MeraPahad Community Of Uttarakhand Lovers

गढ़वळि ग़ज़ल – 1

चंद्रमोहन ज्योति
-
Love Rapture based Garhwali Ghazal
-
By Chandramohan Jyoti

**************
धुंधळी सी रै होली जु कुछ तस्वीर
अब वु आँख्यूं म छप्प छप्यां छन
कुंगळी सी रै होली जु कबि माया
अब लगुला बणी मैमु लिस्यां छन
जु गैणा रै होला कबि तेरी जग्वाळ
टूटि कै मेरी खुचिली म खत्यां छन
तै फूंदा फर रै होला जु फूल टुम्यां
वो बसंत बणी मेरा घौर अयां छन
(बसंत पंचमी कि एक दौ फेरि बधै)
Copyright@ Chandramohan Jyoti

दिल्ली

A Kumaoni /Garhwali Poem about Delhi
by Ramesh Hitaishi
कुमाउनी/गढ़वळि कवि: रमेश हितैषी

-
दिल्ली!
धन रे दिल्ली तेरी पराणी,
सबुलै तेरी पीड़ पछ्याणी।
अपण घरकि नि जाणी कहाणी,
भ्यार अपणी जै जै कराणी।
अपडु कें घर भूकै छोड़ि यानी,
दिल्ली में ऐ भंडारा बांटनी।
कैकी हैरै घर जणे सियाणी,
कैल छोड़ि ह्यै जन्म भूमि अपणी।
आपण गुठ्यार कि दीवाल नि चीणी,
दिल्ली में सब बल भलिक बसाणी।
अपण घर जैल समाइ नि जाणी,
भ्यार कर में पंच परवाणी।
अपण चै धारु धार डोई जै,
दिल्ली अपणी भलिक बसाणी।
सर्वाधिकार@सुरक्षित

तू भी उड़ी जा अब यख कैन नि औंणु।
-
  पलायन दुःख दर्शाती  गढ़वाली कविता
कवि -राजेंद्र सिंह पंवार
-
Garhwali poem illustrating pain of Migration
Poem by Rajendra Singh Panwar
-
फुर्र उड़ी जा तू भी घुघति कि अब यू मुल्क ह्वेगी बिराणु।
अब नि रैनि उ मनखी मायालु…..ओ ओ ओ हो हो.
अब नि रैनि उ मनखी मायालु, ना- रैगे वा मन्ख्यात,
अब नि विरेन्दा उ थौला मेला, न रीति रिवाजु की बात।।
खुश खबर भी हरची अब त.......
खुश खबर भी हरची अब त प्रदेश्यों कु औणु जाणु।
फुर्र उड़ी जा तू भी घुघति कि अब यू मुल्क ह्वेगी बिराणु।
जैली कभी त उमा लगै दे.....ओ ओ ओ हो हो.
जैली कभी त उमा लगै दे, में.रा पहाड़ की गाणी,
जन्द्री घट भी हर्चि ग्याई, मगरा गदनो कु पाणी।
गंगाजी एक सारू रईं छै.........
गंगा जी एक सारू रईं छै वीं भी डॉम सुखाणु।
फुर्र उड़ी जा तू भी घुघति कि अब यू मुल्क ह्वेगी बिराणु।
बांजी पड़ीन डोखरी-पुंगडी.....ओ ओ ओ हो हो.
बांजी पड़ीन डोखरी-पुंगडी सुन्न चौक गुठ्यार,
अब नि सुंणेदी गोरु घण्डुलि बालौं की किलकार
उसगरा भरदी रैगी पहाड़.........
उसगरा भरदी रैगी पहाड़ यखुली यखुली कंणाणु।
फुर्र उड़ी जा तू भी घुघति कि अब यू मुल्क ह्वेगी बिराणु।
अब नि होणी फेर कभी यख.....ओ ओ ओ हो हो.
अब नि होणी फेर कभी यख रामी तीलू सी नारी
कभी जल्म्णयां बीर भड़ क्वी जन माधो भण्डारी
सच ह्वे तेरु अस्गार उदीना...........
सच ह्वे तेरु अस्गार उदीना,सैरा पाड़ तैं ह्वे पछताणु।
फुर्र उड़ी जा तू भी घुघति कि अब यू मुल्क ह्वेगी बिराणु।
©RSPanwar20200104

निरभै बुढ़ापा'

(गढ़वाली  कविता )

कवि-धर्मेंद्र नेगी
-
A Garhwali Pathos rapture Poem on Old Age

By Dharmendra Negi
-
मुंड -मुंडारू, पुटग पिड़ा, द्वी हैड़ चसगणा छन
कन्दूड़ बुजेगैनि पट,आँख्यूंम जैंगण रिंगणा छन
कबि उन्द, कबि उब्ब, करक-करास-झिलसिणि
दवै काम नि करणी, फल-फरूट नि पचणा छन
खुरा-खाँसी दिन-रात, बळगम कतैऽ छड़ेन्दो नी
सैरि रात उठा-पोड़, आंखा निन्द जग्वळणा छन
डौंणा छन तंगत्याणा, उकाळ -उंदार हिटण मा
गैत जबाब देणी, हाथ -खुटा त जन गळणा छन
दिन-रात ख्यप-ख्यप,हर घड़ि रैन्द हणांट-कड़ांट
ध्वार-धर्म नि आन्दो क्वी, सब्बि दूर भजणा छन
सित्त-पित्त,सितगरमी,बरमंड चटाग मरणूं 'धरम'
जीरण ह्वेगे शरैल अब जाणा लछण लगणा छन
सर्वाधिकार सुरक्षित -:
धर्मेन्द्र नेगी
चुराणी, रिखणीखाळ
पौड़ी गढ़वाळ

केरि से ऐथर बढ़णूं किलै छै

(गढ़वाली कविता)

कवि-धर्मेंद्र नेगी
Inspiring Garhwali Poem
By Dharmendra Negi
-

केरि से ऐथर बढ़णूं किलै छै
बढ़िगे त फिर डरणूं किलै छै
सुऽदि तु जैऽ कैऽ का दगड़ि
बिन बातै छेड़ि करणूं किलै छै
होन्द - खान्द देखी अपणौं तैं
छुचाकरा तू जलणूं किलै छै
चकड़ेत दुन्या तैं छन ठगौणा
तु अफुथैं अफी ठगणूं किलै छै
ठंडि रख तु ख्वपड़ि तैं अपणि
तवा सि तम्मऽ तचणूं किलै छै
खतेण देऽ येतैं रोकी नि रख
जिकुड़ी उमाळ थमणूं किलै छै
कैकि छ हिकमत जु त्वे हरैद्यो
अफु से अफी तु हरणूं किलै छै
पैलि त बचन देण नि छौ तिन
दे यालि त अब नटणूं किलै छै
हिकमत कैर तु डौर न 'धरम'
जिम्मेदार्यूं से भजणूं किलै छै
सर्वाधिकार सुरक्षित-:

धर्मेन्द्र नेगी
चुराणी, रिखणीखाळ
पौड़ी गढ़वाळ