुलणु च बल मि युवा छौं।  जैमा जथगा सरकारी पैसा छन वो उथगा जोरुं से बताणु च हम कै से कम नि छंवां।  बाकी चंदा का पैसा से विज्ञापनाहुति  दीणा छन।
  चुनाव मौसम आण से पैल एक मौसम आंद 'प्री इलेक्सन सीजन ' याने विज्ञापन मौसम।  अजकाल विज्ञापन बंगाल का काळु जादू ह्वे गेन अर सब राजनीतिज्ञ भूली गेन , बिसरी गेन कि  इण्डिया शाइनिंग  कन भद पिटी छे अर बिचारा लाल कृष्ण अडवाणी अबी तलक ' मिनिस्टर इन वेटिंग ' का वेटिंग रूम  मा वेट करणा छन।
                   खौंळेणे बात या च ज्वा राजनीतिक  छवि जनसम्पर्क से हासिल हूंदी वीं छवि पाणो बान पोलिटिकल पार्टी विज्ञापन का सहारा लीणा छन।  जनसम्पर्क छोड़िक विज्ञापन करण इन च जन फुल्टा भौरिक भात से पुटुक  नि भर्यायी  त फुल्टा चाटिक क्या होलु ?
इख तलक कि व्यापार मा बि विज्ञापन छवि बणाणो अंतिम हथियार माने जांद।
           अजकाल राहुल गांधी तैं युवा नेता घोषित करणो विज्ञापन टीवी चैनेलों मा अर आउट डोअर मीडिया मा जोर शोरुं से चलणा छन।  जु विज्ञापन का विद्वान या अनुभवी छन वू बतै सकदन कि यी विज्ञापन सबूत च क्वी ब्रैंड (कांग्रेस ) अंतिम लड़ाइ का हथियार लेक मैदान मा ऐ गे।  राजनीति मा इन विज्ञापन तबि आंदन जब मौत समणि ह्वावो।  क्वी बि कुमारी   मायावती से नि सिखणु च कि वा प्रेस से बि दूर रौंद पण फिर बि वा अपण वोटरोंकी  राणी च।  मायावती विज्ञापन का सहारा से ऐंच  नि आयी।  केजरीवाल विज्ञापन से इथगा कम समय मा इथगा प्रभावशाली नि बौण बल्कि जनसम्पर्कीय विधि से प्रभावशाली बौण ।
  राजनीतिक पार्टी वाळु तैं समजण चयेंद कि जख विज्ञापन पेन किलर जन थोड़ा देरा कुण कामयाब ह्वे सकद पण विज्ञापन पेन अव्वाइडर या पेन हीलर नी च। उख  जनसम्पर्क पेन अव्वाइडर अर पेन हीलर च।
 फिर विज्ञापनो मा विषय या हेडलाइन तैं जनसम्पर्कीय विषय बणये जांद।
  अचकाल एक विज्ञापन च नरेंद्र मोदी कु जु सरदार पटेल की मूर्ति का वास्ता खेती का लोखरौ  औजार की मांग करणु च।  कॉंग्रेस का नेताओं तैं पता नि चौल कि यी विज्ञपान जनसम्पर्कीय विषय खड़ो करद।  यु सरदार पटेल की मूर्ति कु विज्ञापन एक बहस शुरू करद जब कि राहुल गांधी कु विज्ञापन बहस बंद करदु। जनसम्पर्कीय  विज्ञापन से ब्रैंड का विषय मा लोग बात करदन अर विज्ञापनी विषय का विज्ञापन से लोग ब्रैंड का विषय मा बात करण बंद करी दीन्दन।
          जु विज्ञापन ब्रैंड का प्रति समाचार पैदा कारो तो वो विज्ञापन प्रभावशाली हूंद।  राहुल गांधी कु विज्ञपान वास्तव मा समाचार ही नी  च। इनी मुलायम कु शहजादा अखिलेश कु विज्ञापन च जु समाचार ही नि बणनु च तो इन विज्ञापन क्याक कामौक ?
विज्ञापन वास्तव मा विश्वास लैक नि होंदन या  विश्वास खतम करदन जब कि जनसम्पर्क या जनसम्पर्कीय आधारित विज्ञापन विश्वास या प्रतिष्ठा बढ़ान्द।
विज्ञापन कै बि ब्रैंड कु निर्वाह वाहन या रखरखाव (मेंटेन ) कु एक जरिया च. जनसम्पर्कीय विज्ञापन या जनसम्पर्क कु काम विश्वास अर प्रतिष्ठा बड़ांद तो राजनेतिक विज्ञापनो मा इन तत्व ह्वावन जो विश्वास का तरफ ढळक्यां ह्वावन।

 विज्ञापन हवा कु चलण च जब कि जनसम्पर्क सूर्य च।
विज्ञापन शब्दुं खेल मने जांद जब कि जनसम्पर्क एक दृश्य पैदा करद।
विज्ञापन रिखड़ा छन तो जनसम्पर्क एक खाका हूंद।
 विज्ञापन सब जगा पौंछद पण जनसम्पर्क काम का ही ग्राहकूं तक पौंछद अर जु बिंडी अटकदू वू खन्नु फटकदू।  विज्ञापन ध्यानविहीन हूंद  त ध्यानविहीन प्रभाव डाळदु जब कि जनसम्पर्क पट्ट उखि असर डाळदु  जख जरूरत च।
विज्ञापन बरखा च अर जनसम्पर्क कूल च।
विज्ञापन स्वमुखी या स्वचिंता मुखी हूंद जब कि जनसम्पर्क परमुखी या परचिंता मुखी हूंद।
विज्ञापन मर्युं याने उदासीन हूंद अर जनसम्पर्क जीवंत हूंद।
विज्ञापन मैंगू हूंद अर जनसम्पर्क सस्तु हूंद।
विज्ञापन नकल हूंद अर जनसम्पर्क मौलिक हूंद।
विज्ञापन अविश्वास पैदा करद जब कि जनसम्पर्क विश्वास पैदा करद।
विज्ञापन मजका हूंद अर जनसम्पर्क गम्भीर हूंद।
विज्ञापन मरम्मत कु काम करद जब कि जनसम्पर्क छवि निर्माण करद ।
विज्ञापन तैं  चौड़ बिसर जांदन जब कि जनसम्पर्क यादगार हूंद।
 
जनसंपर्क तैं विज्ञापन  जरूरत नि होंदी जब कि विज्ञापन तैं जनसम्पर्क की जरूरत हूंद। 
विज्ञपान उयाद नौनु च जब कि जनसम्पर्क कमाऊ नौनु च
जनसम्पर्क समाचार पैदा करद विज्ञापन समाचार खतम करद

Copyright@ Bhishma Kukreti  29 /1/2014

[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वाले द्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा  पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक द्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य    श्रृंखला जारी  ] 

           हरीश रावत जी ! कथगा दिन रैल्या ? कतगौँ तैं कथगा खलैल्या ?

                      चुनगेर ,चबोड़्या -चखन्यौर्या -भीष्म कुकरेती       

(s =आधी अ  = अ , क , का , की ,  आदि )


           चलो भलो ह्वाइ  उत्तराखंड बिटेन आयातित मुख्यमंत्री गेन अर  ख़ास कॉंग्रेसी फैक्ट्री मा ढळयां   देसी मुख्यमंत्री रावत जी ऐ गेन।  हमन त सोची आल छौ कि हरीश  रावत जीन सद्यनि चीफ मिनिस्टर इन वेटिंग ही रौण।
वधाई कि कॉंग्रेस हाई कमांडन आखिर एक सन ऑफ स्वाइल तैं मुख्यमंत्री बणै दे !
                   उत्तराखंड मा कबि बि सवाल यु नि पूछे जांद कि मुख्यमंत्री क्या कारल ? सवाल यु पूछे जांद कि यु मुख्यमंत्री कथगा दिन कुर्सी बचैक रै सकद।  उत्तराखंड कु मुख्यमंत्री को एक ही काम हूंद कि जादा से जादा अपण कुरसी बचैक राखो बाकी जख तलक उत्तराखंड का वास्ता कुछ विकास करणों सवाल च तो हमम बद्रीनाथ जी , केदारनाथ जी , बागेश्वर जी , जागेश्वर जी,  जन देव दिवता छन तो विकास ह्वैइ जालु   निथर चीन की डौर से ह्वैइ जाल।
         हरीश रावत मंत्री मंडल गठन ह्वै ग्यायी अर जु मंत्री बहुगुणा सरकार मा मंत्री छया वी जन्या का तन ही छन। याने बोतल पुराणी ,शराब बि पुराणी, ढक्कणी बि  पुराणी  अर केवल लेबल बदले गे।  पैल शराब कु लेबल छौ मिसऐडमिनिस्ट्रेड बाई विजय बहुगुणा अब होलु ऐडमिनिस्ट्रेड बाई हरीश रावत।
                 हरीश  रावत या उत्तराखंड का हरेक मुख्यमंत्री कु पैलो काम हूंद कि लॉ ऐंड ऑर्डर तैं स्थिर करण. जबकि लॉ ऐड  ऑर्डर का वास्ता हमम बद्रीनाथ जी , केदारनाथ जी , बागेश्वर जी , जागेश्वर जी,  गंगा -जमुना जन देव दिवता छैं इ छन फिर गोरिल -ग्विल्ल दिवता न्याय करणा ही रौंदन त उत्तराखंड का कै बि मुख्यमंत्री तैं जनता का वास्ता लॉ ऐड ऑर्डर की कभी भी चिंता नि राइ बल्कि ऊँ तैं अपण पार्टी मा अपण विरुद्ध विरोधियों द्वारा मचायुं लॉलेसनेस अर ऑर्डरलेसनेस की चिंता सदा समिण राइ।  अर हरेश रावत जीक समिण बि हमेशा कॉंग्रेस कु अंदर घमासान की लड़ाई तैं थमथ्याणो प्राथमिकता ही रौण।  जन कि विजय बहुगुणा सदा ही त्रस्त रैन कि कुज्याण कब हरीश रावत का अग्नि बाण चौलल , कुज्याण कब हड़क सिंह जीक तीर चौलल, कुज्याण कब इंदिरा हृदियेश कु जादू चलल , कुज्याण कब  सतपाल महाराज का नारायण बाण चौलल अर कब हाई कमांड कु न्यूक्लियर बम चौलल धौं। जब तक हरीश रावत उत्तराखंड का मुख्यमंत्री राल तब तलक उंकी प्राथमिकता पार्टी का भीतर बबंडर तैं थमण रालो ना कि उत्तराखंड जु कबि अपराध मुक्त क्षेत्र छौ अर अब अपराराध्युं बणी गे।
               ममता बनर्जी तैं हमेशा लेफ्ट पार्टी कु भय रौंद ,  जय ललिता तैं करुणानिधि कि डौर , अखिलेश यादव तैं मायावती कु भय ,  प्रकाश सिंग बादल  तैं अमरिंदर सिंग से डौर लगणु रौंद।  पण हरीश रावत जी भागयशाली मुख्यमंत्री छन कि यूँ तैं भारतीय जनता पार्टी कु विरोध नि झेलण पोडण बस कॉंग्रेसी नेताओं कु विरोध ही झेलण। हरीश जी क समिण उत्तराखंड मा  नाकाबिल विरोधी पार्टी च तो भारतीय जनता पार्टी का  विरोध कु सवाल ही नि हूंद।
   उत्तराखंड कु मुख्यमंत्री समिण पहाड़ अर पहाड़ीयूं कि समस्या नि रालि किलैकि पहाड़ी जनमजात सहनशील जात च अर पहाड़ी से पहाड़ मा कुछ नि होंद तो उ दिल्ली -मुम्बई सरक जांद पण अपण मुख्यमंत्री कुण  समस्या खडु नि करद  तो हरीश रावत का समिण पहाड़ विकास समस्या कबि बि नि राली।
                हरीश रावत जीक समिण बड़ी समस्या राली कि भूतपूर्व मुख्यमंत्रियों द्वारा जु बि योजना - प्रायोजना घोषित करीं छन वू तैं कनकौरिक बंद करे जावु अर अपण नाम कमाणो बान कथगा हजार नई रावत ब्रैंडेड योजना घोसित करे जावो।  उत्तराखण्ड मा रिवाज बणी गे कि पुरण योजनाओं तैं ठंडा  बस्तों माँ बंद करण अर रोज नई नई अपण नाम से योजना लाण।
मीन ब्याळी गां मा फोन पर कथगा ही लोगुं से बात कार तो हरेक ससंकित छौ कि क्या फलण योजना त बंद नि ह्वे जाली ? गाँव वाळु बुलण छौ बल नारयण दत्त तिवाड़ीन जु योजना चलैन वू खंडूड़ी , निशंकन बंद करीन , निशंकन जु योजना बणैन वू खंडूड़ी अर बहुगुणान बंद करीन त अब हरिस रावत कु एकी प्रमुख काम रालु जौं जौं योजनाओं तैं तिवाड़ी , खंडूड़ी , निशंकन , बहुगुणान शुरू कार वूं तैं बंद कराण।  उत्तराखंड का मुख्यमंत्रीक एकी काम हूंद योजनाओं मा कंटीन्यूटी खतम करण। 
            हरीश रावत कु सबसे बड़ो काम ब्वालो या समस्या ब्वालो वू या च कि कै कै कॉंग्रेसी तैं लाल बत्ती अर राज्य मंत्री कु दर्जा दिए जावो।  जांद जांद बहुगुणा त थोक का भाव पर लाल बत्ती बांटीक चली गेन अब हरीश रावत जी पता नि कखन हौर संस्थान लाला अर लाल बत्ती बाँटल धौं ?
 हरीश रावत जी कु काम बस यु ही राल कि दिखणा रावन कि बगैर नाम गंदो हुयां कॉंग्रेसी, सामजिक कार्यकर्ता अर प्रशासनिक अधिकारी कथगा खाला। 
उन देहरादून तो उत्तराखंड की द्वितीय राजधानी  च उत्तराखंड की असली राजधानी त  दिल्ली च।  तो हम तैं दिखण पोड़ल कि रावत जी तैं द्वितीय राजधानी का दौरा करणों समय मिल्दो च कि ना ?






Copyright@ Bhishma Kukreti  2/2/2014

[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वाले द्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा  पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक द्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य    श्रृंखला जारी  ] 

                                       जब पटवरी जी तैं पटवर्यूंन  जुत्याइ

                                   चुनगेर ,चबोड़्या -चखन्यौर्या -भीष्म कुकरेती       

(s =आधी अ  = अ , क , का , की ,  आदि )


                    पटवरी जी ही  गाउँक ब्यवस्था  असली मालिक हूंद। सरा व्यवस्था पटवरी जीक बस्ता मा रौंद , इलै भू स्वामियों वास्ता पटवारी ही  असली मुख्यमंत्री अर परधानमंत्री च अर पटवरी जीक बस्ता ही संसद अर न्यायालय च।
           अबि कुछ दिन पैल कैन मि तैं कलाल घाटी कु किस्सा सुणाइ।  कलाल घाटी कोटद्वार का काखम च। भाभर भूखंड मा रिटायरमेंट पर जाण वाळ पटवरी तैं भिजे जांद कि अगर कमाण मा कुछ कमि  रै गे हो तो इख पूरी करी द्यावु अर रिटायरमेंट का दिन मजा से कटि जावन।   उख गलती से एक जवान  पटवारी जी आइगेन। बामण ह्वेक बि परम्परा तोडु छौ जब कि बामण परम्परा तबि तुड़दु जब वै तैं कुछ फायदा ह्वावु।  वै से पैलाक पटवारी चूंकि रिटायरमेंट का बगत कलालघाटी आंद छा तो क छुट से छुट   काम का वास्ता छै छै दैं पिठै लगवांद छा।  जन कि तुम तैं अपण जमीनो खसरा दिखण तो पटवारी चौकी मा  जांदो जांद पटवरी जी पर पैल कोरी पिठै लगाण पड़द।  कोरी पिठै नि लग़ त रिटायरमेंट का नजीक बैठ्याँ पटवरी जी तैं झाड़ा लग जांद अर पटवारी जी झाड़ा करणो कोटद्वार जिना  चलण शुरू करी दींद छौ। कोरी पिठै लग जावो तो पटवारी जी चौकी मा ही बैठ्या मिल जांदन।  फिर खसरा नि मिल्दो।  खसरा  (भू रिकॉर्ड ) खुज्याणो बान पटवारी जीपर पंद्यरि  लाल पिठै लगाण पोड़द।  खसरा मील बी जावो तो कब्जादारौ पेज खुज्याणो बान हल्दीक पिठै लगाण पोडद अर अंत मा कब्जादारौ  पेज दिखाणो बान चंदन लगाण पोडद।  हर स्टेप पर एक पिठै।  अर अब त मनरेगा कुनरेगा जन कथगा ही परेशानी ह्वे गेन तो पिठाइयो किसम बि बढ़ी गेन। अर हर स्टेप की पिठाई दगड़ चपड़ासी जीक कफन बि लगाण पोड़द।  एक त पटवारी जीक चपड़ासी नंदी बैल जन हूंद जै तैं छुयां बगैर शिवलिंग का दर्शन होइ नि सकदन।  गढ़वाल मा पिठै पटवारी जी तैं लगद।  चपड़ासी जी तैं पिठै बर्ज्य च।  चपड़ासी जीक कफन लगद।  असल मा यि शब्द बि  हमर सामाजिक ब्यव्स्था का इतिहास बथान्दन।  जब अंग्रेजोंन पटवारी चौकी  खुलेन त पैल पैल  पटवारी  बड़ी जातीक बामण बणिन जौं  तैं जादा संस्कृत आदि छे अर चपड़ासी छुट जातिक बामण।  जब क्वी मुर्दा फ़ुक्यावो या तिरैं बरिख ह्वावो तो बड़ा बामण याने गुरु तैं पिठै लगद पण दुसर छुट सहयोगी बामण तैं कटड़ दिए जांद अर मुगदान दिए जांद।  तो या सामजिक ब्यवस्था  पटवारी चौकी मा बि आयि अर पटवारी जी याने बड़ो बामण तैं त पिठै लगाये जांद अर चपड़ासी याने छुट जातिक बामण कु कफन लगाये जांद।  आज बि जब खांद पींद घौरौक मनिख तैं बीपीएल (गरीबी रेखा से तौळ ) कार्ड मिलद त पूछे जांद - "बीपीएल कार्ड बणाण मा पटवारी तैं कथगा पिठै लग अर चपड़ासीक कफन कथगा लग ?" या इन शब्द हुँदैन कि पटवारी जी तैं पिठै लगाणो बाद चपड़ासीक कफन अवश्य लगैन हाँ !
                 हाँ तो कलाल घाटी चौकी मा बड़ो शहर से पढ्युं लिख्युं बामण ( सर्टिफिकेट मा कम पढ्युं -लिख्युं ) आइ गे अर यु आधुनिक बामण परम्परा तोडू छौ।  जब कि बामणु कुण मनुस्मिृति मा नियम छन कि परम्परा निर्भाह करण चयेंद अर जब कुछ फायदा ह्वाओ तब ही परम्परा तोड़ण चयेंद जन कि अकबर बादशाह का दरबार मा बामण तैं नौकरी मील जावो तो बामणु द्वारा अकबर या औरंगजेव म्लेच्छ श्रेणी माँ नि गणे जांद छा अर नौकरी नि मील तो यी बादशाह म्लेच्छ ही माने  जांद छा।
 हाँ तो कलाल घाटी चौकी मा यु नै बामण जातिक पटवारी परम्परा तोडू छौ येन घूस लीण बंद नि कार पण पिठै लगवाण बंद करी दे।  क्वी बि काम ह्वावो तो सीधा रेट बतांदो छौ अर अपण कीसा कताड़ी दींद छौ।  कलाल घाटी का लोग बुल्दन बल इन इमानदार पटवारी सदियों माँ ही पैदा हूँदन।  पटवारी जी एक दैं फिक्स रेट कौरी  दींदु छौ अर फिर रेट का हिसाब से पूरो  काम करी दींद छौ।  अर एक दै रेट फिक्स तो समझो काम पूरो।  अब लोग पिठैक पुड़की लेक पटवारी चौकी नि आंद छा किलैकि आधुनिक बामण पटवारी सीधा घूस लींद छा अर पिठैक नाम से चिढ़दा छ।
           एक दिन एक आदिम खाली खसरा दिखणो आयी तो परम्परा तोडू पटवारीन खसरा दिखणो सौ रुपया की बाजिब मांग करी दे अर इखिमा चपड़ासी जीक बान कफन बि  शामिल छौ। वै आदिमन अपण कीसौन्दन सौ रुप्या गाड अर पटवारी जीक कताड्यूं कीसाउंद डाळी दे कि एक पुलिस वाळ आयि अर वैन पटवारी जी तैं सौ रुपया घूस लींद पकड़ दे।
 पटवारी जी तैं नजीकौ पुलिस चौकी लिजाये गे।  पुलिस चौकिक थाणेदारन किस्सा सूण अर थाणेदार बेहोस ह्वे गेन।  बेहोसी इथगा जोर की छे कि पाणी छींटा मारण से बि बेहोसी दूर नि ह्वे तो थाणेदार जी तैं एक पवा देसी दारु पिलाये गए तो ऊंक बेहोसी दूर ह्वे।  होस मा आंद ही थानेदारन पटवारी पर लात मार कि," साले तीन उत्तराखंड कु नाम गंदु करी दे।  ईं सूचना सुणिक मध्य प्रदेस या उत्तरप्रदेश का पटवारी क्या ब्वालल कि उत्तराखंड मा इथगा छुटि घूस लिए जांद?"
थाणेदारन न्याड़ ध्वारक पटवारी बुलैन तो लालढांग , कोटद्वार , देवी रोड , इख तलक कि दुगड्डा का पटवारी बि  पुलिस चौकी पौंछि गेन।  हरेक पटवारी आवो अर रस्ता मा पड्यू सुक्युं जुत  या चप्पल तैं पाणी मा भिगाओ अर पटवारी तैं जूते द्यावो।  जुत्यान्द जुत्यान्द हरेक पटवारी बुल्दु छौ -
"साले तूने घूस लेकर सारे उत्तराखंड का नाम गंदा कर  दिया।  उत्तराखंड देव भूमि है और यहाँ कोई घूस नही लेता है।  "
" अबै शरम नि आयि त्वै तैं सौ रुपया घूस लींद।  हमर बि रेट कम करवै देन तीन।  हमर चौकी मा त  चपडासिक कफन लगांणो रेट कम से कम द्वी सौ रुपया छन ।"
" अबै तेरो को किसने बोला था कि तू पिठाई /टीका लेना बंद कर। "
सौ रुपया की घूस छे तो एफआईआर लिखण बि बेज्जती छे।
इथगा मा गाँवाळ बि ऐ गेन अर वूंन पटवारी जीक पैरवी करण शुरू कौरि दे।
सबि गांवाळुन थानेदार अर अन्य पटवार्युं से विनती याने प्रार्थना कार कि पटवारी जी का विरुद्ध  एफआईआर दर्ज नि हूण चयेंद।
जन कि नियम च कि बामणों बुबा मोर या ब्वे मोर तो जजमानुं तैं ही तिरैं -बरखी खर्च उठाण पोड़द।  ऊनि पुलिस चौकी मा बि ह्वाइ।  पटवारी तैं छुडाणो बान गांवाळु तैं तीन खसि बुगठ्यों बलि चढ़ाण पोड अर बीस बोतल बिदेसी दारु से चौकी धूण पोड़।  पुलिस वाळु पाणि पिठै बि ह्वेइ ।
सब्युं समिण परम्परा तोडू पटवारिन कसम खैन कि आज से वो कबि बि घूस नि लयालु अर केवल पिठै ही लगवाल। 



 Copyright@ Bhishma Kukreti  5 /2/2014

[गढ़वाली हास्य -व्यंग्य, सौज सौज मा मजाक  से, हौंस,चबोड़,चखन्यौ, सौज सौज मा गंभीर चर्चा ,छ्वीं;- जसपुर निवासी  द्वारा  जाती असहिष्णुता सम्बंधी गढ़वाली हास्य व्यंग्य; ढांगू वाले द्वारा   पृथक वादी  मानसिकता सम्बन्धी गढ़वाली हास्य व्यंग्य;गंगासलाण  वाले द्वारा   भ्रष्टाचार, अनाचार, अत्याचार पर गढ़वाली हास्य व्यंग्य; लैंसडाउन तहसील वाले द्वारा   धर्म सम्बन्धी गढ़वाली हास्य व्यंग्य;पौड़ी गढ़वाल वाले द्वारा  वर्ग संघर्ष सम्बंधी गढ़वाली हास्य व्यंग्य; उत्तराखंडी  द्वारा  पर्यावरण संबंधी गढ़वाली हास्य व्यंग्य;मध्य हिमालयी लेखक द्वारा  विकास संबंधी गढ़वाली हास्य व्यंग्य;उत्तरभारतीय लेखक द्वारा  पलायन सम्बंधी गढ़वाली हास्य व्यंग्य; मुंबई प्रवासी लेखक द्वारा  सांस्कृतिक विषयों पर गढ़वाली हास्य व्यंग्य; महाराष्ट्रीय प्रवासी लेखक द्वारा  सरकारी प्रशासन संबंधी गढ़वाली हास्य व्यंग्य; भारतीय लेखक द्वारा  राजनीति विषयक गढ़वाली हास्य व्यंग्य; सांस्कृतिक मुल्य ह्रास पर व्यंग्य , गरीबी समस्या पर व्यंग्य, आम आदमी की परेशानी विषय के व्यंग्य, जातीय  भेदभाव विषयक गढ़वाली हास्य व्यंग्य; एशियाई लेखक द्वारा सामाजिक  बिडम्बनाओं, पर्यावरण विषयों   पर  गढ़वाली हास्य व्यंग्य, राजनीति में परिवार वाद -वंशवाद   पर गढ़वाली हास्य व्यंग्य; ग्रामीण सिंचाई   विषयक  गढ़वाली हास्य व्यंग्य, विज्ञान की अवहेलना संबंधी गढ़वाली हास्य व्यंग्य  ; ढोंगी धर्म निरपरेक्ष राजनेताओं पर आक्षेप , व्यंग्य , अन्धविश्वास  पर चोट करते गढ़वाली हास्य व्यंग्य    श्रृंखला जारी  ]