MeraPahad Community Of Uttarakhand Lovers

मदन डुकलाण कि गढवाळि गजल

[ गढ़वळि  गजल विधा तै अग्वाडि बढ़ाणम मदन डुकलाण क काम भौत इ जादा च . मदन डुकलाण कि गजलों खासियत या च बल यूँ गजलों मा पहाड़ क सरोकार  त होंदी छन दगड मा गजलूं  पर गढवळी छाप पुरी तरां से रौंद. फिर गजलूं मा एक तीस हूंद ,  एक टीस हूंद; , रूमानियत हूंद, एक तरलता हूं, एक बौगाण (बहाव) हूंद .मदन कि  हरेक गजल बंचनेर तै चौन्कांदी जरूर च अर पाठक तै घड्याणो /सोचणो मजबूर करदी . कबीर कु उलटवासी या विरोधाभास दिखणायि त ल्याओ मदन डुकलाण कि गजल बाँचो  - भीष्म कुकरेती ]

  मिल त वो अपणो जीवन इनी भ्वाग भैजी

बचपन रौ नांगो  जवानी पसिना मा बौग भैजी I

अर जैका बान  मिल यो जोगी को भेष धारो

वो भी कबि णि मीलो , छौ मेरो भाग भैजी

जै बि दै गास-गफ्फा, वी बिल्कदों   कुकुर सि

आंदो च  नी समज मा दुनिया को राग भैजी

चौछड़ी   च हाई हाई, लुटालुटी  मची च शोषण

यख न धुंवा, न खारो , कन भारी आग भैजी

अब ये मुलक का ढिबरा  नि जळकदा-बिचळदा 

यो रंग को सफेद फैली गे बाग़ भैजी

अब ज्वान ल्वैइ परा बी कुचः रै चरक -फरक नी

जाणा छन अबट ये, लग कैकु दाग भैजी


(साभार- हिलांस, जन.फरवरी १९८९)

सर्वाधिकार @ मदन डुकलाण , देहरादून . २०१२ 

फुन्द्या .

[पूरण पंत एक व्यंगकार च पण जादातर कवितौं मा एक रोस, एक गुस्सा जरूर दिख्यांद ]

कविता: पूरण पन्त पथिक देहरादून उत्तराखंड


हमत अपणौ की छवीं लगाना छाया
खामखाँ ऐन बीचम कखा फुन्द्या .
फूल मुर्झैन धरती बी शरमाई गे
कन लग्यां छन कुहाल निरभागी फुन्द्या .
भत्त्याभंग कैरिकै उत्तराखंडौ  सर्रा
छत्त्यानाश पर मिस्याँ असगुनी फुन्द्या .
बिसरी कै  दूद अपणी ब्वे- इजा को
कन कना राज छन निगुरा फुन्द्या.
पितर कूड्यों की कैरिकी अहा कुदशा
माला पैरिकी,हैंसन लग्यां इ फुन्द्या .
मुखडी /जिकुड़ी की लापता ह्वैगे पछ्याण
लुंड -मुंड -तुण्ड यख बण्या छन फुन्द्या .
थकुळि  माँ आग पैदा अब होण लगे
ठट्टा समझण लग्याँ इ निरसा फुन्द्या .
बगत पूछलो जब बी छक्क्वेइ सवाल
कूण कख कुमच्याराकई लुकला फुन्द्या .
@ पूरण पन्त पथिक देहरादून उत्तराखंड

साँची माया सदानि त्यरा

कोरा मन सी लगान्दी गै

त्वैमा अर मैमा फरक इदगी छ

मै रोंदी गै अर तू रुलान्दी रै !


दोस त्यारू नि दोस म्यारू छै

बर्षों बीटि कुछ नि चितांदी गै

त्वैमा अर मैमा फरक इतगी छ

मै सुणदी रै अर तू सुणादी गै !


त्यरा बाना साथ कत्गों कु छोड़ी

यकुली आज गाणियों गणादी गै

त्वैमा अर मैमा फरक इतगी छ

मै झुरदी रै अर तू झुरान्दी गै !


रोई रोई ज्यू म्यारु ह्वै खारु

तू मुज्याँ खारा सुल्गांदी गै

त्वैमा अर मैमा फरक इतगी छ

मै जगदि रै अर तू जलान्दी गै !


प्रभात सेमवाल ( अजाण )सर्वाधिकार सुरक्षित

उबर  लुक्यूं रै (गढ़वळी कविता )

कवि   :पूरण पन्त पथिक


क्यों कनु  छै घ्याळ   छ्वारा ,अपणा वाबरा लुक्यूं रै


चुसणा  बी त्वे मिलणु   नी छ ,अपणा वाबरा लुक्यूं रै.
रीति बदले नीति -फर्ज .कर्म वाबरा लुक्यूं रै
मुस्द्वाल्यूं का पुटग राजनीति ,घुन्ता वाबरा लुक्यूं रै .
 
सुपिना बिंडी द्यखिन ट्वैन ,अपणा वाबरा लुक्यूं रै
बनिग्ये उत्तराखंड खुश तू ,अपणा वाबरा लुक्यूं रै.

मार बीडी सोड़   ,सरकारी दारु बि  घट्येली ले
झांझ मां तू टुण्ड ह्वैकै अपणा वाबरा लुक्यूं रै .
नौं कमाणा भली बात कन्दुदू बयालो सुणी कै
 मदघट मां नी बैठ छ्वारा ,अपणा वाबरा लुक्यूं रै.
कैको ,क्या, कनो किलै कैन घाम बी शर्मान्दो रै
जून-गैणा सन्ट ह्वेन अपणा वाबरा लुक्यूं रै .

अलगसी-कुसगोरी छ्वारा अपणा वाबरा लुक्यूं रै
ब्वे  का सौं त्वे घ्याळ  नि   कैरी अपणा वाबरा लुक्यों रै .
 रंद-मंदी घपळचौदस  सरसू -झैडु  बाघ ह्वै
क्यों भुत्ये बे छळयुं  छ्वारा अपणा वाबरा लुक्यों रै .
@पूरण पन्त पथिक देहरादून

मेरा पहाड़ ........

कवि : पूरण पन्त पथिक
 
देवभूमि त्वैको ब्वदीन उत्तराखंड ,हिमवंत तेरो नाम केदारखंड
खंड ही खंड रैगैन वार बटी छ्वाड, मेरा पहाड़ ,मेरा पहाड़ .
गंडेळ  किदला जाना जीव बण्या छां ,माछौं को नों नी कखी , डौखा बण्या  छां
चौंर्या स्याल बिंडी ,हर्चिगैन काखड़  ,मेरा पहाड़ ...........

गंगा जमुना को मैत निरपाणी  डांडा, बुतण  लग्यां  सबी कांडा ही कांडा
पाणी सुख्युं ,धंद हर्चीं रगड़ - बगड़ ,मेरा पहाड़ ...........
गौली कै ह्यूं गदिन्युं रौल्युं समैगे ,ढुंगा रैडी-बोगी बोगी गंगल्वादा ह्वैगे
किलारोडी प्वाड्दीन भारी उखाड़ -पखाड,मेरा पहाड़ ...........

लापता खाडू का हम सिंग बण्या छां ,छोट्टू क्वी  रायो निछ ,ब़डा बण्या छां ,
किले जी होंद इनो ,बिजोग प्वाड, मेरा पहाड़ .............
@पूरण पन्त पथिक देहरादून