MeraPahad Community Of Uttarakhand Lovers

गढ़वाली हास्य -व्यंग्य
सौज सौज मा मजाक मसखरी
हौंस,चबोड़,चखन्यौ   
सौज सौज मा गंभीर छ्वीं
                           बखरौं ग्वेर उळकाणु/उल्लू
                          चबोड़्या - चखन्यौर्या: भीष्म कुकरेती
(s = आधी अ )

                                    जब बि कै बि जगा बान कखि बि चुनाव ह्वावन त चुनाव आयोग द्वारा की तिथि बथाण से लेकि चुनाव नतीजा आण तलक मिडिया न्यूक्लियर बम्ब या रेडिओ एक्टिव पदार्थ जन अति क्रियाशील ह्वे जांदो अर भौं भौं खबर दीण मिसे जांद।
अब द्याखो ना हमर गां जख दुसर क्षेत्र का घ्वाड़ा बि जाणम अड़ी जांद उखाक ग्राम प्राधानो चुनावी समाचार दिल्ली अखबारोंम ऐ जांदन जन कि परारौ प्रधानौ चुनाव मा दिल्लिक अखबारों मा खबर आइ कि स्वांरा देवी न एक इंटरव्यू मा इ संवाददाता तैं बथाइ बल  एक प्रत्यासी बीरून  दुसर प्रत्यासी धीरूक भौज तैं तीन किलो चिनी दे अर चिनाव मा गुळादंगी कार अर चुनाव आचार संहिता तोड़ी, इख तलक कि चुनाव जितणो बाण प्रत्यासी अवैध संम्बंध बणाण से नि डरणा छन।  अब या बि खबर च ? भई चुनाव जितण त चीनी चानी दीणी पोड़ल कि ना ? इखमा खबर क्या च? खबर त तब होन्दि कि एक प्रत्यासी क्वी घूस नी दीणु  च। पण जब दिल्ली अखबार हमर गां पौंच  तो गां मा  कखला बखली मचि गे, भ्युंचळ ऐ गे । उन सि बात होन्दि त बातन आइ जाइ ह्वे जाण छौ पण चुनाव को बगत छौ त बात बढ़ी गे अर छुंयाळु छ्वीं से गां मा बणाक लगि गे। लोगुन बात उडै दे बल धीरुक बौ अर बीरु बीच अवैध सम्बन्ध छन। लोग बि सै छन किलैकि अब लोगुं तैं अपण आंखों पर कम विश्वास होंद अर समाचार पत्र या टी वी न्यूज चैनेलो पर जादा भरवस हूंद। वो तो भलो ह्वे कि शारब पिणों उपरांत छुंयाळु समज मा आयि कि धीरू बौ त बीरू घरवळि च। असला मा बीरू अर धीरू पिटालिटि भाइ छन अर प्रधान जन गुंदकि दार पद का लोभि ह्वेक एक दुसरा विरोध मा चुनाव मा खड़ा ह्वे गेन। अर स्वांरा अबि बि नाता रिश्तों खयाल करदी तो बीरू जिठा जीक नाम त ले नि सकदी त वीनं राष्ट्रीय संवाददाता से बोलि कि उ जिठा जि जु कबि उल्ट लाब सुल्ट नि करदा छा अबै दै पैल दै धीरू बौ कुण बजार बिटेन चीनी लैन। बात बड़ी सरल छे कि बीरू अब चुनाव जितणो बान  अपण घरवळि तै बि खुस करण मा लग्युं च। पण संवाददातान बात कुछ हौर ढंग से लेखि दे।
 चुनावों मा चुनाव प्रत्यासी गडबड, आचार संघिता उल्लंघन या दुसर प्रत्यासी तै घपकांदन अर  माल प्रैक्टिस करदन। पण  अब तो भौत सा सा मीडिया वाळ ही जादा माल प्रैक्टिस (गुळादंगी )  करण बिसे गेन।
चुनावों टैम पर पेड न्यूज या  खरिद्यां  समाचार जनि   बात से अब चुनाव आयोग बि परेशान च। चुनाव आयोग हाथी जन अपराध तै त पकड़ सकुद पण पेड  न्यूज जन किरम्वळु  कुछ नि कौर सकुद। फिर आज राजनीतिग्य अखबारों अर टी वी चैनलों  मालिक ह्वे गेन। तो  चुनावुं बगत मीडिया की भूमिका पर ही प्रश्न चिन्ह लगी जान्दो। क्या सामना शिव सेना की कमजोरी बथालो ? क्या सामना शिव सेना तै पाक साफ़ राजनैतिक पार्टी नि बथालो ? क्या सकाल  दैनिक शरद पंवार की प्रशंसा नि कारल? क्या दैनिक लोकमत विजय दर्डा अर राजेन्द्र दर्डा क  पक्षपात नि कारल ? क्या सन टीवी डीएमके की ही पूजा नि कारल?  क्या जया  टीवी जय ललिता की प्रशंसा ही नि कारल अर जया ललिता का विरोध्युं छांछ नि छवाळल ? क्या सुदर्शन टी वी न्यूज चैनेल कौंग्रेस को भतियाभन्द नि कारल अर इंडिया न्यूज चैनेल भाजापा की पोल नि ख्वालल? 
आज जब चुनावी दंगल एक नृशंस , निर्दयी , आचार हीन, स्वार्थ पूरक, प्रजा तन्त्र पर कुलाड़ी चलाण वाळ युद्ध  ह्वे गे  तो प्रजातंत्र को चौथो खम्भा से उम्मीद छे कि प्रजातंत्र की साख बचावो पण जब खंबा पर ही स्वार्थ को वाइरस , घूसखोरी को मैस्वाग, भाई भतीजावाद को धिवड़/द्यूं/दीमक लगी जावो तो प्रजातंत्र को छ्त्यानाश होणि च।
चुनाव बगत पत्रकारों द्वारा झूट मूटो  चुनावी सर्वेक्षण  तो अब लोगुं समज मा थ्वडा थ्वड़ा  आण बिसे गे। पत्रकारों द्वारा पक्षपाती समाचार दीण एक आम बात ह्वे गे।  आज भौत सा पत्रकार गलत अर सर्वथा झुटा बयान  छापदन। आज खबर नी होंदन बलकणम चुनावी   प्रत्यासी को फैदा या नुकसान बान खबरों की रचना होंदी। भौत सा पत्रकारों काम काळो  तै सुफेद बताणो ह्वे गे। कथगा इ पत्रकार कागज की गुडिया तैं शेर अर शेर तै किदलु/ केंचुआ बणाणम सिध्हस्त ह्वे गेन।   
आज असल मा चुनावी प्रक्रिया ही ना पत्रकारिता को अनाचार, दुराचार , आचार विचारो  पर भी प्रश्न चिन्ह लगि गे।
अब बिगण/ समज मा नि आणो कि जु बखरौं ग्वेर उळकाणु / उल्लू ह्वे जावो तो दुनिया को क्या ह्वालो?
 
             


Copyright @ Bhishma Kukreti  26/4/2013           
(लेख सर्वथा काल्पनिक  है )

गढ़वाली हास्य -व्यंग्य
सौज सौज मा मजाक मसखरी
हौंस,चबोड़,चखन्यौ 
सौज सौज मा गंभीर छ्वीं
                                    रूड़ी (गरमी ) ऐ ग्यायि कि ना?

                                         चबोड़्या - चखन्यौर्या: भीष्म कुकरेती
(s = आधी अ )
             पैलाकि सि बात नि रै गे कि हम तैं अफिक पता चलि जावो बल गरमी ऐ ग्ये। पैल हमर सरैल संवेदनशील छौ अर सरैल अफिक चितांदो छौ बल भैर वातवरण कथगा ठंडु  च , कथगा गरम च। तब हमर सरैल अग्वाडि इतला बि दींदो छौ बल रुड़ी कनि रालि अर कथगा गरमी रालि।
               अब त नेताओं , अधिकार्युं का कुकर्मों, आश्वासनों, बेशर्मी, खुलेआम झूट, घूसखोरी , स्वार्थ देखिक हमर चमड़ी  इथगा बकळि  ह्वे गे कि ठंड -गरम त जाणि द्यावो हम तैं पता इ नि चलद बल हम तैं किरम्वळ तड़काणा छन। वो तो क्वी  इनसेक्टिसाइड बिचण वाळ बथांदो बल हम तै किरम्वळ तड़काणा छन।
                        कुछ दिन हम टी वी न्यूज चेनलों पर भरवस करदा छया अर जब चैनेल  बुलदा छा तो  हम तै पता चलदो छौ कि ठंडी ऐ गे कि गरमी पण अब त गर्मी अर जड्डू समाचार बि स्वार्थपूरक ह्वे गेन। परसि    चैनेल यूपी टेन  मा सुबर बिटेन स्याम दें तलक समाचार आणा रैन कि  उत्तर प्रदेश मा गर्मी से बुरा   हाल छन, समाचार छौ कि उत्तर प्रदेश गर्मी से झुलस रहा है । चैनेल यूपी टेन की न्यूज छे कि गरमी से लोगुं इ ना कुता, बिरळु, गोरुं , चखुलों खलडा बि  उतरण मिसे गे। चैनेल समाचार दिखाणो छौ बल उत्तर प्रदेश मा गर्मी से त्राहिमाम त्राहिमाम मच्यु च. अर उत्तर प्रदेश की जलवायु समाचार देखिक हमन अपण पंखा स्पीड बढाई दे। ब्याळि, सुबेर बिटेन आज सुबेर तलक चैनेल यूपी टेन समाचार दिखाणु छौ कि उत्तर प्रदेश मा मौसम खुशनुमा च अर सरकार विरोधी लोगुंन अफवा फ़ैलाइ कि उत्तर प्रदेश मा गर्मी को प्रकोप फैल्युं च।   फिर सरा दिन  चैनेल यूपी टेन मा समाचारों से जादा उत्तर प्रदेश जनसम्पर्क विभाग को विज्ञापन दिखाये जाणा छा कि कन अखिलेश यादव का आणो बाद गरीब सुखी छन अर कन प्रदेश मा लॉ ऐंड ऑर्डर की स्थिति बेहतर ह्वे गे। चैनेल यूपी टेनमा सरा दिन भर सौ दें उत्तर प्रदेश में अपराध  कम  हुए का विज्ञापन दिखाए गेन अर उथगा इ दें समाचार बि दिखाये गेन कि उत्तर प्रदेश मा मौसम खुशनुमा च। अब जब टीवी चैनलों मा जलवायु , मौसम को  समाचार बि विज्ञापन प्रेरित अर प्रदेश को तापमान बि प्रायोजित हूण बिसे जावन तो  हम लोगुंक  टी वी चैनलों पर विश्वास कम हूण लाजमी च। जख तलक सीएनएन या बीबीसी को सवाल च यी बि इंडिया को मौसम की जानकारी ये हि हिसाब से दीन्दन कि जां अमेरिका अर यूरोप का माल बिको। दिखण मा त सीएनएन या बीबीसी  निष्पक्ष समाचार दाता  लगदन पण यूं से बड़ो स्वार्थी चैनेल अबि धरती मा नि आयि सो गरमी ऐ गे कि ना/ की सुचना  बान हम लोग सीएनएन या बीबीसी पर निर्भर नि छंवां।
                      फिर मौसम की जानकारी पैल रिश्तेदार चिट्ठी से दींदा छा कि इख पहाड़ो म ठंड इ च अर आवो इख घुमणो ऐ जावो। अब त पहाड़ो माँ रिश्तेदार झूठ बुलण बिसे गेन अर हर समय बथान्दन बल इख बि टेम्प्रेचर पैंतालिस का करीब च। अब पहाड़ी रिश्तेदारों तैं डौर रौंदी कि मि कखि गर्म्युं मा ऊंक इख नि ऐ जौं।
                  मि जब छ्वटु छौ त मेरि ददिन टक  लगैक मि तै सिखै छौ कि जब चखुल ढंढि मा नयावन तो समझो कि चिट्टों घाम चमकण वाळ च अर जु चखुल माटो मा नयावन तो शर्तिया बरखा होलि। पण अब इख मुंबई मा कखि  जगा इ नि बचिं कि चखुल माटो मा नयावन, सब जगा त  सीमेंट की जमीन जि ह्वे गे। अर उन ढंढि बि मुंबई मा नींन कि चखुल ढंढियुं मा छळबळ ह्वेक नयावन। तो चखुलों द्वारा मौसम की जानकारी का द्वार बंद ह्वे गेनि।
         अब रै गे कवाओं से मौसम की जानकारी की बात तो बिचारा कवा  बि मुंबई का कंक्रीट जंगलों से मतिभ्रमित हुयां छन। पैल कवा गर्मी आंद हि अपण घोल -घोसला बणाणो तयारी मा लगि जांदा छा अर बरखा हूण से ठीक द्वी चार दिन पैलि  अंडा दींद छा या अंडा दिणों तयारी करदा छा पण अब  कंक्रीटो मकान हूण से स्थानीय जलवायु मा परिवर्तन ह्वे गे अर कवावों तैं पता इ नि चलदो कि कब घोल घोसला बणाण अर कब अंडा दीणन अर कब अंडा सिकणन।
 सरकारी सूचना विभाग पर तो पैलि बिटेन क्वी विश्वास कनि करदो। अमूनन जब मौसम विभाग सूचना दीन्दो कि आज बरखा होलि तो वैदिन घाम चटकदो अर जैदिन घाम को आश्वासन होंदु वैदिन तड़क्वणि पोड़दन।
अब मेरि बिंगणम/समजम नि आणो च कि रुड़ी ऐ ग्यायि कि ना?                     
 
 
Copyright @ Bhishma Kukreti  28/4/2013         
(लेख में नाम व घटनायें सर्वथा काल्पनिक  हैं  )

गढ़वाली हास्य -व्यंग्य
सौज सौज मा मजाक मसखरी
हौंस,चबोड़,चखन्यौ 
सौज सौज मा गंभीर छ्वीं
                         दिल्लि, मुंबई मा बि बुरांश, काफळ, फ्यूंळि  जमदन   

                                         चबोड़्या - चखन्यौर्या: भीष्म कुकरेती
(s = आधी अ )
   तुम सणि विश्वास नि होणु ह्वाल बल दिल्लि मुम्बई मा बि बुरांश, काफ़ळ , फ्यूंळि  जन पेड़ पौधा कन जामि सकदन अर पनपि  सकदन।
उन त मि नि बिंगै /समजै सकदु कि बुरांश पर किनग्वड़ लगदन पण कथा से मि बतौल बल दिल्लि, मुंबई मा फ्यूंळि पर हिसरों कांड कनै पुड़दन।
  भौत सालुं बात नि च। बस वैइ सालों बात च जब मुंबई मा कौथिग दुसर साल ह्वे छौ तो मुंबई का लोगुं तैं पता चौल बल इख मुंबई मा उत्तराखंड बटे अयां चार पांच या दस छोरोंन एक सामाजिक संस्था खोलिं च अर जैक नाम यूनाइटेड बुरांश च । असलम मुंबई वाळु तैं जब बि क्वी नै संस्था खुल्दि तो क्वी उत्साह नि आंद इखाक लोग बुल्दन बल नै संस्था माने घमंडी सामजिक कार्यकरतौं नई दुकान-कुज्याण कब बंद ह्वे जांद धौं। पण वै कौथिग से पता चौल कि बुरांश का छ्वारों म नई सोच च किलैकि इ लोग गिटार बि बजौंदा छा त हुडकी बि हुडकांदा छा अर ए  मेरि ब्वै सबी सदस्य लैपटॉप लेकि इन उना फरकणा रौंदा छा। यून मतबल बुरांशन कौथिग वाळु  बड़ी प्रशासनिक सौ  सायता कार। मुंबई का लोगुं तैं जादा त ना पण कुछ कुछ भरवस ह्वाइ बल सैत च या बुराशै डाळि जादा दिन तक टिकी रालि। पण लोग बिसरि गेन कि बुरांशन उत्तराखंड को बांजौ पाणि पियुं च अर खंड खंड खांड्यू मा बंटण उत्तराखंड की पौराणिक परम्परा च।
            ह्वे क्या च बल कौथिग का कौथिगेर अर हिल ड्रामा का नंदा देवी  का जागर्युं मा कौथिग मा नंदा देवी जात्रा स्वांग मा दक्षिणा क बाण झगड़ा ह्वे गे। कौथिगेरु बुलण छौ बल दक्षिणा पर कौथिगेरुं हक च त जागर्युं बुलण छौ बल दक्षिणा लीणो अधिकारी त बस जागर्युं को ही च।
             बस नंदा देवी स्वांग का जागरी कौथिग से बिगळे गेन अलग ह्वे गेन। मुंबई का लोगुं तैं बुरु नि लग किलै कि उत्तराखंडी परम्परा अनुसार अलग अलग काम करण अर खंड खंड मा बंट्याण ही हमारी संस्कृति अर सभ्यता को मूल चूल च , धुरी च।
पण कौथिग का कौथिगेर अर हिल ड्रामा को झगड़ालू  ड्रामा से बुरांश का फाड़ ह्वे गेन।कुछ कौथिगेरूं दगुड़ दीण चाणा छा अर जादातर हिल ड्रामा कम्पनी दगुड़ दीण चाणा छा। बस एक नई संस्था काफुळ खड़ी ह्वे गे।
जब हिल ड्रामा कम्पनीन मुंबई मा नंदा जात जात्रा उर्याई तो काफुळ का काफुऴवै (काफुळ तोड़ने वाले ) हिल ड्रामा वाळो पाळि (Side) छा।
                अब उत्तराखंडी परम्परा निर्वाहन को खातिर हिल ड्रामा कम्पनी मा दुफाड़ हूण जरूरी छौ त नई माउंटेनिंग ड्रामा  कम्पनी खुलि गे अर वा नई माउंटेनिंग ड्रामा  कम्पनी बि नंदा जात जात्रा उर्याण बिसे गे।
इन मा काफळो डाळौ  हलण जरूरी छौ।  कुछ हिल ड्रामा कम्पनी दगुड़ नि छुड़ण चाणा छा पण   जादातर नई  माउंटेनिंग ड्रामा  कम्पनी का साथ दीण चाणा छा तो ऊंन फ्युंळि नाम से एक नई संस्था खडी कर  दे।
                  फिर परम्परा निर्वाह का खातिर माउंटेनिंग ड्रामा  कम्पनी मा दुफाड़ ह्वाइ अर एक नई ड्रामा  कम्पनी खुल -यू .के .वैली ड्रामा कम्पनी।  यू .के .वैली ड्रामा कम्पनी बि   नंदा देवी जात्रा स्वांग करण बिसे गे।
इन मा  रीति रिवाज अर अपण संस्कृति बचाणो खातिर  फ्युंळि  मा बि दुफाड़ ह्वे गे, नई संस्था को नामकरण ह्वे तिमलु जो  यू .के .वैली ड्रामा कम्पनी साथ निभाणो बान बणाये गे।
                        यू .के .वैली ड्रामा कम्पनी मुंबई का ड्रामेवाजों मा उत्तराखंड राज्य की राजकीय भाषा अंग्रेजी ह्वावो या हिंदी पर झगड़ा ह्वे ग्यायि अर इन मा एक नई ड्रामा कम्पनी की पौ (नींव ) पोड़ी अर नई कम्पनी को नाम छौ यु के रिवर ड्रामा कमपनी।
इन मा तिमलु संस्था मा तिड्वाळ (दरार ) पोड़ण जरूरी छौ तो नई संस्था को गठन ह्वे बेडू।
                   फिर बेडू से लोगुं मा बिखळाण पोड़ त एक नई संथा को उदय ह्वे मेंळु. मेंळु पर कांड पुड़ीन त छ्युंति संस्था खुलि। छ्युंति पर बीज नि मिलेन  त औंळा संस्था  खुलि। अब जन कुछ लोग गढवाल भ्रात्रि  मंडल मुंबई को पुनर्जीवित करणों विचार करणा छन उनि बुरांश को पुनर्जीवित करणों बात चलणि च जां से कि घिंघारू, हिसर,डंफु  संस्था खुलणो अवसर पैदा ह्वे जावन।                                                       
 
 Copyright @ Bhishma Kukreti  30/4/2013           
(लेख सर्वथा काल्पनिक  है )

गढ़वाली हास्य -व्यंग्य
सौज सौज मा मजाक मसखरी
हौंस,चबोड़,चखन्यौ 
सौज सौज मा गंभीर छ्वीं
                                  लेडी लक

                          चबोड़्या - चखन्यौर्या: भीष्म कुकरेती
(s = आधी अ )
घरवळि बुलण बिस्यायि बल ," सुणो तुमर लक आज तलक  नि चौल त जावदि जरा पंडी जी मा जनम पत्री  दिखै लयावो। पंडी जी बथाला बल तुमर लेडी लक कनो बदलल "
मि - अब जब, अब तक कुछ नि ह्वे त अब क्या ह्वालो। कख छे तू बि बेकार कि बतौं मा।लेडी लक उक कुछ नि होंद।"
घरवळि- तुमर दगड त ज्युंरा बि क्या जीतल। भाग हूंद च।
मि -भाग ऊग कुछ नि हूंद
घरवळि - हूंद च  अब द्याखो ना ओबेराय होटलों जनक ऐम ऐस ओबेराय को हाल देखि ल्यावदि। शिमला गे छया सरकारी कलर्क  बणणो पण बौणि गेन शिमला को  सिसिल होटलम  कलर्क अर फिर हूंद करदा 1933  मा एम् एस ओबेरायन कोलता को ग्रैंड होटल किराया पर ले अर फिर चली ओबेराय होटलुं चेन।       
मि -हूंद च कबि। कथगा इ लोग बणन कुछ चांदा छा अर बौणि कुछ हौरि जांदन।   
घरवळि - ह्यां पण तुमर दगड़ किलै नि जावो तुम अपण  टिपड़ा दिखैक लावो 
 मि -इन जी हूंद त ..
घरवळि - तुमर दगड़ लगण बोलो तो। उ पौढ़ नि रैनबक्सी कम्पनी इतिहास। कि सिंह ब्रदर्स जो द्वैवों वितर्क छ्या  एक इटालियन तै क्या मिलें कि भाग इ खुलि गेन 
मि - कबि कबि इन बि होंद
घरवळि -  पण तुम तैं किलै ना क्वी इटालियन मील ?किलै तुम किक सम्पर्क माँ नि अयाँ?
मि -सब बुलणा बात छन 
घरवळि -  बुलणा बात क्या छन। तुम जाणदा छा ना अजीत वाडेकर तैं?
मि -हां जब हम मर्फी डबल विकेट टूर्नामेंट और्गेनाइज करदा छा त वाडेकर जी मिलदा छा
घरवळि -  तो याद च जब सन इकहतरम ऊं तैं वेस्ट इन्डीज जाण वळ क्रिकेट टीम  माँ जगा नि मिलणि छे तो क्या ह्वे छौ?
मि -तब इन्डियन क्रिकेट सलेक्सन कमेटी का अध्यक्ष विजय मर्चेंट क वोट से वो टीम मा सलेक्ट ह्वे गेन।
घरवळि -  फिर ?
मि -फिर क्या नबाब पटौदी तैं टीम मा जगा नि मील तो अजित वाडेकर तै टीम कप्तान बणाण पोड़
घरवळि -  फिर ?
मि -फिर अजीत वाडेकर की अगुवाई मा भारतं पैल दै वेस्ट इंडीज अर इंग्लैण्ड क्रिकेट सिरीज जीत।
घरवळि -त ह्वाइ ना सी अजित वाडेकर पर लेडी लक की मेहरबानी। कख टीम मा इ जगा निश्चित नि छे अर कख कप्तान बौणि गेन।
मि -त इख्मा क्या ह्वाइ विजय मर्चेंट मुंबई का छया तो वाडेकर सलेक्सन को सलेक्सन एक आम बात छे
घरवळि -आर याद च मुहम्मद  अजरुद्दीन को सलेक्सन ?
मि -हाँ इंग्लैण्ड की क्रिकेट टीम सन चौरासी पिचासीमा इख आयिं छे अर  चौथा टेस्ट  की बारी आई अर अंशुमान गायकवाड बीमार पोड़ी गे अर अजरुद्दीन तै जगा मीलि
घरवळि -अर फिर अजरुद्दीनन पैथर नि द्याख
मि -क्रिकेट क्या सबि खेलों मा इनि होंद कि बहुत सी दें एक खिलाड़ी घैल या बिमार होंद तो नयो खिलाड़ी तैं जगा मीलि जांदी
घरवळि -अर मोहिन्दर सिंह धोनी तै कनकै जगा मील?
मि -या तो बड़ी रोमांचक खानी च
घरवळि -नै लेडी लक की मेहरबानी च
मि -त्वी बि ना सब चीजुं मा लेडी लक तै कुच्याणि छे।
घरवळि -क्यों ? जु दिनेश कार्तिक चोटिल नि होंद तो क्या धोनी तैं टेस्टम जगा मिल्दि?
मि -हूंद च इन तो
घरवळि -अर जु वीरेन्द्र सहबाग तै टेस्ट टीम से भैर नि करदा तो क्या शिखर धवन तैं जगा मिल्दि?
मि -हूंद च एक खिलाड़ी जांदो तो नया खिलाड़ी इन्डियन टीम आंदो इ च
घरवळि -तो फिर , शिवलकर,  त्यागी जना महान स्पिनर्स भारतीय टीम नि ऐन
मि -कुज्याण भै ! पण एक बात च खेलों मा अचाणचक भौत सी बात होंदन तो वूं बातुं  तैं लेडी लक से जुड़न ठीक नी च   




Copyright @ Bhishma Kukreti  2/05/2013           
(लेख सर्वथा काल्पनिक  है )

गढ़वाली हास्य -व्यंग्य
सौज सौज मा मजाक मसखरी
हौंस,चबोड़,चखन्यौ 
सौज सौज मा गंभीर छ्वीं
                    आजौ रेफ्रिजिरेटर खरीदण अर वै बगतौ  फ्रिज लीण।  भाग- 2 

                           चबोड़्या - चखन्यौर्या: भीष्म कुकरेती
(s = आधी अ )

              अचकाल रिफ्रिजिरेटर लीण सरल च पण प्रक्रिया अबि जरा टेड़ी च। ग्राहक एक अर बिचण वाळ सौ।  अनार एक अर बीमार सौ। कुर्सी एक अर कुर्सी हकदार सौ।
              हम तै अपण पुरण फ्रिज से क्वी सिकैत नि छे। म्यरो  पुरण फ्रिज तै इ हम से नाराजी ह्वे गे। पुरण फ़्रिजौ बुलण छौ बल या बि क्वी बात ह्वे कि वो इं उमर मा सात सात दिनु बासी खाणक कि गंध सुंगणु रावो। चलो बासी कूसी भोजन की गंद बास तो सहन करि ल्यालो पण जख स्यूण (सुई ) बान जगा नि ह्वावो उख सब्बळ त नि कुच्याण चयेंद कि ना! पुरण फ्रिजो बुलण छौ बल हमर परिवार बढ़ी गे तो हम अपण परिवारौ बोझ पुरण फ्रिज पर किलै डाळणा छंवां। अति बोझ की पीड़ा से  फ्रिज रोज क्या हर समौ घर्र घर्र करीक सुसकारी भरदो छौ अर हम समजदा छा कि हमर फ्रिज अपण लोक गीत गाणु च। जब कबि फ्रिज गीत गाण बंद करी दींदु छौ त हम फ़्रिजौ डाक्टर बुलांदा छा। कुछ दिन तलक फ़्रिजौ डाक्टर की मलास, छ्वटि -म्वटि सर्जरी  अर पट्टी -बैंडेज से फ्रिज होश मा आंदो छौ पण अखिरैं डाक्टरन बि जबाब दे द्यायि अर हमकुण भगवान से प्रार्थना की  सलाह दे।बस हम रोज फ्रिज की लम्बी उमरौ बान भगवान से प्रार्थना करदा छा। एक दिन बोझ का मारा हमर पुरण फ्रिजन इलेक्ट्रिक शौक से खुद ही ख़ुदकुशी करी दे। हम फ़्रिजौ फेमिली डाक्टरम बि गेंवां पण हमर फ़्रिजौ फेमिली डाक्टरन  आण से इनकार करि दे अर फिर पछ्याणको  कबाड़ीन ही फ़्रिजौ दाह संस्कार कार   
          पुरण फ्रिज जाणो बाद हम ठंडो पाणी जगा सादो पाणि पीणों तयार छया पण हम से ताजो खाणक नि खाये गे। हमर जीबि मा   बासी तिबासी खाणक खाणों स्वाद बैठी गे छौ। तो बासी भोजन प्रेमी परिवार का सदस्योंन प्रजातांत्रिक ढंग से मि  तै  आज्ञा दे कि मि फ्रिजुं प्रिलिमिनरी सर्वे करिक औं।
 मि ऐत्वारो खुण  चार पांच बड़ी दुकानुंम फ्रिज दिखणो ग्यों अर अर्ध मुर्छित अवस्थाम  बड़ी मुस्किल से घौर बौड़। एकी कंपनी का बीस साइज का फ्रिज , एकी साइज मा बीस किस्मौ टेक्नौलौजी का अलग अलग फ्रिज! फिर हरेक फ्रिज की विशषता वास्ता भिन्न भिन्न अलंकृत भाषा का इस्तेमाल करण वाळ पैम्फलेट देखिक मि रंगतै ग्यों। मै लग मि फ्रिज नि दिखणु छौं बलकणम विज्ञापनों मा नाट्य काव्य पढ़णु हों अर दृश्य काव्य दिखणु हों। जो आज विहारी कवि ज्यूँद होंद तो विज्ञापनों अलंकार पौढिक विहारीन हीन भावना ग्रसित ह्वेक आत्महत्या करि लीण छौ।   तीन चार सौ किस्मौ फ्रिज देखिक मि चचलै ग्यों अर सही माने  मा घंघतुळे ग्यों याने कन्फ्यूज ह्वै ग्यों। एकी दूकानम अलग अलग साइजो अर टेक्नीक का वास्ता  अलग अलग सेल्समैन छया। अर हरेक सेल्समैन अपण ब्रैंड, अपण साइज अर अपण टेक्नौलौजी की प्रशंसा मा उथगा तल्लीन नि छौ बल्कणम हैंको ब्रैंड, हैंको साइज अर हैंकि तकनीक की हद से बिंडी बुरै करण मा उस्ताद छया। हरेक सेल्समैन समजाण से जादा मि तैं कन्फ्यूज करणम बड़ी मेनत करणु छौ।  हरेक सेल्समैनन म्यरो फोन नम्बर नोट कार।   
मि घंघतुळे, घबरै घौर औं। घौर वाळ मेरि घबराट देखिक दुकनि बिटेन ठंडो मिनरल वाटर लैन। अब हमर बिल्डिंग वाळ मोडर्न ह्वे गेन तो एक हैंकाक इखन ठंडो  पाणि मंगणम अपणी बेज्जती अर तौहीन समजदन।
एकाद घंटा मा मेरी तबियत सुधरी। अर इना मेरि तब्यत सुधरि उना नाना प्रकार की फ्रिज कंपन्यूं अर फाइनेंस कंपन्यूं  फोन आण बिसे गेन।
इखम बि हेरेक कम्पनी क अलग अलग साइज अर टेक्नौलौजी क विभाग से अलग अलग फोन ऐन अर हरेक कॉलर अपण साइज या टेक्नौलौजी प्रशंसा नि करणों छौ बलकणम दुसर साइज अर दुसर टेक्नौलौजी की बुरी तरह से काट करणु छौ अर इथगा काट त भारतीय जनता पारी कौंग्रेस की काट  नि करदी जथगा काट एकि कंपनि क कॉलर अपणी कम्पनी क दुसर साइज अर हैंकि टेक्नौलौजी की काट करणु छौ।
फाइनेंस कम्पनी वाळ बि अपण फिनैंस स्कीम  की प्रशंसा नि करणा छा बलकणम दुसर फिनैंस कम्पन्यूं स्कीमुं कमजोर पक्ष की ऐसी तैसी करणा छा।
अर कम्पन्यूं ऑफिस से अर फिनांस कंपन्यूं फ़ोनों से अब मेरो सरा परिवार वाळ घंघतुळे,घबरै, गलत फहमै, कनफ्युजे गेन। कैक बि  समज मा नि आई कि कै साइजौ अर कैं टेक्नौलौजी फ्रिज लिए जावो।
हमन बिल्डिंग अर हौर  दोस्तों , ए  शहर इ ना बलकणम  दुसर शहरों रिश्तेदारों  से बी सलाह ले कि कु फ्रिज लिए जावो।
पण दगड्या - दोस्तों अर रिश्तेदारों न सलाह दीण से  हम सब्युं तै जादा ही घबरै गवाँ।
सबि इन नि बथावन कि कु रेफ्रीजेरेटर लीण बलकणम इन जरुर बथावन कि कु कु फ्रिज नि लीण।
 एक दगड्यान बोलि बल अलण फ्रिज कतै नि खरीदेन अलण फ़्रिजौ कूलिंग तकनीक बेकार च। म्यार सडो भायिक समदिक स्याळो भणजौ चचान ओ फ्रिज खरीद छौ आज तलक ठंडो पाणि पड़ोसी से ही मांगदन बिचारा! तुम इन कारो फलण रेफ्रिजिरेटर खरीदो।
त एक रिस्तेदारन चेतावनी दे बल नै नै ! फलण रेफ्रिजिरेटर कतै नि खरीदण'. फलण फ़्रिजौ कूलिंग कैपेसिटी त ठीक च पण इंसुलेटिंग भौत इ रद्दी च। पांच साल पैल  म्यार बडाक नन्या ससुरौ झड़नति क जीजान अलण रेफ्रीजेरेटर खरीदी छौ त आज तक पछताणा छन।
इख पर हैंक दोस्तन घ्याळ करी दे बल स्यु ब्रैंड कतै नि खरीदण, ये ब्रैंड की सर्विस बेकार च । मेरी मौसिक जिठाणि ममाक साडो भयिक नातिन स्यु ब्रैंड खरीद छौ आज तलक वूं कम्पनी सर्विस सेंटरौ पता अर फोन नम्बर खुज्याणा छन।
 दफ्तरम एक होशियार मने जाण वळ  सहयोगीन बथाइ बल अलण ब्रैंड की कूलिंग कैपेसिटी ठीक च पण इंसुलेटिंग टेक्नीक खराबच, वै ब्रैंड की इन्सुलेटिंग ठीक च पण जगा की कमी च, ...सतों ब्रैंड की सर्विस ठीक च पण टेक्नौलौजी पुराणी च, अठों ब्रैंड की टेक्नौलौजी लेटेस्ट च पण ब्रैंड को नाम गंदो च।
जथगा लोग उथगा इ कु कु ब्रैंड नि लीणो चेतावनी!
आखिरैं हमन अपण पुरण फ़्रिजौ डाक्टर याने फ्रिज मैकेनिक की सलाह सेवा ल्यायि।
अब रेफ्रिजिरेटर त ऐ ग्यायि पण हम कै तैं नि बथान्दा कि हमन नै रेफ्रीजेरेटर खरीदी किलैकि यु रेफ्रिजिरेटर  मेकैनिक द्वारा  असेम्बल्ड फ्रिज च।                             
                                   
                 

Copyright @ Bhishma Kukreti  4/05/2013           
(लेख सर्वथा काल्पनिक  है )