MeraPahad Community Of Uttarakhand Lovers

मुर्गा कनै गै? (दुसुरु भाग)

हैंक ब्यखुनी चरि चोरों की फीरि मती मोरी गे।
घुंगर्या बरांड एक जैरकन वूंल कची घटगै दे।।
।
कची का पुटग जांदी वूंकी लगण लैगे घाण।
ग्यारा सौ फीरि डांड द्यूंला घ्यपळी घपगाण।।
।
अधा राती मा बबडाट करदा घ्यपळी कु घौर कु गैं।
घ्यपळी कु घार समझी वूंल पदनौं का द्वार भटगैं।।
।
अस्वाल बाडा ल समझैकि वूंकू घौर कु पैटा दीं।
निरभग्यों की उल्टी खोपड़ी हैंक बाट लगी गैं।।
।
बियण्या टैम घ्यपळी काका का घार माैं पौंछी गैं।
काका भ्यार जयूंछौ वूंकू समधी थै सटगै गैं।।
।
काकि त पैली भग्यान ह्वै गेछै, भुलि भि ब्यवै दे।
मुर्गा कु सूंणिकी काका कु समधी मिलणौं अयूं रै।।
।
काका कु भितर आणु क्य ह्वैई समधी कणाणू रै।
घ्यपळी काका ल चट फोन मिलैक पुलिस बुलै दे।।
।
थाणा लिजैक चरि चोरों क वूंल मुर्गा बणै द्याई।
थाणादार कुकरेती जी वूंथै लगलि ठ्वकणा छाई।।
।
तबी बुनूंच "दर्शन "फीरि बडु ह्वैलु बडु जनु रै।
कमजोर ल्वखु की हाय लगद नाजैज ना सतै।।

नाम, जगा, घटना सब काल्पनिक छैं। कैसे कैकु क्वी संबंध नीछ।

सर्वाधिकार सुरक्षित@:-दर्शनसिंह रावत "पडखंडांई "
दिनांक 03/09/2015

Darshan Singh with Sudesh Bhatt
August 25 at 11:56am ·

रखडी (राखी) कु त्योहार नजदीक च। जौं कि भैणि या भाई नि ह्वाला, वूं थैं कनु लगदु होलु। --------------------------------------------------

कनू छै विधाता तू त निरदयी रैई।
रखडी त्यौहार द्याई भैणी नि देई।।
कनु छै विधाता तू त निरदयी रैई।
रखडी त्यौहार द्याई भाई नि द्याई।।

एक भैणी मीकू दिंदु क्या बिगड़ी जांदू।
ए त्यौहार मि भि त्वैकु भेट पिठै ल्यांदु।।
एक भाई मीकू दिंदु क्या बिगड़ी जांदू।
ए त्यौहार मि भि त्वैकु भेट पिठै ल्यांदु।।

जौं भयों कि भैणि ह्वैलि रखडी पैराला।
बिना भैणि वळा छ्वारा प्यटा प्यटि र्वाला।।
जौं भैण्यू का भाई ह्वाला रखडी पैराली।
बिना भायों वळी छे्वरी प्यटा प्यटी र्वेली।।

त्योहार का बान सुदी दंतुडी द्यखाला।
आंख्यू का कूणू मा छ्वारा आंसू लुकाला।।
त्योहार का बान सुदी दंतुडी द्यखाली।
आंख्यू का कूणू मा छ्वेरी आंसू लुकाली।।

दगड्या भग्यान म्यारा रखडी पैराला।
अपणी भैण्यू का हथौं खटी मीठि खाला।।
दगड्या भग्यान मेरी रखडी पैराली।
अपणा भयों थै टीका पिठैई लगाली।।

त्योहार कू भैणी नि दे त्यारु च कसूर।
खुशि कनकै मनौलु नि दे घार पूरू।।
त्योहार कू भाई नि दे त्यारु च कसूर।
खुशि कनकै मनौलु नि दे घार पूरू।।

निठुर समिझि मिल, क्याच तेरी माया।
धर्म्यालि भैणि, त्वैन मीकू दे ही द्याया।।
निठुर समिझि मिल, क्याच तेरी माया।
धर्म्यालु भाई, त्वैन मीकू दे ही द्याया।।

ऐंसु की रखडी,देवी तु ह्वै जैई दैणी।
भैण्यू थै तु भाई देई,भायों थैई भैणी।।
ऐंसु की रखडी, देवी................

सर्वाधिकार
सुरक्षित @दर्शनसिंह रावत "पडखंडाई
दिनांक 25/08/2015

Darshan Singh
August 17 · Edited ·

दगड्याें एक हैंस्वाड कविता भ्यजणू छौं।
आप ल्वखु थैं हैंसिसि ऐलि त धन्य समझुलु।

"जागरु मा रेलगाड़ी "

यीं ही हुडकि मा जागर लगणा छाई।
बडु गौं की बात छाई,
जागर थाड मा ना फांग मा लगणा छाई।
जगरी ल सब्यी द्यबता नचै की,
ब्वाल -जजमान जी ह्वैग्याई?
इथगा मा कुतग्यों की अवाज आई,
न न ना रेलगाड़ी त अजि रै ग्याई।
वु तीस पैंतीस खड़ा ह्वैकि,
कट्ठा नचदा छाई।
सैब सुणदरौं का तीन,
फ्यारा फिरांदा छाई।।
जगरी ल भि मुंड फर हाथ लगाई।
जनु वैसे भौत बडि गल्ति ह्वैग्याई।।
जगरी ल हाथ जोड़िकि हुडकि उठाई।
धौं धौं धौं छुक छुक छुक थाप लगाई।।
जगरी धौं धौं धौं छुक छुक छुक बजाणू छाई।
रेलगाड़ी का एक एक डब्बा ज्वणीणा छाई।।
पैलु फ्यारा त ठिक ठाक ह्वैग्याई।
दुसुरु फ्यारा मा एक डब्बा गोल ह्वैग्याई।।
गारड वलु डब्बा दौडिक अगनै आई।
ब्वाल बंद करा जागर,
नुकसान ह्वैग्याई।
सब्यों ल हाथ जोड़िकि पूछ-
परमेश्वरा बता क्या ह्वाई?
ब्वाल एक डब्बा ताळ,
कंडळि कु बुज्या पोडि ग्याई।।
वख स्याल विअयूं छाई,
वैल रेलकु डब्बा गंमजै द्याई।
रेलगाड़ी भि एक झटका मा,
खडि ह्वै ग्याई।
अब रेलगाड़ी कु नचुणु भि,
बंद ह्वै ग्याई।।

सर्वाधिकार सुरक्षित @दर्शनसिंह रावत "पडखंडाई "
दिनांक 17/08/2015

मेरी भूमि भूम्याली

मेरी भूमि भूम्याली
बणों बणों मा पसरी हैरायलि
कख जानू ये छोड़ी की लाटा
ये ना छिन तेरा जणा का बाटा
मेरी भूमि भूम्याली

कया कया नि द्याई इन हम थे
कया कया नि पाई हमुल इं से
जब विं थे देना की बारी ऐ
भुला तू ये बकसा उठे कख हीटे
मेरी भूमि भूम्याली

बगत नि रैगे पैलि जनि अब
मिल बी मान नि राई पैली जनि लोक
पर तू किलै की बदल्नु छे रे
अपरा बाण ही तू किलै जिनु छे रे
मेरी भूमि भूम्याली

देख आस लगै कि वा बी बैंठी चा
तू बी यख रैकी साथ निभै ले
क्या पाई इन ते थे पढ़े लिखे की
तेरो बी सोर बल भैर ही सजे रे
मेरी भूमि भूम्याली

बालकृष्ण डी ध्यानी
देवभूमि बद्री-केदारनाथ
मेरा ब्लोग्स
http://balkrishna-dhyani.blogspot.in/search/
http://www.merapahadforum.com/
में पूर्व प्रकाशित -सर्वाधिकार सुरक्षित

ऐ बार तू बी ऐजा कौथिगा मा

ऐ बार तू बी ऐजा कौथिगा मा
बोई भगवती का मंदिर मा
भेंट चढ़ूँला हात जोडिकी
मोंड टेकोंलु खुठा बौड़ीकी

आशीष देलि बोई जी भोरीकि
अपरा द्वि हाथ खोलि कि
देर ना कैरा स्वामी झट दौड़ी आ
अपरा गौं देब्तों से भेटि जा

नागरा निशाण ढोल दामो बाजू जी
हल्दू चवलों कू टिका कप्ला मा लगुजी
डोली बोई की सरया पाड़ा मा घुमी ऐ
जयकार बोई का चौधिशा मा छैई गे

ऐ बार तू बी ऐजा कौथिगा मा
बोई भगवती का मंदिर मा
भेंट चढ़ूँला हात जोडिकी
मोंड टेकोंलु खुठा बौड़ीकी

बालकृष्ण डी ध्यानी
देवभूमि बद्री-केदारनाथ
मेरा ब्लोग्स
http://balkrishna-dhyani.blogspot.in/search/
http://www.merapahadforum.com/
में पूर्व प्रकाशित -सर्वाधिकार सुरक्षित