MeraPahad Community Of Uttarakhand Lovers

Garhwali Poems By Satish rawat
सतीश रावत की गढ़वाली कविताएं




---1---
बितदी बिनसरि अर उठदू घाम
बिजदी डाँडी-काँठि, हर्चिदि ओंसs की बूँद
कित्गा भग्यान छन तिसलि आँखी
14/07/2016
***
 
---2---
कुछ लोग होंदिन बड़ा खतरनाक
हाथ कि लकीर पढ़ण मा  होंदिन उस्ताद
मुट्ठी बूजि कि रख्याँ भारे !
15/07/2016
***
 
---3---
अदs रातै फूल-फटगी जून
डाँडों का कुल़ैं का डाल़ा, चौड़ु बाटु
खुटों की भौत तेज रफ्तार
15/07/2016
***
 
---4---
नना नौना-बाला़
गरा-गरा बस्ता
खाली खल्याण
15/07/2016
***
 
---5---
फूलि गे लय्या, पँय्या फूल
हरि-भरि डाँडी-काँठी दुःख गेन भूल
मनिखि माचिस लेकि हुयूँ तैयार
15/07/2016
***
 
----6----
मैँगि शिक्षा
मनखि लाचार
छुटि-छुटि दुकान
15/07/2016
***
 
---7---
ब्यखुनि को घाम अछ्लै ग्यायी
गौड़ि-भैंसि छन रमणी, रुमुक पड़ि ग्यायी
घास भटि माँजी अबि नी आयी
15 July, 2016
***
 
---8---
क्यs बोलि
क्यs बींगि
किलै
17/07/2016
***
 
----9----
गौं मs  खँद्वार
शहरूँ मs उड्यार
रचनात्मकता रूणी
19/07/2016
***
 
---10---
रुमुक बिचsरि
दर्दs की मारी
फ़िर ऐ ग्यायी
20/07/2016
***
 
---11---
झपन्यल़ि डाल़ी
रूड़ि कु घाम
कुलड़ि मs धार
20/07/2016
***
 
---12---
मिंढगा टर्रराणा, चिल्गsट च्वींचाणा
गैणों की आँखि बेचैन
आज जून नि दिखेणी
21/07/2016
***
 
---13---
डाँड्यूँ मा कुयेड़ि, बरखा कु झमणाट
खुट्यूँ मा कादैई
गयीं छन भ्याल़
22/07/2016
***
 
---14---
झपन्यल़ि डाल़ि का छैलु बैठी
जलड़ा खर्वाड़ा ना
हैरा-हैरा सुपन्या त्वाड़ा ना
23/07/2016
***
 
---15---
भुला ह्वे अकलबंद, बिगल़े ग्या
जब भटी भुला कु ब्यो ह्वे ग्या
म्यारु भुला स्वारु बण ग्या
24/07/2016
***
 
---16---
कंक्रीट का जंगल
डाल़ौं कू नाश
कित्गा विकास
24/07/2016
***
 
---16A---
बिवैं खुट्यूँ मा
बवै पुंगडौं मा
आदिम ठ्यक्कौं मा
25/07/2016
***
 
---17---
सूर्य अस्त ह्वेगे
किसाण घौर ऐगे
मनखि गोल़ ह्वेगे
25/07/2016
***
 
---18---
कुंगल़ा सुपन्या
कच्ची सड़क
कच्ची की भरमार
25/07/2016
***
 
---19---
घाम अछया रौनक बढ़ि गे
छोर-छवारों की खूब बार पड़िगे
समाज सुधरणs कि सुध कैथै
25/07/2016
***
 
---20---
भैर
लोग नौनौं तैं गढ़वळि बुन-बिँगण सिखाणा
भितरा सिर्फ़ हिन्दी मा बच्याणा
26/07/2016
***
 
---21---
हे ब्यटा जरा इना ऐ
राम बहादुर भटी जरा एक शीशि लै
ब्यटा नs एक ढकणि, रस्ता मा ही चटकै दे
27/07/2016
***
 
---22---
मि पहाड़ ठगे ग्यों सदानि
कबि काम नि आयी अपणि हि ज्वानी
काम नि आयो अपणू पाणी
27/07/2016
***
 
---23---
पिड़ा मन की कनुकै बिंगाण
भैर बरखा थमेणी नी छ
आँख्यूँ मा पाणि कनुकै आण
27/07/2016
***
 
---24---
दारु  नs कैकी मवसि बणायी
तिल-सि हँसायी, ताड़-सि रुलायी
दा रु नाम सुदि नि पायी
28/07/2016
***
 
---25---
डाँड्यूँ मs खिल्यूँ सूरज-फूल
चखुलौं कु खिगताट नयु मौळयार लैगे
ग्वाया लगाँदु नयु दिन ऐगे
28/07/2016
***
 
---26---
समान शिक्षा जरूरि करि द्यावा
होनहार नौजवानू थैं वूँकु हक दे द्यावा
दगड़ सभ्यूँ थै चळण द्यावा
28/07/2016
***
 
---27---
सामान्य वर्ग का भाग मs क्या
वेकू भाग तs 
भाग ग्या
29/07/2016
***
 
---28---
तिसळि धरती
सौंणा कु मैना
बादळ बणि कि ऐ जावा
29/07/2016
***
 
---29---
जोगी भेष मs मँगणौं ऐन
वूँका ठाट-बाट, हम छाँ बेचैन
मँगणा दिन अब राजौं का ऐन
29/07/2016
***
 
---30---
राजा बण गेन रंक
बजाणा छन सूखा शंख
किरम्वळौं फर ऐ गेन पंख 
29/07/2016
***
 
---31---
म्यारु कसूर इत्गा ही राई
आँसू, आँख्यूँ मा हि समै गेन
दुनिया नs  निष्ठुर बोलि द्यायी
30/07/2016
***
 
---32---
दानि आँखि
छुटा-छुटा सुपन्या
बड़ा-बड़ा मनख्यौं, सच करि द्यावा
30/07/2016
***
 
---33---
बैख बण गेन मूसा
जनना बिरळा बण गेन
दूधs कि पत्यलि अब न लुकैन
30/07/2016
***
 
---34---
त्वा ! य कन दिखावटी दुनिया
होटल मs  लुटेकि टिप देकि आणा छन
रेड़ि वळा दगड़ भुज्जि  मुल्याणा छन
31/07/2016
***
 
---35---
दीणै तs शिक्षा, रोजगार द्यावा
नना-नौना-बाळा नि रै ग्याँ हम
टॉफी, लैमचूस, खिलौणा नि पकड़ावा
31/07/2016
***
 
---36---
आवा सबि एक ह्वे जौला
ये कॉमन्युकेशन अर जनरेशन का गैप मs
प्यार कु गबिलु भोरि द्योला
01/08/2016
***
 
---37---
वु दानौं कु दिल दुखाणा छन
अर् अपणा सुख का वास्ता
पितsर पुज्याणा छन
01/08/2016
***
 
---38---
सौंगु बाटु
भरि-भरि कु भ्याळ
सिंवळि लगी छ
02/08/2016
***
 
---39---
रकर्याणी आँखि, तंगत्याणी छन खुटि
भीटा जपकै-जपकै कि जिंदगी कु रस्ता
संगड़ु भौत, कब तक कट्यालो
02/08/2016
***
 
---40---
वूँ फर अयूँ जोश
खुट्यूँ मs नी छ टेक
बुज्या पुड़्याँ बेहोश
02/08/2016
***
 
---41---
घ्यू की माणी
अाँख्यूँ मs पाणी
मनख्यूँ कु अकाळ
02/08/2016
***
 
---42---
खड़-खुड़ु बाटु
बाँजु माटु
रिबड्याँ लोग
02/08/2016
***
 
---43---
कुछ रिश्ता होंदन खून का रिश्तौं से बड़ा
कु कन समझsद
अपणि-अपणि सोच छ
03/08/2016
***
 
---44---
बौगदा पाणी कख तक जैली
बरखा बणि कि तू मेम ही ऐली
जन्म-भूमि थैं कन बिसरैली
03/08/2016
***
 
---45---
अगोळ तिमला अब नि जमावा
नया जमsना थै तुम ठगै नि सकदा
नयी पौध अब रोपि द्यावा
04/08/2016
***
 
---46---
स्वर्ग से सुंदर म्यारू गौं
भैर उन्दा भितsर ऐनी
मि भितरs कु भैर उन्द छौं
04/08/2016
***
 
---47---
काचा लखड़ा
बुढड़ी आँखीं
खैरि का आँसू
04/08/2016
***
 
---48---
चौक मs जम्यूँ दुबुलु
बंद दरवजौं देखि की
चिफळि देळि फटकरे ग्या
05/08/2016
***
 
---49---
कठिन जीवन, सौंगा लोग
सौंगु जीवन, कठिन लोग
सौंगा-कठिन मs फँस्या लोग
05/08/2016
***
 
---50---
भागीरथी भटी बौगि
यमुना मs आयी
मैणा मs माछी तड़पी ग्यायी
05/08/2016
***
 
---51---
पितsजि कु पुँगड़ू
बण गे फाँगू
जब भटी वाडु बीच मs आयी
05/08/2016
***
 
---52---
कित्गा सुपन्या सियाँ रै जँदन
कबि गुरु नि मिल्दा
कबि चेला नि मिल्दा
07/08/2016
***
 
---53---
जिंदगी की बैलेंस सीट नि ह्वे साक टैली
कबि सम्पत्ति जादा
कबि उत्तरदायित्व जादा
07/08/2016
***
 
---54---
स्कूल जाण दाँ भी रूँ
स्कूल भटी जाण दाँ भी रूँ
आँसू कु फर्क बिंगै ग्या स्कूल
08/08/2016
***
 
---55---
आँसू भैर ऐ गेन
आँखि तिसळि रै गेन
डॉक्टर बुलणा छन मोतिया बिंद पड़ि गेन
08/08/2016
***
 
---56---
ढक्याँ दरवsजा
गुड़्या मनखि
बंद विचार
08/08/2016
***
 
 
---57---
वूँन चाँद मs ज़मीन लियाल
पृथ्वी का अच्छा दिन आण वळा छन
जून बिचरि कु ज्य ह्वालो तब
08/08/2016
***
 
---58---
दथड्यूँ की छुणमुण
बाँदू की गुणमुण
बरखs की रुणझुण
09/08/2016
***
 
---59---
खेल-तमsशs खतम ह्वे गेनि
हम बिज्याँ रै ग्यँवा
सुपन्या सियाँ रै गेनि
10/08/2016
***
 
---60---
छुटि-छुटि आँखी
बड़ा-बड़ा सुपन्या
कड़ा-कड़ा बोझ
10/08/2016
***
 
---61---
दिदौं ! न बदला म्यारु अर्थ
नौना-बाळौं थैं मे दगsड़ खिलsण द्यावा
मेथैं बचपन ही रैण द्यावा
10/08/2016
***
 
---62---
हमsरि पिड़ा, हमsरु सुख
तुमsरु सुख, तुमsरि पिड़ा
तुमsरा शहर, हमsरा गौं
12/08/2016
***
 
---63---
भैजि लग्याँ छन सार
पिलै दींदू क्वी द्वी घूट
चल जाँदू अपणा ड्यार
13/08/2016
***
 
---64---
सरकार दीणी सब्सिडी
कागजूँ का गरीब उठाणा फैदा
भूखु भूखs नs मुरणू
13/08/2016
***
 
---65---
पिरपिरु मनखी
पिरपिरि बात
पिर्रु प्राण
13/08/2016
***
 
---66---
मेहनत कु पसीना
खैरि का आँसू
पहाड़ की नारी
14/08/2016
***
 
---67---
आजाद ह्वे गेन
भारत माँ का वीर सपूत
हमsरि आजादी का बाना
14/08/2016
***
 
---68---
बोडि नs नीर करि
चौबट्टा मs धोळि
खिखराणs नs अफी मोरि
14/08/2016
***
 
---69---
ब्वाडाजी फर नरसिंग प्रकट ह्वाई
गूणि, बांदरूँ की बार पड़ि ग्यायी
धुपsणु दिँदरु क्वी नी पायी
15/08/2016
***
 
---70---
मिन त  अपणु फर्ज निभायी
माँ का दूधs कु कर्ज चुकायी
दगड़्यों सदनि कु यख रायी
15/08/2016
***
 
---71---
कबि-कबि जरूरी ह्वे जाँद
बीच रस्ता मs ढुंगु होण
क्वी आसमान देखी त नि जालो
16/08/2016
***
 
---72---
भौत तेज ह्वे गेन बाँदर
रुसड़ा भटी रुठि तक ली जाणा छन
मनख्यूँ देखी डरणा न, डराणा छन
17/08/2016
***
 
---73---
भै-बैणौं कु प्यार
बचपन की मिठि-मिठि याद
रखड़ी कु त्योहार
18/08/2016
***
 
---74---
जख्या क्वी नि बुतsण चाँदो
साग-भुज्जी मs तुड़का देकी
स्वाद हर-क्वी लीण चाँदो
18/08/2016
***
 
---75---
बोडा-बोडी लग्या छन सारा
दिल्ली भटी अयूँ वूँका नौना कु दगड्या
वू सारा ही लग्या रैन
19/08/2016
***
 
---76---
नि होंण निराश
जम ही जँदिन जलड़ा
डाळु ह्वा या मनखि
19/08/2016
***
 
---77---
आवा जून मs हरियाळि बूति द्योला
जून थैं जून जन बणै द्योला
सरगs कि आँख्यूँ का गैणा बणि जौला
19/08/2016
***
 
---78---
गिचा बुबs कु क्य जाँद
सुदी नि छन वु विकसित
जित्गा गुड़, उत्गा मिठु
20/08/2016
***
 
---79---
काका टरकिण्यूँ मs रै गेन
अफु नौणs कि गुँदsगी भी नि चाखि
घ्यू कि पाथि क्वी और ही खै गेन
20/08/2016
***
 
---80---
हैरि धरती
पिंगळि फ्योलि
रँगीलो मिजाज
20/08/2016
***
 
---81---
जाति-भेद करी आपस मs लड़ै गेन
अफु बण गेन सुपन्यों का राजा
हमsरा सुपन्या भी चोरि गेन
21/08/2016
***
 
---82---
मोल-भौ नि करणूँ अपणौं दगड़
कुछ चीज़ सस्ति, कुछ मैंगि होंदिन
पर अपणा तs अपणा ही होंदिन
23/08/2016
***
 
---83---
वूँन कुंगळि डाळि कु टुक्कु चूँडि द्या
द्वी-चार दिन मs औरि छौंका फुटि गेन
डाळि और भी झपन्यळि ह्वे ग्या
23/08/2016
***
 
---84---
रचण पोड़लि एक नयी कथा
लीण पोड़लु एक नयु अवतार
म्यारा प्रभु तुमथैं एक और बार
24/08/2016
***
 
---85---
जीण अगर हमथैं ऐ जाँदू
खुस्यूँ कु ड्वारू भुर्यूँ राँदु
जीवन, खाली बन्ठा-सि नि हिलणू राँदु
24/08/2016
***
 
---86---
सुख की खोज
सुख ग्या सुख
सुख नि मौळ
25/08/2016
***
 
---87---
भैरऽ  कु बाटू साफ ह्वे ग्यायी
भीतरऽ कु बाटू मैले ग्यायी
गुज्यरु त उनि-कू-उनि रै ग्यायी
26/08/2016
***
 
---88---
मि आम ही ठीक छौं
नि हर्चाण चाणू छौं मिठास
नि बणण चाणू छौं खास
03/09/2016
***
 
---89---
इखुलि नि छ्वाडा दानौं थैं
टैम छ लेल्या आशीर्वाद
बाद मा ही आँद औंळा कु स्वाद
03/09/2016
***
 
---90---
कन आँद दिन कन जाँद
बार-त्योहारूँ कु पता नि राँद
छुटि-सी जिन्दगी कमरा पुटुग कटे जाँद
03/09/2016
***
 
---91---
द्वी आँसु सुख
द्वी आँसु दुःख
सुख-दुख मा जीवन सुख
03/09/2016
***
 
---92---
म्यारा नौना नऽ बसयाल परिवार
बणऽयाल राशन-कार्ड
सदस्य- वू , वेकि ब्वारि अर मेरी नातिण
03/09/2016
***
 
---93---
उळझ्यूँ धागू इन न तोड़ा
ममत्याणा छाँ कुछ करणा कु तऽ
यीं उळझ्यीं गेड़ खोला.
05/09/2016
***
 
---94---
सितराज का फूल
इगास-बग्वाळ
गौड़ि कु व्रत
06/09/2016
***
 
---95---
लूण-रुट्ठि डाळा टुक्कु
होटलूँ कु खाणु फीकु
खुट्टा सातौं आसमान पर
06/09/2016
***
 
---96---
सीधी बात समझ नि आ
डुण्डि चिफळि बात मन मा समै ग्या
कैकु दोष नी गिच्चि कु फर्क रा
09/09/2016
***
 
---97---
फागुण मैना
नयी-नयी ब्योली
फ्योलि कु फूल
10/09/2016
***
 
---98---
धार मा गैणू
कुरमुरि बिनसर
बेटी-ब्वारी किसाण
10/09/2016
***
 
---99---
बसगळ्या औड़ौ
सँगुड़ु बाटु
हैरि-हैरि खुशबू
12/09/2016
***
 
---100---
खैरीऽ गौं लगदन अपणा
सुख-सुविधाऽ शहर उपरि-अजाण
म्याळै-सि खुशबू कनकै लेन्टर मा आण
12/09/2016
***
 
---101---
देवकी बणिकि फोटो खिंचै गेन
कान्हा कि कुँगुळि अँगुळि हममा थमै गेन
डाळौं कि बिज्वाड़ रोपिकि बँहड़ा पोड़ गेन
13/09/2016
***
 
---102---
कित्गा भि द्या भगवान पर
अपणु रूणु रूणऽ की आदत नि जाँद
चुप्फा मा दलेदर हँसणू राँद
13/09/2016
***
 
---103---
चुल्लु जगणूँ एक कूण
बोडा-बोडी रँदन हैंका कूण
नौना की कोठी मा अलग कमरा डॉगी खुण
13/09/2016
***
 
---104---
लिखऽयाली वसीयत
सुपन्या , सुख , खुस्यूँ की
तुमऽरा नाम
14/09/2016
***
 
---105---
हरि-भरि डाँडि-काँठि
सौन्दर्य अपार
मनख्यूँ कु अकाळ
14/09/2016
***
 
---106---
कोफणि गौं सौ मौ
कुल जनसंख्या द्वी सौ
तीन बीसि से मुड़ि क्वी नि छौ
15/09/2016
***
 
---107---
बोडी नऽ आँखौ खैड़ गड़दरु नि पायी
भाभी थैं आ छींक
भैजी डॉक्टर ले आयी
15/09/2016
***
 
---108---
चेला कि लगुली अळझी जाली
गुरु रूपी अगर ठँकरी नि घंट्याली
कखड़ि का बीजूँ नऽ दुनिया देखि याली
17/09/2016
***
 
---109---
काँडा हँसण नि देंदा
फूल रूण नि देंदा
कट्वरि कि डाळि मुळ-मुळ हँसणी
17/09/2016
***
 
---110---
कुँगळा काँडा
मुरझ्याँ फूल
समय बड़ु बलवान
17/09/2016
***
 
---111---
म्यारु मुण्ड
तुमऽरु हाथ
सहारा कि बरसात
17/09/2016
***
 
---112---
गौं मा बड़ा दिन
सभ्यूँ दगड़ मुलाकात
शहरूँ मा झट पड़ जाणी रात
18/09/2016
***
 
---113---
मेहनत करण वळौं कु हाथ न रोका
बढ़ण द्या अगना टँगड़ि न खींचा
तुम देळि कि ढुँगि चिफळि करदा रा 
21/09/2016
***
 
---114---
सीधु-साधु पहाड़
हिसाब नि मँगणू
चाणूँ हमऽरि आड
21/09/2016
***
 
---115---
कित्गा कमायी
कित्गा लुटायी
काम केवल बचऽयूँ आयी
21/09/2016
***
 
---116---
फूलूँ हँसणू
काँडौं रूँणु
डाळि चुट पछ्याँण ग्या
21/09/2016
***
 
---117---
पौड़ीऽ धार मऽ सूरज आयी
बरफ चाँदि-सि चमकी ग्यायी
जेमोऽ मोटरौ हौरन बजि ग्यायी
21/09/2016
***
 
---118---
तेरि मुखड़ि जूनै टुकड़ि
गाळा मऽ गैणौं का गैंणा
सूरज ये सौन्दर्य से दूर
21/09/2016
***
 
---119---
जब छा तब बरबाद कायी
अब नी छ तऽ लाळसा रै ग्यायी
टैम कबि हँसै तऽ कबि रुवै ग्यायी
23/09/2016
***
 
---120---
जित्गा टैम देला
उत्गा सुख पैला
दुखै घड़ि मऽ बतै गेन भगवान
23/09/2016
***
 
---121---
जिकुड़ि फुक्या
गाळि बण आशीर्वाद
धुरपळि मऽ कैक्टस हँसणान
24/09/2016
***
 
---122---
ठुपरौं मऽ भुर्याँ सुपन्या
शहरूँ मऽ खते गेन
उकरि हौरी-हौर सुपन्या पतड़े गेन
24/09/2016
***
 
---123---
हिन्दी साहित्य मऽ एम. ए. कायी
एक लाळसा दिल मऽ रै ग्यायी
बजार मऽ गढ़वाली साहित्य उपलब्ध नि छायी
24/09/2016
***
 
---124---
ब्वे कि गाळि
बुबऽ कि मार
पैंछु नि लौटाँद स्वार्थी संसार
25/09/2016
***
 
---125---
दिल मऽ जहर रालो
तऽ असर जरूर दिखालो
ननऽ नौना-बाळौंऽ भविष्य क्यऽ ह्वालो
26/09/2016
***
 
---126---
इत्गा बड़ि दुनियऽ मऽ 
कठऽ नि ह्वे साक
एक अंज्वाळ प्यार
26/09/2016
***
 
---127---
डाळा छन फुड़ेणा
हर्चैकि पसीना
खुजयेणू छ भाग
27/09/2016
***
 
---128---
दिल्ली भटीन चल भारी-भरकम योजना
गौं मऽ आँदा-आँदा ह्वे ग्या हळ्की
जौंका बान आ वु हैंकि हाड़ नि फरकिन
27/09/2016
***
 
---129---
वूँन नि करि क्वी डिमाण्ड
ब्योली ओर ह्वे गेन गरीब
ब्योला वळौं का ऐ गेन ठाठबाट
27/09/2016
***
 
---130---
कित्गा स्वाणि प्रकृति
दुन्या भरौ सुख दुनिया मऽ
जब जीण ही नि आ क्य कन तब
28/09/2016
***
 
---131---
जून जन जींदु जु
तऽ चमकुदु कित्गा दिन
हर क्वी सूरज नि होंद
28/09/2016
***
 
---132---
राति बोडि कणाणी
दिन मऽ काम-काज फर लग जाणी
"मीन नि रै सकऽण छा दिल्ली" अपणु मन व्यळमाणी
29/09/2016
***
 
---133---
चखलौं च्वींच्याट उठाणू
खिड़की रस्ता घाम बुलाणू
धूळा कणूँ थैं नचदा देख ल्या
29/09/2016
***
 
---134---
पूषौ मैना ऐ ग्यायी
दान मँगणौ म्यारु भैजि नि आयी
बैंड-बाजौं जमऽनु ऐ ग्यायी
30/09/2016
***
 
---135---
गैणौं झिमलाट
हवौ फफराट
अग्यठि जगणी गुठ्यारा तीर
30/09/2016
***
 
---136---
घाम न हवा
डाळि न बोटि
उजणा छाँ बंद कमरौं मऽ
30/09/2016
***
 
---137---
नखरा विचार
हमऽरा काळ
अपणु हि टैम अफी खयाल
30/09/2016
***
 
---138---
घिंडुड़ी आँख्यूँ मऽ
आँसु ऐ गेन
देखी खालि गुठ्यार
30/09/2016
***
 
---139---
वूँन द्या
टेढ़ा सवालूँ
सीधु जवाब
03/10/2016
***
 
---140---
नखरा बोल बोली
नखरा कना छन
अफथैं ही खूब बताणा छन
04/10/2016
***
 
---141---
रस्ता चल्दा-चल्दा
पतेड़ दींद कई किरम्वळा
हमऽरि टकटिकि धौंण
04/10/2016
***
 
---142---
ऊँचि डाँडि-काँठ्यूँ मऽ
चाँदीऽ चदरी
क्व होलि सुखाणी
04/10/2016
***
 
---143---
हैरा-भैरा बुग्याल मऽ
खिलणी ओंस
घाम देखी झट लुक ग्यायी
05/10/2016
***
 
---144---
धरति देखीऽ ढाँढु बरखि
मनखि देखीऽ लुकि
सचेकी कित्गा बदले ग्याँ हम
05/10/2016
***
 
---145---
अम्यळीऽ डाँडा
सफेद बरफ मऽ
सूनौ पाणी कु चढ़ै गे होलु
06/10/2016
***
 
---146---
गुँदक्यळा हिसरूँ रस्याण
अँदळि लगी डाळि
बौंळि कनुकै छुडाण
06/10/2016
***
 
---147---
बरखौ झमणाट
भटूँ तटड़ाट
बुखंदरौं किबलाट
06/10/2016
***
 
---148---
खँतड़ि पुटुग बैठी बहस न कारा
अछ्यणि मऽ जरा मुँडळि तऽ धारा
फिर बौर्डरै बात कारा
06/10/2016
***
 
---149---
दूर नी दिल्ली
मंजिल नजदीक
धैर द्या बस द्वी और लपाग
07/10/2016
***
 
---150---
पीठु कुटेणू घम्म-घम्म
चूड्यूँ छमणाट छम्म-छम्म
भैजी ब्योऽ मऽ रंगत अयीं
08/10/2016
***
 
---151---
चूनै रुठळि इन न ढकावा
खैर खैयीं छ तुमऽरी भारी
गौड़ा बाँठै एक खँडिकि खाणि द्यावा
09/10/2016
***
 
---152---
बरखा आयी
प्रकृति नयायी
चोळि तिसळि रै ग्याई
14/10/2016
***
 
---153---
छुटि-छुटि बातूँऽ ख्याल राखा
बड़ि-बड़ि बात बण जाली
जीणु सौंगु ह्वे जालो
14/10/2016
***
 
---154---
टरकऽणि कैर-कैरी पुकाण वलौं का
जलड़ा ढीला ह्वे गेन
वु साब बणौ शौक रखऽण बैठ गेन
18/10/2016
***
 
---155---
ब्यखुनी घाम झट अछळे ग्याई 
मिठि-मिठि खुशबू कुरै दगड़ आयी
रातै राणी अंध्यरा मऽ लुकि ग्याई
18/10/2016
***
 
---156---
कभि-कभि परदा जरूरी ह्वे जाँद
कभि-कभि दूरि भि नजदीक लाँद
तड़तड़ा घामौ मरुस्थल मऽ पाणि दिख्याँद
19/10/2016
***
 
---157---
बातूँ से मुकुरण सौंगु
कठिन वूँ पर डट्यू रैण
बिना वसूलूँऽ क्या जिंदगी
19/10/2016
***
 
---158---
खोल द्या ज्यूड़ा
तोड़ द्या सँगुळा
कैका गुठ्यारा गोर नि छाँ
20/10/2016
***
 
---159---
पिंडळू पत्ता
पाणी खेल
मोती म्यालौं मऽ घामै झैळ
22/10/2016
***
 
---160---
जब गाळा-गाळा ऐ जाँद
तब बागै डैर नि राँद
नयु अध्याय शुरु ह्वे जाँद
23/10/2016
***
 
---161---
भाँडि भुरे गेन बँदर्यूं नऽ
अब कनकै बौगदू पाणि बचाण
रूड़ी मैना दगड़्या हमन फिर तिसळु रै जाण
24/10/2016
***
 
---162---
चला अपणू कद बढ़ौला
छुटि सोच त्यागी द्योला
जरऽसि बड़ा बण जौला
27/10/2016
***
 
---163---
काफुळ पाका मीन नि चाखा
कन खैरि खै की भोरि छा काण्डी
खैरीऽ भौ मा बिक नि साका
29/10/2016
***
 
---164---
यूँकि मुण्डळि इन हुँच्याई
कखड़ि तऽ खाई-खाई
लगुलि भि उपाड़ द्यायी
29/10/2016
***
 
---165---
उरख्यळाऽ पाणी
घिंडुड़ि नयेणी
घामै झैळ आणी-जाणी
31/10/2016
***
 
---166---
छुँय्यौ पाणी अँज्वळ्यूँन प्यायी
सरैल बगछट पर मन नि भुर्याई
खारू पाणी आँख्यूँ मऽ आयी
31/10/2016
***
 
---167---
जिकुड़ि मऽ राला भला विचार
भला रौला अफु, घौर, संसार
अबटा लिजाँदा बुरा विचार
01/11/2016
***
 
---168---
बगऽत आण पर जवाब मिल जाँद
सबतैं जवाब बगऽत दे जाँद
प्रभु ! सभि बुल्याँ मिठा-मिठा बोल
01/11/2016
***
 
---169---
लिच्चा कुमुर चिपकी गेन
विचऽरा कित्गा खुद्'या रैन
जब धुळिन फुंडु दणमुण र्'वेन
01/11/2016
***
 
---170---
मुंडळि हिलाणी ग्यूँ की डाळी
मिठि-मिठि छ्'वीं-बथा हवा दगड़ लगाणी
दगड्या वींकी दाथि पळ्याणी
01/11/2016
***
 
---171---
कटे जँदिन खैरी बाटा
कदम न र्'वाका
मौळि जालि खुटि छाळा न द्याखा
03/11/2016
***
 
---172---
मशीनूँ पर ह्वे ग्या  भर्'वँसु
पास ह्वे गेन रोबोट
मनखि ह्वे गेन फेल
04/11/2016
***
 
---173---
बोल-बाला तऽ बड़ा कु हि राँद
सब जगा  छ्'वटु  हि मरे जाँद
बड़ु माछु  छ्'वटि  माछि तैं घूळि जाँद
05/11/2016
***
 
---174---
न सूरज घबराँद
न जून घबराँद
द्वी घड़ीऽ त जीवन मऽ ग्रहण आँद
05/11/2016
***
 
---175---
ड्वारा रै गेन रीता
च्यूला ह्वे गेन ढिल्ला
बटुवा ह्वे गेन टैट
06/11/2016
***
 
---176---
साफ-सफै राली
नयी तकनीक आली
सदनि इनि जीण क्या
12/11/2016
***
 
---177---
घैणा रुप्या, घैणि कड़ऽकताळ
घैणा, गैंति, सबळा हँसणान
सियाँ सुपन्या कुबळाणान
12/11/2016
***
 
---178---
एक इन मशीन बण जाँदि
सुख-शांतीऽ रैबार फैलाँदी
दुख-दर्द तैं थमथ्याणी राँदि
13/11/2016
***
 
---179---
गुरुजी पिड़ा चेला नि जाणी
चेलैऽ पिड़ा गुरुजी नऽ  पछ्'याणी
सूनाऽ गुरुजी, चेला सूनौ पाणि
13/11/2016
***
 
---180---
बादळूँऽ टोली खिलणी होली
सूरज दगड़ सतरंगी होली
दगड्या धार मा घाम तपणा होला
15/11/2016
***
 
---181---
लीसाऽ आँसू डाळी  र्'वाई
हैरू-भैरु जंगळ फुक्याई
कुळैंऽ डाळीऽ टुक्कु उल्लू  र्'वाई
16/11/2016
***
 
---182---
उकळी बाटु, थक्यूँ सरैल
ज्वान खुज्याँदा रै गेन
बुढ़डी़ डाळी-बोट्यूँऽ छैल
18/11/2016
***
 
---183---
कब आला बादऽळ, कब बरखा आली
मैला डाळा-बोटों तैं कब नवाली
तिसऽळि चोळि कब चुप ह्वाली
23/11/2016
***
 
---184---
अजाण पराण
कबि फीकु, कबि मिट्ठु बणी
जिन्दगीऽ कड़ु सच बताँद
23/11/2016
***
 
---185---
बादळूँ बीच मुखड़ि लुकाई
जून छुईमुई-सी सरमै ग्याई
मनखी मन ढुँगु किलै ह्वाई
23/11/2016
***
 
---186---
मंगसीर मैना
फूल घाम तपणौ ऐना
चटकताळा घाम मऽ हीटर चलणा रैनऽ
26/11/2016
***
 
---187---
फूलूँन पूछी किलै छाँ उदास
आवा घाम तापा, छ्'वीं-बथा लगावा खास
वु बैठ नि सकिन व्यस्तताऽ बाना
26/11/2016
***
 
---188---
दिमाग नि लगा, भकळाण म गैन
अपणऽ हि खुटौं पर कुलऽड़ि चलैन
चकडे़त स्याळ धार मऽ र्'वेन
27/11/2016
***
 
---189---
खेल-खेल मा रुमुक ह्वे जाँण
माँजीऽ चौका तीर भटी धै लगाण
कन डैर जाँदु छायु बाळु प्राण
Copyright © सतीश रावत
27/11/2016
***
 
---190---
माँ रखऽद छुटि-छुटि बातूँऽ ख्याल
बड़ि-बड़ि बात सौंगि ह्वे जँदिन
माँ  पछ्'यणदि  छ छुटा मनैऽ बड़ि बात
28/11/2016
***
 
---191---
डाळि सुख पर आस नि गाई
सेवा-भक्ति मऽ क्वी कमि नि ह्वाई
छौंका फुटिन, नयु मौळ्यार आयी
02/12/2016
***
 
---192---
शॉर्टकट इत्गा पसंद आई
अपणा ढंग से परम्परा चलाई
पाथु बिचऽरु, माणु ह्वाई
04/12/2016
***
 
---193---
शहरैऽ मुँगरि मळमळि ह्वाई
पुटुगु भुर्या पर मन रीतु राई
गौं का माटौऽ स्वाद नि आई
05/12/2016
***
 
---194---
गरीब जखा-तखी
चकड़ेतूँऽ बार
योजनौंऽ पकड्ँयू रा सदनि कपाळ
05/12/2016
***
 
---195---
रँगिला-पिंगला फूल छाँ.
हम नऽ, कलम बुलणी.
हम सब्बि समाजाऽ अंग छाँ.
06/12/2016
***
 
---196---
डॉलरऽन उगड़िन भीटा
रुप्यऽन मरिन फळ्ळि
कैशौऽ बैलेंससीट मऽ जगा नि रा ह्वलि
06/12/2016
***
 
---197---
प्रकृति जन स्वाणा हम ह्वे जाँदा
हमऽरु भि जीणु सफल ह्वे जाँदु
हम भि मनखि बण जाँदा
08/12/2016
***
 
---198---
जमीन छोड़ी आसमान लँफ्याँण
जमीन भटी आसमान लँफ्याँण
जमीन आसमानौऽ फरक
08/12/2016
***
 
---199---
माटु उड़ नि जा कखि, डाळि लगौला
पुँगडौंऽ तीर ऊँचि डिमडाळ बणि जौला
कब तक बीजौऽ बि पैंछु मँगणा रौला
12/12/2016
***
 
---200---
रात बिजि ग्या दिनऽ बाना
घाम अछे ग्या जूनऽ बाना
हम लड़णा रै ग्यों अपणऽ बाना
18/12/2016
***
 
---201---
बरखा हूणी
धुरपळि चूणी
स्वारा बाँठु मँगणान
24/12/2016
***
 
---202---
तुम छाँ डाळि-बोटि, गाड-गद्न्यूँ मा
तुम छाँ उचि-निसि डाँडि-काँठ्यूँ मा
हम राँका लेकि खुज्याणा छाँ मैदानूँ मा
24/12/2016
***
 
---203---
हळतुडै़ न  कारा परम्परा निभावा
म्यारु ससुराल परदेश
वखौ लड्डु न, अरसा बणावा
24/12/2016
***
 
---204---
ढुँगु प्राण
रूँदि आँखि
हँसदा लोग
30/12/2016
***
 
---205---
हैरि पुँगड़ि पिंगळि ह्वेन
लय्याऽ फूल फूलि गेन
खुटौंऽ काँडा निकळि गेन
02/01/2017
***
 
---206---
पूषौऽ मैना लय्या फूलि अफार
रंगिला-पिंगला फूलूँ पड़ि बार
फूलूँ मुखड्यूँ मा तुमरि अन्द्वार
03/01/2017
***
 
---207---
स्वाळि-भूड़ि, पूरि-पक्वड़ि पकै दिंया
जरा अपणु भि त्योहार मनै दिंया
अपणि परम्परा पर भी कुछ कृपा कैर दिंया
13/01/2017
***
 
---208---
प्रदूषण तैं दवऽयूँन मिटाणा छाँ
घिंडुड्वी आँसु देखी दया खाणा छाँ
अफु तैं अफी मारी, अफी बुथ्याणा छाँ
15/01/2017
***
 
---209---
चोळि ! तेरि खैरि बींगऽलु कु
सुदि नऽ  हैंस
अछेकी नऽ रू
16/01/2017
***
 
---210---
टैम-टैमै बात
उबरीऽ गुरुजी मार
आज लगऽद प्यार
24/01/2017
***
 
---211---
फ्योलि-सि मुखड़ी
ह्यूँ-सि दँथुड़ी
कित्गा नैसर्गिक छन डाँडि-काँठि
25/01/2017
***
 
---212---
बोल कड़ा कभी ब्वला ना
रिश्ता-नातौं तैं तर्वऽजू मा त्वाला ना
टुटी माळै मेल्यूँ पत्याड़ा ना
28/01/2017
***
 
---213---
फूल हर्चिन, फल ऐन
फौंका निसऽ हूँदा गैन
मनखि तखणेंणा रैन
29/01/2017
***
 
---214---
बाछी मोळ, जौ कि हरियाळिल
मोड़सँगारूँ तैं प्रकृति-सि सजौला
वसंत पंचमी त्योहारौ, आवा प्राकृतिक बण जौला
01/02/2017
***
 
---215---
हम कर्करा ढुंगऽ
प्रकृति नौण-सी
सै नि सकद हमऽरऽ पापूँऽ ताप
07/02/2017
***
 
---216---
क्वी कैथै सुदि नि खलाँद
यु सुचणौ कलियुग मजबूर कैर जाँद
मनखि बिचऽरु टपराणू राँद
10/02/2017
***
 
---217---
ह्यूँ पड़ि, ह्यूँद आयी
हैरि मुखड़ि गोरि ह्वाई
काजऽळौ टीका किलै नि लगाई
10/02/2017
***
 
---218---
हर्चण भि पुड़द, पाणा बाना
हरऽण भि पुड़द, जितणा बाना
जितऽण ही पुड़द, जीणा बाना
13/02/2017
***
 
---219---
पत्तौं नऽ माँग बाँठु अलग ह्वेन
डाळ्यूँऽ आँख्यूँ मा अँसऽधरि ऐन
मुंडाऽ मुकुट खुटौं मुड़ि पतड़ेन
13/02/2017
***
 
---220---
मंगसीरा मैने घामै झैळ
जेठा मैने आमै डाळी छैल
पैंछु त्यारु प्रकृति लौटा कैल
13/02/2017
***
 
---221---
बिरऽणि संस्कृति बचा, अपणि डुबाई
अपणि ताकत अफी लूछि द्याई
खलि बंठा इना-उना लटकेणू राई
14/02/2017
***
 
---222---
मुळ- मुळ हँसणू बुराँस
खित-खित हँसणू बथौं
टूरिस्ट रकरे गेन देखी खालि गौं
17/02/2017
***
 
---223---
टुट्याँ फूलूँ आँखि हँसणी रैन
हँसणै पिड़ा जाण नि कैन
आँखि-हि-आँख्यूँ मा आँसु समैन
17/02/2017
***
 
---224---
डाळि नि पचै साकि इत्गा प्रदूषण
ऑक्सीजनौऽ भंडार मँगणू जीणौ ऑक्सीजन
मनखीऽ मन मा जमणू कार्बन
19/02/2017
***
 
---225---
छैंदा पाणि कब तक तिसऽळा रौला
हमऽरा टैक्साऽ पैंसा कख जाणा होला
कनकै विकासाऽ गीत लगौला
21/02/2017
***
 
---226---
हमऽन का पलायन अपणौंऽ बाना
सुपन्य दिखिन दुनिया दगड़ चलणा बाना
खैरि खा, खैरि खतम करणा बाना
23/02/2017
***
 
---227---
कर्मूंऽ फल पैलि चितै जाँदा
पापाऽ घाड़ा रीता राँदा
हम भी मनखि बण जाँदा
26/02/2017
***
 
---228---
स्वाणि डाँडि-काँठि, रौंतेला गौं
अपणा बाँठै हवा, पाणि, बिजली बँटणू छौं
फिर भि खैरीऽ जोग सरणू छौं
05/03/2017
***
 
---229---
हँसदा-ख्यलदा बरखा आयी
प्रकृति नऽ स्वाणि धुन बणायी
मनखि रा सूखु, मन भिज ग्याई
10/03/2017
***
 
---230---
रंगिला-पिंगळा रंग बण जौला
मुखड़्यूँ मा मुस्कान लौला
द्वी घड़ि अफुतैं बिसरि जौला
11/03/2017
***
 
---231---
माटौऽ मनखि खट टुट ग्यायी
ढुंगौऽ मनखि करकुरु राई
आँसु तऽ मनखि नऽ ही बौगाई
13/3/2017
***
 
---232---
मंगसीरा मैना घाम बणी औलू
जेठा मैना छैल बण जौलू
पितरूँ तैं मनल्या तऽ दगड़ु निभौलु
13/3/2017
***
 
---233---
सुबेर गुठ्यार मा ऐ जाँदि
सुख-दुखैऽ छ्वीं-बथा लगाँदि
घिन्डुड़ि ! कब तेरि याद नि आँदि ?
20/3/2017
***
 
---234---
बिनसिरि ह्वे प्रकृति बिजि ग्यायी
मनखीऽ निंद पूरि नि ह्वायी
सुन्दर सुबेर हर्चै द्यायी
21/3/2017
***
 
---235---
तुमतैं पैलि पछ्याण जाँदा
सबसे अगनै हम राँदा
क्वीला; हीरा बण जाँदा
23/03/2017
***
 
---236---
फूलूँ नऽ ब्वाली हँसणा रावा
काँडौं नऽ ब्वाली चुभणा रावा
डाळि नऽ ब्वाली दगड़ु निभावा
23/03/2017
***
 
---237---
मि, मि नि राँदु
तू, तु नि राँदि
मनख्यातै लगुलि बढणी राँदि
25/03/2017
***
 
---238---
जिन्दगी मुळ- मुळ हँसदि बिंडि बार
कित्गै दाँ जीत मिल्द, कित्गै दाँ मिल्द हार
कित्गा स्वाणु छ संसार
16/04/2017
***
 
---239---
ज्यूँदा रौला तऽ ऑक्सीजन द्योला
मोरि जौला तऽ ठँकरा बण जौला
मनख्यूँ जन मनख्यात निभौला
19/04/2017
***
 
---240---
माटाऽ खेल अब नि दिखेंदा
तिड़ी गल्वड़ि अब नि दिखेंदी
बचपन सँयणु होण बैठ ग्या
22/04/2017
***
 
---241---
जरा मि निसु ह्वे जाँदु
जरा तु निसु ह्वे जाँदि
मनख्यातै सग्वड़ि हैरि-भैरि राँदि
28/04/2017
***
 
---242---
द्वी लपाग तुम बढ़ावा
द्वी लपाग हम बढ़ौला
दुनिया से अगनै निकळ जौला
30/04/2017
***
 
---243---
साँस मठु - मठु चलणी राली
जीवन तैं सर-सर पळणी राली
ग्लेशियरूँऽ जिकुड़ि पिघऽळणी राली
03/05/2017
***
 
---244---
क्वी साथ द्या, नि द्या
मेहनत रंग जरूर लाँद
खैरिऽ जोग कैकु नि आँद ?
05/05/2017
***
 
---245---
अब न चिट्ठी, न पार्सल आँद
जिकुड़ि सारा अब नि लगी राँद
समाज मा व रौंस अब नि दिख्याँद
09/05/2017
***
 
Copyright © सतीश रावत
Critical and Chronological History of Asian Modern Garhwali Songs Tercet /Three lines,  Poets   ; Critical and Chronological History of Modern Garhwali Verses Tercet /Three lines ,  Poets ; Critical and Chronological History of Asian Modern Poetries Tercet /Three lines ,  Poets  ; Poems Contemporary Poetries Tercet /Three lines ,  Poets  ; Contemporary Poetries from Garhwal; Development of Modern Garhwali Verses; Poems Tercet /Three lines ; Critical and Chronological History of South Asian    Modern Garhwali Verses  ; Modern Poetries Tercet /Three lines,  Poets  ; Contemporary Poetries Tercet /Three lines,  Poets  ; Contemporary Poetries Poems  from Pauri Garhwal; Modern Garhwali Songs; Modern Garhwali Verses Tercet /Three lines ; Poems,  Poets   ; Modern Poetries Tercet /Three lines ; Contemporary Poetries  ; Contemporary Poetries from Chamoli Garhwal  ; Critical and Chronological History of Asian Modern Garhwali Verses Tercet /Three lines; Modern Garhwali Verses Tercet /Three lines,  Poets   ; Poems,  Poets  ; Critical and Chronological History of Asian  Modern Poetries; Contemporary Poetries Tercet /Three lines, Poems Poetries from Rudraprayag Garhwal Asia,  Poets   ; Modern Garhwali Songs,  Poets    ; Critical and Chronological History of Asian Modern Garhwali Verses  ; Modern Poetries  ; Contemporary Poetries,  Poets   ; Contemporary Poetries from Tehri Garhwal; Asia  ; Poems  ;  Inspirational and Modern Garhwali Verses Tercet /Three lines; Asian Modern Garhwali Verses  Tercet /Three lines; Modern Poetries; Contemporary Poetries; Contemporary Poetries from Uttarkashi Garhwal  Tercet /Three lines;  Modern Garhwali Songs; Modern Garhwali Verses Tercet /Three lines ; Poems  ; Asian Modern Poetries  ; Critical and Chronological History of Asian Poems  ; Asian Contemporary Poetries; Contemporary Poetries Poems from Dehradun Garhwal; Famous Asian Poets  ;  Famous South Asian Poet ; Famous SAARC Countries Poet Tercet /Three lines ; Critical and Chronological History of Famous Asian Poets of Modern Time Tercet /Three lines ;
-
पौड़ी गढ़वाल, उत्तराखंड  से गढ़वाली , तीन पंक्ति कविता ; चमोली  गढ़वाल, उत्तराखंड  से गढ़वाली पद्य तीन पंक्ति , तीन पंक्ति कविता ; रुद्रप्रयाग गढ़वाल, उत्तराखंड  से गढ़वाली पद्य तीन पंक्ति , कविता ;टिहरी गढ़वाल, उत्तराखंड  से गढ़वाली पद्य तीन पंक्ति , कविता ;उत्तरकाशी गढ़वाल, उत्तराखंड  से गढ़वाली पद्य तीन पंक्ति , तीन पंक्ति कविता ; देहरादून गढ़वाल, उत्तराखंड  से गढ़वाली पद्य तीन पंक्ति , तीन पंक्ति कविता ; 
-

-
  स्वच्छ भारत ; स्वच्छ भारत ; समर्थ गढ़वाल
 
 
 
गढ़वाल सतीश रावत के  आधुनिक लोकगीत/कविताएं , नज्म ;  , उत्तरकाशी गढ़वाल से आधुनिक लोकगीत कविताएं , नज्म;  टिहरी गढ़वाल से आधुनिक लोकगीत कविताएं , नज्म; रुद्रप्रयाग गढ़वाल से आधुनिक लोकगीत कविताएं , नज्म, चमोली गढ़वाल से आधुनिक लोकगीत कविताएं , नज्म, , सलाण से गढ़वाल से आधुनिक लोकगीत; पौड़ी तहसील से  गढ़वाल से आधुनिक लोकगीत कविताएं , नज्म, ; लैंसडौन तहसील  गढ़वाल से आधुनिक लोकगीत , कविताएं , नज्म
 
Garhwali verses, Garhwali Folk Songs, Garhwali Poems
 
Garhwali Verses by Satish Rawat
 
 
 

--
 

Thanking You with regards

B.C.Kukreti

Satirical Garhwali Poem by Payash Pokhara
-
विकास का नौ चार लैन
*******************
डिलि-द्यारादूणा ल म्यारा भय्यूं थैं इनु रुजगार द्याया |
आज म्यारा गांवा कि इक्कैक घर-कूड़ि खंद्वार ह्वाया ||
ठिट्ट चुलखन्दिम तक काळि डमरौण्यां सड़क पौंछे याल |
गांवा कि खुट्टि भैर रड़ाणा को कन सौंगि सौंग्यार ह्वाया ||
आळौ मा द्यू बतूलु,जळ्वठौं मा चिमिनि नि चमकदि अब |
गांवा का सूरज फर त चुकापट्ट अंध्यरौं की अंद्वार आया ||
घम-पाणि बिजिलि(1) त अब सरकरि पिनसनेर ह्वै ग्याई |
तू ये वैम मा नि रै कि त्यारा गौं मा कभि उदकांर ह्वाया ||
(1) सौर ऊर्जा-पन बिजली
@पयाश पोखड़ा |

Critical and Chronological History of Asian Modern Garhwali Folk Songs,  Poets   ; Critical and Chronological History ofModern Garhwali Folk Verses,  Poets ; Critical and Chronological History of Asian Modern Poetries,  Poets  ; Poems Contemporary Poetries,  Poets  ; Contemporary folk Poetries from Garhwal; Development of Modern Garhwali Folk Songs ; Poems  ; Critical and Chronological History of South Asian    Modern Garhwali Folk Verses  ; Modern Poetries ,  Poets  ; Contemporary Poetries,  Poets  ; Contemporary folk Poetries Poems  from Pauri Garhwal; Modern Garhwali Folk Songs; Modern Garhwali Folk Verses  ; Poems,  Poets   ; Modern Poetries  ; Contemporary Poetries  ; Contemporary folk Poetries from Chamoli Garhwal  ; Critical and Chronological History of Asian Modern Garhwali Folk Songs  ; Modern Garhwali Folk Verses,  Poets   ; Poems,  Poets  ; Critical and Chronological History of Asian  Modern Poetries; Contemporary Poetries , Poems folk Poetries from Rudraprayag Garhwal Asia,  Poets   ; Modern Garhwali Folk Songs,  Poets    ; Critical andChronological History of Asian Modern Garhwali Folk Verses  ; Modern Poetries  ; Contemporary Poetries,  Poets   ; Contemporary folk Poetries from Tehri Garhwal; Asia  ; Poems  ;  Inspirational and Modern Garhwali Folk Songs  ; Asian Modern Garhwali Folk Verses  ; Modern Poetries; Contemporary Poetries; Contemporary Folk Poetries from Uttarkashi Garhwal  ;  Modern Garhwali Folk Songs; Modern Garhwali Folk Verses  ; Poems  ; Asian Modern Poetries  ; Critical andChronological History of Asian Poems  ; Asian Contemporary Poetries; Contemporary folk Poetries Poems from Dehradun Garhwal; Famous Asian Poets  ;  Famous South Asian Poet ; Famous SAARC Countries Poet  ; Critical and ChronologicalHistory of Famous Asian Poets of Modern Time  ;

शादी के सात बचनों का छंदयुक्त गढ़वाली अनुवाद
-
भवानुवादक - कृष्ण कुमार ममगाईं
-
 
ब्यो का 7 बचन गढ़वाली स्लोक :
=
जु शादिसुदा झन उ फेरौं का यूँ 7  बचनू थैं मनन कैरा अर जौंका ब्यो हूंणा छन उ रियलसल कैरा।  संस्कृत का मन्त्रु कु यु  गढ़वाली ड्राफ्ट रूपान्तर जन चा ।
प्रथम वचन:
तीर्थव्रतोद्यापन यज्ञकर्म मया सहैव प्रियवयं कुर्या:,
वामांगमायामि तदा त्वदीयं ब्रवीति वाक्यं प्रथमं कुमारी !!
 
                     याने   (गढ़वालिम)   
 
तीर्थुम बरतुम यज्ञोंम पाठुम,
दगड़ी रखल्य जू अपणां हि साथम ।
वामांग मा औलु तभी तुम्हारा   
पैलू बचन यो ब्वल्दा कुमारी  ॥
द्वितीय वचन:
पुज्यौ यथा स्वौ पितरौ ममापि तथेशभक्तो निजकर्म कुर्या:,
वामांगमायामि तदा त्वदीयं ब्रवीति कन्या वचनं द्वितीयम !!

                     याने  (गढ़वालिम)
 
अपड़ा ब्वै-बब्बु जन म्यारा भि मनल्या,
मर्यादा जन सब्बी कर्म कल्या ।
वामांग मा औलु तभी तुमारा   
दुसरू बचन यो ब्वल्दा कुमारी  ॥
तृतीय वचन:

जीवनम अवस्थात्रये मम पालनां कुर्यात,
वामांगंयामि तदा त्वदीयं ब्रवीति कन्या वचनं तृ्तीयं !!

                     याने   (गढ़वालिम)
 
जीवन कि तिन्नी अवस्थौं म मेरी,
मेरु जु पालन करल्या त ब्वाला ।
वामांग मा औलु तभी तुमारा     
तिसरू बचन यो ब्वल्दा कुमारी  ॥
 

चतुर्थ वचन:

कुटुम्बसंपालनसर्वकार्य कर्तु प्रतिज्ञां यदि कातं कुर्या:,
वामांगमायामि तदा त्वदीयं ब्रवीति कन्या वचनं चतुर्थं !!

                     याने  (गढ़वालिम)
 
कुटुम्ब पालनकि सबि जुम्मेबारी,
लींदा प्रतिज्ञ उठांणा कि सारी ।
वामांग मा औलु तभी तुमारा     
चौथू बचन यो ब्वल्दा कुमारी  ॥
पंचम वचन:

स्वसद्यकार्ये व्यवहारकर्मण्ये व्यये मामापि मन्त्रयेथा,
वामांगमायामि तदा त्वदीयं ब्रूते वच: पंचमत्र कन्या !!

                     याने  (गढ़वालिम)
 
घर-भैरा कामुम कै भी व्यवहारम,
खर्चा कनम जू मीं थैं भि पुछल्या ।
वामांग मा औलु तभी तुमारा     
पांचौं बचन यो ब्वल्दा कुमारी  ॥
षष्ठम वचनः

न मेपमानमं सविधे सखीनां द्यूतं न वा दुर्व्यसनं भंजश्चेत,
वामाम्गमायामि तदा त्वदीयं ब्रवीति कन्या वचनं च षष्ठम !!

                     याने  (गढ़वालिम)
 
अपमान नी कल्या दगड़्यों क बीचम,
जुवा आदि ब्यसनौ से रैल्या दूर ।
वामांग मा औलु तभी तुमारा     
छट्टू बचन यो ब्वल्दा कुमारी  ॥
सप्तम वचनः

परस्त्रियं मातृसमां समीक्ष्य स्नेहं सदा चेन्मयि कान्त कुर्या,
वामांगमायामि तदा त्वदीयं ब्रूते वच: सप्तममत्र कन्या !!

                     याने   (गढ़वालिम)
बक्की जननौ थैं माँ जन्न मनल्या
अर हमरा प्रेमम हैंकै नि स्वचल्या ।
वामांग मा औलु तभी तुमारा     
सातौं बचन यो ब्वल्दा कुमारी  ॥
 
Of and By  : कृष्ण कुमार ममगांई
ग्राम मोल्ठी, पट्टी पैडुल स्यूं, पौड़ी गढ़वाल
[फिलहाल दिल्लि म] :: [जै भैरव नाथ जी की ]
*************************  ‘
--
Asian  Modern Garhwali Folk Songs, Modern Garhwali Folk Verses, Asian Modern Poetries, Poems Contemporary Poetries, Contemporary folk Poetries from Garhwal; Development of Modern Garhwali Folk Songs, Poems, South Asian    Modern Garhwali Folk Verses, Modern Poetries, Contemporary Poetries, Contemporary folk Poetries Poems  from Pauri Garhwal; Modern Garhwali Folk Songs, Modern Garhwali Folk Verses, Poems , Modern Poetries, Contemporary Poetries, Contemporary folk Poetries from Chamoli Garhwal; Asian Modern Garhwali Folk Songs, Modern Garhwali Folk Verses, Poems, Asian  Modern Poetries, Contemporary Poetries, Poems folk Poetries from Rudraprayag Garhwal Asia; Modern Garhwali Folk Songs, , Asian Modern Garhwali Folk Verses, Modern Poetries, Contemporary Poetries, Contemporary folk Poetries from Tehri Garhwal, Asia ; Poems,  Inspirational and Modern Garhwali Folk Songs, Asian Modern Garhwali Folk Verses, Modern Poetries, Contemporary Poetries, Contemporary Folk Poetries from Uttarkashi Garhwal; , Modern Garhwali Folk Songs, Modern Garhwali Folk Verses, Poems, AsianModern Poetries, Asian Poems, Asian Contemporary Poetries, Contemporary folk Poetries Poems from Dehradun Garhwal; Famous Asian Poets, Famous South Asian Poet , Famous SAARC Countries Poet , Famous Asian Poets of Modern Time,
पौड़ी गढ़वाल, उत्तराखंड  से गढ़वाली लोकगीत , कविता ; चमोली  गढ़वाल, उत्तराखंड  से गढ़वाली लोकगीत , कविता ; रुद्रप्रयाग गढ़वाल, उत्तराखंड  से गढ़वालीलोकगीत , कविता ;टिहरी गढ़वाल, उत्तराखंड  से गढ़वाली लोकगीत , कविता ;उत्तरकाशी गढ़वाल, उत्तराखंड  से गढ़वाली लोकगीत , कविता ; देहरादून गढ़वाल,उत्तराखंड  से गढ़वाली लोकगीत , कविता ;   Asian Poems for ; South Asian Poems for  ; Indian Poems for  ; North Indian Poems for   ; Himalayan Poems for

गढ़वाली दोहा  ““पखणौं  का  बुखणां””
.

Garhwali Couplets by Krishan Mamgain

दोहा लम्बर 161 :
.
गुरु त गुड़ ही रै ग्यया 

च्याला शक्कर बणिं जांद ।

फिर भी चेला गुरुम ही   

गुर सिखणूं कू आंद ॥ [१६१]

.

 
दोहा लम्बर 162 :
.
तू ठगणी कू ठग छई   

मी जाती कू ठग ।

पार नि पै सकदू मेरू

कोशिस कैर जतग ॥ (१६२)

. 
दोहा लम्बर 155 :
.
नाच नचणु त आंद नी 

करलु बतांदा चौक ।

अपणीं कमी छुपांण कू   

बाना  हुंदन  भौत  ॥ (१५५)

.दोहा लम्बर 143 :
.
शक कु इलाज हूंद नी 
हो लुकमान हकीम  ।

शक से पीछु छुड़ाण मां 

फेल सभी स्कीम ॥ [१४३]

.

दोहा लम्बर 127:
.
हैंककु  लाटु हंसांदु चा   

अपड़ू  लाटु रुलांद ।

दुनियां की या रीत चा 

दुख बस अपड़ु सतांद ॥ (१२७)

.

दोहा लम्बर 105:
.
कैकि मरीनी गैबणीं   

लैंदी कैकि खांद ।

ईं शरम कू बाग यू 

दिनम गौंम नी आंद ॥ (१०५)

.

 

 

 

 

 

 

दोहा लम्बर 144 :
.
अपड़ु हि सूनू खोटु रा
कै पर दींण क्य दोष ।
आस त इन्नी कै नि छै
बैठ्यां छां खामोश ॥ [१४४]

 

दोहा लम्बर 120:
.
क्या कन ये नौन्याल कू
अपड़ि मस्ति मां रांद ।
काम काज कुछ करदु नी
हगदिदां गीत लगांद ॥ (१२०)

 

दोहा लम्बर 69:


अन्ध्यरी और बिन्दरि का     

भितरकि जंणद नि छाय ।

अल्ट्रसौंड पर कांडा लग्या 

भ्रूण हत्य पनपाय ॥ (६९)

 

दोहा लम्बर 60:


कन भग्यानका भाग की 

मिलदि खणीं च खाड ।

निरभगि थैंत दबाणुं कू   

मिलदू नी चा माटु ॥ (६०)

 

बाकी फिर कभी अगले अंक में ........

 
Of and By  : कृष्ण कुमार ममगांई
ग्राम मोल्ठी, पट्टी पैडुल स्यूं, पौड़ी गढ़वाल
[फिलहाल दिल्लि म]  :: {जै भैरव नाथ जी की }

--
 

Thanking You with regards

B.C.Kukreti

Garhwali Poems by Sunil Bhatt

"बड़ु गुरू घंटाल"
-
By Sunil Bhatt
=

बाघै खाल,
निकलणु वालु,
ऊ दिल्ली वालु,
भौतै होश्यार
चितौंदू छौ अफुतैं।

देखो जी, यह लो जी,
बोलो जी, कैरि जी जी,
निपट्ट  ईमानदार
बतौंदू छौ अफुतैं।

ह्याँ बल......
"तू ठगणी कु ठग
अर मी जाति कुईई ठग"
हे ब्वै मिन त चितै जणी "यु"
भ्रष्टाचारियोंकु काल छ,
दा निराश ह्वैली ये कुणै..
हे यु बी भै बड़ु गुरू घंटाल छ।।

स्वरचित/**सुनील भट्ट***
10/05/2017

Garhwali Poems, Folk Songs , verses from Garhwal, Uttarakhand; Garhwali Poems, Folk Songs , verses from Pauri Garhwal, Uttarakhand; Garhwali Poems, Folk Songs , verses from Chamoli Garhwal, Uttarakhand; Garhwali Poems, Folk Songs , verses from Rudraprayag Garhwal, Uttarakhand; Garhwali Poems, Folk Songs , verses from Tehri Garhwal, Uttarakhand; Garhwali Poems, Folk Songs , verses from Uttarkashi Garhwal, Uttarakhand; Garhwali Poems, Folk Songs , verses from Dehradun Garhwal, Uttarakhand; Garhwali Poems, Folk Songs , verses from Haridwar Garhwal, Uttarakhand; Himalayan Poetries, North Indian Poetries , Indian Poems, SAARC countries poems, Asian Poems