MeraPahad Community Of Uttarakhand Lovers

गढ़वाली हास्य -व्यंग्य
सौज सौज मा मजाक मसखरी
हौंस,चबोड़,चखन्यौ 
सौज सौज मा गंभीर छ्वीं
                       
                            जु मि पौलिटिकल पार्टी प्रवक्ता हूंद !
                            चबोड़्या - चखन्यौर्या: भीष्म कुकरेती
(s = आधी अ )

घरवळि-म्यार त सद्यनि इनि जोग रै गेन
मि -ह्यां ! आज जोगुं पैथर किलै पोड़ी छे?
घरवळि- तुमर ले क्या। कथगा दिनु बिटेन तुम तै घचकाणु छौ कि विजय बहुगुणा  जिठा जी , सतपाल माराज जी ना सै त हरीश रावत जिठा जीक  खुकलिउंद बैठि जावा पण तुमन कबि मेरि सूण हो तब ना! 
मि -याँ क्या करी लिंदा त्यार इ दूरौ जिठा जी?
घरवळि-क्या नि करदा?
मि -क्वी एक बात त बता जु यि म्यार भला करी दींदा
घरवळि-तुम यूँका चरणों मा रोंदा त कनि क्वी ना क्वि बडि जिठाण सोनिया जी मा बोलिक तुम तैं कौंग्रेस पार्टी प्रवक्ता बणवै दींदा   
मि -मि अर पौलिटिकल पार्टी प्रवक्ता?
घरवळि-हाँ त क्या ह्वाइ?
मि -पण जाणदि छे ना कि पोलिटिकल पार्टी प्रवक्ता कन हूण चयेंदन?
घरवळि-हां सबसे पैल त जब दुनिया मा दस करोड़ बेशरम मोरदन तब ही एक पौलिटिकल पार्टी प्रवक्ता  पैदा होंद । पौलिटिकल पार्टी प्रवक्ता बेशरमो बेशरम हून्दन।
मि -बेशरम?
घरवळि-हाँ यी पौलिटिकल पार्टी प्रवक्ता बेशरमी से लाल रंग तै नीलो रंग घोषित करी दींदन अर यी  प्रवक्ता शर्म बेचींक  फिर बि  जबाब दींदन।
मि -क्या
घरवळि-हां जन कि रोज भारतम बलात्कार हूणा छन त पौलिटिकल पार्टी प्रवक्ता रोज बेशरमी से बलात्कार को समाचार सुणिक बेशरमी से बयान दीन्दन बल हमार पार्टी बलात्कार की निंदा करणि च। 
मि -बस ?
घरवळि-नै नै पौलिटिकल पार्टी प्रवक्ताक खलडि - चमड़ी गैंडा से बि बकळि हूण चयेंद   
मि -किलै ?
घरवळि- ह्याँ रोज त हरेक पार्टी नेता या नेताक जवैं , बेटी , बेटा भतीजा या भाणजा घूसखोरी केस मा फंसदन तो जनता अर प्रेस तै जबाब वी दे सकुद जैकि बकळि जिकुडि ह्वावो अर बकुळ खलड़ ह्वावो।       
मि -ये मेरी ब्वै
घरवळि-फिर पौलिटिकल पार्टी प्रवक्ता तैं झूठ नि बुलण बलकणम झूठ इन बुलण जन बुल्याँ राजा हरिश्चन्द्र की औलाद  बयान दीणु ह्वावो। द्याख नि तुमन कॉंग्रेसी प्रवक्ता डौरु बजैक , कंटर बजैक हमेशा घ्याळ लगांदन बल कौंग्रेस भ्रष्टाचार खतम करणों बान सदैव तत्परता दिखांदी। या बेशरमी से भाजापा वळ संसद माँ काम नि होण दीण  तैं प्रजातंत्र की रक्षा नाम दींदन     
मि -औ !
घरवळि- फिर पौलिटिकल पार्टी प्रवक्ता तै क हरेक बात पर विरोधी पार्टी पर इन हमला करण चयेंद जन बुल्यां यूंकी अपणी पार्टी माँ धर्मराज छन अर विरोधी पार्टी चोरों अर गलादारों पार्टी ह्वावो । जन कि भाजापा प्रवक्ताs  वास्ता पीएसी (पब्लिक अकाउंट कमेटी ) की रिपोर्ट को लीक हूण बिलकुल जायज च किलैकि डा मुरली मनोहर जोशी पीएसी का अध्यक्ष छन पण भाजापा का प्रवक्ता हिसाब से जेपीसी (ज्वाइंट पार्लियेमेंट्री कमेटी) की रिपोर्ट लीक हूण बड़ो ही घोर  जघन्य अपराध च किलैकि जेपीसी क अध्यक्ष कॉंग्रेसी सांसद च।   
मि - हाँ या बात त सै च
घरवळि- फिर यदि टीवी चैनलों मा डिबेट /बहस हूणि ह्वावो त झूट तै सच अर सच तैं झूठ  करणों अलावा विरोधी पार्टी तैं कतै नि बुलण दीण चयेंद। जथगा तक ह्वे साको विरोधी पार्टीक प्रवक्ता क बुलणम  अधिक से अधिक अवरोध पैदा करण ही पौलिटिकल पार्टी प्रवक्ता को  असली मकसद या ध्येय हूण चयेंद। 
मि -  पण पौलिटिकल पार्टी प्रवक्ता ह्वेक रोज पत्रकारों मिसाइल का ग्व़ाळा  सहन कौरिक  क्वी फैदा त क्या ह्वाल धौं?
घरवळि-ह्याँ जु तुम सोनिया जिठाण की पार्टी का प्रवक्ता ह्वेल्या त कुछ दिनों मा तुम जरुर राज्य मंत्री बणि जैल्या।
मि -त मि पैल आळी -जाळी काम , बेशरमी , झूठ तैं  सच अर सच तैं झूठ करण , विरोध्युं लफरा (खाल ) खैंचण सीखि लींदु अर फिर विजय भैजी या हरिश रावत  भैजी शरण मा जांदो
घरवळि- तुमर बि दिमाग खराब हुयुं च पैल पौलिटिकल पार्टी प्रवक्ता बौणो 
मि -ह्याँ पण पैल कुर्सी लैक त बणण चएंद कि  ना?
घरवळि-नै नै ! पैल कुर्सी पावो फिर कुर्सी अफिक सबि कुछ सिखै दींदी।


Copyright @ Bhishma Kukreti  6/05/2013           
(लेख सर्वथा काल्पनिक  है )

गढ़वाली हास्य -व्यंग्य
सौज सौज मा मजाक मसखरी
हौंस,चबोड़,चखन्यौ 
सौज सौज मा गंभीर छ्वीं
                       
                                    घर्या तोताऊं दुःख
                              चबोड़्या - चखन्यौर्या: भीष्म कुकरेती
(s = आधी अ ) 

              जब बिटेन माननीय न्यायालय को सीबीआई का  काम काज पर कमेंट्स आइ कि सीबीआई केवल - पिंजडाम बंद  तोता च अर ये तोता को कथगा इ मैश (मालिक ) छन तब बिटेन सबी घर्या तोता परेशान छन। तोता क्वी मायावती या डीऐमके   जन राजनैतिज्ञ त छ नीन जु बोलि द्यावन बल तोता दलित छन तो माननीय न्यायाधीशोंन  दलित विरोधी कमेंट्स करी देन, अर ऊनि बि तोता या कबूतर पक्षियों मा दलित पंछी नि माने जांदन कि तोता माननीय  न्यायाधीशों टिप्पणी तैं दलित विरोधी बथावन। ना ही तोता कौंग्रेस या भाजापा का कतिपय नेताओं तरां बेशरम, बिलंच त छ नीन कि बोलि द्यावन कि या त केवल टिप्पणी च ना कि निर्णय।
             घर्या तोता अब अपण आपस मा बचऴयाणा छन कि तोता सम्बन्धी सबी कहावतों पर बैन लगण चयेंद। तोताओं बात बि सै च इना माननीय न्यायाधिसों नेताओं अर अधिकार्युं कुनेथ, कुकरतबुं  पर टिप्पणी आयि अर उना लोगुन घर्या तोताओं नाम 'सीबीआई' धरी द्यायि। अब लोग घौरौ बान तोता खरीदणो जांदन त इन नि बोल्दन कि हम तै बढिया सि तोता दयावो बलकणम बुल्दन, भया जी /दुकानदार जी !  हम तैं एक गुलाम 'सीबीआइ' दिखावदी।
तोता विक्रेता  - जी आप तैं गयेळि याने देरी करण वाळ बोफोर्स नामौ सीबीआई याने तोता चयेणु च?
तोता खरीददार - नै नै ! इथगा बि अळगसि /सुस्त सीबीआई नि चयेणु जु  सत्ताइस सालों भागदौड़, छौम्पादौड़ , दसियों विदेस यात्रा  बाद  न्यायालयमा बोलि दयावो कि हम तैं ठोस सबूत नि मिलणा छन।   
तोता विक्रेता - इखमा तोता की क्वी गल्थी नी च ओ तो तोताओं मालिकोंन तोता कुण ब्वाल बल कै बि तरां से कखि बिटेन किकबैक्स का सबूत नि मिलण चयेंदन।       
 तोता खरीददार - ह्यां पण उख त सरकारी ब्वालो या जनता को पैसा ब्वालो च त हजारों साल तलक बि तोता खोजबीन करी सकदन। हम तो गरीब लोग छां हम तैं तेज तरार सीबीआई चयेणु च 
तोता विक्रेता -. ठीक च तुम तैं 'बोफोर्स सीबीआई' नि चयेणु त 'हवाला सीबीआई' याने तोता ले ल्यावो
तोता खरीददार - नै नै!  'हवाला सीबीआई' जन झूटों , बदमाश तोता नि चयाणु च। अरे खुज्याण छौ कि हवाला से टेरिरिस्ट कामों बान विदेशों से पैसा कनै आन्दो अर कै कै कुण जांदो  त तोताओंन लाल कृष्ण अडवानी, बलराम जाखड़, शरद यादव  जन नेताओं तैं फंसै द्यायि। 
तोता विक्रेता -भई इखमा तोताओं क्वी गल्थी नी च जन मालिक ब्वालल तनि त तोता काम कारल कि ना ? पी . नरसिम्हा रावन तोताओन तै हुकम दे तो तोताओंन टेरिरिस्ट मनी फंडिंग की जद तलक पौंछणो  जगा नरसिम्हा रावका धुर विरोधी नेताओं तैं पकड़ी दे। 
तोता खरीददार - नै नै हम तैं इन बिलंच, झूटो सीबीआई याने तोता नि चयेणु च। क्वी अछु सि सीबीआई दिखावो
तोता विक्रेता -तो ठीक च।  तुम ''प्रियदर्शनी माट्टो रेप ऐंड मर्डर केस सीबीआई' ले ल्यावो
तोता खरीददार - नै नै इन बेइमान सीबीआई (तोता ) हम तै नी चयेणु च जु रेपिस्ट अर मर्डरर (बलात्कारी) संतोष कुमार सिंह तै तोता की अपणी अकर्मण्यता का बदौलत बचै द्यावो   
तोता विक्रेता - द्याखो जी इखमा तोता की क्वी गऴथि नी च वो तो  रेपिस्ट अर मर्डरर (बलात्कारी) संतोष कुमार सिंहक बुबा भौत बड़ो पुलिस अधिकारी छौ तो तोता तै अपण बौस का बेटा बचाणि छौ कि ना?
तोता खरीददार - नै नै हम तैं  रेपिस्ट अर मर्डरर (बलात्कारी) तैं बचाण वाळ सीबीआई नि चयाणु च। क्वी इमानदार, कर्तव्यनिष्ठ सीबीआई  (तोता) बथावो 
तोता विक्रेता -जी इन च तोता तो इमानदार , धारदार , कर्तव्यनिष्ठ ही होंदन वो तो मालिक पर निर्भर करदो कि तोता से क्या अर कनो काम कराए जावो अर न्यायालयम तोता से क्या बुलाये जावो।
तोता खरीददार - ठीक च। पण हम तै रेपिस्ट अर मर्डरर (बलात्कारी) तैं बचाण वाळ तोता नि चयाणु च।
तोता विक्रेता -चलो आपकी मर्जी! ल्यावो सिस्टर अभया मर्डर केस को सीबीआई ले ल्यावो
तोता खरीददार - नै नै इन बि निखत्तो तोता बि नि चयाणा छन  जखमा पांच दें तोताओं की पांच टीमोन केस की जांच कार अर सन उन्नीस सौ बयाणबे से लेकि  सन द्वी हजार नौ तलक कुछ बि नि कार। इन तोताओं से बढ़िया तो नितोता हि रौण ठीक च।
तोता विक्रेता -तो गुजरात को प्रसिद्ध सोराहबुद्दीन सीबीआई ही ले ल्यावो
तोता खरीददार - नै नै इन कॉंग्रेसी गुलाम तोता बि नि चयाणु च जो विरोधी पक्ष पर हमला बान काम कारो 
तोता विक्रेता -द्याखो मीम कॉमन वेल्थ , टू जी स्पेक्ट्रम जन सैकडो  लांछित सीबीआई छन
तोता खरीददार - नै नै हम तै भलो सि सीबीआई दिखावो
तोता विक्रेता - तो ल्यावो यू सीबीआई ठीक रालो। बोल भई सीबीआई जरा यूँ नया खरीददार तैं  बथादी कि तू कन सीबीआई छे
तोता -मि बडो चतुर सीबीआई छौं, मि बड़ो तेज सीबीआई छौं, मी देस का बान फिकरमंद सीबीआई छौं, मि पाताळ से बि अभियोग्युं तै लाण लैक छौं, मि कर्तब्यनिष्ठ छौं पण अपण  मालिकौ बुलण पर मि निकज्जो, निस्फिकर, झुटो, अळगसी, अदूरदर्सी, अनियमित,कुकर्तबी, ह्वे जांदो। मि वो ही करुद जो म्यरा आका बुल्दन, मि वै हि बाटो पर जांदो जै बाट पर चलणो म्यार मास्टर हुकुम दींदन। मि मास्टर व्वाइस छौं, मी न्यायालय मा बि वो ही फ़ाइल अर एविडेंस दिखान्दो जो म्यरा मालिकों की मौण (गर्दन ) बचै द्यावन। मि मालिक अर बौस भक्त छौं       
तोता खरीददार - ओह ! यु सीबीआई याने तोता ठीक च। मीन इनि सीबीआई लीण।
तोता विक्रेता (अपण मन मा ) - जनता ह्वावो या अधिकारी या ह्वावो नेता सब्युं तैं चापलूसी पसंद च।
तोता विक्रेता- अरे हरिया! ग्राहक तै स्यु चापलूसी करण वाळ सीबीआई याने तोता दे दे। पिंजडा बि इन दे दे कि सीबीआई कथगा बी कोशिस कारो तो  बि स्वतंत्र नि ह्वे साको

Copyright @ Bhishma Kukreti  10/05/2013           
(लेख सर्वथा काल्पनिक  है )

गढ़वाली हास्य -व्यंग्य
सौज सौज मा मजाक मसखरी
हौंस,चबोड़,चखन्यौ 
सौज सौज मा गंभीर चर्चा ,छ्वीं
                           भौं भौं किस्मौ पौण (मेहमान )

                              चबोड़्या - चखन्यौर्या: भीष्म कुकरेती
(s = आधी अ )

  ब्यौ बरात्युं मा पौण, अतिथि मेहमान, मेमान बुलाण अर पौणु बरात या रिसेप्सन मा जाण आम बात च।
मेमानुं या पौणु कथगा इ जात होंद या बुले जावों तो पौण कथगा इ किस्मौ हूँदन। कुछ ख़ास किसमौ पौण इन बि हूँदन।
द्वारखुला पौण- द्वारखुला पौण  अगल्यारि मा हमेशा अगनै रौणै  आदत से मजबूर पौण हूँदन। इ हमेशा रिसेप्सन हाल /वेडिंग हौल मा घरात्यूं से पैलि पौंछि जांदन अर बेबातौ अफिक इंतजाम दिखण लगि जांदन।
घड़ी सुई से चलण वाळ पौण-  इ बिचारा समय का पाबन्द होंदन अर न्यूतो- पतड़ी (निमंत्रण पात्र) माँ लिख्युं हिसाब से  रिसेप्सन हाल मा पौंछि जांदन अर जब घराती द्वी तीन घंटा पैथर आंदन अर समय का पाबंद  मेहमान तै सुणान्दन की ' इंडिया मा समय पर कु आंद" तो इ समय का पाबन्द मेहमान बुलण मिसे जांदन बल इण्डिया विल नेवर प्रोग्रेस काउज दे नेवर अंडरस्टैंड द वैल्यू ऑफ टाइम।
 टिपोड़ी पौण- इ कैक बि ब्यौ मा जावन इख तलक कि अपण बेटी ब्यौ मा बि टिपोड़ मा रौंदन। टिपोड़ी मेमानुं मानण च बल अतिथि भगवान को दुसर रूप होंद तो इ लोग भगवान जन अपण खुट जमीन पर नि धरदन अर कैक दगड़ खां मा खां बात करण अपण बेजती समजदन। कुछ आदतन टिपोड़ी हूँदन कुछ समय क अनुसार अपण मुख पर टिपोड़ी भाव लाणा रौंदन।
फरफरट्या पौण- बस इ फर फर उर्जावान ह्वेक फर्र फर्र इना उना हॉल मा चलणा रौंदन।
इकअडसर्या पौण-  यि  पौणएक दै कैं जगा मा  बैठि जावन तो फिर वीं सीट पर अफिक फेविकोल लगि जांद अर मजाल च कि भ्यूंचळ आणो बाद बि सीट छ्वाड़न धौं!
रगरट्या पौण- यूँ पौणु तैं पता नी क्यांकु रगर्याट हुयुं रौंद धौं, न्यूत लिखाण, स्टेज पर ब्योलि-ब्योला तै आशीर्वाद दीण, खाणो खाण ह्वाओ या गुसलखाना मा फ्रेश हूण ह्वावो इ हमेशा जल्दबाजी मा रौंदन।
जुत दिखवा पौण- इन पौण अपण धन , धान्य  रूप या शानौ शौकत को प्रदर्शन  करण मा अग्वाडि रौंदन।
चिंता का ठेकेदार पौण-  इ हर समय बगैर आज्ञा लेकि घरात्यूं तरफान हौर लोगुं तैं चिंतित करदन। चिंता दिखाण अर दूसरों तैं अनावश्यक चिंता मा डाळण  ही यूंक एकमात्र काम होंद।
सरोता पौण- इन पौण हरेक चीज की हरेक से काट ही करणा रौंदन।
अहसान दिखांदर पौण- इन पौण हर समय घराती पर कुछ ना कुछ अहसान दिखाणा रौंदन अर बुलणा रौंदन मि त बस फलणो वजै से रिसेप्सन मा औं ...
थाळी चट्वा पौण-  यी पौण  आदतन देर से आंदन अर तब आंदन जब खाणक पीणक खतम ह्वे जांद अर तब बच्युं खुच्युं जो भी ह्वावो चाटी पूंछी खांदन।
भंडमजा पौण- यी बी आदतन लेट लतीफ होंदन अर तब आंदन जब कैटरर का आदिम भांड मंजाण शुरू कौरि दींदन अर यि आइसक्रीम या ठंडो पेय से काम चलांदन।
डुलेर पौण- इ आदतन ना जनम जाति लेट लतीफ हूँदन। यि तब आँदन जब बर -ब्योलि कार मा बैठि जांदन अर चलती कार मा  बर-ब्योलि तैं   अपण न्यूत पकडाँदन अर इन लगद कि यि पौण बार - ब्योलि ड्वाला उठणौ डुलेर ह्वावन               
 उन हौर तरां पौण बि  हूँदन पण इ जरा अलग किस्मौ पौण हूँदन।
एक बात बथावदी !  आप कैं श्रेणी मेहमान छंवाँ ?


Copyright @ Bhishma Kukreti  12/05/2013           
(लेख सर्वथा काल्पनिक  है )

सौज सौज मा गंभीर चर्चा ,छ्वीं 


                           चक्रवर्ती सम्राट अशोक कु राज माँ गढ़वाळम भाषा आन्दोलन   
                                        चबोड़्या - चखन्यौर्या: भीष्म कुकरेती
(s = आधी अ )
 
 श्रेणी संघ  महा नायक (फैक्ट्री/ गिल्ड सुपरवाइजर)  -हे सबि  सूणो पांच दिन उपरान्त प्रियदर्शनी, महानो माँ महान  चक्रवर्ती सम्राट अशोक को सहतरवां जनम दिन च अर वैदिन सरा जगा अवकाश रालो। तो तुम तैं तैदिन तलक सब आवश्यक काम निबटाण पोड़ल। अच्छा मि कालकूट (कालसी , चकरौता ) तरफां जाणु छौं उख बि अपणी श्रेणी धरमों ( व्यापारिक या फैक्ट्री गिल्ड ) मा  महान अशोक को जनम दिनों सुचना दीण। मेरो सहायक श्रेणी संघ  उपनायक तुम तैं बथाल कि पाटलिपुत्र का वास्ता , उज्जैन का वास्ता , अफघानिस्तान का वास्ता अर यूनान का वास्ता क्या क्या वस्तु  कै कै चीज पर बंधण।
एक श्रेणी संघ  भागीदार या कर्मचारी- यूँ श्रेणी धर्म महानायक मंडली  (निदेशक मंडली ) अर महानायक , नायकों (जनरल मैनेजर ) मजा छन। खेत हमर , जंगळ हमर,खेतुं-जंगळु   से लेकि सामान हम एकत्रित करवां , इख अणसाळ (फैक्ट्री ) मा  काम हम करदां अर मलाई खै जान्दन इ बणिया जु व्यापार संघ का नायक , महानायक अर निदेशक  बण्या छन। सब कुछ हमारो अर पुट लाभ (नेट प्रॉफिट ) मा हम भागीदारों अर बकै कर्मचार्युं हिस्सा बीस प्रतिका (प्रतिशत ) अर नायकों , महानायकों तैं मिलदो अस्सी प्रतिशत।
दुसर भागीदार या कर्मचारी -अरे हम कौरि बि क्या सकदवां जब बिटेन यि व्यापार श्रेणी संघ बणिन अर बणिक श्रेणी का लोगुं अधिकार व्यापारिक संघों पर ह्वे व्यक्तिगत व्यापार माँ घाटा ही घाटा अर जब बीतें मौर्या सम्राटों समौ पर विपणन अर वितरण मा संघोंकु एकाधिकार ह्वे हम सरीखा स्थानीय व्यक्तिवादी व्यापारियों कुदशा  शुरू ह्वे अर हम तै अपण  माल बिचणो बान  झक मारिक व्यापारी श्रेणी संघों सदस्य बणन पोड़। बुलणो हम भागीदार छंवा पण मलाई अर गुंदकी  तो निदेशकों पास ही रै जांदी।
तिसरू भागीदार - हम तैं एकी लाभ च बल हम तैं ,  माल वस्तु या बणयूँ  माल को वितरण अर विपणन की झंझट नि होंदि। ले स्यु ऐ ग्यायि अणसाळ  श्रेणी संघ को सहनायक ..
अणसाळ  श्रेणी संघ को सहनायक ( फैक्ट्री मैनेजर ) [एक लम्बो भोजपत्र या ताड़पत्र माँ देखिक ] - टक लगैक सूणो हाँ परस्यूं तलक सौ तुमड़ी शहद उज्जैन का वास्ता, द्वी सौ तुमड़ी पाटलिपुत्र का वास्ता, तीन सौ तुमड़ी गिरी याने जामनगर गुर्जर का वास्ता भरो अर तुमड्यू तैं मुंगरेटुं ढक्कन अर ठप्पा (सील ) लगै देन। इनि चमोली गढवाल बिटेन  जु भेषज (दवा )  अयीं छन वूं तैं पुडकी अर पितकों पर भरण , इ दवा यूनान अर देश माँ जालि। अर हजारेक दांतून पाटलिपुत्र का वास्ता बंधणन, इनि हजारेक हजारेक टिमरो दांतून दस जगा हौरि जाली। अच्छा हे बैसाखु ! तू पर्ण (पत्ता ) पर गढ़वाली भाषा मा यूँ सामनो विवरण लेखि दे हाँ अर फिर यूँ भागीदारों तैं अपणी भाषा मा बिंगाई दे !
बैशाखु - हाँ श्री
एक भागीदार -अणसाळ नायक श्री ! यी जु तुम ताड़ पत्र मा मगधी मा हमर अणसाळ (फैक्ट्री ) को हिसाब लिखदां तो आप गढ़वाळी भाषा मा ही लेखि दींदा अर हमारि भाषा माँ हम तैं बिंगांदा /समझांदा तो ठीक नि होंद।
 अणसाळ  श्रेणी संघ को सहनायक ( फैक्ट्री मैनेजर )- छि छि ! अरे गढ़वाळी भाषा बि भाषा ह्वे। भाषा ह्वे तो शेष्ठ जनों की मगधी पाली भाषा ।
एक भागीदार -कनो जब हम खस सम्राट को तौळ छया तो हमारी खस भाषा तैं जामनगर गुर्जर नि समझदा छा ? अरे म्यार पड़  ददा श्री अपण शहद जामनगर गुजरात तलक पंहुचांदा छा।
 अणसाळ  श्रेणी संघ को सहनायक ( फैक्ट्री मैनेजर)  - छि छि ! स्थानीय  भाषा की बात मेरी समणि नि कर्या करो।
 एक भागीदार - अणसाळ  नायक श्री ! जरा मै बथावो कि ये पदिका (मैना /माह ) मा मेरो हिसाब कथगा ह्वे?
अणसाळ  श्रेणी संघ को सहनायक ( फैक्ट्री मैनेजर)  - रवाँइ को माळु  पत्तळ बणाण अर  माळु टांटी , माळु रस्सी दीण वाळ  हुस्यारु को भाग ...ऊँ ऊँ उ . ये मैना को त्यार  भाग च  कुल जमा तीन हजार कहपणस (रुपया )।
हुस्यारु- नै नै म्यार हिसाब से मेरो भाग होंद चार हजार कहपणस (रुपया )।
अणसाळ  श्रेणी संघ को सहनायक ( फैक्ट्री मैनेजर)  - तो त्यार बुलणो मतबल च  मि असत्य बुलणु छौं। ले देखि लेदि अपण हिसाब
हुस्यारु - क्या देखि ल्यूं त्यार मगधी पाली मा लिख्युं हिसाब। मि तैं मगधी पाली बंचण आंद तो मि त्यार जगा अणसाळ  श्रेणी संघ को सहनायक ( फैक्ट्री मैनेजर)  या व्यापारी संघ को महानायक नि होंदु।
अणसाळ  श्रेणी संघ को सहनायक ( फैक्ट्री मैनेजर)  - त कैन रोकि छौ कि मगधी पाली नि सीख।
हुस्यारु - ए ले म्यार अपुण पर्ण (पत्ता ) मा रवांइनी  खस भाषा मा  हिसाब  लिख्युं च। अर म्यार हिसाबन मेरी भागीदारी  चार हजार  कहपणस (रुपया ) हुंदन।
अणसाळ  श्रेणी संघ को सहनायक ( फैक्ट्री मैनेजर)- मीन कथगा दें ब्वाल बि च कि मि निम्न श्रेणी की भाषा मा बचऴयाणम ही अपंणो अपमान समझदु तो निम्न श्रेणी भाषा मा लिखीं इबारत किलै पौढु ?
हुस्यारु - तो फिर न्याय कनकै होलु ?
 अणसाळ  श्रेणी संघ को सहनायक ( फैक्ट्री मैनेजर)- ठीक च तू अणसाळ  संघ को न्यायालय मा अबि चलि जा।
सबि - पण संघ न्यायालय हमारी खस भाषा मा लिख्युं तैं मान्यता ही नि दींदो अर न्यायाधीस बुलदो बल यदि हिसाब मगधी वा बि पाली प्राकृत भाषा मा  नि ह्वावो तो इन हिसाब किताबो विवादों की सुणवाइ होलि ही ना।
 अणसाळ  श्रेणी संघ को सहनायक ( फैक्ट्री मैनेजर)- न्यायालय ठीक बुलद, अणसाळु   हिसाब बि उच्च श्रेणी भाषा मा हि होण चयेंद। ऐरा गैरा , तुच्छ खस भासा को तो तिरस्कार  ही अति उत्तम च। मीम तुच्छ भाषा बाराम बात करणों समौ नी च मि यूनान अर सिंध देस से अयाँ व्यापारियों से मिलणो कालकूट  (कालसी ) जाणु छौं।
हुस्यारु - यी ,  महानायक , नायक , सहनायक  मगधी भाषा  मा गड़बड़ी करदन अर हमर खस भाषा माँ लिख्युं हिसाब तै झुटा साबित करदन।
सबि - अब हम बि क्या करां। हमर राजान चन्द्रगुप्त,  बिन्दुसार  अशोक को प्रांताधिकारी बणन स्वीकार कार तो हम तैं मगधी पाली भाषा को अधिपत्य स्वीकार  करण ही पोड़ल
भैर बीतें एक आवाज - भन्ते आणा छन, भन्ते आणा छन।
एक -अब ल्या ये बुद्ध सन्यासी क बकबास बि  सूणो।
दुसर - अरे नै नै सन्यासी बढ़िया सीख वळ बात सिखांदो।
तिसुर - ह्यां पण मगधी पाली की सेख हमर बिंगण मा आवो तब तो ठीक च।
सन्यासी आंद  अर प्रवचन शुरू करद -धम्मा साधु,कियम च ध्म्मे ति। अपासिनेव, बहु कयाने, दया दाने , सच,सौच्य। दिघा निकाय,कलनगामा,अपाव्यायाता अपा भादता ......संघम शरणम
सन्यासी सुणैक चली जांद।
सबि - चलो गरण चलि ग्यायी। यक्ष को सौं, घंटाकर्ण को सौं जु हमर समझ मा कुछ आयि धौं। राजकीय सन्यासी अपण कर्तव्य निभै ग्यायि। मगधी पाली मा कुछ बोलि गे अर फिर इन नि दिखुद कि हमर समझ मा आयि च कि ना .
एक -चलो रै  अपण काम कारो। अपण काम निबटैक   नितरस्युं कालकूट ( कालसी ) जौंला।
सबि - अरे उख जैक बि क्या करण। हमर खस राजाक समौ छौ तो उख हम मनोरंजन करी लीन्दा छा। हमारि खसणि, किरातण, टंगणन (भोटिया स्त्री ) नृत्य करदी छे अर हमारि भाषा मा गीत गाँदी छे। अब त मगधी पाली मा सूत्र वाच्य सूणो अर कालकूट को बड़ी पटाळ पर मगधी पाली भाषा मा लिखीं चक्रवर्ती सम्राट की आज्ञा तैं  रटो।
हुस्यारु - मगधी पाली भाषा क राज मा  हम निम्न श्रेणी का नागरिक ह्वे गेवाँ। जब तलक राज्यौ कामो मा  मगधी पाली को बोलबाला  नि छौ हम तैं हमर व्यापार को टुप  लाभ से से अस्सी प्रतिशत भागीदारी मिल्दि छे। जन जन राज्यौ काम मा मगधी पाली को अधिपत्य शुरू ह्वे हमर गणत निम्न श्रेणी नागरिकों मा हूंद गे अर हमर व्यापार मा लाभांस बि कम हूँद गे। भाषा की मान्यता से हमर समाज ही  हीण ह्वे गे।
एक - पण हम क्या कौर सकदां/
हुस्यारु - विद्रोह या असहयोग आन्दोलन !
सबि -यी क्या ह्वाइ/
हुस्यारू - बस हमर मांग च बल जु अणसाळ को काम धाम हमारी खस भाषा मा नि होलु अर अणसाळ न्यायालय मा खस भाषा तैं मान्यता नि मीलल तो हम सब अपण वस्तु व्यापारिक संघ तै नि बिचला।
सबि - क्या व्यापारिक संघ (गिल्ड ) हमारि बात मानि जालो?
हुस्यारु - नि मानल तो कालकूट (कालसी ) मा सब ब्यापार बंद ह्वे जालो
सबि -हाँ यु ठीक च। जा रै दुभाषिया बैसाखू  ! अपण श्रेष्ठी (बौस ) अणसाळ  श्रेणी संघ को सहनायक ( फैक्ट्री मैनेजर) तक रैबार पौंछे दे बल जु अणसाळ को काम मा अर व्यापारी संघ न्यायालय मा  खस भाषा तैं मान्यता नि मिल्दी तो हमन अपण सामन व्यापारी संघ (गिल्ड ) तैं नि बिचण ना ही अणसाळम काम करण।
दुभाषिया बैसाखू - द्याखो सोचि समजी ल्यावो हाँ। मगधी पाली तैं राजकीय परिश्रय मिल्युं च। ह्वे सकद च अणसाळ संघ राजकीय सैनिकों सहायता ले ल्यावो।
हुस्यारु - सैनिको से हम नि डरदां। उख मौर्यों अदा से जादा भाड़ा सैनिक बि त खस, किरात , भारद्वाज,  आत्रेयी ही छन। हम बि कुछ कम नि छंवां। फिर कालकूट (कालसी ) मध्य हिमालय को सबसे बडो निर्यात केंद्र च। हम सब पाटलिपुत्र से असहयोग करला तो हम से जादा हानि राज्य की होली
सबि - चलो अणसाळ का द्वार बंद कारो अर अब अणसाळ[फैक्ट्री ] मा काम तबी शुरू होलु जब हमारी खस भाषा मा लिख्युं हिसाब तैं सबि जगा मान्यता मीललि। अर कालकूट ( कालसी ) का सबि अणसाळ बंद कराणो चलो। सबि मागधी पाली को एकाधिकार से परेशान छ्न. सबि अणसाळ वाळुन  हमर दगुड दीण हि च ।     
सबि - जै खस दिव्ता. जै घंटाकरण दिब्ता .... जै खस भाषा !                           
         
 
       

 Copyright @ Bhishma Kukreti  14/05/2013           
(लेख सर्वथा काल्पनिक  है )

गढ़वाली हास्य -व्यंग्य
 सौज सौज मा मजाक मसखरी
   हौंस,चबोड़,चखन्यौ 
    सौज सौज मा गंभीर चर्चा ,छ्वीं 

                               विज्ञापन धर्मी राजनीति
               
                               चबोड़्या - चखन्यौर्या: भीष्म कुकरेती
(s = आधी अ )
 इना गाँवों सयाणोन दुसरो मुंडळम   जैक धै लगै बल अंक्वैक भैरों ! अंक्वैक!  सावधान भैरों! आम चुनाव नजीक हि छन।
उना स्वर्गलोकम महर्षि गर्ग अर ऊंको परम शिष्य याग्यवल्क्यम वार्तालाप हूणु थौ।
 याग्यवल्क्य-गुरु जी ! स्यु गांवक सयाणा गांवमा सबसे उच्चो अपण मुंडळ छोड़ि दुसरो मुंडळ बिटेन धै किलै लगाणु च? 
गर्ग -  पुत्र याग्यवल्क्य! वू कळजुगि  सयाणा  चतुर च, चंक च, चलाक च। अपण मुंडळो पठळ नि खपचावन यांक डौरन वु हमेशा दुसरौ मुंडळ मा जैक धै लगांदो       
याग्यवल्क्य- ज्ञानी गर्ग श्री ! आम चुनाव आणौ क्या क्या निसाणी छन? 
गर्ग -  जब जब टीवी चैनलों अर समाचार पत्रों मा सरकार को जन कल्याण सम्बन्धी विज्ञापनों ढांड पोड़ण शुरू ह्वे जावन तो वुद्धिमान लोग समजि लीन्दन बल आम चुनाव नजीक छन।   
याग्यवल्क्य-अच्छा अच्छा ! जन अच्काल मनमोहन सरकारौ जन कल्याण सम्बन्धी विज्ञापनों बबंडर चलणु च। 
गर्ग -तेरो सही आलकन च 
याग्यवल्क्य-प्रभु भूतकाल मा इन विज्ञापनुं भ्युंचळ,  भूचाल पैल  बि त ऐ होला कि ना?
गर्ग -  वत्स ! किलै ना! इन सरकारी विज्ञापन पैल बि आंदा छा अर आंदा राला
याग्यवल्क्य-जन कि ?
गर्ग - महान राजयोगी नरसिम्हा राव को समौ पर बि चुनाव से पैल सरकारी जन कल्याण कामों का  विज्ञापनु झड़ी  लगी छे। फ़िर महान राजधर्म मर्मज्ञ अटल विहारी वाजपेयी को राज मा चुनाव से कुछ दिन पैल इंडिया शाइनिंग का विज्ञापनों से भारत को असमान  ढकि गे छौ। राज्य स्तर पर बि इन विज्ञापनों भळक,बाढ़  आणा हि रौंदन। जन कि एक दें चुनाव से पैल महान पैतराबाज मुलायम सिंह यादव सरकार का विज्ञापनों तड़क्वणि, ढांड पोड़ी छौ ..     
याग्यवल्क्य-हाँ हाँ महर्षि ! याद आयि वो उत्तर प्रदेश सरकारी विज्ञापन केरल का स्थानीय समाचार पत्रों मा बि खूब छपी छौ अर वै विज्ञापन मा यीं सदी का महान नायक अमिताभ बच्चनन धै लगैक बोलि छौ कि मुलायम की सरकार मा उत्तर प्रदेश बिटेन अपराधूं निरबिजु ह्वे  गे, न्याय व्यवस्था से अपराध्युं  कुज्याण कख  हर्चंत ऐ गे धौं!
गर्ग -  हां वत्स! तू  सही स्मरण करणु छे अर उत्तर प्रदेसौ अरबो रुपया वै विज्ञापन पर खर्च ह्वे छौ। अमिताभ बच्चन की बड़ी भद्द पिटि छे कि इथगा बड़ो  महान नायक इथगा बड़ो झूठ बि बोलि सकुद।
याग्यवल्क्य-पण प्रभु ! क्या यूँ बड़ा बड़ा विज्ञापनों से महान राजयोगी नरसिम्हा  राव , महान राजधर्म मर्मग्य अटल विहारी या महान राजनीति को पैंतराबाज मुलायम सिंह यादव या दलितुं राजरानी मायवती चुनाव जीत छन? 
गर्ग - प्रिय ! नही ! सरकार को अरबों रुपया खर्च होण पर बि यूंकि पार्टी चुनाव हारी गे छे
याग्यवल्क्य- तो फिर यी राजनैतिक दल विज्ञापनों पर इथगा धन किलै खर्च करदन अर फिर यी विज्ञापन किलै असर नि डाळदन ?
गर्ग -  पुत्र भारतीय रानीतिज्ञोंन यदि शुक्र नीति पौढ़ी होंदी या महाभारत को भीष्म पर्व पौढ़ी होंद तो यूंक बिंगण /समज मा ऐ जान्दो बल विज्ञापन से उथगा फरक  नि पड़द जथगा यी राजनीतिग्य समजदन     
याग्यवल्क्य-प्रभो विज्ञापन से बड़ो हथियार क्वा च?
गर्ग - वत्स ! विज्ञापन से बडो सदावहार हथियार  च जन सम्पर्क को हथियार जै तैं पब्लिक रिलेसन हथियार  बि बोले जांद। शुक्र नीति को हिसाब से विज्ञापन वास्तव मा जन सम्पर्क तैं आधार दीणो काम करदो। जन कि महान चक्रवर्ती सम्राटन जनसम्पर्क तै आधार दीणो   बान  अभिलेख लिखैन। 
याग्यवल्क्य- हे ज्ञान भंडार ! तो आज का राजनीतिग्य जन कि मंमोहान सिंह जी आदि  अचूक , अमोघ , अतुलनीय, अमूल्य जन सम्पर्क हथियार किलै इस्तेमाल नि करदन?
गर्ग -  हे वत्स ! जब राजनीतिग्य  नेता लोक सभा चुनाव लड़णो जगा राज्यसभा को चुनाव लड़ण लगी जावन, जब एकाधिकार राजनीति पर  हावी ह्वे जावो अर राजनीतिज्ञ जनता से कटि जावन, नेता जनता से  दूर ह्वे जावन तो यि लोग जन सम्पर्क को मर्म नि पछ्याणदन अर  विज्ञापन  तैं ही सब कुछ समजण शुरू करी दीन्दन।
याग्यवल्क्य-प्रभो ! क्वी उदाहरण
गर्ग - प्रिय ! याद कर अबि सि हिमाचल प्रदेश का चुनाव ह्वेन अर वीर भद्र सिंह  का नेतृत्व मा कौंग्रेस चुनाव जीती गे।
याग्यवल्क्य-हाँ प्रभु ! जब कि वीर भद्र सिंह पर भ्रष्टाचार का कथगा ही अभियोग छा
गर्ग -  वत्स ! हिमाचल मा चुनावो से पैलौ माहौल याद कर जब कौंग्रेस की कमान राज्य सभा प्रेमी आनन्द शर्मा मा छे तो कौंग्रेस तैं बि लगि गे कि कौंग्रेस चुनाव नि जीति सकदन अर फिर वीर भद्र सिंह की सेवा लिए गे. वीर भद्र सिंह जन सम्पर्क को मर्मग्य छन। यही कारण च कि वीर भद्र सिंघन धुमाल को चक्रव्यूह को भेदन कार अर इखमा विज्ञापन ना बलकणम वीर भद्र सिंह को  जन सम्पर्क , जनता का साथ हमेशा एक सम्वाद ही काम आयि।
याग्यवल्क्य- नीतिग्य ! नीति शास्त्र मर्मग्य ! फिर यी नेता जनसम्पर्क हथियार से दूर किलै रौंदन
गर्ग -प्रिय शिष्य ! जब राजनीति जन उन्मुखी नि ह्वावो अर पद उन्मुखी याने जब राजनीति  कुर्सी उन्मुखी ह्वे जावो तो जन सम्पर्क पैथर छूटि जांद अर राजनीतिज्ञों  का केवल विज्ञापनों पर ही  सहारा ह्वे जांद।
याग्यवल्क्य-अर विज्ञापनों से यो जरूरी नी च कि माल बिक जावो
गर्ग -सत्य वचन वचन ! विज्ञापन सूचना  पौंछे सकद पण माल त जन सम्पर्क से ही बिचे सक्यांद।



Copyright @ Bhishma Kukreti  16/05/2013           
(लेख सर्वथा काल्पनिक  है )