Author Topic: Satire on various Social Issues - सामाजिक एवं विकास के मुद्दे और हास्य व्यंग्य (Read 360909 times)

Bhishma Kukreti · « **Reply #800 on:** November 03, 2014, 08:19:49 AM »

हमर बगतमा स्कूल नि जाणो कुछ कारण

इना उना बिटेन ::: भीष्म कुकरेती

आज प्याज गडै च।
आज वैक सुलार भीजि गे ।
आज सरा गां अयेड़ी खिलणो जाणु च।
आज वैक छुट भाई तैं अखळ लग्यां छन।
आज हमन ए सालक पैलि कखड़ी तुड़ण ।
मेरी ब्वेक तब्यत खराब च तो साधू आज अपण ददिम रालु ।
मेरी तब्यत खराब च त हौळ लगाणो बान मि सून तैं भिजणु छौं ।
आज भद्वाक दीदीक खुट पर ढाल हुयुं च तो भद्वान पाणी सारण।
भोळ सौणाक ब्वेक स्वील हूणों चानस च त आज से सौणा स्कूल नि ऐ सकुद।
झगड़ु तैं पल्ली गाँवन अल्लु लाणन अर भोळ एक माण आपकुण (मास्टर जी ) बि भेज द्योलु
फत्तूक ददा आँख नि दिखदन अर आज फत्तूक ददान फत्तू दगड़ जीमण खाणो पल्ली गां जाण ।
आज पली ख्वाळ बरखी च अर म्यार लूथान भौत दिनों से खीर नि खै तो आज वैतैं छुटि चयाणी च।
आज म्यार मौनू स्कूल नि ऐ सकुद। भौत दिन से मीन पळेक नि बिसाइ तो आज गोरमा मौनू जाणु च।
गुन्दरू तबियत खराब च , वैदराज जीन सख्त हिदैत देकि वैमा द्वी चार दिन बेकार का काम नि करैन ।
ब्याळि म्यार घन्तु छुट भुला तैं संबालणो जगा किताब पढ़णु छौ त वैक बुबान थींचि दे तो आज स्कूल नि ऐ सकुद।
हमर बगत माने सन साठ से पैल !

Copyright@ Bhishma Kukreti 3 /11 /2014
*लेख की घटनाएँ , स्थान व नाम काल्पनिक हैं । लेख में कथाएँ , चरित्र , स्थान केवल व्यंग्य रचने हेतु उपयोग किये गए हैं।

CLEAN INDIA , स्वच्छ भारत !

Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language , Mockery in Garhwali Language, Send-up in Garhwali Language, Disdain in Garhwali Language, Hilarity in Garhwali Language, Cheerfulness in Garhwali Language; Garhwali Humor in Garhwali Language from Pauri Garhwal; Himalayan Satire in Garhwali Language from Rudraprayag Garhwal; Uttarakhandi Wit in Garhwali Language from Chamoli Garhwal; North Indian Spoof in Garhwali Language from Tehri Garhwal; , Regional Language Lampoon in Garhwali Language from Uttarkashi Garhwal; Ridicule in Garhwali Language from Bhabhar Garhwal; Mockery in Garhwali Language from Lansdowne Garhwal; Hilarity in Garhwali Language from Kotdwara Garhwal; Cheerfulness in Garhwali Language from Haridwar;

Bhishma Kukreti · « **Reply #801 on:** November 04, 2014, 04:35:35 PM »

हँसुड़ि , हँसिकाएँ ,Jokes

संकलन - भीष्म कुकरेती

हे भगवान !
हे भगवान सब्युं भलो करी।
पण शुरुवात में से हाँ।

हरिद्वार मा त मिलला ही

ज्यूंद रौला त बार बार मिलला
निथर हरिद्वार मा त मिलला

कूड़ माँ जैक भूक
- ये ब्वे ! भूक लगीं च.
-त जा कूड़ों मुंडळ माँ जैक भूक

गाळी
- ये ब्वे मीन गाळि नि खै
-जा बुबा बीच बाट मा हौग आदि। त्यार पड़ददा जी बि गाळि खाला

जनानीक तीन रूप
एक शादी शुदा औरत का जिन्दगी माँ तीन पड़ाव हूंदन
पैल रूप -चन्द्र मुखी
दुसर रूप - सूरज मुखी
तिसर रूप -ज्वाला मुखी

पारस्युं माँ प्रसिद्ध चबोड़
सवाल -दारू पेक मर्युं मनिख तैं क्या बुल्दन ?
जबाब - बेजान दारूवाला
सवाल -पारसी लोग वैश्याक दलालौ कुणि क्या बुल्दन ?
जबाब - नारी कौंट्क्टर
सवाल -पारसी समाज माँ टेस्ट ट्यूब बेबी कुण क्या बुल्दन ?
जबाब - बाटलीबॉय

CLEAN INDIA , स्वच्छ भारत !

Bhishma Kukreti · « **Reply #802 on:** November 05, 2014, 12:44:07 PM »

गढ़वाळि हास्य -व्यंग्यकोष -भाग -28

Garhwali Humorous and Satirical Dictionary part -28

संकलन ::: भीष्म कुकरेती

अन्याय - जै भार तैं हम दुसरौ पीठमा मा डाळि दींदा अर अफु हळका रौंदा

न्याय - जैक व्याख्या दस तरां से ह्वे सकद

इन्स्युरेंस एजेंट - जु अमृत/स्वर्ग जन चीज तैं बि विषैला/नरक बतांद अर डराणम उस्ताद

हत्या करण - वैकेंसी पैदा करण किन्तु वीं वैकेंसी तैं पूरी करणो जुम्मेदारी नि लीण

दयालुता - अनुचित कार्यों भूमिका

मजदूर - मजबूर जु दुसरों कुण धन जुटान्दु या जु दूसरों कुण प्रॉपर्टी/जायजाद जुटान्दु

भूमि - पृथ्वी का भाग जै तैं हम जायजाद बुल्दां

स्वतंत्रता - एक कल्पित बहुमूल्य अधिकार या कीमती जायजाद

जिंदगी -एक आध्यात्मिक अचार जु सरैल सड़ण से रुकद

ताळी -चाबी - सभ्यता विकास का विशेष उपाय

लम्बी आयु - मृत्यु डर लम्बो करणो एक पूजनीय तरीका

व्यंग्य शब्दकोश जारी रहेगा ……।

Bhishma Kukreti 5/11/2014

Garhwali Satire Dictionary, Garhwali Satire Dictionary collected and edited by born in village Jaspur ; Garhwali Satire Dictionary collected and edited by born in Dhangu Patti ; Garhwali Satire Dictionary collected and edited by born in Dwarikhal Block ; Garhwali Satire Dictionary collected and edited by born in Gangasalan Pargana ; Garhwali Satire Dictionary collected and edited by born in Lainsdowne Tehsil ; Garhwali Satire Dictionary collected and edited by born in Pauri Garhwal ; Garhwali Satire Dictionary collected and edited by born in Uttarakhand; Garhwali Satire Dictionary collected and edited by born in Central Himalaya ;Garhwali Satire Dictionary collected and edited by born in North India;Garhwali Satire Dictionary collected and edited by born in South Asia ; Garhwali Satire Dictionary; Garhwali send-up lexicon; Garhwali spoof vocabulary; Garhwali lampoon glossary; Garhwali Satire phrase book; word list; Garhwali Humor, Satire thesaurus;

CLEAN INDIA , स्वच्छ भारत !

Bhishma Kukreti · « **Reply #803 on:** November 06, 2014, 05:59:48 AM »

कुछ हँसौण्या-सिखौण्या कैपणि बोल (कहावतें )

गढ़वाळि हास्य -व्यंग्यकोष -भाग -29

Garhwali Humorous and Satirical Dictionary part -29

संकलन ::: भीष्म कुकरेती

घर आयुं कज्याणिन हरायुं , बौण गयूं बाघन डरायुं।

जु बि घ्वीड़ जिबळ (जाल ) से भागी जावो वु महान घ्वीड़ हि होलु !

तीन दिन बाद माछ अर मेमान से बास (दुर्गन्ध ) आण बिसे जांद !

स्याळो असली यार अळगसि ग्वेर !

बच्चा पैदा करण बच्चा की चिंता करण से सरल हूंद !

धन सब कुछ त नि कौर सकद पर नौन्याळु तैं न्याड़ ध्वार रख सकद !

मि सबि चीजुं प्रतिरोध कौर सकुद बस लालच -ल्हाळसा म्यार बस मा नि आंद !

गन्ना ब्वेली त हाथी मीलल अर मूंगफळी दिखैल त गूणी -बांदर ही आल !

भोळ सबसे व्यस्ततम दिन हूंद !

बंद मुखक भितर माख नि छिरदन !

नाव जबतक किनारो पर बँधीं च सुरक्षित च पर नाव बंधणो थुका बणाइ !

जिंदगी मा कुछ बि निर्धारित नी च किंतु मृत्यु व इन्सुरेंस पर टैक्स अवश्य ही निश्चित च

सबसे म्यारु मोती ढांगु , सौ रुपया कु सींगु

अच्छी चीज वैमा इ आंदन जु प्रतीक्षा करद किंतु समय अर ज्वारभाटा कैक बि प्रतीक्षा नि करदन

सही कारो निथर नि कारो पर यि बि त बुल्यांद बल निछौंद ममा से काणो ममा भलो !

सिखणै क्वी उमर नि हूंदी पर इन बि बुल्दन बल तुम पुरण कुत्ता तैं नै तरकीब नि सिखै सकदा।

तलवार से कलम बड़ी पर दगड़म कैपणी बोल बि च बल बुलण से भलो कर्युं काज /कार्य

क्वी बि खबर नि हो ………....... ………………………………असंभव

सब्युं तैं प्यार कारो , विश्वास ……….......…………………… मि पर ही कारो

ढम मारो …………………………… जब सरसु (खटमल ) समिण दिखे जावु

एक धेला बचैक …………………… ……………………खन्नु हूण ?

वा ही ब्योलि खुस हूंद …………………………………जैं तैं जादा भेंट मिलद

वूं नंग दांतुन नि काटो …………………………………जु गंदा ह्वावन

जख बि धुंवा च …………………………………………तख प्रदूषण च

कलम बड़ी च …………………………………………सुंगरुँ से

सीण (सोना ) तैं ………………………………………भोळ तक नि टाळो

कबि बि धिवड़ (दीमक ) की ताकत ……………………कम नि अंक्याण

जोर जोर से हंसिल्या तो संसार हौंसल पर ………… रोल्या (रोओगे ) त नाक साफ़ करण पोड़द

यदि कुत्ता दगड़ सेल्या तो …………………… तो कुत्ता पर सुबेर तुमर गंध बि आली

मुर्ख उखी दौड़दन …………………… जख पैल मूर्ख दौड़ ह्वावन

आणा -भ्वीणा बोलिक घ्वीड़ -काखड़ नि मारे जांदन !

व्यंग्य शब्दकोश जारी रहेगा ……।

Bhishma Kukreti 6/11/2014

Garhwali Satire Dictionary, Garhwali Satire Dictionary collected and edited by born in village Jaspur ; Garhwali Satire Dictionary collected and edited by born in Dhangu Patti ; Garhwali Satire Dictionary collected and edited by born in Dwarikhal Block ; Garhwali Satire Dictionary collected and edited by born in Gangasalan Pargana ; Garhwali Satire Dictionary collected and edited by born in Lainsdowne Tehsil ; Garhwali Satire Dictionary collected and edited by born in Pauri Garhwal ; Garhwali Satire Dictionary collected and edited by born in Uttarakhand; Garhwali Satire Dictionary collected and edited by born in Central Himalaya ;Garhwali Satire Dictionary collected and edited by born in North India;Garhwali Satire Dictionary collected and edited by born in South Asia ; Garhwali Satire Dictionary; Garhwali send-up lexicon; Garhwali spoof vocabulary; Garhwali lampoon glossary; Garhwali Satire phrase book; word list; Garhwali Humor, Satire thesaurus;

CLEAN INDIA , स्वच्छ भारत !

Bhishma Kukreti · « **Reply #804 on:** November 07, 2014, 07:57:08 AM »

चला ! स्वच्छ भारत अभियानौ कचरा करे जाव !
चबोड़्या - भीष्म कुकरेती

घरवळि - तुम से भलो त वी छौ जु कैबि अभियान से जुड़ जांद छौ।
मि -हैं मे से भलु ? क्या मतबल ?
घरवळि -म्यार त जोग इ इनि छन कि मि अपर घरवळक अभियान देखि नि सकुद !
मि -ह्यां क्या बुलणि छे तू ?
घरवळि -वी जि हूंद त आज मुहल्ला माँ हमर नाम गंदु त नि हूंद।
मि -कैक बात करणि छै ?
म्यार नौनु - पापा ओ देहरादून में नही हैं अभियान अंकल ? कोई भी सरकारी अभियान चलता वे शुरू कर देते हैं।
मि - तो क्या ?
नौनु- अरे उन अंकल की शादी की बातचीत ममी से चली थी।
मि - तो ?
नौनु - उस समय दहेज अान्दोलन छिड़ा था और वो अंकल देहज आंदोलन से जुड़े थे।
मि - त शादी किलै नि ह्वे ?
नौनु - ऊन अंकल ने नाना जी से दहेज में बंगला की मांग कर डाली जिसमे अंकल दहेज विरोधी ऑफिस खोल सकें।
मि - फिर ?
नौनु - फिर क्या ! नाना जी तो तयार हो गए थी पर नानी , ममी और मामा लोग तयार नही हुए।
घरवळि -ह्यां पर हरेक अभियान माँ शामिल तो व अबि बि हूंद। एक तुम छंवां कि हम तैं मुहल्ला मा हिटण बि मुस्किल हुयुं च। इथगा बदनामी झेलणा छंवां हम !
मि -क्यांक बदनामी ?
घरवळि -सरा मुहल्ला वळु कुण प्रधान मंत्री कार्यालय से धन्यवाद चिट्ठी ऐ गे। एक हमि छंवां जौंतैं प्रधानमंत्री कार्यालय से जुगराजि , धन्यवादी , थैंक यु को पत्र नि अयि।
मि -ह्यां पर प्रधान मंत्री कार्यालय से क्यांक धन्यवादी पत्र ?
घरवळि -जौं जौंन सफाई आंदोलन याने स्वच्छ भारत अभियान मा भाग ले सब्युं तैं प्रधान मंत्री कार्यालय से थैंक्स लेटर मील।
मि -पर कैन कैन स्वच्छ भारत अभियान मा भाग ले ?
घरवळि -सि मुहल्ला मा पल्ली ख्वाळक उंड्यानाथ जी नीन ?
मि -हाँ !
घरवळि -ऊँन वैदिन म्युनिस्पैलिटी को कचरा पेटी तैं पैलि रस्ता मा गिराई , फिर वीं गंदगी क फोटो ले , फिर लंका भर का लम्बा लम्बा झाड़ू लेक वे कचरा तैं साफ़ कार अर वांक जम करिक फोटो खैंचवैन।
मि -तो ?
घरवळि -त क्या फिर वुं फोटो तैं स्वच्छ भारत पोर्टल मा डळवै द्याई अर फिर कुछ दिनों मा प्रधानमंत्री कार्यालय से प्रशंसा पत्र ऐ गे। उंड्यानाथ जीक घरवळि अब वै प्रशंसा पत्र सब्युं तैं दिखाणि रौंद।
मि -अच्छा पर उंड्यानाथ जीक गळी मा त कूड़ा अबि बि ऊनि फैल्युं रौंद।
घरवळि -वांसे क्या हूंद। प्रसस्ति पत्र तो मिल गए कि ना ?
मि -अरे इन पत्र से क्या फायदा जाँसे सफाई नि हो।
घरवळि -तुमर ले क्या ! मुहल्ला कि जनान्युं से तो मि तैं भारत लीण पोड़द कि ना ?
मि -क्यांक भारत ?
घरवळि -अरे जरा अच्काल मिसेज फुन्द्यानाथ का झरफर तो द्याखो ! तौळ खुट हि नि धरदी। सरा मुहल्ला मा प्राइम मनिस्टर अप्रिसिएसन लेटर लेकि घुमणि रौंदि।
मि -मिसेज फुन्द्यानाथ तैं प्राइम मिनिस्टर से क्यांक अप्रिसिएसन लेटर मील ?
घरवळि -प्रसस्ति पत्र मिसेज फुन्द्यानाथ तैं ना मिस्टर फुन्द्यानाथ तैं मील।
मि -पर क्यांक प्रसस्ति पत्र ?
घरवळि -सफाई अभियान मा भाग लीणो बान।
मि -फुन्द्यानाथ जी अर सफाई ?
घरवळि -हाँ। वैदिन ऊंन अपण बिल्डिन्गौ समिणक नाळी बंद कराइ अर गंदो पाणि -कचरा तैं रस्ता मा बौगण दे , फिर वांक वीडिओ फोटो लेन। फिर नया नया , चंक बरोबर लम्बा -लम्बा झाड़ू से गंदो पाणि व कचरा साफ़ कार अर वांक बि वीडिओ फिल्म बणाइ अर वा फिल्म स्वच्छ भारत पोर्टल मा डाळ अर फोटो प्रधान मंत्री कार्यालय कुण बि भेजी दिनि बस कुछ दिनों बाद फुन्द्यानाथ जीकुण प्रसस्ति पत्र ऐ गे।
मि -पर फुन्द्यानाथ जीक समिण त आबि बि रस्ता मा नाळीक गंदो पाणी अर कचरा बगणु रौंद।
घरवळि -वांसे कुछ नि हूंद। मिसेज फुन्द्यानाथम प्रसस्ति पत्र त ऐ गे कि ना ?
मि -हाँ पर ?
घरवळि -मि कुछ नि जाणदु तुम मेकुण बि प्रधान मंत्री कार्यालय से प्रसस्ति पत्र लाओ।
मि -कनकै ?
घरवळि - बड़ो सरल तरीका च।
मि -क्या तरीका च ?
घरवळि -तुम पैल रस्ता मा कूड़ा कर्कट कट्ठा कारो , वांक अपण दगड़ वीडिओ फिल्म खैंचवावो , फिर वै कचरा तैं साफ़ कारो अर मोदी जिठा जी कुण ट्वीट कारो , स्वच्छ भारत पोर्टल मा फिल्म डाळो अर प्रधान मंत्री कार्यालय कुण फोटो भयाजो।
मि -यांसे क्या हासिल होलु ?
घरवळि -प्रसस्ति पत्र मीलल।
मि -मैडम ! मि स्वच्छ भारत कु बड़ो प्रशंसक ही ना चाहक भि छौं तो मि ये अभियान की ऐसी तैसी, ये बहुमूल्य अभियानौ कचरा, ये कामौक अभियानौ भतियाभंद ये तरां से नि कौर सकुद , ये अभियान तैं हम सब भारतीयों तैं देव पूजा से बि बढ़कर मानण चयेंद अर सच मा सफाई पर ध्यान दीण चयेंद। मी स्वच्छ भारत अभियान कु आंदोलनकारी छौं पर दिखलौटी आंदोलनकारी नि छौं।

Copyright@ Bhishma Kukreti 7 /11 /2014
*लेख की घटनाएँ , स्थान व नाम काल्पनिक हैं । लेख में कथाएँ , चरित्र , स्थान केवल व्यंग्य रचने हेतु उपयोग किये गए हैं।

Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language , Mockery in Garhwali Language, Send-up in Garhwali Language, Disdain in Garhwali Language, Hilarity in Garhwali Language, Cheerfulness in Garhwali Language; Garhwali Humor in Garhwali Language from Pauri Garhwal; Himalayan Satire in Garhwali Language from Rudraprayag Garhwal; Uttarakhandi Wit in Garhwali Language from Chamoli Garhwal; North Indian Spoof in Garhwali Language from Tehri Garhwal; , Regional Language Lampoon in Garhwali Language from Uttarkashi Garhwal; Ridicule in Garhwali Language from Bhabhar Garhwal; Mockery in Garhwali Language from Lansdowne Garhwal; Hilarity in Garhwali Language from Kotdwara Garhwal; Cheerfulness in Garhwali Language from Haridwar;

CLEAN INDIA , स्वच्छ भारत !

Bhishma Kukreti · « **Reply #805 on:** November 08, 2014, 07:52:10 AM »

फेसबुक्याण , ट्वीटर्याण , वट्सप्याण डराणा छन

हौंस -इ -हौंस मा - भीष्म कुकरेती
पैल जब इंटरनेट आइ तो कुछ दिन तलक मि स्वछंद रौं, बेचिंतित रौं , अलमस्त रौं कि क्या च इंटरनेट ? अरे मीम कम्पनीक फोन च तो मि दुसरौ पीठ मा सत्तु छोळिक अपण पछ्याणक वळु दगड़ लंका -चंका -अमेरिका तक फोकट मा फोन कौर सकुद छौ। मि फोन से गढ़वाळि साहित्यकारों दगड़ वार्तालाप कर सकुद छौ। अपण काम सेक्रेटरी तैं देकि अफु ऑफिस टैम मा यार दगड्यों कुण पोस्ट कार्ड या चिट्ठी लिखुद छौ। पर जब अपण मैनेजमेंट परिवार मा यार दगड्या "I will dispatch you full details though Net " बिंडी बुलण मिसे गेन अर इख तलक कि म्यार चपड़ासी बि बुलण लग गे कि सर मि त अब नेट से हि रैबार भिजदु तो मि डौर ग्यों कि मि इखुली रै ग्यों , मि अकेला पड़ ग्यों अर मेरी शंहसायत पर डाका पड़ गे। मि तैं पर्सनल इंटरनेट प्रयोग का बान कम्प्यूटर सिखण पोड़ निथर मीन यी सब काम सेक्रटरी जोग कर्याँ छया। जनि मीन इंटरनेट मा पांच पास कार मि इना -ऊना जौंमा इंटरनेट नि छौं ऊँँ तैं डराण बैठी ग्यों कि "अरे जब तुमम इंटरनेट नी च तो तुम केक लैक छंवाँ ?" मैनेजर दगड्यों मा त इंटरनेट छौ तो मि गढ़वळि साहित्यकारुं पैथर पोड़ि ग्यों बल अरे ! साहित्यकार ह्वेक बि तुमम इंटरनेट नी च ? साहित्यकार दगड्या पिछ्नै पड़नो डौर से डर गेन। न्यू कम्युनिकेसन टेक्नॉलॉजी याने नई संचार तकनीक से दूरी कम अवश्य हूंद पर न्यू कम्युनिकेसन टेक्नॉलॉजी अकेला पड़नो या पैथर रौणौ डौर अर हीनभावना बि दगड़ मा लांदी।
इना मि इंटरनेट सीखु त ऊना पाराशर गौड़ जीन कनाडा बिटेन फोन करिक चिरड़ाई " अरे भीषम जी ! तुम पौड़ी गढ़वाल ग्रुप का सदस्य नि बण्या क्या ?"
मीन उत्तर दे ," इख मुंबई मा पौड़ी गढ़वाल ग्रुप नी च। इख त पिछत्तर साल पूरणि संस्था गढ़वाल भ्रातृ मंडल च."
पाराशर जीक उलाहना वळु वाक्य छौ ," छि ! मि इंटरनेट कु पौड़ी गढ़वाल ग्रुप की बात करणु छौं। अरे वै ग्रुप मा 700 - 800 सदस्य छन। "
मि नयो वर्चुअल समाज से कटणो डौर से डौर ग्यों अर मि पौड़ी गढ़वाल ग्रुप से जुड़ि ग्यों। अब मि हौरुं तैं डराण मिसे ग्यों कि पौड़ी गढ़वाल ग्रुप से नि जुड़िल्या तो तुम भौत कुछ ख्वे देल्या (You will miss a lot ).
फिर विपिन पंवारौ इंटरनेटी रैबार आयि कि यदि तुम यंग उत्तरांचल से नि जुड़िल्या तो दुनिया ख्वे देल्या (You will miss the whole world ). अर मीन दुनिया तैं कब्जाणो बान यंग उत्तरांचल सब्सक्राइब कार। इनि दसेक उत्तराखंडी ग्रुप कु सदस्य बौण कि मि वर्चुअल सोसाइटी मा इखुलि नि रै जौं।
फिर मैनेजर यार दगड्या मि तैं दंगल्याण मिसे गेन कि यदि मि ऑरकुट मा शामिल नि होलु तो कुज्याण क्या से क्या छूट जालो धौं। मि डौरन ऑरकुट मा भर्ती ह्वे ग्यों।
जयकृत रावत जीक रैबार आयि बल पढ्यां -लिख्याँ linkden से नि जुड़लु तो मेरी क्वी औकात हि नि रालि। औकात बढ़ाणो वास्ता मि Linkden से जुड़ अर अब दगड्यों इंटरनेट रैबार आंद ," please add me on Linkden"।
मि तब मार्केटिंग का लेख लिख्दु छौ अर ऑफ़लाइन मैगजीनों मा प्रकाशित करदो छौ तो मैनेजमेंट सर्कल का दगड्यों मेल आंद छौ ," Don't miss 'Management.com या marketing circle .com आदि आदि "। मि मैनेजमेंट वर्चुअल वर्ल्ड से भैर नि रै जौंक बान पता नी कथगा मि मैनेजमेंट ग्रुपुं मा शामिल हो धौं ! मी मैनेजमेंट वर्ल्ड मा ही रौं अर भैर नि हो का डौर से मी आज रोज एक इंटरनेट मैनेजमेंट ग्रुप से जुड़नु रौंद।
एक दिन डा राजेश्वर उनियाल जीक फोन आई बल ," भीष्म जी ! आपन लिखण बंद करी आल ?"
मीन जबाब दे , "कनो ? क्या आप पौड़ी गढ़वाल , यंग उत्तरांचल ग्रुप की पोस्ट नि पढ़दा ?"
उनियाल जीक जबाब छौ ," हूँ ! आप हमेशा से बूड -खूड -बूढ़ों के साथ रहते हो। आज फेसबुक कु जमाना च। यदि तुम फेसबुक मा नि छंवां तो समझो आप साहित्य मा ज़िंदा हि नि छंवां। "
मि डौर ग्यों कि कखि साहित्य संसार मा मुर्दा घोषित करे जौल त इथगा लिखणो क्या फ़ायदा ? अर मि फेसबुक मा घुस ग्यों। The Fear Of Missing Out (FOMO ) कारण मि फेसबुक मा घुस्यों , The Fear Of Missing Out का कारण मि अनजाना लोगुं तैं दगड्या बणान्द ग्यों अर The Fear Of Missing Out मनोविज्ञान का तहत मि वास्तविक ऑफलाइन का दगड्यों से भौत क्या सदा का वास्ता दूर ह्वे ग्यों।
फेसबुक याने नयो कम्युनिकेसन अस्त्र किन्तु यु अस्त्र बि डरौण्या अस्त्र च अर हम बेबसी मा रोज दगड्या पर दगड्या बणाणा छंवां फिर बि धीत नि भोर्यांदि।
फिर Like , Comments , Share , Engaged की चाह बि फेसबुक मा The Fear Of Missing Out पैदा करद अर हम अपण असलियति स्वभाव का विपरीत फेसबुक मा कुछ बि पोस्ट करण लगदां।
फिर जन नरेंद्र मोदीक ट्वीटर्याण से राहुल गांधी बि पिछड़ उनि मि तैं बि FOMO कु डौर रोज सताणु रौंद । मि नरेंद्र मोदी तैं ट्वीटर पर Follow त करद छौं किन्तु नरेंद्र मोदी च कि मि तैं Follow नि करद। इख तलक कि राहुल गांधी बि मि तैं Follow नि करद। क्वी मि तैं Follow नि करणो डौर से अचकाल मि तैं निंद नि आदि।
अब जौं साहित्यकार दगड्यों या रिश्तेदारों तैं मि इंटरनेट प्रयोग नि करणो वास्ता डरांद छौ वी दोस्त अर फ्रेंड अब वाटसप का वास्ता म्यार फोन या कोड मँगणा रौंदन अर मि फेसबुक मा फेस लुकाणु रौंद।
हर नई कम्युनिकेसन तकनीक The Fear Of Missing Out (FOMO करदि अर या डौर वर्चुअल नी च असली च , सत्य च अर रियल च !

Copyright@ Bhishma Kukreti 8 /11 /2014
*लेख की घटनाएँ , स्थान व नाम काल्पनिक हैं । लेख में कथाएँ , चरित्र , स्थान केवल व्यंग्य रचने हेतु उपयोग किये गए हैं।

Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language , Mockery in Garhwali Language, Send-up in Garhwali Language, Disdain in Garhwali Language, Hilarity in Garhwali Language, Cheerfulness in Garhwali Language; Garhwali Humor in Garhwali Language from Pauri Garhwal; Himalayan Satire in Garhwali Language from Rudraprayag Garhwal; Uttarakhandi Wit in Garhwali Language from Chamoli Garhwal; North Indian Spoof in Garhwali Language from Tehri Garhwal; , Regional Language Lampoon in Garhwali Language from Uttarkashi Garhwal; Ridicule in Garhwali Language from Bhabhar Garhwal; Mockery in Garhwali Language from Lansdowne Garhwal; Hilarity in Garhwali Language from Kotdwara Garhwal; Cheerfulness in Garhwali Language from Haridwar;

CLEAN INDIA , स्वच्छ भारत !

Bhishma Kukreti · « **Reply #806 on:** November 09, 2014, 07:53:29 AM »

फेसबुक मा घुसे घुसेक इ स्वार बणदन !

चबोड़्या , चखन्यौर्या , घपरोळया ::: भीष्म कुकरेती
गढ़वळि मा एक कैपणि बोल (मुवारा ) च बल - घुसे घुसेक स्वार अर धुये -धुयेक ग्वार नि बणदन। बात बि सै च ठाकुर रामपाल सिंग अर पंडित रामप्रसाद जीक कूड़ लग्या-बगी बि ह्वावन अर द्वी दगड़ि एकी बुझीं बीड़ी पर कथगा बि सोड़ मारन , द्वी एकि गिलासड़ि से दारु घटकावन अर द्वी एकि पंडित से एकि चौकल माऊँ , न , म , सि , ढिंग सीखन बि तो बि दुयुंन स्वार नि बण सकण अर द्वी एक हैंकाक रिस्तेदारूं मरण पर मुंडे नि सकदन।
पर फेसबुक मा इन नी च। पौड़ी गढ़वाल ग्रुप का सदस्य हूण से मि भीष्म कुकरेती , खुशाल सिंग रावत अर जय लाल टम्टा एकी थोक का छंवां।
ऑफ़लाइन मा एक संस्था का सदस्य बणन से सदस्य स्वार -भार नि बण सकदन पर फेसबुक मा कौथिग या बुरांश ग्रुप का सदस्य बणो ना कि तुम फेसबुकिया स्वार -भार ह्वे जाँदा। join बटन आप तैं हैंकाक स्वार बणै दींदु।
अपण संसार मा हमर ख़ास दगड्या , दोस्त या फ्रेंड तीन से अधिक नि ह्वे सकदन अर सात से अधिक दगड़्यों नाम हम तै याद नि रै सकुद पर फेसबुक या अन्य सोसल मीडिया मा हमारी कामना हूंद कि एकि दिन मा हम 5000 दगड्या बणै दिवां धौं अर फिर 5000 I फिर 5000 II दगड़्यों की लाइन लगवां ! अपण संसार मा हम सात से अधिक दगड़्यों तैं सहन नि कर सकदां तो फेसबुक मा दगड़्यों भूका -चूका ह्वे जांदवां।
हम अपण संसार मा कबि इन नि बुल्दां कि प्लीज मि तैं अपण गळकंठ्या दगड्या बणाओ। पर फेसबुक मा या अन्य सोसल मीडिया मा हम सीधा प्रार्थना करदवां कि मि तैं कनि करिक बि फ्रेंड बणा दे।
हम अपण संसार मा बगैर जण्या -पछण्या दोस्त नि बणदां किंतु फेसबुक मा पैल फ्रेंड बणदा अर फिर पुछदा कि ये भै तू कै गांवक छे , कै जिला कु छे अर सचमुच मा तू छैं बि छे कि ना ? मी बहुत सा कुकरेत्युं फ्रेंड बौण अर अब रोज कै ना कै कुकरेती फेसबुक्या फ्रेंड तैं पुछणु रौंद कि भाई साहब आप कै गांवक छे। हद त तब हूंद जब मि अपण हि गांवक कै जखमोला , बहुगुणा, नेगी या कुकरेती से जसपुर भ्रातृ मंडल फेसबुक ग्रुप मा जुड़द अर पुछद कि तू कु छे अर पता चलद कि उ फ्रेंड ना म्यर नाती , भाई या काका च तो बड़ी शरम लगद कि यदि मि यूँ बीस सालुं मा गाँव जांदु त अपण गांवक नौनी तैं फेसबुक मा इन नि पुछद कि त्यार बुबा जीक नाम क्या च ?
इंटरनेट मा अजाण तैं हम फ्रेंड बणौदा अर भौं भौं का तिकड़म मि करदा। म्यार अंग्रेजी मा नाम च -Bhishma Kukreti अर कमला , विमला का तरां मि तैं कति छ्वारा -बुड्या जनानी समझदन अर चैटिंग मा कथगा इ इना -ऊना कि छ्वीं लगै दींदन। एक छ्वारा या बुड्यान मि तैं फेसबुक चैट मा पकड़ी दे (हालांकि मि चैट पसंद ही नि करदो ) अर पैल हाउ आर यू आदि से चैट शुरू कार अर फिर पूछ आप इतनी परेशान क्यों रहती हैं ? तो मीन जबाब दे कि शादी से पैल त्यार बुबाक दगड़ प्यार छौ अर वैन धोका दे तो मि तब से परेशान छौं। तब वैक समज मा आइ कि मि मिस ना मिस्टर छौं। वैदिन ही वैन मि तैं फ्रेंडशिप से अनरजिस्टर करी दे।
इनि बहुत सा मजनू मि तैं जनानी समझिक चैट से रिझाणो कोशिस करदन अर जब मि बुल्दु कि ये नर्भागी जरा मेरी प्रोफाइल मा जैक पता त लगा कि मि क्या छौं तो फेसबुक्या फ्लर्टर की नानी बूड़नानि मरि जांदी।
फेसबुक का दगड्या अधिकतर झूठा ही हून्दन। हमर एक ग्रुप च we are kukreti . एक दें ग्रुप ऐडमिनिस्ट्रेटर तैं जोश आई कि जरा दिल्ली मा कुकरेती लघु सम्मेलन करे जाव। फेसबुक मा सबि 200 -250 सदस्योंन हाँ भरी दे कि हम सम्मेलन मा आणो कोशिस करला। जब मीटिंग ह्वे तो कुल मिलमिलैक दस बि नि ऐन। असल मा अपण असली संसार मा हम एक दुसराकी मुखाकी इज्जत करदां तो काम करदां पर इंटरनेट मा हम बेशरम टाइप से व्यवहार करदां।
फेसबुक या सरा इंटरनेट वास्तव मा एक अति सशक्त, तेज , अप्रमित सूचना माध्यम च तो फेसबुक्या फ्रेंड उ काम नि कर सकदन जु हम अपण संसार मा कर सकदवां। मि बीमार होलु तो फेसबुक मा Get well soon का रैबार त सैकड़ों ऐ जाल किन्तु मि तैं दिखणो तो असली संसार का ही दगड्या आला कि ना ? म्यार नौनो ब्यावक सुचना पर वधाई संदेश त ऐ जाल पर ब्यौ नाचणो वास्ता त हाड मांश का दोस्त या रिस्तेदार ही चयेंदन कि ना ?
अपण संसार तो अपण असली संसार च पर हम वर्चुअल संसार तैं बि असली संसार समजिक क्या से क्या करणा रौंदा। झूठ बुलणु छौं क्या माई डियर फ्रेंड ?

Copyright@ Bhishma Kukreti 9 /11 /2014
*लेख की घटनाएँ , स्थान व नाम काल्पनिक हैं । लेख में कथाएँ , चरित्र , स्थान केवल व्यंग्य रचने हेतु उपयोग किये गए हैं।

Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language , Mockery in Garhwali Language, Send-up in Garhwali Language, Disdain in Garhwali Language, Hilarity in Garhwali Language, Cheerfulness in Garhwali Language; Garhwali Humor in Garhwali Language from Pauri Garhwal; Himalayan Satire in Garhwali Language from Rudraprayag Garhwal; Uttarakhandi Wit in Garhwali Language from Chamoli Garhwal; North Indian Spoof in Garhwali Language from Tehri Garhwal; , Regional Language Lampoon in Garhwali Language from Uttarkashi Garhwal; Ridicule in Garhwali Language from Bhabhar Garhwal; Mockery in Garhwali Language from Lansdowne Garhwal; Hilarity in Garhwali Language from Kotdwara Garhwal; Cheerfulness in Garhwali Language from Haridwar;

CLEAN INDIA , स्वच्छ भारत !

Bhishma Kukreti · « **Reply #807 on:** November 10, 2014, 12:29:47 PM »

साहित्यकार गाय तैं दुहने लग जाला त दुधाळ गौड़ी बि बैल गौड़ी बण जालि
चकड़ैत ::: भीष्म कुकरेती

पाराशर जी, जयाड़ा जी !
हे गढ़वळि साहित्यकारों !
सम्नैन , तुमारी देळी भरीं रैन, लोखरौ-दबल (तिजोरी) भर्यां रैन, तंदुरस्ती खूब भली रावो , घरवाळी, नौन्याळ अर नाती नतण्या सुखी रैन !
परासर जी ! तुमन अपणि कविता चौकसी या जगवाळ क बार मा लिखी बल जन की बल अख्बरून मा लंगूर लिख्युं थौ त तुमन गुणीs जगा लंगूर लेखी दे--- कविता मा ।
ये म्यार भूभरड़ो ! भोळ जु अखबार रैबार /खबर मा ल्याख्ल बल "चातक पाणी पी रही थी" , अर कविता मा लिख्ल्या बल अस्वाळस्यूं मा चातक पाणी पीणी छे तो आप त चोळीs जान ल़े लेल्या भै। इनि तुम त पैथर तैं पैथर करी देल्या अर बाद तैं आगे करी देल्या भै !
पौणु तैं तुम मेहमान बणे देला त गढवाळी साहित्य मा मेहमान गद्दी मा बैठ्याँ राला अर हमर अपणा पौण बिचारा घराती जन घरात्युं चिलम भरणा राला . ब्याळि इ अस्वाल्स्युं बटिन रैबार ऐ गे बल अब गूणी सरा अड़गें (क्षेत्र) मा घ्याळ लगाणा छन बल उ तैं लंगूर इ बोले जावू, जु ऊं खुणी गूणी बवालल याइ तैं जयारा जी क पर्वतजन खतम करी द्याला ।
इनि जब यज्ञोपवित जन्द्यौ ल़ीण की जगा लेलु त जन्द्यो त फांस इ खै देलो . . कूल नहर मा बदली जालि त कुज्याण भि कुज्याण गढवाळी साहित्य मा नहरूं मा जल ही जल होलू अर हमारी कूल निर्जला क बरत धरण बिसे जालि . जब हमर कुड़ मकान बणो जला त सैत च इ मकान बगैर छत का इ होला । जब हम लिख्वार अर तुम सरीका साहित्यकार गढवाळी साहित्य मा दुल्हन तै सजैल्या अर डोली मा बैठैल्या त ब्योली बिचारि ड्वाला मा इ रंडे जालि ।
जब गढवाली का प्रबुद्ध साहित्यकार चारपाई मा बैठण लगी जैल्या त गढवाळ अर गढवाळी का खटला सिर्फ मुर्दों ल्हिजाणा काम आला अर फिर मड़घट मा मुडै गढवाळी खटलों तैं मुर्दा दगड चिता मा जळै द्याला। खटला कु स्वाहा ह्व़े जालो अर चारपाई साहित्यौ मकान मा आनन्द से राली ।
जब गढवाली का बुद्धिजीवी साहित्यकार गाय तैं दुहने लग जाला त दुधाळ गौड़ी बि बैल गौड़ी इ ह्व़े जालि । जब गढवाळी साहित्य औ खेतों मा बैल अर बछडे हल और पाटा चलाल त गढवाळी क बल्द अर बौड़ बुचडखाना जोग ही होला की ना अर हौळ , ज्यू , नाड़ , निसडु
सब जळ जाला।
जब गढ़वाली साहित्यकार उत्तरप्रदेश या उत्तराखंड सरकार का बुल्युं मानिक घोड़ाखाळ तैं घोड़ाखाल , रीठाखाळ तैं रीठाखाल अर छाळु पाणि तैं छालु पानी लिखण मिसे जाल तो साहित्यिक कूड़ कु छालु ?
ठीक च गढवळि साहित्य कु भंडार भरण चयेंद पर कौश्यला जन पुराणा शब्दों जगा कैकेयी जन नया श्ब्दुं तैं महत्ता दीण ठीक च ?
मरखुड्या बल्द तैं तुम बिजनौर जोग करिक मरखना बैल से गढ़वळि साहित्यिक सारी बाण लग जैल्या तो पहाड़ी बल्दुं नसल ही निबट जाली , कबि स्वाच च तुमन साहित्यकारों ?
तड़क्वणि तैं तुम मूसलाधार बर्षा बतैक गढ़वळि साहित्य मा गढ़वळि शब्दुं को सूखा किलै पैदा करणा छंवां भै ?
भौत साल पैल जब हमर हथ खुट मुड़दा छा तो हम बुल्दा छ घुंग्यस्यों (घुंग्यासि से बण्युं शब्द ) पर हमर साहित्यकारोंन जब से अपण कपाळ पर हिंदी की बिंदी क्या लगाई हम घुंग्यासु , घुंग्यासो , घुंग्यासि शब्द या घुंजकूड़, घुंजबैठण , घुंजेण शब्दों से परेज इ नि करणा छंवां बल्कण मा हमन इ शब्द आर्कियोलॉजी म्यूजियम मा धौर देन।
अब हमर गढ़वळि साहित्यकार मधुमखियों का समूह से प्रेम करदन अर म्यारुं घाण से बितकदन अर वांपर कुतर्क कि हम गढ़वळि शब्द भंडार भरणा छंवां।
अब गढ़वळि कवितौं मा बाघ गरजता है अर पता नि कै जंगळ मा बाग़ घिमकणि मार्दू धौं !
अजकाल साहित्य मा गिताड़ गजेन्द्र राणा उत्तेजित करदो पैल बादी इन गीतूं से चचकौंद छौ।
पैल अनपढो पर चरक -फरक रौंदी छे किंतु अब गढ़वाली साहित्यकार चतुराई दिखाँदन
गढ़वळि शब्द भण्डार भरणो यु अर्थ त नी च कि पुराणा शब्दों क़त्ल कारो, ऊँ तैं बिसर जावो अर ऊँक जगा नया शब्द लाओ ?

Copyright@ Bhishma Kukreti 2011
Happy Clean India!

Bhishma Kukreti · « **Reply #808 on:** November 11, 2014, 07:52:19 AM »

खत खत हौंस बि आंद, ठट्टा लगाणो ज्यू बि बुल्यांद अर रुण बि आंद

चबोड़्या , चखन्यौर्या , घपरोळया ::: भीष्म कुकरेती

अज्काल राजनैतिक थौळुम , गलियारों मा , प्रदेशुं राजधानियुं मा जु बि हूणु च वांपर मुल मुल मुस्कराट बि आंद , खत खत जोरकी हंसी बि आंद अर ज्यू खट्टू बि हूंद। अब जब इनमा रुणो , ऐड़ाट -भुभ्याट अर हंसणो अलावा क्वी विकल्प नि बच्युं ह्वाऊ तो हंसण इ बेहतर च।
अब द्याखो ना नरेंद्र मोदीक स्वच्छ भारत अभियान से आसा बंधदि , ऊर्जा संचार हूंद पर सरा उत्साह तब भेळ जोग ह्वे जांद जब हम इस्लामिक सेंटर मा भाजपा का सतीश उपाध्याय का सफाई अभियान का स्वांग दिखदा।
स्वच्छ भारत अभियान भारत की जरूरत च, हरेक भारतीय का वास्ता जरूरी च पर भाजपा मा ही रानी वसुंधरा राजे सिंधिया या भाजपा विरोध्युं कुण यु अभियान एक राजनैतिक चाल च। मि बुल्दु स्वच्छ भारत अभियान एक राजनैतिक चाल किलै नि हो , एक राजनैतिक छल -कपट ही किलै नि हो हम तैं ये पाप करण मा पुण्य अर आयुर्वृद्धि हि मिलण तो इन पाप करण मा क्वी गुनाह नी च।
जम्मू -कश्मीर अर झारखंड मा चुनाव हूणों कारण भाजपा , कुछ द्वि चार पार्टयूं मा जोश च , उत्साह च पर पता नि राहुल गांधी अणमण सि उदास किलै छन धौं ।
कुछ दिन पैल आम आदमी पार्टी का बड़ा आम आदमी याने अरविन्द केजरीवाल सुबेर , श्याम अर सोसल मीडिया मा दिन रात किरांद छौ बल दिल्ली विधान सभा भंग कारो , चुनाव करवावो अर अब बैनर लगाणा छन कि मोदी जी केंद्र मा पीएम अर मि दिल्ली मा सीएम ।
कॉंग्रेसी कंटर बजाणा छया , ढोल बजाणा छया , जंघड़ बजाणा छया बल राहुल गांधी का कुशल , सशक्त , दूरदर्शी नेतृत्व का कारण राजस्थान , गुजरात मा कॉंग्रेस मध्यविधि चुनाव जीत अर अब बुलणा छन बल कॉंग्रेस क्षेत्रीय नेताऊँ कमजोरी , संगठनात्मक कमजोरी अर नरेंद्र मोदीक झूठा आश्वासनुं कारण महाराष्ट्र अर हरियाणा चुनाव हार।
कुछ दिन पैल परिवारवादी , जातिवादी, कर्सिवादी याने नामौक , बुलणोक , सुदि -सुद्याक समाजवादी मिलेन कि मोदी तैं हटाणो बान एक हूण जरूरी च। अब कुछ दिन बाद यूंन शिव सेना का उद्धव ठाकरे तैं बि न्योता दीण कि आओ मोदी तैं हटैक भारत बचाये जावु ! कै तैं बि भारत कि चिंता नी च असलम परिवार की चिंता सब्युं तैं च।

प्रकाश सिंग बादल खुस छन कि ब्वारी याने हरसिमरत कौर बादल अबि बि केंद्रीय मंत्रिमंडल मा च , भाजपा का यशवंत सिन्हा खुश छन कि नौनु मंत्री बण गे पर भूतपूर्व मुख्यमंत्री धुमाल अर वर्तमान मुख्यमंत्री वसुंधरा राजे रूणा छन कि हमारा सुपुत्रों तैं गद्दी नि मील !
जब बि मनमोहन सिंग जी मंत्रिमंडल विस्तार करांदा छा तो भाजपा का लोग भगार , लांछन , अभियोग लगांदा छा कि मंत्रिमंडल मा दागी मंत्री छन अर अब जब जनता भाजपा से पुछणी च कि गिरिराज सिंह , राम शंकर कठेरिया , वाई येस चौधरी तैं मंत्री किलै बणाइ ? तो कुतर्की दिवता अरुण जेटली जनता तैं टेक्निकल बात समझाणो कोशिस करणा छन कि हमर लोगुं पर लग्युं अपराध नि हूंद पर यो ही अपराध कॉंग्रेस्यूं अर हौरि पार्ट्युं वास्ता पापी अपराध च। जेटली जी ! जनता सब जानती है कि अपराध क्या होता है।
टेहरी रानी , खंडूरी , निशंक , कोशियारी दुःख बर्दास्त करणा छन, दिल बौगाणा छन अपण चमचों तैं तस्सली दीणा छन बल मि केंद्रीय मंत्री नि बौण साक पर खुस छन , आनंदित छन , प्रसन्न छन बल अजय टमटा बि केंद्रीय मंत्री नि बौण। राजनीति मा नेता अपण दिवाल गिरण से दुखी नि हून्दन पर दुसरौ कमर टुटण से पुळयांद छन , खुस हून्दन , वैक ठट्टा लगांदन। हाँ ! बिचारा सतपाल महाराज जी पर क्या बितणि होलि कि जब बगैर कुर्सी को ही रौण छौ तो कॉंग्रेस बुरी क्या छे ?

Copyright@ Bhishma Kukreti 11 /11 /2014
*लेख की घटनाएँ , स्थान व नाम काल्पनिक हैं । लेख में कथाएँ , चरित्र , स्थान केवल व्यंग्य रचने हेतु उपयोग किये गए हैं।

Garhwali Humor in Garhwali Language, Himalayan Satire in Garhwali Language , Uttarakhandi Wit in Garhwali Language , North Indian Spoof in Garhwali Language , Regional Language Lampoon in Garhwali Language , Ridicule in Garhwali Language , Mockery in Garhwali Language, Send-up in Garhwali Language, Disdain in Garhwali Language, Hilarity in Garhwali Language, Cheerfulness in Garhwali Language; Garhwali Humor in Garhwali Language from Pauri Garhwal; Himalayan Satire in Garhwali Language from Rudraprayag Garhwal; Uttarakhandi Wit in Garhwali Language from Chamoli Garhwal; North Indian Spoof in Garhwali Language from Tehri Garhwal; , Regional Language Lampoon in Garhwali Language from Uttarkashi Garhwal; Ridicule in Garhwali Language from Bhabhar Garhwal; Mockery in Garhwali Language from Lansdowne Garhwal; Hilarity in Garhwali Language from Kotdwara Garhwal; Cheerfulness in Garhwali Language from Haridwar;

CLEAN INDIA , स्वच्छ भारत !

Bhishma Kukreti · « **Reply #809 on:** November 12, 2014, 06:21:02 AM »

भू.पू. स्वास्थ्य मंत्री डा हर्षवर्धन कु हुक्का पाणि बंद किलै ह्वे ?

घपरोळया ::: भीष्म कुकरेती
नरेंद्र मोदीक मंत्री मंडल विस्तार (10/11/2014) मा स्वास्थ्य मंत्री हर्षवर्धन कु डिमोसन करवै गे , पदावनति करे गे , हर्षवर्धन का फंकर काटे गेन। उन त "अच्छे दिन" का समर्थक , सपोर्टर्स अर ठेकेदार बुल्दन बल नरेंद्र मोदी सद्यनि कुशल , प्रभावकारी अर मानव प्रेमी मंत्री अर संत्र्युं तैं प्रमोट करदन। किंतु जब "अच्छे दिन आला " का समर्थकों से पूछे गए बल कुशल , प्रभावकारी अर मानवप्रेमी हर्षबर्धन कु डिमोसन किलै ह्वै तो इ लज्जाहीन समर्थक बेशरमी से जबाब दीणा छा कि यु त प्रधानमंत्री को अधिकार च।
अखबार अर मीडिया का भीतरी सूत्र बताणा छया कि चूँकि दिल्ली का चुनाव अग्वाड़ी छन अर शायद डा हर्षवर्धन तैं मुख्यमंत्री बणये जाव तो डा साब तैं स्वास्थ्य जन महत्वपूर्ण महकमा से हटैक बेकारौ विभाग विज्ञानं अर तकनीक मा धुळे , चुलये , फिंके गे बल।
कुछ अखबारों , मीडिया तैं सूत्र बताणा छन कि चूँकि हर्षवर्धन कु काम प्रभावकारी नि छौ च तो इफेक्टिव मैनेजमंट का धड्वै, प्रभावकारी प्रबंधन का प्रबल समर्थक , घ्वाड़ा तैं घ्वाड़ा अर गधा तैं गधा बुलण वाळ नरेंद्र मोदीन हर्षवर्धन की पदोवनती कार। ऊँ तैं , मि तैं अर तुम तैं विश्वास नी च कि हर्षवर्धन नाकामयाबी से हर्षवर्धन की पदोवनती से कुछ लीण दीण च।
कुछ पत्रकारुं सोर्स , म्यार सूत्र अर ख़ास तुम्हारी छठी इंद्री बताणी च कि डा हर्षवर्धन की पदोवनती पैथर कुछ हौरि राज च। सत्ता का गलियारुं , पावर कोरिडोरुं , कन्स्टीट्यूसन क्लब मा त कानाफूसी हूणि च बल चूँकि डा हर्षवर्धन भारत से हुक्का -सजला -तमाखु तैं अरब सागर जोग करणै फिराक मा छया तो शैतान का मुंहलगा टोबेको लॉबीन डा हर्षवर्धनौ हुक्का पाणि ही बंद करै दे।
जी हाँ असलियत या च की टोबेको लॉबी तैं डा हर्षवर्धन की स्वस्थ्य संबंधी सोच पसंद नि आई तो डा हर्षवर्धन तैं ऊंकी जगा बताये गए।
डा हर्षवर्धन तैं पता छौ , ज्ञान छौ अर ऊंमा रिकॉर्ड छौ कि भारत माँ तमाखु सेवन से 10 लाख से अधिक लोग मोरदन अर 50 लाख लोग आर्थिक , सामाजिक, सोसल रूप कमजोर हूंदन।
डा हर्षवर्धन तैं जाणदा छा , पछ्याणदा छा अर ऊँ तैं पक्को विश्वास बि छौ कि भारत मा ही ना सरा दुन्या मा चरस -गांजा सेवन से उथगा लोग नि मरदन जथगा तमाखु सेवन से मरदन।
सूत्र बतांदन कि डा हर्षवर्धन भारत से सन 2020 तक तमाखु सेवन निर्मूलन की योजना पर काम करणा छया। डा हर्षवर्धन भारत मा तम्बाकू पीणो वास्ता तम्बाकू की खेती पर एकदम रोक लगाणो फिराक मा छया। डा हर्षवर्धन की दिल्ली इच्छा छे कि साल चार साल मा भारत मा बीड़ी -सिगरेट निर्माण बंद ह्वे जाव अर फिर सिगरेट आयत बि बिलकुल बंद ह्वे जाव।
असल मा डा हर्षवर्धन भारत तैं टोबेको फ्री करणै फिराक मा छया।
किन्तु दस्यु वर्ग , रागस वर्, शैतान का बेटा याने सिगरेट लॉबीन हर्षवर्धन तैं इन पछाड़ कि भारतवासी सुचणा छन कि डा हर्षवर्धन नकज्जा मंत्री छया। शैतान की औलाद सिगरेट लॉबी मनुष्यों कत्लेआम करणो वास्ता अपण दुस्मनो इज्जत पर हमला करद , मानव भक्षी शैतान की औलाद सिगरेट लॉबी मानव जाती तैं खतम करणो वास्ता अपण विरोध्युं मान सम्मान पर खुले आम आक्रमण करद अर मृत्यु पुजारी शैतान की औलाद सिगरेट लॉबी अंदादुंद पैसा कमाणो वास्ता अपण गैरसमर्थकों की पदावनति करांद।
शैतान की औलाद सिगरेट लॉबी सभी राजनीतिक पार्टयूं तैं चंदा दींदी तो सरकारी दल हो या विरोधी दल हो यी सभी मानव हत्यारा शैतान का बेटा याने सिगरेट लॉबी का गुलाम हुंदन अर तभी तो कॉंग्रेस , समाजवादी पार्टी , बसपा , तृणमूल कॉग्रेस , एडीमके , डीएमके , बीजेडी , अकाली , एनसीपी कै बि पार्टिन भाजपा या नरेंद्र मोदी से यु सवाल नि कार कि डा हर्षवर्धन तैं स्वास्थ्य मंत्रालय से किलै हटाये गे। प्रधान मंत्री को अधिकार अवश्य च कि वो अपण मंत्री नियुक्त कारो किंतु प्रधान मंत्री तो प्रधान सेवक च तो वै प्रधान मंत्री तैं सब्युं तैं पुछण चयांद कि आपका मंत्रिमंडल गठन माँ यमराज का भाई शैतान की औलाद टोबेको लॉबी कथगा हाथ च ?
शैतान का बेटा याने टोबेको लॉबी भौत ही खतरनाक हूंद वैक विरोध क्वी बि डा हर्षवर्धन कारल तो वैकि बेज्जती खुले आम करे जांद कि भविष्य मा क्वी बि स्वास्थ्य मंत्री शैतान की औलाद का विरोध की ना सोचे।
शैतान अपण शैतानियत भौत ढंग से निभांद अर वैक शैतानी कारनामा एक च कि जु बि मंत्री शैतान का विरुद्ध हो ना कि वै मंत्री तैं संत्री बणाये जाव।
शैतान की औलाद सिगरेट लॉबी इथगा कुकर्मी , बदजात , हत्यारा च कि या लॉबी मृत्यु कारक सिगरेट तैं मृत्यदायक पदार्थ घोषित नि हूण दींद। डा हर्षवर्धन भौत जल्दी एक नियम लाणा छया जै नियम का तहत सिगरेट का डब्बों पर 75 % जगा मा घोषित होलु कि सिगरेट यमराज च , तम्बाकू यमराज च अर सिगरेट स्मोकिंग ही मृत्यु दायक च यमराज च। पर शैतान की औलाद सिगरेट लौबिन डा हर्षवर्धन ट्रांसफर ही नि करायी अपितु डिमोसन करायी जाँसे जगत प्रकाश नड्डा सिगरेट स्मोकिंग तैं यमराज नि ब्वालो अपितु तम्बाकू सेवन तैं जीवन घुट्टी माने जाव।
हिंदुओं तैं बिंगण चयेंद कि गौ हत्या पाप नी च बल्कि असली पाप तो तम्बाकू पीण च , मुसलमानो तैं बि मनण चयेंद यदि सुवर भक्षण हराम तो तम्बाकू पीण वांसे बि अधिक हराम च। किन्तु ना तो मुसलमान ना ही हिन्दू यूँ बातों तैं मानल किलैकि यूँ पर बि शैतान की औलाद कु भूत लग्युं च।
कख डा हर्षवर्धन भारत से हुक्का /तम्बाकू सेवन बंद करणो फिराक मा छया अर कख शैतानी खेल का वजह से बिचारा हर्षवर्धन अब डिमोसन का दंस झेलणा छन।
क्या आपकी छठी इंद्री नि बताणी कि शैतान की औलाद टोबेको लॉबी कथगा शक्तिशाली च जु नरेंद्र मोदी का बि हाथ मरोड़ण माँ सक्षम च।

Copyright@ Bhishma Kukreti 12 /11 /2014

CLEAN INDIA , स्वच्छ भारत !

MeraPahad Community Of Uttarakhand Lovers

News:

Author Topic: Satire on various Social Issues - सामाजिक एवं विकास के मुद्दे और हास्य व्यंग्य (Read 360909 times)

Bhishma Kukreti

Re: Satire on various Social Issues - सामाजिक एवं विकास के मुद्दे और हास्य व्यंग्य

Bhishma Kukreti

Re: Satire on various Social Issues - सामाजिक एवं विकास के मुद्दे और हास्य व्यंग्य

Bhishma Kukreti

Re: Satire on various Social Issues - सामाजिक एवं विकास के मुद्दे और हास्य व्यंग्य

Bhishma Kukreti

Re: Satire on various Social Issues - सामाजिक एवं विकास के मुद्दे और हास्य व्यंग्य

Bhishma Kukreti

Re: Satire on various Social Issues - सामाजिक एवं विकास के मुद्दे और हास्य व्यंग्य

Bhishma Kukreti

Re: Satire on various Social Issues - सामाजिक एवं विकास के मुद्दे और हास्य व्यंग्य

Bhishma Kukreti

Re: Satire on various Social Issues - सामाजिक एवं विकास के मुद्दे और हास्य व्यंग्य

Bhishma Kukreti

Re: Satire on various Social Issues - सामाजिक एवं विकास के मुद्दे और हास्य व्यंग्य

Bhishma Kukreti

Re: Satire on various Social Issues - सामाजिक एवं विकास के मुद्दे और हास्य व्यंग्य

Bhishma Kukreti

Re: Satire on various Social Issues - सामाजिक एवं विकास के मुद्दे और हास्य व्यंग्य