Kumauni & Garhwali Poems by Various Poet-कुमाऊंनी-गढ़वाली कविताएं

[एम.एस. मेहता /M S Mehta 9910532720]

बौळ्या आंखि"
**************

उणिंदि आंख्यूं मा मेरि,
निंदि की झपाग तेरि ।
निंद पिरोळ जांद मेरि,
सुपिन्यों की लपाग तेरि ॥

आंख्यूं-आंख्यूं मा छुंयाळ,
छुवीं लगाला तेरि मेरि ।
गल्वड़ि तरकण्यां कै जालि,
आंसु की छपाग तेरि ॥

हैंस्दा-ख्यळ्दा दगड़ा-दगड़ि,
कभि रुसाणु कभि हैंसाणु ।
अभितलक याद आंद वो,
हथग्वळ्यूं की थपाग तेरि ॥

निंदिम घर्री हुयीं आंखि,
बिसौण बैठि जांद जग्वाळम ।
सर्र बुजेन्दि जनि आंखि,
अंग्वाळ घळ्द जपाग तेरि ॥

बिसिरि भि जादि घड़ेक,
'पयाश' आंखि नि उगाड़ि ।
जनि आंखा खोलि द्याख,
आंखि मारगीं दपाग तेरि ॥

@पयाश पोखड़ा ॥

[एम.एस. मेहता /M S Mehta 9910532720]

******#छवीं....=11.
"तुमुल भि सूण"
ब्वाला भै बंदौं तुमुल भि सूण...
शहीदुं की ल्वै ब्वगैकि
बणि छै जो स्वाणी स्यूंद
राज्य जखा तखि हजि भि
कागजों मा विकास लेख्णा
धरातल मा नि सर्कि स्यूँण
ई हुयुंच सब्यूँ क रुण
ब्वाला भै बंदौं तुमुल भि सूण...
गौं का गौं खाली ह्वैगी
पलायन कैरि की
मजबूरि कू ठिकणा बूण
अधीति कू
ट्वप्ला बदिल्खै कुछ नि हूंण
मुंड नवैकी हथ जोडि कि
अटगणा छी छ्वाड कूण
ब्वाला भै बदौं तुमुल भी सूण...
उनि मलस्णा छी कपैलि थै
जन वर्षों बटि सूण
अब त म्यारा मुल्क
भि
सट्टियूँ मा रल्यैगि घूँण
ब्वाला भै बंदौं तुमुल भी सूण..
प्रजातंत्र की धाद लैग्या
न्येतौं की अईंच बसगल्या
ब्वगण
लल्तजीभ कू लालीपोप
देकि अच्छन्याट पल्याणा
मन्ख्यों कि सजणीं च मूण
भोल फिर
झणि कुजणि
क्या हूण
ब्वाला भै बंदौं तुमुल भी सूण....
जौंन पैंया जन बथैं अफ्थै
वो भी निक्ल्यीं जन
डाली तूण
अब त खीरी मा रल्यैगी
लूण
गैरसैंण कुसज बथाणा
अफ
सज लिन्दीई यो देरादूण
ब्वाला भै बदौं तुमुल भी सूण........
@

[एम.एस. मेहता /M S Mehta 9910532720]

******#छवीं...=10. -------------------------------------------------------------
***नै साल भि स्वीं स्वां आई ..................
खाणा खराब ड्यूटी बेहिसाब कूई न्यौ ना निसाब
या शिकैत चौतर्फें ओपन ह्वैग्याई
तेजप्रताप बीएसएफ कू ज्वान सोशल मिडिया मा
सत्तर साल पुरणि बिमरि क
दवै खुज्याणु छाई
इन साहसी कदम उठाणा कू मकसद
गालगाल तक पाणि बथाई
जत्गा मुख उत्गै बात
कूई समर्थन दिणू छौ कूई वैथे
उदंड पागल बताणा छाई
गृहमंत्री भि संज्ञान लेकि जाँच कर्वाणा छाई लेकिन हासिल कुछ नि ह्वाई
नै साल भि....................................
सीआईएसएफ बटि अमित ज्वान भि
बगावति तेवर दिखाणु छाई
अपिडि शिकैत मा फौजियों की सुविधा वोलि हक की बात उठाई
सैनिक सैनिकों मा सुविधों कि
खाई कू अन्तर थै असिली मुद्दा बणाई
तबरि फिल्म जगत कू ओमपुरी नौं कू
सितारा दुन्या से रुखसत ह्वैग्याई
नै साल भि...........................................
अचणचक गाँधी कू चर्खा फरि मोदी की
छवि से बवंडर उठग्याई
काँग्रेसीयों टाँग्रेसीयों थै नोटबंदी क बाद
मोदी थै घेरणा कू बडु मुद्दा मिलग्याई
ढाँगा म जन गरुड पोडदि तनि सर्या विपक्ष
मोदी क पैथर पोडिग्याई
बल तिल गाँधी की चर्खा वोलि पोज मा
किलै अपिडि फोटू खैंचाई
गाँधी इन हर्च्युं छौ फोट बटि जन
नवंबर 2016 बटि हजार कु नोट गायब ह्वैग्याई
पूना वनडे केदार कोहली ल इंग्लैंड फरि विजयी बढत दिलाई
नै साल भि ...........................................
चुनौ आयोगल सपा की सैकिल चिन्ह अखिलेश थै थमाई
या सेटिंग आपस मा बडी जबरदस्त
हिट ह्वाई सैकिल का पुटुग सर्या कुटुम समाई
पब्लिसिटि खुणि घपरोल कैरिक लोग थै समाजवाद कू भलु अंग्वठा दिखाई
27साल यूपी बेहाल कू नारा काँग्रेसल भि खूब सुणाई
आपस कू गठजोड कू मुद्दा आँकडों मा फँसग्याई अभि देख्दै रावा खबरसार अभि सपा कू भैंसु नि पिज्याई
नै साल भि स्वीं स्वां आई..............................
उत्तराखंड मा बीजेपी की 64सीटों खुणि यो कना टिकट बटेंई
जो सेवा कनु छो पार्टी की वो पैलि छटेंई
आर्य अर तिवडी जी ल भि कमलदल मंडल मा डूबकी लगाई
छलबलि नारैण ल बुढैंद दौ कि कन स्याणी दिखाई
पौंछिगि नब्बे का पार पर हजि भि धीत नि भ्वर्याई
यों नेतों क आण से कि पार्टी कू कैडर कार्यकर्ता नाराज ह्वैग्याई
कि पार्टी ल अपिडि या कन भद्द पिटाई
सुदि सुदि वंशवाद की
तैडू की सि लगुलि किलै लगाई
जाणि बूझीक ग्यूँ का रोटुमा
झुँगरा कू पथर्णु लगाई
अर हमथै दालि म खैड जन सर्रर् किलै बिराई
पार्टी क पोस्टर बैनर सालों बटि हमल ब्वोकि प्रचार भि काई
क्या ई दिन देख्णा कू हमल
चलदा फिरदा उठदा बैठदा कमल कमल कू घ्वट्या लगाई
जो तुमुल पैराशूट प्रत्याशी उत्रैंई
आर्य तिवरी थै टिकटों की मुगली घुट्टी किलै पिलाई हमल क्या पाई
अब यो निर्दलीय लड्णा छि कतगौं क बकैदा ऐलान भि ह्वैग्याई
धमकी दीणा छी कि चुनौ क नतीजों ल
पता लैगि जालु कि तुमुल विरणी मौं का
ग्वरु मा अपुडु उज्याड अफि खवाई
नै साल भि...........................................
यख रैलीमा राहुल लोग थै अपुडु
चिर्यु खीसा बथाणु छाई
वख पंजाब मा ओ गुरु ह्वैजा शुरु
ठोको ताली खटैक कू दलबद्लू वायरस
पंजा कु भगत बणिग्याई
जो ब्यालि तक सोनिया राहुल फरि
बनि बनि क चुटकला सुणाणु छाई
वक्त की चिर्वाड देखा भयो आज वो मैडम थै खुटूम बटिक नाक रगोडिक स्यवा भि लगाणु छाई
जन्ता भि कन्दुडूम हथ धैरिक सोच्दै देख्दै रैग्याई
कखि योग गुरु नकली कुश्ती लैडिक अपिडि फिटनेस मा
दमखम लगैकि असिली बथाणु छाई
50साल कू योगी पैलि दौ जुत्ता पैरिकी अखाडा म उतर्युं छाई
12-0का अंतर से रफ मैच मा विदेशी पहलवान हराई
नै साल भि..............................................
सलमान खान भि पेशी फरि
जाणिबूझिक द्वी घंटा लेट मा आई
जजल भि वेथै निर्दोष बथै कि
वैकू हक कू फैसला सुणाई
भागी कि किस्मत भौत भली चा
जज भि मिली बडा दयावान
गोली खैकि हिरन म्वार
गाडी मूडि दब्येखै इंसान
आँखा बुझि क कानून भि म्वार
बीईंग ह्यूमैन की आड मा
या
कनि भली चलणि च दुकान
सुद्दि नि ब्वादा हम लोग भि
म्यारु भारत देश महान
जो बिचरा निर्दोषी छैया
वुखुणि रुठीग्या भगवान
कलियुग छैंच पर जरुर लगन्द
गरीबों की हाई अर फकीरों की दुहाई
युवी माही क शतकों से कटक मा
इंग्लैंड वनडे श्रृँखला हैरीग्याई
नै साल भि.............................................
तमिलनाडु मा जलीकट्टू
मेला आयोजन थै केन्द्रीय परमिशन की
हैरी झंडी मिलीग्याई
बडा बडा नेता अभिनेता आपस मा
खुशि क साझा कना छी बधाई
कखि येक धर्म की गौ च माई
वखि हैंक धर्म का बण्या छी कसाई
वोटों क बाना सेकूलर नेता
आस्था क दगिडि ल्वै रल्यैकि गला मिलाणा छीई
सम्पूर्ण सौहार्द कू फार्मूला सम्प्रभुता का
वाडू से जोडिक कत्गौं थै
कमजोर बणाणा छीई
नै साल भि.............................................
अमेरिका क बराक हुसैन ओबामा
अपिडि मिशेल थै ल्येकि राष्ट्रपति पद से
मुक्त ह्वैग्याई
डोनाल्ड जेम्स ट्रंप
मेलानिया थै ल्येकि व्हाईट हाउस मा
नै राष्ट्रप्रमुख बणिग्याई
36आर.आर. कु ज्वान
चंदू बाबूलाल चौहान पाकिस्तान बटि
सकुशल ब्यालि अपडा वतन बाघा बार्डर का रस्ता लौटिक आई
घर परिवार दोस्तों मा सब्या जगा खुशी कु
माहौल ह्वैग्याई
नै साल भि स्वीं स्वां आई...........................
*********जारी है********

[एम.एस. मेहता /M S Mehta 9910532720]

Payash Pokhra
January 20 at 6:17am ·
गज़ल
*******
दिदा दुन्या दिख्यां दुन्यदरि
बताणा छन ।
अपणु बिरणु माल थैं सरकरि
बताणा छन ॥
बघनखा पैर्यां छन हथुकि अंगुळ्यु मा ।
सर्या मुलक मा अपणि रिस्तदरि
बताणा छन ॥
दिनमान छुयूं मा जौंकु गिच्चू नि पटांदु ।
वो छुयांळ हमरु बच्याणु थै बिमरि
बताणा छन ॥
लंग्वट्या यार लंग्वटु बेचि भाजि ग्याइ ।
अजकाल दगड़्यों थैं लोग ब्यौपरि
बताणा छन ॥
अंधु घोल छोड़िकै अकाळ म्वार बब्बा।
सैंति पाळि सितरा करौ वींथै बिचरि
बताणा छन ॥
नश म गुंग बणि आंख्यूं मा फूल पोड़िगे ।
चुड़ापट्ट दीन द्वफिरि थैं कुरबरि
बताणा छन ॥
बल 'पयाश' की सिरमथि बीए पास चा ।
गौं गळ्या मा ब्वारी थैं भारि चरचरि
बताणा छन ॥
© पयाश पोखड़ा ॥

[एम.एस. मेहता /M S Mehta 9910532720]

Payash Pokhra
January 19 at 6:24am ·
ऐगीं नेताजी भारे !!
*****************
करळि सुफेद ट्वप्लि पैरिक,
त्वै पुजणा को ऐगीं ।
त्यारा तिड़क्वळ्या तव्वा मा,
भट भुजणा को ऐगीं ॥
अंग्वठा दिखै ग्या छायो जो,
चुनौ जीतणा का बाद ।
फेरि त्यारा गळ्या मा त्यारु,
अंग्वठा चुसणा को ऐगीं ॥
कभि नि धराई छायो मिल,
तैल्या मैल्या ख्वाळ अंठा मा ।
भोटु का लिबद गौं गळ्या मा,
सबुथैं लुछणा को ऐगीं ॥
अभि तलक त नि चिताई कैल,
त्यारा पस्यौ कु मोल ।
आज त्यारा ल्वै दगड़ फेरि,
कत्तल रुजणा को ऐगीं ॥
फ्यफ्नौं की दळखा बिवयूं फर,
लीसू लगाणाकु को आया ?
त्यारा मुक नजर लगैकि,
आंखि बुजणा को ऐगीं ॥
गैरहळ्या ब्वै छोड़िक कांधिम,
भारत माता ब्वकुणु रै ।
त्यारा बाटों मा उज्यळु द्यख्दै,
बतुलु मुंजणा को ऐगीं ॥
रौलि गदनि कूल नवलि पंद्यरि
अर आंखि बिसगीं छन ।
स्यूं कुड़गटीं गल्वड़ियूं ऐथर कैर,
आंसु फुंजणा को ऐगीं ॥
हम त सदनि दुख पिड़ा की
दाळ बिराणा रवां ।
आज छीमी का म्याला बणि
भड्डुंद उजणा को ऐगीं ॥
त्यारा तिड़क्वळ्या तव्वा मा,
भट भुजणा को ऐगीं ॥
©पयाश पोखड़ा ॥

[एम.एस. मेहता /M S Mehta 9910532720]

****#छ्वीं...=9.
-----------------------------------------
बल थच्चगा मारि कि बस चलनी
चलनी च डाँडीयुं का पार
कै दिन गैरसैंण राजधानी बणली
मि भि लग्युँ छौं सार......
नेंतु कू क्याच यो त भागि घुसगिली खेल्णा रैंदिई
जो भागि ब्यालि तक
जिंदगी कटणा छाई पंजामूडि
वो
आज ढाल आण फरि सर्र र कमल मा अन्दिई
जनि पार्टीयुँ मा टिकट बटेणा कि चौरांस लगन्द
तब कतगै क्षत्रप नेता भि कौंपि जन्दिई
वुँका समर्थकों थै तब गुज्जा कि रिट्याँ कि सि कीसली लगन्द
जब वो कट्टर विपक्षी थैई भि अपडैई दिन्दिई
पैलि बडा दलों मा टिकट बंटेणा कु
मवारि बाँठू लगुन्दु छो
अब त कुटमदरि वोलू कु भि
आरा मँगण शुरु ह्वैगींई
कभि जनता थै दिखाणा कू जो आपस मा आरोपों से खूब धदोडा-चिचोडा लगाणा रैंदा छाई
टिकट मिलण दौ हैंक दल का कार्यकर्ता का
लिपियाँ उबरा चौक डंडिय्ला मा लिचोडा लगन्दिई
कैल उत्तराँचल नौं धारा
उ.प्र. बटि अपुडु चुलु जन्दुरु अलग कारा
कैल उत्तरांचल नौं फरकै खै नैई नौं उत्तराखँड धारा
16 साल बटि ठगी जनता अब हिसाब मँगणी चा कि बथावा तुमुल हमखुणि क्या कारा
वोट भि हमरि राज्य भि हमरु तुमरु प्रचार भि हमल हि कारा
जनहित का नौं फरि रुप्यौं कि खौंकलि लगै लगै कि ईतगा साल तक
बिना पाणि पियां की जो तुमुल मुच्यडि मारा
तुमरा चक्कर मा खास भै भि बणजन्दिई आपस मा स्वारा
जनि तुम पार्टी बदल्दवा तनि भयुँ की हालत इन ह्वैजान्द
जन फुक्या भात मा चौंल क्वारा
अब बतावा तुमुल जन हित म क्या कारा
त सब्या दल बुना छीई
ये राज्य क भलै क बाना ईतगा साल राजपाट कारा
ऐंसुँ भि जितै दियां बाकि तुम चिंता नि कारा
कभि ह्वैलि ई देवभूमि मा रोजगार अर विकास की बयार
कन्ख्वै चलदा ह्वाला बाँझा पोड्या
सगोडि पुंगडि घर गौं गुठयार
कखि ना कखि त हमसब भि छों राज्य की कुदशा का जिम्मेदार
जतगा भि पलायन कैरि कि ऐ गी राजहित की पहल कैरि की जरा चुकै दियाँ पवित्र माटी कू उधार
जौं थैई स्वराज्य कू मोह नि रैंदू वुथैं लगन्द जलमभूमि कू असगार
ईबरि चुनौं मा सब्या भ्याजा देवभूमि कू उन्नति रैबार
भन्डिया बिरोलू मा मूसा नि म्वरदा ई बात थै कर्यां स्वीकार
म्यारा मुल्क का भै बंदौं जरा
पन्द्रह फरवरी खुणि आँखा खोलिकी
अक्वैं चुन्या ईबरि दा सरकार...
@

[एम.एस. मेहता /M S Mehta 9910532720]

आज मि एक रचना बड़ा भैजी धर्मपाल भैजी तै समर्पित कनु छौ। जन भि ह्वेळी बुरू न मन्या।
अर शेयर कर्यां टक लगा कै ।
पेश छ
कैमा ळगौं मी , कन्क्वै बिंगौं मि ।
दुख्यारु पराणै पिड़ा कैतै सुणौ मि ।।
हौंसिया उमर ऐ , ह्वै ज्वानी को तमासू ।
प्रीत की ठंगरी फरे लिटैंदै गौं मि
अब सूखी लगुळि सि छिनरै गयौं मि ।।
मन स्याणी गाण्यु कु उमाल खतेणु।
जोग फरै बसगल्या यो कुयडु नि छटेणु
जोग संजोग सारा बैठ्युं रौ मि ।।
बक्या की बातू म अळझै छौ मी ।
द्यबतौं का अग्वड़ि गौंबंद ह्वै ग्यौं
अब छैळ छळाट द्यौ पूजणु छौ मि। ।
न्यौ निसाब तू कैरि बिधाता
तेरी दैळी मा मंदरु सी पसर्युं छौ मि ।
फूका जन भी कटै या ज्वानि की उकाळ
अब उँदारि को बाटू भि ,कखि उत्यडा न ख़ौ मि ।।
कैमा ळगौं मी , कन्क्वै बिंगौं मि ।
दुख्यारु पराणै पिड़ा कैतै सुणौ मि ।।
-दिवाकर बुडाकोटी
copyright @ Diwakar budakoti

[एम.एस. मेहता /M S Mehta 9910532720]

*********#छवीं ...= 7*****
-------------------------------------------------------------
-----------------------#कच्वरा...-----------------------
भै बदौं आज आपक समिणी एक प्रतीकात्मक रुप मा एक हास्य व्यंग्य मनोरंजन कु #अगोल्या फलाट स्वीणुमा सरकाणू छूँ....... जनि भि ह्वालु तब..हैं....................................
"कभि ये भ्रम मा नि रैण चैंद कै थै भि कि ये कलाकार थै कुई नि पछैणदा....
कैई दौ जो असिली कलाकार हुंद वैकु त कतगै नौं भि नि जणदा"....
यो बात मिर्जा #गालिब ल अपिडि रफ कापी म #ह्यूँदा क मैना घाम तपण दौ लेखि छै

[एम.एस. मेहता /M S Mehta 9910532720]

Payash Pokhra
January 8 at 1:53am ·
त मिल क्य कन ?
**************

तेरि आंख्यूं मा आंसु की पंद्यरि नवळि,
त मिल क्य कन तब ?
बगत की हत्थ्यू मा थमीं दाथी थमळि,
त मिल क्य कन तब ?

कभि नि ज्वाड़ा हथ द्यप्तौं का ठौ मा,
तू रेची ल्हे देळिम अपणि मुण्ड कपळि,
त मिल क्य कन तब ?

ओगळ पळिंगु टुकुलु द कख कि छुवीं,
त्यारा भागम त सदनि भुज्जी कंडळि,
त मिल क्य कन तब ?

अधीतु नि हो जरा ग्वत्राचार त हूण दे,
भुला तिल पैलि खोळ्याल स्य बड़डलि,
त मिल क्य कन ?

जामण मंगदरौ की लैन च सुबेर बटैकि,
जो तुमरा ठ्याकुंद खट्टि दै नि जमलि,
त मिल क्य कन ?

ठुलि ब्वारी थैं परदेस पणसै गे 'पयाश',
ननि ब्वारी घारम खपलि कि नि खपलि,
त मिल क्य कन ?

©पयाश पोखड़ा ॥

[एम.एस. मेहता /M S Mehta 9910532720]

Payash Pokhra
January 7 at 10:39am ·
एक शेर भाई वीरेन्द्र जुयाल 'अजनवी' पलतीर क्लब, फरसड़ि, बैजरौ का नौ ।
*********************************
अणत्वसि राया म्यारु मन,
तेरि मयळ्दु माया का लिबद ।
कभि आख़र नि मीला मिथैं,
कभि हर्चि गैन म्यारा शबद ॥
© पयाश पोखड़ा ॥