MeraPahad Community Of Uttarakhand Lovers

*******तेरि तकदीरकु मिन बि क्य कन********
                   कवि-डॉ नरेन्द्र गौनियाल

मि चांदु कि तू खुश रहे सदनि इनी.
पण तेरि तकदीरकु मिन बि क्य कन.

हवामहल बि त्वे नि दिखै कबी.
भूखो-प्यासो बि त्वे नि रखो कबी.
मि चांदु तेरि हर हसरत हो पूरी इनी.
पण तेरि तकदीरकु मिन बि क्य कन.

गिच गफा अर मुंड ढकणो एक कूड़ी बि हो.
बदन पर लैरी-लती बि हो इनि भलि-भली.
मि त चांदु कि तू नूर,सदनि इनि नूर ही रहे.
पण तेरि तकदीरकु मिन बि क्य कन.

कबी दुःख नि दे,न कबी सताई त्वे.
न कबी कर्म से न मर्म से, दुखाई त्वे.
 हर दिन हर घड़ी तेरो ख्याल करे.
पण तेरि तकदीरकु मिन बि क्य कन.

मितै रैंद सदनि तेरि अंसधरी कि फिकर.
मितै रैंद सदनि तेरि भावना कि कदर.
इनि चांदु सदनि मि मेरि सरि जिंदगी.
पण तेरि तकदीरकु मिन बि क्य कन.

मेरो सुख बि घटद,त्वे दुखी देखिकी.
मेरो दुःख बि घटद,त्वे सुखी देखिकी.
इनि चांदु मि मेरि कटे भली जिंदगी.
पण तेरि तकदीरकु मिन बि क्य कन.

तन कि रीत य सदनि रहे इनी.
मन कि प्रीत य सदनि रहे इनी.
इनी चांदु मि मेरि सुखी जिंदगी.
पण तेरि तकदीरकु मिन बि क्य कन.

       डॉ नरेन्द्र गौनियाल..सर्वाधिकार सुरक्षित   

*******ये देश का सपूतो ********




          कवि- डॉ नरेन्द्र गौनियाल

ये देश का सपूतो,तुम तै प्रणाम करदु.
तुम्हरा खुट्यूं मा बीरो,अपणु मुंड मि धरदु.

देश का खातिर ही,तुमन गवैंयी प्राण.
तुम्हरा त्याग से ही,आजादी हमन जाण.

सूळी पर लट्गी ग्यो,हंशी-ख़ुशी से तुम.
तुम्हरा बलिदान से,आजाद छौ हुयाँ हम.

धन हे लक्ष्मीबाई,धन रे भगत सिंह.
दत्त,शेखर,गुरु तुम,धन रे तू बिस्मिल.

धन-धन हे बोस त्वैकू,धन-धन महात्मा जी.
धन-धन पटेल-नेरु,धन-धन सभी सपूतो.

धन-धन हे देव सुमन,धन-धन भंडारी माधो.
धन-धन तीलू रौतेली,धन चन्द्र सिंह गढ़वाली.

धन-धन पुखर्याळ गीता,धन-धन हे शीशराम.
धन-धन हे थानी नेता,धन गुजडू का सपूतो.

कतगौंन खाई मार,हथ-खुटा भली कै तोडा.
कतगौं कि ह्वैयी कुर्की,घर-बार तौन छोड़ा.

कतगौं कि खुचिली रीती,कतगों कि मांग सूनी.
कतगों तै लगी फांसी,गोल्योंन कतगे भूनी.

चालाक फिरंगियों तै,तुमन खदेड़ी द्याई.
तन-मन अर धन लगैकी,आजादी तुमन द्याई.

आजादी कु इतिहास,ल्वे से तुमन लिख्योंऊ.
अजर-अमर ही रालो,तुम्हरो यु त्याग बीरो.

        डॉ नरेन्द्र गौनियाल..सर्वाधिकार सुरक्षित.. narendragauniyal@gmail.com

ढ़वाली कविता--सरकरि रूप्या बुसे जन्दिन
        कवि- डॉ नरेन्द्र गौनियाल

सरकरि योजना
हर गौं मा
सड़क पौंछाण
बड़ी इस्कीम
बड़ो विभाग
बड़ो बजट

इन्जीनेर का बदल
चपड़सि
सर्वे कैरि दींद
सड़क तै
उकाळ -उन्दार
भ्यटा-पाखों
जख मर्जी
धैरि दींद

सियूँ विभाग
कंट्री ठेकेदार
सुद्दी माटु छल्कैकि
स्याल़ा कि सि कूडि
बणे दींद
मकड़ा कि सि मुतीं
हळकि बरखा बि
सड़क तै
बोगाई दींद
योजना फेल
गौं का लोग
खिसये जन्दिन
सरकरि रूप्या
बुसे जन्दिन. 

     डॉ नरेन्द्र गौनियाल ..सर्वाधिकार सुरक्षित.

-----त येमा कैकु कसूर छा*********

        कवि-डॉ नरेन्द्र गौनियाल

ढयूँ-ढयूँ मा
इस्कूल खुलीं छन
साल भर
छोरी-छोरा
पढ़ीं नि पढ़ीं
पास हुणे
गारंटी छा
मास्टर जि
पढैं-नि पढैं
तनखा
मैना-मैना
पकणी छा
कोर्स पुरु हो नि हो
इम्तहान मा
इंतजाम
पुरु छा
इतगा मा बि क्वी
फेल ह्वै जांद
त येमा कैकु
कसूर छा.

     डॉ नरेन्द्र गौनियाल ..सर्वाधिकार सुरक्षित   

*******त्वे किलै हुयूं कपचाट रे ******

             कवि -डॉ नरेन्द्र गौनियाल

क्वी खाणू च
खाणि दे
क्वी पीणू च
पीणि दे
क्वी हैंसणू च
हैंसणि दे
क्वी रूणू च
रूणि दे
क्वी सीणू च
सीणि दे
क्वी अपणि
निखणि करणू 
करणि दे
रैणि दे
जु ज्य बि कर्द
करणि दे
तू अपणि सोच
अपणि
पुट्गी देख
अपणि
लुतगी देख
अपणि
हड्गी देख
अपणि
ल्वे देख
अपणि
ज्वै देख
निर्भगी तेरो
किलै हुयूं
रपचाट रे 
त्वे किलै हुयूं
कपचाट रे .

      डॉ नरेन्द्र गौनियाल ..सर्वाधिकार सुरक्षित...